Kerala news

മണത്തണ:സപ്തമാതൃ പുരം എന്ന മണത്തണ ചപ്പാരം ഭഗവതി ക്ഷേത്രത്തിലെ മുപ്പത്തിയഞ്ചാമത് നവരാത്രി മഹോത്സവത്തിന് തുടക്കമായി.ഒന്‍പത് ദിവങ്ങളിലായി നടക്കുന്ന നവരാത്രി മഹോത്സവം ആഘോഷ കമ്മറ്റി പ്രസിഡന്റ് ഗംഗാധരന്‍ കോലംചിറയുടെ അധ്യക്ഷതയില്‍ കൊട്ടിയൂര്‍ ദേവസ്വം ചെയര്‍മാന്‍ കെ.സി.സുബ്രഹ്മണ്യന്‍ നായര്‍ ഉദ്ഘാടനം ചെയ്തു.ചടങ്ങില്‍ തിട്ടയില്‍ വാസുദേവന്‍ നായര്‍ രയരപ്പശ്ശന്‍ അനുസ്മരണം നടത്തി.കൂടത്തില്‍ ശ്രീകുമാര്‍, ഗ്രാമപഞ്ചായത്ത് അംഗങ്ങളായ ബേബി സോജ, യു.വി.അനില്‍കുമാര്‍, കൂടത്തില്‍ നാരായണന്‍ നായര്‍, സി.എം.ജോസഫ്, മന്‍മദന്‍ മുണ്ടപ്ലാക്കല്‍, സുധീര്‍ ബാബു തുടങ്ങിയവര്‍ സംസാരിച്ചു.തുടന്ന് പയ്യന്നൂര്‍ അമ്മ ഓര്‍ക്കസ്ട്രയുടെ നേതൃത്വത്തില്‍ ഗാനമേളയും നടന്നു.

സംസ്ഥാനത്ത് ഇന്ന് സ്വര്‍ണവില ഇടിഞ്ഞു. ഇന്നലെ ഉച്ചയ്ക്ക് ഉയര്‍ന്ന സ്വര്‍ണവിലയാണ് ഇന്ന് കുത്തനെ കുറഞ്ഞത്. ഒരു പവന്‍ സ്വര്‍ണത്തിന് 320 രൂപയാണ് കുറഞ്ഞത്. ഇന്നലെ 160 രൂപ ഉയര്‍ന്നിരുന്നു. ഒരു പവന്‍ സ്വര്‍ണത്തിന്റെ നിലവിലെ വിപണി വില 36640 രൂപയാണ്.ഒരു ഗ്രാം 22 കാരറ്റ് സ്വര്‍ണത്തിന്റെ വില കുറഞ്ഞു. 40 രൂപയാണ് ഇന്ന് ഇടിഞ്ഞത്. ഇന്നലെ 20 രൂപ ഉയര്‍ന്നിരുന്നു. ഒരു ഗ്രാം 22 കാരറ്റ് സ്വര്‍ണത്തിന്റെ വിപണി വില 4580 രൂപയാണ്. ഒരു ഗ്രാം 18 കാരറ്റ് സ്വര്‍ണത്തിന്റെ വിലയും ഇടിഞ്ഞു.25 രൂപയാണ് ഉയര്‍ന്നത്. ഒരു ഗ്രാം 18 കാരറ്റ് സ്വര്‍ണത്തിന്റെ ഇന്നത്തെ വിപണി വില 3785 രൂപയാണ്.

തെരുവ്നായ്ക്കളെ പിടികൂടാന്‍ കുടുംബശ്രീ അംഗങ്ങള്‍ക്കുള്ള പരിശീലനം ആരംഭിച്ചു. തിരുവനന്തപുരം ജില്ലാ മൃഗസംരക്ഷണ വകുപ്പും ജില്ലാ പഞ്ചായത്തും നഗരസഭയും ചേര്‍ന്നാണ് പരിശീലന പരിപാടി സംഘടിപ്പിക്കുന്നത്. 15 പേര്‍ വീതമുള്ള ബാച്ചുകളാക്കി തിരിച്ചാണ് പരിശീലനം.തിങ്കള്‍, ചൊവ്വ ദിവസങ്ങളിലാണ് പരിശീലനം. ജില്ലാ കുടുംബശ്രീയില്‍ നിന്നും ജില്ലാ പഞ്ചായത്ത് തെരഞ്ഞെടുത്തവര്‍ക്കാണ് പരിശീലനം. പേട്ട എബിസി സെന്ററിലും, കുടപ്പനക്കുന്ന് ലൈഫ് സ്റ്റോക്ക് മാനേജ്മെന്റ് ട്രെയിനിങ് സെന്ററിലുമായാണ് പരിശീലനം.മുന്‍പ് കുടുംബശ്രീയില്‍ ഉണ്ടായിരുന്ന നായ പിടുത്തക്കാര്‍ക്ക് ആദ്യം പരിശീലനം നല്‍കും. പരിശീലനം ലഭിച്ചവരുടെ സേവനം നഗരസഭയിലെ തെരുവുനായ്ക്കളെ പിടിക്കുന്നതിനായി ഉപയോഗപ്പെടുത്തും.ആരോഗ്യവകുപ്പിന്റെ നിര്‍ദ്ദേശങ്ങള്‍ പാലിച്ച് പ്രതിരോധ കുത്തിവെപ്പുകള്‍ പൂര്‍ത്തിയാക്കിയവര്‍ക്കു മാത്രമാണ് പരിശീലനം നല്‍കുന്നത്. പ്രതിരോധ കുത്തിവയ്പ്പ് എടുത്ത നായ്ക്കളെ പ്രത്യേക അടയാളം നല്‍കി അവയുടെ ആവാസവ്യവസ്ഥയില്‍ തുറന്നു വിടുമെന്ന് മൃഗസംരക്ഷണ വകുപ്പ് അറിയിച്ചു.

ഹയര്‍ സെക്കന്ററി വിദ്യാര്‍ഥികളില്‍ റോഡ് നിയമങ്ങളെക്കുറിച്ചും അവബോധം സൃഷ്ടിക്കുന്നതിന് റോഡ് നിയമങ്ങള്‍ പാഠ്യപദ്ധതിയില്‍ ഉള്‍പ്പെടുത്തും. മോട്ടോര്‍ വാഹന വകുപ്പ് തയ്യാറാക്കിയ പുസ്തകം ഗതാഗത വകുപ്പ് മന്ത്രി ആന്റണി രാജു വിദ്യാഭ്യാസ വകുപ്പ് മന്ത്രി വി. ശിവന്‍കുട്ടിക്ക് നല്‍കി സെപ്റ്റംബര്‍ 28 ന് പ്രകാശനം ചെയ്യും. സെക്രട്ടേറിയറ്റിലെ പി.ആര്‍. ചേമ്പറിലായിരിക്കും പ്രകാശന ചടങ്ങ്.

റോഡ് നിയമങ്ങള്‍, മാര്‍ക്കിംഗുകള്‍, സൈനുകള്‍ എന്നിവയും വാഹന അപകട കാരണങ്ങളും നിയമപ്രശ്നങ്ങളും റോഡ് സുരക്ഷാ സംവിധാനങ്ങളും ഉള്‍പ്പെടെ മോട്ടോര്‍ വാഹന സംബന്ധമായി ഡ്രൈവിംഗ് ലൈസന്‍സ് എടുക്കുന്നതിനു മുന്‍പ് അറിഞ്ഞിരിക്കേണ്ട കാര്യങ്ങളെക്കുറിച്ച് സമഗ്രമായി പ്രതിപാദിക്കുന്ന പുസ്തകമാണ് ഹയര്‍ സെക്കന്ററി പാഠ്യപദ്ധതിയില്‍ ഉള്‍പ്പെടുത്തി മോട്ടോര്‍ വാഹന വകുപ്പ് തയ്യാറാക്കിയിരിക്കുന്നത്.

പുസ്തകം പാഠ്യപദ്ധതിയിലുള്‍പ്പെടുത്തുന്നതിനാല്‍ ഹയര്‍ സെക്കന്ററി പരീക്ഷ പാസ്സായി ഡ്രൈവിംഗ് ലൈസന്‍സ് നേടാന്‍ പ്രായപൂര്‍ത്തിയാകുമ്പോള്‍ പ്രത്യേക ലേണേഴ്സ് ലൈസന്‍സ് എടുക്കേണ്ടി വരില്ല. കേന്ദ്ര മോട്ടോര്‍ വാഹന നിയമത്തില്‍ ഇതിനാവശ്യമായ ഭേദഗതി വരുത്താന്‍ ഗതാഗത വകുപ്പ് നടപടി സ്വീകരിക്കും. ഇത്തരത്തില്‍ രാജ്യത്തുതന്നെ ആദ്യമായി തയ്യാറാക്കിയിട്ടുള്ള പുസ്തകം പഠിപ്പിക്കുന്നതിനാവശ്യമായ പരിശീലനം അദ്ധ്യാപകര്‍ക്ക് നല്‍കുന്നതിനും മോട്ടോര്‍ വാഹന വകുപ്പ് സംവിധാനം ഒരുക്കും.

പേരാവൂര്‍: എ.എസ് നഗറിലെ ശ്രീധരന്‍ സ്മാരക മന്ദിരത്തിന്റെ ഉദ്ഘാടനത്തോട് അനുബന്ധിച്ച് കുനിത്തലയില്‍ സംഘാടക സമിതി യോഗം ചേര്‍ന്നു. വി. ബാബു മാസ്റ്ററിന്റെ അധ്യക്ഷതയില്‍ ശശീന്ദ്രന്‍ മാസ്റ്റര്‍ ഉദ്ഘാടനം ചെയ്തു. മന്ദിരത്തിന്റെ ഉദ്ഘാടനം ഒക്ടോബര്‍ 4-ന് എം. വി ജയരാജന്‍ നിര്‍വഹിക്കും. കെ. എ രജീഷ്, നിഷ ബാലകൃഷ്ണന്‍, കെ. എ ജോയിക്കുട്ടി, എം. കെ രാജന്‍ തുടങ്ങിയവര്‍ സംസാരിച്ചു.

പേരാവൂര്‍: സി.പി.ഐ.എം നേതാക്കളായിരുന്ന എന്‍. കണ്ണന്‍, പാലക്ക ബാലന്‍ എന്നിവരുടെ അനുസ്മരണത്തോട് അനുബന്ധിച്ച് പേരാവൂരില്‍ ക്രോസ്സ് കണ്‍ട്രി മത്സരം സംഘടിപ്പിച്ചു. പേരാവൂര്‍ സി.പി.ഐ.എം ഏരിയ കമ്മിറ്റി ഓഫീസിന് മുന്നില്‍ നിന്ന് ആരംഭിച്ച ക്രോസ്സ് കണ്‍ട്രി മത്സരം മുഴക്കുന്നില്‍ സമാപിച്ചു. കെ. വത്സന്റെ അധ്യക്ഷതയില്‍ കെ. ടി ജോസഫ് ഉദ്ഘാടനം ചെയ്തു. പ്രസന്ന സംസാരിച്ചു.

പേരാവൂര്‍: സി.പി.ഐ പേരാവൂര്‍ മണ്ഡലം കമ്മിറ്റിയുടെ ആഭിമുഖ്യത്തില്‍ ലഹരി വിരുദ്ധ ജാഗ്രതാ സംഗമം പേരാവൂര്‍ വച്ച് നടന്നു. സി.പി.ഐ മണ്ഡലം സെക്രട്ടറി സി. കെ ചന്ദ്രന്റെ അധ്യക്ഷതയില്‍ സി. പി. ഐ ജില്ലാ സെക്രട്ടറി കെ.ടി ജോസ് ഉദ്ഘാടനം ചെയ്തു. വി. പത്മനാഭന്‍, പി. ദേവദാസന്‍, കെ.വി ശരത്, ഷാജി പൊട്ടയില്‍ തുടങ്ങിയവര്‍ നേതൃത്വം നല്‍കി. അഡ്വ. വി. ഷാജി, രഞ്ജിത്ത് മാര്‍ക്കോസ്, ഷാജിത്ത് വായന്നൂര്‍, വി. ഗീത തുങ്ങിയവര്‍ സംസാരിച്ചു.

മുഴക്കുന്ന്: ഗ്രാമ പഞ്ചായത്തിലെ ടൂറിസം സാധ്യതയുമായി ബന്ധപ്പെട്ട് ഹോം സ്റ്റേ നടത്താന്‍ താല്‍പര്യമുള്ളവരുടെ യോഗം പഞ്ചായത്ത് ഹാളില്‍ നടന്നു. വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ എ വനജ അധ്യക്ഷത വഹിച്ചു. ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ വി.വി വിനോദ്, ടൂറിസം സെക്രട്ടറി ജിജേഷ് കുമാര്‍ ജെ കെ, ടൂറിസം ഇന്‍ഫര്‍മേഷന്‍ ഓഫീസര്‍ സുഗതന്‍, വി ഇ ഒ കെ .പി ഷാജി തുടങ്ങിയവര്‍ സംസാരിച്ചു.

പേരാവൂര്‍: ചന്തു വൈദ്യര്‍ അനുസ്മരണം കറ്റിയാടില്‍ നടന്നു. പി.ബാബുരാജ് അധ്യക്ഷത വഹിച്ചു. എന്‍.ജയരാജന്‍ മാസ്റ്റര്‍, സി.കെ ദാമോധരന്‍, കണ്ണങ്കേരി രാജന്‍, പി.പ്രഹളാദന്‍, പി.രവീന്ദ്രന്‍ കോളയാട്, കെ.വി ഷൈജു, എം.വാസു, റെജി നിടുംപൊയില്‍, കെ.പ്രിയന്‍ തുടങ്ങിയവര്‍ സംസാരിച്ചു.

കാണാതായ കര്‍ണാടക വനം വകുപ്പിന്റെ താല്‍ക്കാലിക വാച്ചറുടെ മൃതദേഹം കണ്ടെത്തി. ബാരാപോള്‍ പുഴയുടെ ഭാഗമായ നീലംപുഴയിലാണ് കര്‍ണാടക പൊന്നംപേട്ട സ്വദേശിയായ തരുണിനെ(21) കാണാതായത്. കര്‍ണാടകത്തിന്റെ കൊക്ക ക്യാമ്പിലുള്ള തരുണ്‍ കാല് തെന്നി പുഴയില്‍ വീഴുകയായിരുന്നു. ഇക്കഴിഞ്ഞ വെള്ളിയാഴ്ച്ചയായിരുന്നു സംഭവം. തരുണിന് വേണ്ടിയുള്ള തിരച്ചില്‍ കര്‍ണാടകത്തില്‍ നിന്നുള്ള സംഘം ബാരാപോള്‍ പുഴയില്‍ ഉള്‍പ്പെടെനടത്തിയിരുന്നു. ഇതിനിടയില്‍ വീണ സ്ഥലത്തിന് സമീപത്ത് നിന്ന് എന്‍.ഡി.ആര്‍.എഫ് സംഘം നടത്തിയ പരിശോധനയിലാണ് തരുണിനെ മൃതദേഹം കണ്ടെത്തിയത്.