latest news

കണ്ണൂര്‍:കൈത്തറി മേഖലയിലെ ഉല്‍പാദന ചെലവ് കുറക്കാനുള്ള നിര്‍ദേശങ്ങള്‍ സര്‍ക്കാരിനെ അറിയിക്കുമെന്ന് വിദഗ്ധ സമിതി. കൈത്തറി മേഖല നേരിടുന്ന പ്രതിസന്ധി പഠിക്കാനും പ്രശ്ന പരിഹാരം നിര്‍ദേശിക്കാനും സര്‍ക്കാര്‍ നിയോഗിച്ച സംഘം ജില്ലയില്‍ കൈത്തറി സംഘങ്ങള്‍ സന്ദര്‍ശിച്ച ശേഷമാണ് ഇക്കാര്യം അറിയിച്ചത്.കൈത്തറി മേഖലയുടെ സുസ്ഥിര വികസനമാണ് ലക്ഷ്യം. അതിനായി നിലവിലെ ചില പദ്ധതികളില്‍ ഉള്‍പ്പടെ ആവശ്യമായ മാറ്റം വരുത്തേണ്ടി വരും. ഉല്‍പാദന ചെലവ് കൂടുന്നതാണ് ലാഭം കുറയാനുള്ള പ്രധാന കാരണം. അതിനാല്‍ ആധുനിക സങ്കേതിക വിദ്യകള്‍ ഉപയോഗിച്ച് ഉല്‍പാദന ചെലവ് കുറക്കാനുള്ള മാര്‍ഗങ്ങള്‍ സമിതി സര്‍ക്കാരിനെ അറിയിക്കും. ചെലവ് കുറയുമ്പോള്‍ വിപണിയില്‍ മറ്റ് ഉല്‍പ്പന്നങ്ങളുമായി മത്സരിക്കാനാകും. വിപണി കീഴടക്കാന്‍ വൈവിധ്യപൂര്‍ണമായ ശ്രമങ്ങള്‍ സംഘങ്ങളുടെ ഭാഗത്തു നിന്നും ഉണ്ടാകണം. ഓണം, ക്രിസ്തുമസ്, വിഷു തുടങ്ങിയ സീസണുകളിലാണ് കൂടുതലായും വില്‍പ്പന നടത്തുന്നത്. പകരം എല്ലാ സമയത്തും മെച്ചപ്പെട്ട വ്യാപാരം ഉണ്ടാക്കാനാകണം. വിദേശ രാജ്യങ്ങളില്‍ കൈത്തറിക്ക് മികച്ച സ്വീകാര്യതയുണ്ട്. കൈ കൊണ്ട് ഉണ്ടാക്കുന്ന ഉല്‍പ്പന്നങ്ങള്‍ക്ക് ലോകത്താകെ ആവശ്യക്കാര്‍ ഏറെയാണ്. അതിനാല്‍ കയറ്റുമതി വര്‍ധിപ്പിക്കാനുള്ള നിര്‍ദേശങ്ങളും സര്‍ക്കാരിലേക്ക് സമര്‍പ്പിക്കുമെന്ന് സമിതി അംഗങ്ങള്‍ വ്യക്തമാക്കി.
സംസ്ഥാന ഹാന്‍ഡ്‌ലൂം ഡയറക്ടര്‍ കെ എസ് അനില്‍കുമാര്‍, ഹാന്‍ടെക്‌സ് പ്രസിഡണ്ട് കെ മനോഹരന്‍, മുന്‍ ഹാന്‍ഡ്‌ലൂം ഡയറക്ടര്‍ കെ എസ് പ്രദീപ്കുമാര്‍, കോഴിക്കോട് ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാനേജ്മെന്റിലെ അക്കാദമിക് പ്രതിനിധി പ്രൊഫ. ആനന്ദക്കുട്ടന്‍ ഉണ്ണിത്താന്‍, നാഷണല്‍ ഇന്‍സ്റ്റിറ്റ്യൂട്ട് ഓഫ് ഫാഷന്‍ ടെക്നോളജി അസി. പ്രൊഫസര്‍ പി ആര്‍ ദിവ്യ, കണ്ണൂര്‍ വീവേഴ്സ് സര്‍വീസ് സെന്റര്‍ ഡെപ്യൂട്ടി ഡയറക്ടര്‍ എസ് ടി സുബ്രഹ്മണ്യന്‍ എന്നിവരാണ് സമിതിയിലുള്ളത്.
കണ്ണൂര്‍ കെടിഡിസി ലൂം ലാന്‍ഡ് ഹോട്ടലില്‍ നടന്ന കൂടിക്കാഴ്ചയില്‍ കാസര്‍കോട്, കണ്ണൂര്‍, വയനാട്, കോഴിക്കോട് ജില്ലകളിലെ കൈത്തറി സംഘങ്ങള്‍, കണ്ണൂര്‍ ഹാന്റ് വീവ്, കൈത്തറി കയറ്റുമതിക്കാര്‍, കണ്ണൂര്‍ ഐ ഐ എച്ച് ടി, ജില്ലാ കൈത്തറി വികസന സമിതി തുങ്ങിയവയുടെ പ്രതിനിധികള്‍ പങ്കെടുത്തു. ഇവരുടെ പ്രശ്‌നങ്ങളും അഭിപ്രായങ്ങളും സമിതിയെ അറിയിച്ചു. മുഴുവന്‍ കാര്യങ്ങളും സര്‍ക്കാരിലേക്ക് സമര്‍പ്പിക്കുന്ന റിപ്പോര്‍ട്ടില്‍ ഉള്‍പ്പെടുത്തുമെന്ന് സംഘം അറിയിച്ചു. ജില്ലാ വ്യവസായ കേന്ദ്രം ജനറല്‍ മാനേജര്‍ എ എസ് ഷിറാസ് സംസാരിച്ചു. വ്യാഴാഴ്ചയാണ് വിദഗ്ധ സമിതി ജില്ലയിലെ വിവിധ കൈത്തറി സംഘങ്ങള്‍ സന്ദര്‍ശിച്ചത്.

ആറളം: ലിംഗാധിഷ്ഠിത അതിക്രമങ്ങള്‍ക്കെതിരെ കുടുംബശ്രീ മിഷന്‍ ആരംഭിച്ച ജെന്‍ഡര്‍ ക്യാമ്പയിന്‍ നയി ചേതനയുടെ ആറളം പഞ്ചായത്ത് തല ഉദ്ഘാടനം ഗ്രാമപഞ്ചായത്ത് പ്രസിഡന്റ് കെ പി രാജേഷ് നിര്‍വഹിച്ചു.വര്‍ധിച്ചു വരുന്ന അതിക്രമങ്ങള്‍ സ്ത്രീകള്‍ സഹിക്കേണ്ടതില്ലെന്നും പ്രതികരിച്ചു മുന്നോട്ടു പോകണമെന്ന് കാലഘട്ടം ആവശ്യപ്പെടുന്ന മുദ്രാവാക്യമാണ് കുടുംബശ്രീ ജന്‍ഡര്‍ ക്യാമ്പയിനിലൂടെ മുന്നോട്ട് വെക്കുന്നതെന്നും പ്രസിഡന്റ് പറഞ്ഞു.തുടര്‍ന്നു കുടുംബശ്രീ അംഗങ്ങള്‍ക്കായി ജന്‍ഡര്‍ അവബോധ ക്ലാസ്സ് സംഘടിപ്പിച്ചു. ജന്‍ഡര്‍ ജില്ലാ പ്രോഗ്രാം മാനേജര്‍ നൈല്‍ കെ എന്‍ ക്ലാസെടുത്തു. അതിക്രമങ്ങള്‍ക്കെതിരെ കുടുംബശ്രീ പ്രവര്‍ത്തകര്‍ സിഗ്നേച്ചര്‍ ക്യാമ്പയിനും, സി ഡി എസ് തല റാലിയും സംഘടിപ്പിച്ചു. വൈസ് പ്രസിഡന്റ് ജെസിമോള്‍ കെ ജെ അധ്യക്ഷത വഹിച്ചു.സി ഡി എസ് ചെയര്‍പേഴ്സണ്‍ ,കമ്മ്യൂണിറ്റി കൗണ്‍സിലര്‍ ശ്രുതി എം എസ് എന്നിവര്‍ സംസാരിച്ചു.

കൊട്ടിയൂര്‍: പാല്‍ച്ചുരത്ത് കാറിന്റെ ബ്രേക്ക് നഷ്ടപ്പെട്ട് മിനി ലോറിയിലിടിച്ച് അപകടം.ഒരാള്‍ക്ക് പരിക്ക്.കാറിലെ യാത്രക്കാരിയായ തില്ലങ്കേരി പള്ള്യം സ്വദേശിനി ഷീമയ്ക്കാണ് നിസാര പരിക്കേറ്റത്.ഷീമയെ പേരാവൂര്‍ താലൂക്കാശുപത്രിയില്‍ പ്രവേശിപ്പിച്ചു.വെള്ളിയാഴ്ച ഒരു മണിയോടെയായിരുന്നു അപകടം. തിരുനെല്ലി ക്ഷേത്ര ദര്‍ശനം കഴിഞ്ഞ് മടങ്ങിയ തില്ലങ്കേരി പളള്യം സ്വദേശികള്‍ സഞ്ചരിച്ച കാറാണ് പാല്‍ച്ചുരം മാതാവിന്റെ ഗ്രോട്ടേയ്ക്ക് സമീപം വെച്ച് ബ്രേക്ക് നഷ്ട്ടപ്പെട്ട് ചെങ്കല്‍ കയറ്റി പോവുകയായിരുന്ന ലോറിയില്‍ ഇടിച്ചത്.

തൊണ്ടിയില്‍: എം.എസ് ഗോള്‍ഡിന്റെ ഗോള്‍വണ്ടി തൊണ്ടിയില്‍ സെന്റ് ജോണ്‍സ് യുപി സ്‌കൂളില്‍ എത്തി. വിവിധ രാജ്യങ്ങളുടെ ജേഴ്സി അണിഞ്ഞെത്തിയ വിദ്യാര്‍ത്ഥികള്‍ ഗോളടിച്ചു. പ്രധാനാധ്യാപിക സൂസമ്മ,പിടിഎ പ്രസിഡന്റ് തങ്കച്ചന്‍ കോക്കാട്ട് എന്നിവര്‍ നേതൃത്വം നല്‍കി.

കോഴിക്കോട് മെഡിക്കല്‍ കോളേജില്‍ യോഗ്യതയില്ലാത്ത വിദ്യാര്‍ത്ഥിനി എംബിബിഎസ് ക്ലാസില്‍.പ്രവേശന പരീക്ഷ യോഗ്യത പോലും ഇല്ലാതെ പ്ലസ് ടു വിദ്യാര്‍ത്ഥിനി ക്ലാസിലിരുന്നത് നാല് ദിവസമാണ്. അധ്യാപകരും സഹപാഠികളും അറിഞ്ഞില്ല. സംഭവം അറിഞ്ഞത് ഹാജര്‍ പരിശോധിച്ചപ്പോഴാണ്. സംഭവത്തില്‍ മെഡിക്കല്‍ കോളജ് പ്രിന്‍സിപ്പല്‍ പരാതി നല്‍കി.

കോഴിക്കോട് മെഡിക്കല്‍ കോളേജില്‍ നവംബര്‍ 29ന് ഒന്നാം വര്‍ഷ ക്ലാസ് തുടങ്ങിയിരുന്നു. 245 പേര്‍ക്കാണ് പ്രവേശനം ലഭിച്ചത്. ഇതിന് പുറമെയാണ് പ്ലസ് ടു വിദ്യാര്‍ത്ഥിനി കടന്നുകൂടിയത്. വിദ്യാര്‍ത്ഥികളുടെ പ്രവേശന പട്ടികയില്‍ പേരില്ലെങ്കിലും ഹാജര്‍ പട്ടികയില്‍ കുട്ടിയുടെ പേര് വന്നത് ദുരൂഹമാണെന്ന് പൊലീസ് പറയുന്നു. വിദ്യാര്‍ത്ഥി മലപ്പുറം സ്വദേശിനിയാണ്.

സംസ്ഥാനത്ത് ഇന്ന് സ്വര്‍ണവില ഉയര്‍ന്നു. ഇന്നലെ മാറ്റമില്ലാതെ തുടര്‍ന്ന സ്വര്‍ണവിലയാണ് ഇന്ന് കൂടിയത്. ഒരു പവന്‍ സ്വര്‍ണത്തിന് 200 രൂപയാണ് ഇന്ന് വര്‍ദ്ധിച്ചത്. ബുധനാഴ്ച ഒരു പവന്‍ സ്വര്‍ണത്തിന് 160 രൂപ ഉയര്‍ന്നിരുന്നു. 40000 ത്തിനോട് അടുക്കുകയാണ് സംസ്ഥാനത്ത് സ്വര്‍ണവില. ഒരു പവന്‍ സ്വര്‍ണത്തിന്റെ ഇന്നത്തെ വിപണി വില 39800 രൂപയാണ്.

ഒരു ഗ്രാം 22 കാരറ്റ് സ്വര്‍ണത്തിന്റെ വില 25 രൂപ ഉയര്‍ന്നു. വിപണിയില്‍ ഇന്നത്തെ വില 4975 രൂപയാണ്. ഒരു ഗ്രാം 18 കാരറ്റ് സ്വര്‍ണത്തിന്റെ വില 20 രൂപ ഉയര്‍ന്നു. വിപണിയിലെ വില 4115 രൂപയാണ്.

പാറശാല ഷാരോണ്‍ രാജ് വധക്കേസില്‍ മുഖ്യപ്രതി ഗ്രീഷ്മ മൊഴിമാറ്റി. കുറ്റസമ്മതം ക്രൈം ബ്രാഞ്ചിന്റെ സമ്മര്‍ദ്ദം മൂലമെന്നാണ് ഗ്രീഷ്മയുടെ രഹസ്യമൊഴി. അമ്മയെയും അമ്മാവനെയും ഒഴിവാക്കാമെന്ന് ക്രൈം ബ്രാഞ്ച് ഉദ്യോഗസ്ഥര്‍ പറഞ്ഞുവെന്നും ഇത് വിശ്വസിച്ചാണ് കുറ്റമേറ്റതെന്നുമാണ് പുതിയ മൊഴി. നെയ്യാറ്റിന്‍കര കോടതിയിലെ രണ്ടാം ക്ലാസ് മജിസ്‌ട്രേറ്റ് വിനോദ് ബാബുവിന് മുന്നിലാണ് മൊഴി നല്‍കിയത്.

രഹസ്യമൊഴി പെന്‍ ക്യാമറയില്‍ കോടതി പകര്‍ത്തിയിട്ടുണ്ട്. പലതവണ ജ്യൂസില്‍ കീടനാശിനി കലര്‍ത്തി നല്‍കിയതായി ഗ്രീഷ്മ കേസ് അന്വേഷിക്കുന്ന ജില്ലാ ക്രൈം ബ്രാഞ്ചിന് മൊഴി നല്‍കിയിരുന്നു. ഇതെല്ലാം നിഷേധിക്കുന്ന തരത്തിലാണ് പുതിയ മൊഴിയെന്നതും ശ്രദ്ധേയമാണ്. ചോദ്യം ചെയ്യലിന്റെ ആദ്യ ദിനം തന്നെ ഗ്രീഷ്മ കുറ്റം സമ്മതിക്കുകയായിരുന്നുവെന്നാണ് പൊലീസ് പറഞ്ഞത്. വേറെ വിവാഹം ഉറപ്പിച്ചപ്പോള്‍ ഷാരോണിനെ ഒഴിവാക്കാനായി കഷായത്തില്‍ വിഷം കലര്‍ത്തിയെന്നാണ് പെണ്‍കുട്ടി പൊലീസിനോട് സമ്മതിച്ചത്. ഇപ്പോഴത്തെ മൊഴി ഇതില്‍ നിന്നും തീര്‍ത്തും വ്യത്യസ്തമാണ്.

മാടായി: എരിപുരത്ത് വെച്ച് നടന്ന ജില്ലാ കേരളോത്സവത്തിന്റെ വനിതാ ഷട്ടില്‍ ബാഡ്മിന്റണ്‍ ഡബിള്‍സ് വിഭാഗത്തില്‍ പേരാവൂര്‍ ബ്ലോക്കിനെ പ്രതിനിധീകരിച്ച കേളകം ഗ്രാമപഞ്ചായത്തിലെ മഹിമയ്ക്കും ബിന്റുവിനും രണ്ടാം സ്ഥാനം. ഫൈനലില്‍ തളിപ്പറമ്പ് ബ്ലോക്ക് പഞ്ചായത്തിനെ പരാജയപ്പെടുത്തി. ജില്ലാ പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ അഡ്വ. കെ കെ രത്‌നകുമാരി സമ്മാനവിതരണം നടത്തി.

പേരാവൂര്‍: നാളികേര വിലയിടിവിന്റെ പശ്ചാത്തലത്തില്‍ പേരാവൂര്‍ കൃഷി വകുപ്പിന്റെ നേതൃത്വത്തില്‍ വിഎഫ്പിസികെയും കേരഫെഡും സംയുക്തമായി കര്‍ഷകരില്‍ നിന്നും കുനിത്തലയിലുള്ള പേരാവൂര്‍ സ്വാശ്രയ കര്‍ഷക സമിതിയിലൂടെ പച്ചത്തേങ്ങ സംഭരണം ആരംഭിച്ചു. പച്ചത്തേങ്ങ സംഭരണോദ്ഘാടനം പഞ്ചായത്ത് മെമ്പര്‍ കെ.വി ശരത്ത് നിര്‍വഹിച്ചു. വാര്‍ഡ് മെമ്പര്‍ സി യമുന അധ്യക്ഷത വഹിച്ചു. പേരാവൂര്‍ കൃഷി ഓഫീസര്‍ പി.ജെ വിനോദ് പദ്ധതി വിശദീകരണം നടത്തി. പി കെ ജ്യോതിഷ് കുമാര്‍,ദശാനനന്‍ തുടങ്ങിയവര്‍ സംസാരിച്ചു.