പോപ്പുലര് ഫ്രണ്ട് ആഹ്വാനം ചെയ്ത മിന്നല് ഹര്ത്താലിലെ അക്രമ സംഭവങ്ങളില് നഷ്ടപരിഹാരം ഈടാക്കാന് ഉത്തരവിടാമെന്ന് ഹൈക്കോടതി ഡിവിഷന് ബെഞ്ച്. നഷ്ടപരിഹാരത്തുക കെട്ടിവച്ചേ ജാമ്യം നല്കാവൂ എന്ന് കോടതി നിര്ദേശിച്ചു. ഇക്കാര്യത്തില് എല്ലാ മജിസ്ട്രേട്ട് കോടതികള്ക്കും നിര്ദേശം നല്കുമെന്നും ഹൈക്കോടതി വ്യക്തമാക്കി. നഷ്ടപരിഹാരം ഈടാക്കാനാകാത്ത സാഹചര്യത്തില് സ്വത്തുക്കള് കണ്ടുകെട്ടല് അടക്കമുള്ള നടപടികള് സ്വീകരിക്കാമെന്നും കോടതി പറഞ്ഞു. ഹര്ത്താലില് ജനങ്ങള്ക്ക് ജീവിക്കാന് കഴിയാത്ത സാഹചര്യമെന്ന് ഡിവിഷന് ബെഞ്ച് നിരീക്ഷിച്ചു. പോപ്പുലര് ഫ്രണ്ട് സംസ്ഥാന സെക്രട്ടറി അബ്ദുള് സത്താറിനെ കേരളത്തിലെ മുഴുവന് കേസുകളിലും പ്രതിയാക്കാന് സര്ക്കാരിനോട് ഹൈക്കോടതി നിര്ദ്ദേശിച്ചു.പിഎഫ്ഐ ഹര്ത്താലുമായി ബന്ധപ്പെട്ട് സ്വമേധയാ എടുത്ത കേസിലാണ് ഹൈക്കോടതിയുടെ നിര്ദ്ദേശം.