latest news

ചേരാനല്ലൂര്‍ വാഹനാപകടക്കേസുമായി ബന്ധപ്പെട്ട് കൂടുതല്‍ നടപടി. കൊച്ചി സിറ്റി പൊലീസ് കമ്മീഷണറെ മാറ്റി. കാളിരാജ് മഹേഷ് കുമാറിനെ മാറ്റി ഉത്തരവിറങ്ങും. ആര്‍ നിശാന്തിനി കൊച്ചി കമ്മീഷണറാകും. കൂടാതെ പി പ്രകാശിനെ ദക്ഷിണ മേഖല ഐജിയാക്കാനും നിലവില്‍ തീരുമാനിച്ചിട്ടുണ്ട്.

ചേരാനല്ലൂരില്‍ ജയബാലകൃഷ്ണന്റെ മരണത്തിനിടയാക്കിയ വാഹനാപകടത്തില്‍ പൊലീസ് സ്വീകരിച്ച നടപടിയിലെ വീഴ്ച ആഭ്യന്തര വകുപ്പ് മന്ത്രി രമേശ് ചെന്നിത്തല തന്നെ നിയമസഭയില്‍ സമ്മതിച്ചിരുന്നു. നാല് പൊലീസ് ഉദ്യോഗസ്ഥരേയും സസ്പെന്‍ഡ് ചെയ്തിരുന്നു. ഇതിന് പിന്നാലെയാണ് ഉന്നത ഉദ്യോഗസ്ഥനെതിരേയും നടപടിയുണ്ടായിരിക്കുന്നത്. വാഹനം ഓടിച്ച ആള്‍ക്ക് അന്നേ ദിവസം ജാമ്യം ലഭിക്കുന്നതില്‍ പൊലീസിന് ജാഗ്രതക്കുറവുണ്ടായെന്ന് ജയബാലകൃഷ്ണന്റെ കുടുംബം ഉള്‍പ്പെടെ ആരോപണം ഉന്നയിച്ചതിന് പിന്നാലെയാണ് നടപടി.

മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരായ ഹര്‍ജിയില്‍ തെരഞ്ഞെടുപ്പ് കമ്മീഷന് മറുപടി നല്‍കാന്‍ കൂടുതല്‍ സമയം അനുവദിച്ച് സുപ്രീം കോടതി. 10 ദിവസം കൂടി സമയമാണ് കോടതി അനുവദിച്ചത്. ദീപാവലി അവധി കഴിഞ്ഞ് കേസ് പരിഗണിക്കും. നിലവില്‍ കമ്മീഷന്‍ നല്‍കിയ സത്യവാങ്മൂലത്തിന് മറുപടി നല്‍കാനും ഹര്‍ജിക്കാര്‍ക്ക് നിര്‍ദ്ദേശം നല്‍കി. തെരഞ്ഞെടുപ്പ് കമ്മീഷന് അധിക സത്യവാ മൂലത്തിന് രണ്ടാഴ്ച സമയവും കോടതി നല്‍കി.

ചേരാനല്ലൂര്‍ വാഹനാപകടം നിയമസഭയില്‍ ഉന്നയിച്ച് ആഭ്യന്തര മന്ത്രി രമേശ് ചെന്നിത്തല. സംഭവത്തില്‍ സര്‍ക്കാരിന് ഒന്നും ഒളിപ്പിക്കാനില്ല ശക്തമായ നടപടി ഇക്കാര്യത്തില്‍ സ്വീകരിച്ചിട്ടുള്ളതാണ്. സംഭവം നടന്നയുടന്‍ സ്ഥലം എംഎല്‍എ തന്നെ ഫോണില്‍ വിളിച്ചാണ് കാര്യം പറയുന്നത്. അപ്പോള്‍ തന്നെ മനസ്സിലായിരുന്നു പൊലീസിന്റെ ഭാഗത്ത് നിന്ന് വീഴ്ചയുണ്ടായിട്ടുണ്ടെന്ന്. ഡിജിപിയുമായി ബന്ധപ്പെടുയുകയും ജാമ്യം ലഭിക്കുന്ന വകുപ്പ് ചുമത്തിയത് എന്ത് അടിസ്ഥാനത്തിലായിരുന്നുവെന്നും ചോദിച്ചു. അത് തന്റെ ഉത്തരവാദിത്വമാണ്. പൊലീസ് തെറ്റുചെയ്താല്‍ അതിനെയെല്ലാം കണ്ണടച്ച് ന്യായീകരിക്കേണ്ട ഒരു ബാധ്യതയും ഈ സര്‍ക്കാരിനില്ല രമേശ് ചെന്നിത്തല സഭയില്‍ വ്യക്തമാക്കി.

ജഡ്ജിയുടെ മകന്‍ അല്ല ആരായാലും നിയമം എല്ലാവര്‍ക്കും ഒന്നാണ്. ഒരു പാവപ്പെട്ട മനുഷ്യന്‍ സ്‌കൂട്ടറില്‍ പോകുകയായിരുന്നു. അയാള്‍ ഭക്ഷണം കൊണ്ടുപോയിട്ടുവേണം കുടുംബത്തിന് കഴിക്കാന്‍. മൂന്ന് ആവശ്യങ്ങളാണ് കുടുംബത്തിന് ഉള്ളത്.അതെല്ലാം അംഗീകരിച്ചത് കൊണ്ടാണ് ഇന്നലെ നടന്ന സമരം അവസാനിപ്പിച്ചത്. ജുവനൈല്‍ മജിസ്ട്രേറ്റ് ഒരു കാരണവശാലും വാഹനമോടിച്ച 17 കാരന് ജാമ്യം അനുവദിക്കരുത്. ജഡ്ജിയുടെ പേരില്‍ നടപടിയെടുക്കാന്‍ സര്‍ക്കാരിന് സാധ്യമല്ല. ചെയ്യാന്‍ കഴിയുന്നത് വാഹനത്തിന്റെ ഉടമയ്ക്കെതിരെ കേസ് എടുക്കാം എന്നുള്ളതാണ്. അത് ചെയ്തിട്ടുണ്ട്. ഈ വിവരം ഹൈക്കോടതി രജിസ്ട്രാറെ രേഖാമൂലം അറിയിച്ചിട്ടുണ്ട്.

ചേരാനല്ലൂര്‍ വിഷയത്തില്‍ തെറ്റ് ചെയ്ത പൊലീസുകാര്‍ക്കെതിരെ ഇന്ന് തന്നെ നടപടി ഉണ്ടാകും. ഒരു പണക്കാരനും സ്വാധീനം ചെലുത്താന്‍ ഈ ഗവണ്‍മെന്റ് സമ്മതിക്കുകയില്ല. ജഡ്ജി അല്ല ആരായാലും ശരി. ജഡ്ജി ഒരു വലിയ കാര്യം ചെയ്തു. പൊലീസ് സ്റ്റേഷനില്‍ പോയി. ഔദ്യോഗിക കാര്യത്തിനല്ലാതെ ജഡ്ജി പൊലീസ് സ്റ്റേഷനില്‍ പോകരുത്. സ്റ്റേഷനില്‍ ചെന്ന് ജഡ്ജി പൊട്ടിത്തെറിക്കുകയായിരുന്നു. ‘ഹിസ് ബിഹേവിയര്‍ വാസ് വെരി റൂഡ്’, പാവപ്പെട്ട മനുഷ്യനെയും കുടുംബത്തെയും സംരക്ഷിക്കാന്‍ സാധ്യമായതെല്ലാം ചെയ്യും രമേശ് ചെന്നിത്തല പറഞ്ഞു.

കോവിഡ് കാലത്ത് ആരോഗ്യവകുപ്പ് വാങ്ങിയ ഐഫോണുകള്‍ കാണാതായത് വിജിലന്‍സ് അന്വേഷിക്കും. സംഭവത്തില്‍ വിജിലന്‍സ് അന്വേഷണം ആവശ്യപ്പെട്ട് ആരോഗ്യമന്ത്രി കെ മുരളീധരന്‍ ആഭ്യന്തരമന്ത്രി രമേശ് ചെന്നിത്തലയ്ക്ക് കത്തുനല്‍കി.

7.16 കോടി രൂപ മുടക്കി ആരോഗ്യവകുപ്പ് വാങ്ങിയ 224 ഐഫോണുകളില്‍ പലതും കാണാനില്ലെന്ന് കഴിഞ്ഞദിവസമാണ് കെ മുരളീധരന്‍ നിയമസഭയില്‍ പറഞ്ഞത്. കോവിഡ് കാലത്ത് വാങ്ങിയ ഈ ഐഫോണുകളില്‍ ചിലത് ആശുപത്രികളില്‍ കൂട്ടിയിട്ടിരിക്കുകയാണെന്നും മന്ത്രി പറഞ്ഞിരുന്നു. കണ്ണ് പരിശോധനയ്ക്കായുള്ള ഫണ്ടസ് ക്യാമറയില്‍ ഘടിപ്പിക്കാനായാണ് ആരോ?ഗ്യവകുപ്പ് ഐഫോണുകള്‍ വാങ്ങിയിരുന്നത്. ഇതില്‍ പലതും കാണാനില്ലെന്ന കണ്ടെത്തലിലാണ് ഇപ്പോള്‍ വിജിലന്‍സ് അന്വേഷണം വരുന്നത്.

പി എസ് സി പരീക്ഷാക്രമക്കേടില്‍ രണ്ട് എഫ്ഐആര്‍ കൂടി രജിസ്റ്റര്‍ ചെയ്ത് ക്രൈംബ്രാഞ്ച്. ഖാദി ബോര്‍ഡിലെ വില്ലേജ് ഓയില്‍ ഇന്‍സ്പെക്ടര്‍, ഫിഷറീസ് എക്സ്റ്റന്‍ഷന്‍ ഓഫീസര്‍ തുടങ്ങിയ പരീക്ഷകളിലാണ് കേസെടുത്തത്. ഖാദി ബോര്‍ഡില്‍ പിഎസ്സി അംഗത്തിന്റെ ബന്ധുമിനായിരുന്നു നിയമനം ലഭിച്ചത്. ഫിഷറീസ് വകുപ്പില്‍ ചോദ്യം തയ്യാറാക്കിയ കോളജിലെ വിദ്യാര്‍ഥികള്‍ക്കായിരുന്നു നിയമനം.

നാളെയാണ് പിഎസ്സി ചെയര്‍മാന്‍ എം ആര്‍ ബൈജു ക്രൈംബ്രാഞ്ചിന് മുന്നില്‍ ചോദ്യം ചെയ്യലിന് ഹാജരാകുക. അതേസമയം പരീക്ഷ ക്രമക്കേടില്‍ എഫ്ഐആര്‍ റദ്ദാക്കണമെന്ന് ആവശ്യപ്പെട്ടുള്ള പിഎസ്സിയുടെ ഹര്‍ജി ഇന്ന് വീണ്ടും ഹൈക്കോടതി പരിഗണിക്കും.

മോട്ടോര്‍ വാഹന നിയമത്തില്‍ നിര്‍ണ്ണായക മാറ്റങ്ങളുമായി കേന്ദ്രസര്‍ക്കാര്‍. 100% എഥനോള്‍ വരെ വാഹനങ്ങളില്‍ ഉപയോഗിക്കാന്‍ അനുമതി നല്‍കിയാണ് ഭേദഗതി നടപ്പാക്കിയത്. ഇതിനായി കേന്ദ്ര മോട്ടോര്‍ വാഹന ചട്ടങ്ങളില്‍ ഭേദഗതി വരുത്തി ഔദ്യോഗികമായി വിജ്ഞാപനം ഇറക്കി. ഇന്ധന ഇറക്കുമതി കുറയ്ക്കാനും മലിനീകരണം നിയന്ത്രിക്കാനും ലക്ഷ്യമിട്ടാണ് കേന്ദ്ര സര്‍ക്കാറിന്റെ ഈ നിര്‍ണ്ണായക നീക്കം. ഇ 100, ഇ 85 തുടങ്ങിയ ഇന്ധനങ്ങള്‍ ഉപയോഗിക്കാന്‍ കഴിയുന്ന ഫ്‌ലെക്‌സ് ഫ്യുവല്‍ വാഹനങ്ങള്‍ക്കാണ് പച്ചക്കൊടി.

നിലവില്‍ ഇ-20 വരെ ഉപയോഗിക്കാനായി നിര്‍മ്മിച്ച വാഹനങ്ങളില്‍ അതില്‍ കൂടുതല്‍ എഥനോള്‍ കലര്‍ത്താന്‍ ആകില്ല. എഥനോള്‍ കൂടുതല്‍ കലര്‍ത്തിയ പെട്രോള്‍ ഒഴിക്കാവുന്ന വാഹനങ്ങളുടെ നിര്‍മ്മാണം പ്രോത്സാഹിപ്പിക്കുമെന്ന് കേന്ദ്രം വ്യക്തമാക്കി. അതേസമയം നിലവിലുള്ള സാധാരണ പെട്രോള്‍ കാറുകളിലോ ഇ20 ഇന്ധനം ഉപയോഗിക്കുന്ന വാഹനങ്ങളിലോ ഇ100 ഉപയോഗിക്കാന്‍ അനുവാദമില്ല. പുതിയ ഭേദഗതിയോടെ മാരുതി സുസുകി, ടൊയോട്ട, ടാറ്റാ മോട്ടോഴ്‌സ്, ഹ്യുണ്ടായ് തുടങ്ങിയ പ്രമുഖ വാഹന നിര്‍മ്മാതാക്കള്‍ ഉയര്‍ന്ന എഥനോള്‍ മിശ്രിതത്തില്‍ ഓടുന്ന ഫ്‌ലെക്‌സ്-ഫ്യുവല്‍ മോഡലുകള്‍ വിപണിയിലിറക്കാന്‍ സജ്ജമാകുകയാണ്.

മാരുതി സുസുകി വേഗണ്‍ ആര്‍ ഫ്‌ലെക്‌സ് ഫ്യുവല്‍ മോഡല്‍ ഇതിനകം തരംഗമായിരുന്നു. ലൈറ്റ് മോട്ടോര്‍ വെഹിക്കിളിന്റെ ഭാരപരിധിയും പുതിയ ഭേദഗതിപ്രകാരം ഉയര്‍ത്തിയിട്ടുണ്ട്. പെട്രോള്‍, ഡീസല്‍ എല്‍എംവികളുടെ ഭാരപരിധി 3000കിലോയില്‍ നിന്ന് 3500 കിലോ ആയാണ് ഉയര്‍ത്തിയത്.

തീവ്ര വോട്ടര്‍ പട്ടിക പരിഷ്‌കരണത്തിന്റെ ഭാഗമായി വോട്ടര്‍ പട്ടികയിലെ അപാകതകള്‍ കണ്ടെത്താന്‍ ഉപയോഗിച്ച സോഫ്റ്റ് വെയര്‍ പേരും പതിപ്പും വെളിപ്പെടുത്താന്‍ സാധിക്കില്ലെന്ന് തെരഞ്ഞെടുപ്പ് കമ്മീഷന്‍

ഈ വിവരങ്ങള്‍ വ്യാപാര രഹസ്യം, ബൗദ്ധിക സ്വത്ത്, വാണിജ്യ ആത്മവിശ്വാസം എന്നിവയുമായി ബന്ധപ്പെട്ടതാണെന്ന് വ്യക്തമാക്കിക്കൊണ്ടാണ് വിവരാവകാശ നിയമപ്രകാരമുള്ള ചോദ്യത്തോട് തെരഞ്ഞെടുപ്പ് കമ്മീഷന്‍ പ്രതികരിച്ചത്.

തെലങ്കാനയിലെ കരിമ്പൂര്‍ സ്വദേശിയായ സാമൂഹിക പ്രവര്‍ത്തകന്‍ എംഎ മുജീബ് അയ്യൂബ് ആണ് വിവരാവകാശ നിയമപ്രകാരം അപേക്ഷ സമര്‍പ്പിച്ചത്. ജൂലൈ 27-ന് നല്‍കിയ അപേക്ഷയില്‍ എസ്‌ഐആര്‍ സമയത്ത് വോട്ടര്‍ പട്ടികയിലെ പിശക്, അപകാത, പൊരുത്തക്കേടുകള്‍ തിരിച്ചറിയാന്‍ ഏത് സോഫ്റ്റ്വെയര്‍, അല്ലെങ്കില്‍ മൊബൈല്‍ ആപ്ലിക്കേഷനാണ് ഉപയോഗിച്ചതെന്നും ഇതിനായി ഏതെങ്കിലും എഐ പ്ലാറ്റ്‌ഫോമുകളുടെ സഹായം ലഭിച്ചോ എന്നുമടക്കം ചോദ്യങ്ങള്‍ ഉണ്ടായിരുന്നു. ഭാരത് ഇലക്ട്രോണിക്‌സ് ലിമിറ്റഡ്, ഇലക്ട്രോണിക്‌സ് കോര്‍പ്പറേഷന്‍ ഓഫ് ഇന്ത്യ ലിമിറ്റഡ് തുടങ്ങിയ ഇവിഎം നിര്‍മ്മാതാക്കള്‍ വിവരാവകാശ നിയമപ്രകാരമുള്ള ചോദ്യത്തിന് മറുപടി നല്‍കുമ്പോള്‍ വോട്ടിങ് മെഷീനുമായി ബന്ധപ്പെട സോഴ്സ് കോഡുകള്‍ പങ്കുവെക്കാന്‍ വിസമ്മതിച്ചിരുന്നു. എസ്‌ഐആറുമായി ബന്ധപ്പെട്ട് മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യത്തില്‍ സമരങ്ങള്‍ രാജ്യവ്യാപകമായി തുടരുന്നതിനിടെയാണ് ഈ വിവരം പുറത്തുവന്നത്.

സ്‌കൂള്‍ കുട്ടികളുടെ ബാഗുകളുടെ അമിതഭാരം കുറയ്ക്കാന്‍ സംസ്ഥാന സര്‍ക്കാര്‍. സ്‌കൂള്‍ കുട്ടികളുടെ ബാഗുകളുടെ അമിതഭാരം കുറയ്ക്കാന്‍ വേണ്ടിയുള്ള ചര്‍ച്ചകള്‍ നടക്കുന്നു എന്ന് വിദ്യാഭ്യാസ മന്ത്രി എന്‍ ഷംസുദീന്‍ സഭയില്‍ വ്യക്തമാക്കി. അടുത്തമാസം 24ന് ഇത് സംബന്ധിച്ച് യോഗം വിളിച്ചിട്ടുണ്ട്. ഭാരം കുറഞ്ഞ പേപ്പര്‍ ഉപയോഗിച്ചുള്ള പുസ്തകങ്ങള്‍ നിര്‍മ്മിക്കും.

പുസ്തകങ്ങള്‍ അര്‍ദ്ധ വാര്‍ഷികം എന്ന നിലയില്‍ ചുരുക്കാന്‍ വേണ്ടിയുള്ള നടപടികളും ആലോചിക്കുന്നു. കൈപ്പമംഗലം എംഎല്‍എ കെ കെ വത്സരാജിന് മണ്ഡലത്തിലെ സ്‌കൂള്‍ ലീഡര്‍ നല്‍കിയ നിവേദനം ആണ് റൂള്‍ 113 പ്രകാരം നിയമസഭയില്‍ ചര്‍ച്ചയായത്. ഹൈസ്‌കൂള്‍ വിദ്യാര്‍ഥികളുടെ ബാഗുകളുടെ അമിതഭാരം കുറയ്ക്കണമെന്നതാണ് ആവശ്യം.

നിയമസഭാ ചട്ടം 113 നിയമസഭാംഗങ്ങള്‍ക്കു സഭയില്‍ പെറ്റീഷന്‍ അവതരിപ്പിക്കുന്നതിനുള്ളതാണ്. വിദ്യാര്‍ഥിനി നല്‍കിയ നിവേദനം എംഎല്‍എ സ്പീക്കറുടെ ഓഫിസിന്റെ ശ്രദ്ധയില്‍പെടുത്തുകയും പെറ്റീഷനായി അവതരിപ്പിക്കാന്‍ അനുമതി നല്‍കുകയുമായിരുന്നു. ഇതിന്‍മേല്‍ സഭയില്‍ ചര്‍ച്ച അനുവദിക്കില്ല. പെറ്റീഷന്‍ കമ്മിറ്റിയുടെ പരിഗണനയ്ക്കു വിടുകയാണ് രീതി.

പി എസ് സി അംഗങ്ങളുടെ എണ്ണം കുറക്കുന്നത് പരിഗണനയില്‍ ഇല്ലെന്ന് മുഖ്യമന്ത്രി വി ഡി സതീശന്‍. ശമ്പളവും ആനുകൂല്യങ്ങളും കുറയ്ക്കുന്നത് ആലോചനയില്‍ ഇല്ല. മുഴുവന്‍ സമയ രാഷ്ട്രീയക്കാര്‍ പി എസ് സി അംഗങ്ങള്‍ ആകുന്നത് തടയേണ്ട സാഹചര്യമില്ലെന്നും മുഖ്യമന്ത്രി നിയമസഭയില്‍ പറഞ്ഞു. പി എസ്സിക്കെതിരെ ഡിജിപിക്ക് മാത്രം 180 പരാതികള്‍ ലഭിച്ചു. ക്രമക്കേടുകളില്‍ പി എസ് സി ചെയര്‍മാനും അംഗങ്ങള്‍ക്കും പങ്കുണ്ടോയെന്ന് അന്വേഷിച്ചുവരിയാണെന്നും മുഖ്യമന്ത്രി വ്യക്തമാക്കി.നിയമസഭയില്‍ ജി സുധാകരന്‍ ഉന്നയിച്ച ചോദ്യങ്ങള്‍ക്ക് മറുപടി നല്‍കുകയായിരുന്നു മുഖ്യമന്ത്രി വി ഡി സതീശന്‍.

ബംഗാള്‍ ഉള്‍ക്കടലില്‍ രൂപപ്പെട്ട തീവ്രന്യൂനമര്‍ദം ‘അര്‍ണബ്’ ചുഴലിക്കാറ്റായി മാറി. കിഴക്കന്‍-മധ്യ ബംഗാള്‍ ഉള്‍ക്കടലിലും സമീപ പ്രദേശങ്ങളിലും നിലകൊള്ളുന്ന അര്‍ണബ് മറ്റന്നാള്‍ ആന്ധ്രാ തീരത്ത് കരതൊടുമെന്നാണ് പ്രവചനം. മണിക്കൂറില്‍ 15 കിലോമീറ്റര്‍ വേഗതയില്‍ പടിഞ്ഞാറന്‍ ദിശയിലേക്ക് നീങ്ങുന്ന അര്‍ണബ്, ഇന്ന് അര്‍ദ്ധരാത്രിയോടെ കടുത്ത ചുഴലിക്കാറ്റായും ഒക്ടോബര്‍ 27 ഓടെ അതിതീവ്ര ചുഴലിക്കാറ്റായും ശക്തിപ്രാപിക്കും. തുടര്‍ന്ന് വടക്കുപടിഞ്ഞാറന്‍ ദിശയിലേക്ക് നീങ്ങുന്ന അര്‍ണബ് ചുഴലിക്കാറ്റ് ഒക്ടോബര്‍ 28 ന് ഉച്ചയ്ക്ക് മുന്‍പായി ആന്ധ്രാപ്രദേശിലെ ബാപ്പറ്റ്ലയ്ക്കും വിശാഖപട്ടണത്തിനും ഇടയിലുള്ള തീരത്തുകൂടി കരതൊടുമെന്നാണ് പ്രതീക്ഷ. നിലവില്‍ ഗോപാല്‍പൂരില്‍ നിന്ന് 610 കിലോമീറ്ററും വിശാഖപട്ടണത്ത് നിന്ന് 650 കിലോമീറ്ററും അകലെയാണ് ഇതിന്റെ കേന്ദ്രമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. കരതൊടുന്ന സമയത്ത് മണിക്കൂറില്‍ 115 മുതല്‍ 125 കിലോമീറ്റര്‍ വരെയും ചിലപ്പോള്‍ 140 കിലോമീറ്റര്‍ വരെയും വേഗതയുള്ള ശക്തമായ കാറ്റിന് സാധ്യതയുണ്ട്. ആന്ധ്രാപ്രദേശ്, തെക്കന്‍ ഒഡീഷ തീരങ്ങള്‍ക്ക് കേന്ദ്ര കാലാവസ്ഥാ വകുപ്പ് റെഡ് അലര്‍ട്ട് നല്‍കിയിട്ടുണ്ട്. ആന്ധ്ര പ്രദേശ്, പശ്ചിമ ബംഗാള്‍, ഒഡീഷ, തമിഴ്‌നാട് സംസ്ഥാനങ്ങളില്‍ അര്‍ണബ് ആഞ്ഞടിക്കാനാണ് സാധ്യതയെന്നാണ് പ്രവചനം. കേരളത്തിലും കനത്ത മഴക്ക് സാധ്യതയുണ്ട്.