latest news

കൊട്ടിയൂര്‍: ജനുവരി 26 ന് നടക്കുന്ന ചുവട് 2023 അയല്‍ക്കൂട്ട സംഗമത്തിന്റെ ഭാഗമായി കൊട്ടിയൂര്‍ ഗ്രാമ പഞ്ചായത്ത് കുടുംബശ്രീ സി.ഡി.എസിന്റെ നേതൃത്വത്തില്‍ വിളംബര ഘോഷയാത്ര സംഘടിപ്പിച്ചു. പഞ്ചായത്ത് പ്രസിഡന്റ് റോയി നമ്പുടാകം ഉദ്ഘാടനം ചെയ്തു. കൊട്ടിയൂര്‍ ക്ഷേത്ര പരിസരത്ത് നിന്നാരംഭിച്ച വിളംബര ഘോഷയാത്ര നീണ്ടുനോക്കിയില്‍ സമാപിച്ചു.സി.ഡി.എസ് ചെയര്‍പേഴ്‌സണ്‍ ബീന,പഞ്ചായത്ത് അംഗങ്ങള്‍ തുടങ്ങിയവര്‍ നേതൃത്വം നല്‍കി. തുടര്‍ന്ന് ഫ്‌ലാഷ് മോബും നടന്നു.

കേളകം: ജനുവരി 26 ന് നടക്കുന്ന ചുവട് 2023 അയല്‍ക്കൂട്ട സംഗമത്തിന്റെ ഭാഗമായി കേളകം ഗ്രാമ പഞ്ചായത്ത് കുടുംബശ്രീ സി.ഡി.എസിന്റെ നേതൃത്വത്തില്‍ വിളംബര ഘോഷയാത്ര സംഘടിപ്പിച്ചു. ഗ്രാമ പഞ്ചായത്ത് വൈസ് പ്രസിഡന്റ് തങ്കമ്മ മേലെക്കുറ്റ് ഉദ്ഘാടനം ചെയ്തു. കേളകം ഐശ്വര്യ ഓഡിറ്റോറിയം പരിസരത്ത് നിന്നാരംഭിച്ച വിളംബര ഘോഷയാത്ര കേളകം ബസ്റ്റാന്റില്‍ സമാപിച്ചു.സി.ഡി.എസ് ചെയര്‍ പേഴ്‌സണ്‍ രജനി പ്രശാന്ത്, പഞ്ചായത്ത് അംഗങ്ങള്‍ തുടങ്ങിയവര്‍ നേതൃത്വം നല്‍കി.

കൊട്ടിയൂര്‍: കുടുംബരോഗ്യകേന്ദ്രത്തിന്റയും കൊട്ടിയൂര്‍ ഗ്രാമപഞ്ചായത്തിന്റെയും ആഭിമുഖ്യത്തില്‍ പഞ്ചായത്തിലെ വ്യാപാരികള്‍ക്കുള്ള ഭക്ഷ്യസുരക്ഷയെക്കുറിച്ചു പരിശീലനവും ലഖുലേഖ പ്രകാശനവും നടത്തി. ഗ്രാമപഞ്ചായത്ത് ഹാളില്‍ വെച്ച് നടന്ന യോഗത്തില്‍ മെഡിക്കല്‍ ഓഫീസര്‍ ഡോ. സരുണ്‍ ഘോഷ് പ്രസിഡന്റ് റോയ് നമ്പുടകത്തിന് നല്‍കി കൊണ്ട് ലഖുലേഖ പ്രകാശനം ചെയ്തു. മെഡിക്കല്‍ ഓഫീസര്‍ ഡോ. സരുണ്‍ഘോഷ്, ഹെല്‍ത്ത് ഇന്‍സ്പെക്ടര്‍ ടി. എ ജെയ്‌സണ്‍ എന്നിവര്‍ വിഷയവതരണം നടത്തി.പഞ്ചായത്ത് ഭരണാസമിതി അംഗങ്ങള്‍, വ്യാപാരം സംഘടന പ്രതിനിധികള്‍ എന്നിവര്‍ പങ്കെടുത്തു.

പേരാവൂര്‍: സ്ത്രീകള്‍ക്കെതിരായ അതിക്രമങ്ങള്‍ക്കും ലിംഗ വിവേചനങ്ങള്‍ക്കും എതിരെ നടക്കുന്ന ഓറഞ്ച് ദ വേള്‍ഡ് ക്യാമ്പെയിനിന്റെ ഭാഗമായി വനിത ശിശുവികസന വകുപ്പ്,ഐസിഡിഎസ്,പേരാവൂര്‍ ഗ്രാമ പഞ്ചായത്ത് കുടുംബശ്രീ എന്നിവയുടെ സംയുക്താഭിമുഖ്യത്തില്‍ പേരാവൂരില്‍ രാത്രി നടത്തം സംഘടിപ്പിച്ചു. പേരാവൂര്‍ പഞ്ചായത്ത് പ്രസിഡന്റ് പി പി വേണുഗോപാലന്‍ ഉദ്ഘാടനം ചെയ്തു. വൈസ് പ്രസിഡന്റ് നിഷ ബാലകൃഷ്ണന്‍ അധ്യക്ഷത വഹിച്ചു.ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ റീന മനോഹരന്‍,പഞ്ചായത്ത് അംഗങ്ങളായ നൂറുദ്ദീന്‍ മുള്ളേരിക്കല്‍,അനില്‍കുമാര്‍,ഐസിഡിഎസ് സൂപ്പര്‍വൈസര്‍,സിഡിഎസ് ചെയര്‍പേഴ്സണ്‍ ഷാനി,അംഗനവാടി വര്‍ക്കര്‍മാര്‍,ഹെല്‍പ്പര്‍മാര്‍,കുടുംബശ്രീ പ്രവര്‍ത്തകര്‍ എന്നിവര്‍ സംബന്ധിച്ചു.

രണ്ടു മാസം മുമ്പ് റോഡിലിറങ്ങിയ ആനയെ ശകാരിച്ച് വിരട്ടിയോടിച്ച് വൈറലായ ദേവികുളം ഫോറസ്റ്റ് റെയ്ഞ്ച് ഓഫീസിലെ വാച്ചര്‍ ശക്തിവേലാണ് ഇന്ന് രാവിലെ ഇടുക്കി ശാന്തന്‍പാറയില്‍ കാട്ടാന ആക്രമണത്തില്‍ കൊല്ലപ്പെട്ടത്.

പന്നിയാര്‍ എസ്റ്റേറ്റില്‍ എത്തിയ കാട്ടാനകൂട്ടത്തെ ഓടിക്കാന്‍ എത്തിയതായിരുന്നു ശക്തിവേല്‍. കാട്ടാനക്കൂട്ടം ഇറങ്ങുമ്പോഴൊക്കെ ജനങ്ങള്‍ക്ക് രക്ഷകനായി എത്തിയിരുന്ന ആളായിരുന്നു ശക്തിവേല്‍.

ദിവസങ്ങളായി പന്നിയാര്‍ എസ്റ്റേറ്റില്‍ കാട്ടാന ശല്യം രൂക്ഷമായിരുന്നു. തേയിലക്കാട്ടില്‍ മൂന്ന് ആനകള്‍ നില്‍ക്കുന്നതായി തൊഴിലാളികള്‍ ഇന്ന് പുലര്‍ച്ചെ ശക്തിവേലിനെ അറിയിച്ചു. കാട്ടാനകള്‍ എത്തുമ്പോഴൊക്കെ രക്ഷകനാകാറുള്ള ശക്തിവേല്‍ മടിക്കാതെ തേയിലക്കാട്ടിലേക്ക് കയറി. മൂടല്‍ മഞ്ഞ് കാരണം ആനകളെ കാണാനാകാതെ മുന്നില്‍ ചെന്നുപെട്ടു എന്നാണ് പ്രാഥമിക നിഗമനം. ഏറെ നേരം കഴിഞ്ഞിട്ടും ശക്തിവേല്‍ തിരിച്ച് എത്താതായപ്പോള്‍ നാട്ടുകാരും ബന്ധുക്കളും തെരച്ചില്‍ തുടങ്ങി. ഒടുവില്‍ തേയിലക്കാട്ടിനുള്ളില്‍ ആനകള്‍ ആക്രമിച്ച് കൊലപ്പെടുത്തിയ നിലയില്‍ ശക്തിവേലിന്റെ മൃതദേഹം കണ്ടെത്തി. വര്‍ഷങ്ങളായി കാട്ടാനകളുമായി ഇടപഴകിയിരുന്ന ശക്തിവേലിന്റെ മരണം ബന്ധുക്കള്‍ക്കും നാട്ടുകാര്‍ക്കും അവിശ്വസനീയമായി.

സംസ്ഥാനത്ത് കോവിഡ് കേസുകള്‍ കുറഞ്ഞു വരുന്ന സാഹചര്യത്തില്‍ ഡെഡ് ബോഡി മാനേജ്മെന്റ് മാര്‍ഗനിര്‍ദേശങ്ങള്‍ പുതുക്കിയതായി മന്ത്രി വീണാ ജോര്‍ജ് അറിയിച്ചു. പോസ്റ്റ്മോര്‍ട്ടത്തിന് മുമ്പുള്ള നിര്‍ബന്ധിത കോവിഡ് പരിശോധന ഒഴിവാക്കി. മരണം കോവിഡ് ബാധയെ തുടര്‍ന്നാണെന്ന് ശക്തമായ ക്ലിനിക്കല്‍ സംശയം തോന്നിയാല്‍ റാപ്പിഡ് ആന്റിജന്‍ ടെസ്റ്റ് മതിയാകും. പോസ്റ്റ്മോര്‍ട്ടം സമയത്ത് എല്ലാ ആരോഗ്യ പ്രവര്‍ത്തകരും പിപിഇ കിറ്റ്, എന്‍ 95 മാസ്‌ക്, രണ്ട് ഗ്ലൗസ്, ഫേസ് ഷീല്‍ഡ് തുടങ്ങിയ അടിസ്ഥാന മുന്‍കരുതലുകള്‍ സ്വീകരിക്കണമെന്നും പുതിയ മാര്‍ഗനിര്‍ദ്ദേശത്തില്‍ പറയുന്നു.

കോവിഡ് ബാധിച്ച് മരണപ്പെട്ട വ്യക്തികളുടെ മൃതദേഹം കുളിപ്പിക്കുകയാണെങ്കില്‍ രോഗം പകരാതിരിക്കാന്‍ കോവിഡ് മാര്‍ഗനിര്‍ദേശങ്ങള്‍ കൃത്യമായി പാലിക്കണം. മൃതദേഹം കുളിപ്പിക്കുക, വൃത്തിയാക്കുക, വസ്ത്രം ധരിപ്പിക്കുക, മുടി വൃത്തിയാക്കുക, ഷേവ് ചെയ്യുക, നഖങ്ങള്‍ മുറിയ്ക്കുക തുടങ്ങിയവ ചെയ്യുന്നവര്‍ കയ്യുറ, ഫേസ് ഷീല്‍ഡ്/ കണ്ണട, മെഡിക്കല്‍ മാസ്‌ക് എന്നിവ ധരിക്കണം. എന്‍ 95 മാസ്‌ക് ധരിക്കുന്നത് അഭികാമ്യം. നീളത്തില്‍ കൈയ്യുള്ള വസ്ത്രം ധരിക്കുകയും നടപടി ക്രമങ്ങള്‍ക്ക് ശേഷം ഉടനടി വസ്ത്രം നീക്കം ചെയ്യുകയും സോപ്പുപയോഗിച്ച് കഴുകുകയും ചെയ്യണം.

കാട്ടാനയുടെ ആക്രമണത്തില്‍ രണ്ട് പേര്‍ക്ക് പരിക്ക്. വയനാട് ചേകാടിയിലാണ് സംഭവം. വിലങ്ങാടി കോളനിയിലെ ബാലന്‍, സഹോദരന്‍ സുകുമാരന്‍ എന്നിവര്‍ക്കാണ് പരിക്കേറ്റത്. പിതാവിന്റ മൃതദേഹം മറവു ചെയ്യാന്‍ കാട്ടിനകത്തെ ശ്മശാനത്തില്‍ കുഴിയെടുക്കുകയായിരുന്നു ഇരുവരും. ഈ സമയത്താണ് കാട്ടാന ആക്രമിച്ചത്. ഇരുവരെയും വയനാട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

ഇടുക്കി ശാന്തന്‍പാറയില്‍ കാട്ടാന ആക്രമണത്തില്‍ വനം വകുപ്പ് വാച്ചര്‍ കൊല്ലപ്പെട്ടതിന് പിന്നാലെയാണ് വയനാട്ടിലും കാട്ടാന ആക്രമണം ഉണ്ടായത്.

ഇടുക്കി ശാന്തന്‍പാറയില്‍ കാട്ടാന ആക്രമണത്തില്‍ വനം വകുപ്പ് വാച്ചര്‍ കൊല്ലപ്പെട്ടത് വേദനാജനകമെന്ന് വനം മന്ത്രി എകെ ശശീന്ദ്രന്‍. വനംവകുപ്പ് ഉദ്യോഗസ്ഥര്‍ക്ക് കൂടുതല്‍ സുരക്ഷയൊരുക്കുമെന്ന് അദ്ദേഹം പറഞ്ഞു. കുടുംബത്തിന് ആനുകൂല്യങ്ങള്‍ നല്‍കും. സുരക്ഷാ ഉദ്യോഗസ്ഥര്‍ക്ക് കൂടുതല്‍ പരിശീലനം നല്‍കും. കൂടുതല്‍ ഉദ്യോഗസ്ഥരെ നിയമിക്കുമെന്നും അദ്ദേഹം പറഞ്ഞു.

ശാന്തന്‍പാറ പന്നിയാര്‍ എസ്റ്റേറ്റ് അയ്യപ്പന്‍കുടി സ്വാദേശിയ ശക്തിവേല്‍ ആണ് കൊല്ലപ്പെട്ടത്. രാവിലെ ഏഴ് മണിയോടെയാണ് കാട്ടാന ആക്രമണം ഉണ്ടായത്. പന്നിയാര്‍ എസ്റ്റേറ്റില്‍ എത്തിയ കാട്ടാനകൂട്ടത്തെ ഓടിക്കാന്‍ എത്തിയതായിരുന്നു ശക്തിവേല്‍.

വാച്ചര്‍ കൊല്ലപ്പെട്ടതോടെ ആളുകള്‍ പ്രതിഷേധിച്ചു. കഴിഞ്ഞ കുറേ നാളുകളായി ഇവിടെ കാട്ടാന ആക്രമണം ശക്തമാണ്. ആക്രമണത്തില്‍ വനംവകുപ്പ് നടപടിയൊന്നും എടുക്കുന്നില്ല എന്ന് ആളുകള്‍ കുറ്റപ്പെടുത്തി.

കിളിയന്തറ: സെന്റ് തോമസ് ഹയര്‍ സെക്കന്‍ഡറി സ്‌കൂള്‍ വാര്‍ഷികാഘോഷവും പ്രിന്‍സിപ്പാള്‍ സെലസ്റ്റിന്‍ ജോണിനുള്ള യാത്രയയപ്പും അഡ്വ. സണ്ണി ജോസഫ് എംഎല്‍എ ഉദ്ഘാടനം ചെയ്തു. തലശ്ശേരി അതിരൂപത വികാരി ജനറാള്‍ ഫാ.ആന്റണി മുതുകുന്നേല്‍ അധ്യക്ഷത വഹിച്ചു. കോര്‍പ്പറേറ്റ് മാനേജര്‍ ഫാ. മാത്യു ശാസ്താംപടവില്‍ ഉപഹാര സമര്‍പ്പണം നടത്തി. സ്‌കൂള്‍ മാനേജര്‍ ഫാ.തോമസ് തയ്യില്‍, പി.കെ.ബാബു, കെ.ജി.സിനി, പായം പഞ്ചായത്ത് അംഗംഅനില്‍ എം. കൃഷ്ണന്‍, സിനി ആര്‍ട്ടിസ്റ്റ് നിവേദ് കൃഷ്ണന്‍, ഹൈസ്‌കൂള്‍ പ്രധാനാധ്യാപിക ഷൈനി വി. സിറിയക്, പിടിഎ പ്രസിഡന്റ് പി.എന്‍ സുരേഷ്, മദര്‍ പിടിഎ പ്രസിഡന്റ് രാധാമണി, സ്‌കൂള്‍ ചെയര്‍മാന്‍ അനസ്റ്റിന്‍ ജോര്‍ജ്, എം.ജെ.വിനോദ എന്നിവര്‍ സംസാരിച്ചു. വിദ്യാര്‍ത്ഥികളുടെ വിവിധ കലാപരിപാടികളും നടന്നു.

പടിക്കച്ചാല്‍: തില്ലങ്കേരി ഗ്രാമപഞ്ചായത്ത് 2022-23 വാര്‍ഷിക പദ്ധതിയില്‍ ഉള്‍പ്പെടുത്തി പടിക്കച്ചാല്‍ ഈയ്യം ബോഡില്‍ നീന്തല്‍ പരിശീലനം ആരംഭിച്ചു. തില്ലങ്കേരി ഗ്രാമപഞ്ചായത്ത് വൈസ് പ്രസിഡണ്ട് അണിയേരി ചന്ദ്രന്‍ ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ വി.വിമല അധ്യക്ഷത വഹിച്ചു. വാര്‍ഡ് അംഗം എന്‍.മനോജ്, ശ്രീകുമാര്‍ മാസ്റ്റര്‍, ആഷ ടീച്ചര്‍, ഷിംല കെ, ബാബു ഈയ്യം ബോഡ്, രാജീവന്‍ തുടങ്ങിയവര്‍ സംസാരിച്ചു.