കള്ളാടി മണ്ണിടിച്ചില്: ഒരാളുടെ മൃതദേഹം കൂടി കണ്ടെത്തി
വയനാട് കള്ളാടി മണ്ണിടിച്ചിലില് മരിച്ചവരുടെ എണ്ണം ഏഴായി. തെരച്ചിലില് ഒരാളുടെ മൃതദേഹം കൂടി കണ്ടെത്തി. പുഴയില് നിന്നാണ് മൃതദേഹം കണ്ടെത്തിയത്. ഇനി ഒരാളെ കൂടിയാണ് കണ്ടെത്താനുള്ളത്. മീനാക്ഷി പാലത്തില് നിന്നും ഒരു കിലോമീറ്റര് താഴെ നിന്നാണ് മൃതദേഹം കിട്ടിയത്. ബംഗാള് സ്വദേശി രാഗേഷ് ഗുചെയ്തിന്റെ മൃതദേഹം ആണ് ലഭിച്ചത്. നിര്മാണ കമ്പനിയുടെ സര്വേയര് ആണ് രാഗേഷ് ഗുചെയ്ത്. മൃതദേഹം രാഗേഷിന്റെ ബന്ധുക്കള് തിരിച്ചറിഞ്ഞു.
കള്ളാടിയിലെ തെരച്ചില് ഇന്ന് നാലാം ദിവസമാണ്. ഇന്നലെ നടത്തിയ തെരച്ചിലില് മൂന്ന് മൃതദേഹം ലഭിച്ചിരുന്നു. കള്ളാടി- ആനക്കാംപൊയില് തുരങ്കപാത നിര്മ്മാണം നടത്തുന്ന കരാര് കമ്പനിയായ ദിലീപ് ബില്ഡ് കോണിന്റെ തൊഴിലാളികളാണ് ദുരന്തത്തില് പെട്ടത്. ആശുപത്രിയില് ചികിത്സയില് കഴിയുന്ന രണ്ടുപേരുടെ നില ഗുരുതരമായി തുടരുകയാണ്. മന്ത്രിമാരായ എ.പി അനില്കുമാര്, അഡ്വ. ടി. സിദ്ദീഖ് എന്നിവര് പ്രദേശത്ത് ക്യാമ്പ് ചെയ്ത് തെരച്ചിലിന് നേതൃത്വം നല്കുന്നുണ്ട്. പദ്ധതിയുടെ മേല്നോട്ട ചുമതലയുള്ള കൊങ്കണ് റെയില് കോര്പറേഷന് ഉദ്യോഗസ്ഥര് ഇന്ന് ദുരന്തബാധിത പ്രദേശം സന്ദര്ശിക്കും. അതേസമയം സര്ക്കാര് പ്രഖ്യാപിച്ച ഇരട്ട അന്വേഷണത്തില് ഇതുവരെ വ്യക്തത വന്നിട്ടില്ല. വിദഗ്ധ സമിതിയെ ഇന്ന് പ്രഖ്യാപിച്ചേക്കും.
