latest news

റഷ്യയുടെ ചാന്ദ്രദൗത്യം പരാജയം. ലൂണ 25 തകര്‍ന്നുവീണു. ലാന്‍ഡിങ്ങിന് മുന്‍പ് ഭ്രമണപഥത്തിലേക്ക് നീങ്ങവേ ഇടിച്ചു ഇറങ്ങുകയായിരുന്നു. 50 വര്‍ഷത്തിനുശേഷമുള്ള റഷ്യയുടെ ചാന്ദ്രദൗത്യമായിരുന്നു ലൂണ 25. ചന്ദ്രന്റെ ഉപരിതലത്തില്‍ ഇറങ്ങുന്നതിന് മുന്നോടിയായി വലം വെക്കേണ്ട ഭ്രമണപഥത്തിലേക്ക് ലൂണ-25 പേടകത്തെ മാറ്റാന്‍ സാധിച്ചില്ലെന്ന് ഇന്നലെ റിപ്പോര്‍ട്ടുകളുണ്ടായിരുന്നു.

സാങ്കേതിക തകരാറാണ് ലൂണയ്ക്ക് തിരിച്ചടിയയത്. 1976ല്‍ ആയിരുന്നു റഷ്യയുടെ അവസാനത്തെ ചാന്ദ്രദൗത്യം. ഓഗസ്റ്റ് 11നായിരുന്നു ലൂണ 25 വിക്ഷേപിച്ചത്. അഞ്ചുദിവസം കൊണ്ട് ചന്ദ്രന്റെ ആകര്‍ഷണവലയത്തിലെത്തുകയും ഏഴു ദിവസം കൊണ്ട് ലാന്‍ഡിങ് നടത്താനുമായിരുന്നു പദ്ധതി.

ഈ മാസം 23നു നടക്കുമെന്നു പ്രതീക്ഷിക്കുന്ന ചന്ദ്രയാന്റെ ലാന്‍ഡിങ്ങിനു മുന്‍പോ, അതിനൊപ്പമോ, തൊട്ടു പിന്നാലെയോ ലൂണയും ചന്ദ്രോപരിതലം തൊടുമെന്നായിരുന്നു കരുതിയിരുന്നത്.

കണിച്ചാര്‍: കേരള വ്യാപാരി വ്യവസായി ഏകോപന സമിതി കണിച്ചാര്‍ യൂണിറ്റ് വനിത വിംഗ് വാര്‍ഷിക പൊതുയോഗം കേരള വ്യാപാരി വ്യവസായി ഏകോപന സമിതി കണിച്ചാര്‍ യൂണിറ്റ് പ്രസിഡന്റ് എം വി നാരായണന്‍ ഉദ്ഘാടനം ചെയ്തു.വനിത വിംഗ് പ്രസിഡന്റ് ധന്യ സന്തോഷ് അധ്യക്ഷത വഹിച്ചു. എം വി മത്തായി, കെ വി ശശികുമാര്‍, എം എസ് സന്തോഷ്, പ്രജിത്ത് പൊനോന്‍, പി എസ് സുജിത്ത്, ഷൈന, അമ്പിളി സജീവന്‍ എന്നിവര്‍ സംസാരിച്ചു

ഇരിട്ടി :സംസ്‌കൃത അധ്യാപകരുടെ വിവിധ ആവശ്യങ്ങള്‍ ഉന്നയിച്ചു കൊണ്ട് സംസ്‌കൃത അധ്യാപക ഫെഡറേഷന്‍ ഇരിട്ടി ഉപജില്ലാ ഓഫീസര്‍ക്ക് നിവേദനം നല്‍കി. എല്‍ പി വിഭാഗത്തിലും സംസ്‌കൃതാധ്യാപകരെ നിയമിക്കുക,സ്‌കൂള്‍ കലോത്സവ മേന്വല്‍ അപാകതകള്‍ പരിഹരിക്കുക, സംസ്‌കൃതം സ്‌പെഷല്‍ ഓഫീസറെ നിയമിക്കുക തുടങ്ങിയ വിവിധ ആവശ്യങ്ങള്‍ ഉന്നയിച്ചായിരുന്നു സംസ്‌കൃത അധ്യാപക സംഘടനയുടെ (കെ.എസ് ടി എഫ്) നേതൃത്വത്തില്‍ നിവേദനം നല്‍കിയത്. ഇരിട്ടി എ.ഇ ഒ ഓഫീസില്‍ വച്ച് നടന്ന ചടങ്ങില്‍ എ.ഇ ഒ കെ. ബാബുരാജിന് സംസ്ഥാന എക്‌സിക്യൂട്ടീവ് അംഗം കെ.കൃഷ്ണന്‍ നമ്പൂതിരിപ്പാട് കൈമാറി.രൂപ പി പി,പി.എം നീലകണ്ഠന്‍, രേഷ്മ പി, ഉമ കെ.ബി, സ്വപ്ന ബി.വി എന്നിവര്‍ പങ്കെടുത്തു.

വര്‍ണാഭമായ അത്തം ഘോഷയാത്രയോടെ മലയാളക്കരയുടെ ഓണാഘോഷത്തിന് തുടക്കമായി. തൃപ്പൂണിത്തുറ ബോയ്‌സ് സ്‌കൂള്‍ ഗ്രൗണ്ടിലെ അത്തം നഗറില്‍ നിന്നു തുടങ്ങി നഗരം ചുറ്റിയാണ് ഘോഷയാത്ര. മുഖ്യമന്ത്രി പിണറായി വിജയന്‍ ഓണാഘോഷം ഉദ്ഘാടനം ചെയ്തു. നടന്‍ മമ്മൂട്ടി ഘോഷയാത്ര ഫ്‌ലാഗ് ഓഫ് ചെയ്തു. വ്യവസായ മന്ത്രി പി രാജീവ് പതാക ഉയര്‍ത്തി.

അത്താഘാഷ പരിപാടിയില്‍ അതിഥിയായി എത്തുന്നത് ആദ്യമായാമെന്ന് മമ്മൂട്ടി പറഞ്ഞു.നിങ്ങളറിയുന്ന മമ്മൂട്ടിയാകുന്നതിന് മുമ്പ് അത്തം ഘോഷയാത്രക്ക് വായ് നോക്കി നിന്നിട്ടുണ്ട്. അന്നും പുതുമുയും അത്ഭുതവും ഉണ്ട്. ഇന്നും അത് വിട്ടുമാറിയിട്ടില്ല. ഏത് സങ്കല്‍പ്പത്തിന്റയോ ഏത് വിശ്വാസത്തിന്റേയോ പേരിലായാലും ഓണം നമുക്ക് ആഘോഷമാണ്. അത്തച്ചമയം വലിയ സാഹിത്യ സാംസ്‌കാരിക ആഘോഷമാക്കി മാറ്റണം. ഘോഷയാത്രക്ക് അപ്പുറം സാംസ്‌കാരിക മേഖലക്ക് സംഭവന നല്‍കിയവരെ കൂടി പങ്കെടുപ്പിച്ച്, അവരുടെ ലോകോത്തരമായ കലാരൂപങ്ങള്‍ അവതരിപ്പിക്കണം. അത്തച്ചമയം കേരളത്തിന്റെ വലിയ ടാഗ് ലൈന്‍ ആകും.ട്രേഡ്മാര്‍ക്ക് ആകും. ടൂറിസ്റ്റുകളെ ആകര്‍ഷിക്കുന്ന ആഘോഷമാക്കി മാറ്റണമെന്നും മമ്മൂട്ടി അഭ്യര്‍ത്ഥിച്ചു. മനുഷ്യരെ ഒന്നിപ്പിക്കുന്ന ആഘോഷമായി ഓണം നിലനില്‍ക്കെട്ടെയന്നും മമ്മൂട്ടി ആശംസിച്ചു.

കണ്ണൂര്‍ തളാപ്പ് എ കെ ജി ആശുപത്രിക്ക് സമീപം മിനി ലോറിയും ബൈക്കും കൂട്ടിയിടിച്ച് രണ്ടു പേര്‍ മരിച്ചു. കാസര്‍ഗോട് സ്വദേശികളായ മനാഫ്, ലത്തീഫ് എന്നിവരാണ് മരിച്ചത്. പുലര്‍ച്ചെ ഒരു മണിയോടെയായിരുന്നു അപകടം. കണ്ണൂരില്‍ നിന്ന് പുതിയ തെരു ഭാഗത്തേക്ക് പോവുകയായിരുന്ന ബൈക്കും മംഗളൂരുവില്‍ നിന്ന് ആയിക്കരയിലേക്ക് വന്ന മിനി ലോറിയും കൂട്ടിയിടിച്ചാണ് അപകടം ഉണ്ടായത്. പരിക്കേറ്റ മനാഫിനെയും ലത്തീഫിനെയും ആശുപത്രിയിലെത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല.

ചന്ദ്രയാന്‍ മൂന്ന് ലാന്‍ഡറിന്റെ അവസാന ഭ്രമണപഥം താഴ്ത്തലും വിജയകരം. പുലര്‍ച്ചെ 2 മണിയോടെയാണ് ഇന്ത്യയുടെ ചാന്ദ്ര ദൗത്യം, ചന്ദ്രയാന്‍ 3 വിജയകരമായി ചന്ദ്രനോട് ഏറ്റവും അടുത്ത ഭ്രമണ പഥത്തിലേക്ക് ലാന്‍ഡ് ചെയ്തത്. ഇതോടെ പേടകം ഇപ്പോള്‍ ചന്ദ്രനില്‍ നിന്ന് 25 കിലോമീറ്റര്‍ അടുത്ത ദൂരവും, 134 കിലോമീറ്റര്‍ അകന്ന ദൂരവും ആയിട്ടുള്ള ഭ്രമണപഥത്തില്‍ എത്തി. ഇനി സോഫ്റ്റ് ലാന്‍ഡിങ്ങിനായുള്ള തയ്യാറെടുപ്പാണ്. ആഗസ്റ്റ് 23ന് വൈകിട്ട് 5.45 നാണ് സോഫ്റ്റ് ലാന്‍ഡിംഗ് പ്രക്രിയ തുടങ്ങുക.

അതേസമയം റഷ്യന്‍ ചാന്ദ്ര ദൗത്യം ലൂണ 25ന്റെ ഭാവി അനിശ്ചിതത്വത്തിലായി. ലാന്‍ഡിങ്ങിന് മുന്നോടിയായി നടത്തേണ്ട ഭ്രമണപഥമാറ്റം പൂര്‍ത്തിയാക്കാന്‍ പേടകത്തിനായില്ല. ഇന്നലെ ഇന്ത്യന്‍ സമയം വൈകിട്ട് 4.40നായിരുന്നു ഭ്രമണപഥ മാറ്റം നടക്കേണ്ടിയിരുന്നത്. എന്നാല്‍ ഇത് സാധ്യമായില്ല. സാങ്കേതിക തകരാര്‍ ഉണ്ടായെന്നും പ്രശ്‌നം പരിശോധിച്ച് വരികയാണെന്നുമാണ് റഷ്യന്‍ ബഹിരാകാശ ഏജന്‍സി റോസ്‌കോസ്‌മോസിന്റെ അറിയിപ്പ്. നിലവിലെ സാഹചര്യത്തില്‍ മുന്‍നിശ്ചയിച്ചത് പോലെ ആഗസ്റ്റ് 21ന് സോഫ്റ്റ് ലാന്‍ഡിങ്ങ് നടത്താന്‍ പറ്റില്ല. ആഗസ്റ്റ് 10ന് വിക്ഷേപിച്ച പേടകം ആഗസ്റ്റ് 16നാണ് ചാന്ദ്ര ഭ്രമണപഥത്തില്‍ പ്രവേശിച്ചത്. പേടകവുമായി ബന്ധം നഷ്ടമായെന്നും റിപ്പോര്‍ട്ടുകളുണ്ട്. എന്നാല്‍ റഷ്യ ഇക്കാര്യം സ്ഥിരീകരിച്ചിട്ടില്ല.

സ്‌കൂളില്‍ പരിശോധനക്ക് എത്തിയ വിദ്യാഭ്യാസ വകുപ്പ് ഉദ്യോഗസ്ഥരെ സ്‌കൂളിലേക്ക് പ്രവേശിക്കാന്‍ അനുവദിക്കാത്ത അധ്യാപികക്ക് സസ്‌പെന്‍ഷന്‍. മലപ്പുറം കാരക്കുന്ന് പഴേടം എ.എല്‍.പി സ്‌കൂള്‍ അധ്യാപിക സിദ്റഹതുല്‍ മുന്‍തഹയെയാണ് സസ്‌പെന്റ് ചെയ്തത്.

സ്‌കൂളില്‍ പരിശോധനക്ക് എത്തിയ മഞ്ചേരി എഇഓ ,ബിപിഓ ,നൂണ്‍ മീല്‍ സൂപ്പര്‍വൈസര്‍ എന്നിവരെ ഇന്നലെ അധ്യാപിക സിദ്റഹതുല്‍ മുന്‍തഹ തടയുകയായിരുന്നു. സ്‌കൂള്‍ ഗേറ്റ് പൂട്ടി ഏറെ നേരം ഇവരെ പുറത്ത് നിര്‍ത്തി. തുടര്‍ന്ന് ഉപജില്ലാ വിദ്യാഭ്യാസ ഓഫിസറാണ് നടപടിയെടുത്തത്.

പരീക്ഷ നടത്തിപ്പിലെ ക്രമക്കേട് ,ഉച്ചഭക്ഷണ വിതരണം തടസ്സപ്പെടുത്തല്‍ ,വിദ്യാഭ്യാസ വകുപ്പ് ഉദ്യോഗസ്ഥരെ തടഞ്ഞു വെക്കല്‍ എന്നിവ ചൂണ്ടിക്കാട്ടിയാണ് നടപടി. സ്‌കൂളില്‍ എസ്.എസ് .കെ മുഖാന്തിരം നല്‍കിയ ചോദ്യപ്പേപ്പര്‍ ഉപയോഗിക്കാതെ അനധികൃതമായി ചോദ്യപ്പേപ്പര്‍ ഉപയോഗിച്ചതായും കണ്ടെത്തിയിട്ടുണ്ട്.

പേരാവൂര്‍: ശാന്തിനികേതന്‍ ഇംഗ്ലീഷ് സ്‌കൂളില്‍ പച്ചക്കറി കൃഷി ആരംഭിച്ചു. ചടങ്ങ് പേരാവൂര്‍ കൃഷി ഓഫീസര്‍ സാന്ദ്ര പച്ചക്കറി തൈ നട്ടു കൊണ്ട് ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പാള്‍ റിജി രാമചന്ദ്രന്‍, വൈസ് പ്രിന്‍സിപ്പാള്‍ മേരി ജോണി, വൈഗ പ്രദീപ് തുടങ്ങിയവര്‍ സംസാരിച്ചു. മദര്‍ പി ടി എ പ്രസിഡണ്ട് അനിയമ്മ മാത്യു, മറ്റു പി ടി എ എക്‌സിക്യൂട്ടീവ് അംഗങ്ങള്‍ എന്നിവര്‍ പങ്കെടുത്തു.

കേളകം: ഇന്ത്യയെ സംരക്ഷിക്കുക എന്ന മുദ്രാവാക്യമുയര്‍ത്തി വിവിധ സംഘടനകളുടെ നേതൃത്വത്തില്‍ കേളകത്ത് സ്‌നേഹകൂട്ടായ്മ സംഘടിപ്പിച്ചു. സ്‌നേഹ കൂട്ടായ്മ ജനാധിപത്യ മഹിള അസോസിയേഷന്‍ പേരാവൂര്‍ ഏരിയ സെക്രട്ടറി ജിജി ജോയ് ഉദ്ഘാടനം ചെയ്തു. രജനി പ്രശാന്തന്‍ അധ്യക്ഷയായിരുന്നു. തൊഴിലുറപ്പ് തൊഴിലാളി യൂണിയന്‍ ജില്ലാ പ്രസിഡണ്ട് തങ്കമ്മ സ്‌കറിയ, ബീന ഉണ്ണി എന്നിവര്‍ സംസാരിച്ചു.

ബ്രഹ്മപുരം മാലിന്യ പ്ലാന്റിലെ ബയോമൈനിംഗ് കരാറില്‍ തീരുമാനമെടുക്കാതെ കോര്‍പ്പറേഷന്‍. കരാര്‍ യോഗ്യത നേടിയ കമ്പനിയുടെ നടത്തിപ്പ് കോര്‍പ്പറേഷന്‍ പ്രതിനിധി സംഘം നേരിട്ട് കണ്ട് പരിശോധിച്ച ശേഷമാകും അന്തിമതീരുമാനം. ഉയര്‍ന്ന മാലിന്യ സംസ്‌കരണ നിരക്ക് പ്രതിപക്ഷം ചോദ്യം ചെയ്തതോടെയാണ് നടപടികള്‍ നീളുന്നത്. തീപ്പിടുത്തമുണ്ടായി 5 മാസം പിന്നിട്ടുമ്പോഴാണ് ബയോമൈനിംഗിന് ഇനി ആരെന്ന ചര്‍ച്ചകള്‍ സജീവമാകുന്നത്. 8 കമ്പനികള്‍ ടെണ്ടറില്‍ പങ്കെടുത്തെങ്കിലും രണ്ടെണ്ണമാണ് യോഗ്യത നേടിയത്. പുനൈയിലെ ഭൂമി ഗ്രീന്‍ എനര്‍ജിക്കാണ് കൂടുതല്‍ സാധ്യത. ടണ്ണിന് 1699 രൂപ വെച്ചാണ് കരാര്‍. മറ്റൊരു കമ്പനിയായ സിഗ്മ ഗ്ലോബല്‍ എന്‍വയോണ്‍ സൊലുഷന്‍സിന് ടണ്ണിന് 4640 രൂപയും. ടണ്ണിന് 1156 രൂപ നീരക്കില്‍ 55 കോടി രൂപയ്ക്കായിരുന്നു സോണ്ടയുമായുള്ള കരാര്‍. ഭൂമി ഗ്രീനുമായുള്ള കരാര്‍ അംഗീകരിച്ചാല്‍ 119 കോടി രൂപയാകും ആകെ തുക. വലിയ നിരക്കില്‍ തിരക്ക് കൂട്ടി കമ്പനിയെ ഏല്‍പിക്കുന്നതിലാണ് പ്രതിപക്ഷത്തിന്റെ ആക്ഷേപം. മാലിന്യം വലിയ അളവില്‍ കരാര്‍ നല്‍കുമ്പോള്‍ വേണ്ട മുന്നൊരുക്കങ്ങള്‍ ഇല്ലെന്നും പരാതിയുണ്ട്. നേരത്തെ സോണ്ടാ ഇന്‍ഫ്രാടെക്ക് 25 ശതമാനം മാത്രം ബയോമൈനിംഗ് പൂര്‍ത്തിയാക്കിയപ്പോഴായിരുന്നു ബ്രഹ്മപുരത്ത് തീപ്പിടുത്തം ഉണ്ടായത്. ബയോമൈനിംഗ് ഒരിക്കല്‍ ചുവട് പിഴച്ചതിനാല്‍ കരുതലോടെയാണ് കോര്‍പ്പറേഷന്റെ തുടര്‍ നീക്കങ്ങള്‍. ഭരണപക്ഷ പ്രതിപക്ഷ കൗണ്‍സിലര്‍മാരും,വിദഗ്ധരും ഉള്‍പ്പെടുന്ന 15 അംഗ സംഘം പുനൈയിലെ ഭൂമി ഗ്രീന്‍ പ്ലാന്റ് സന്ദര്‍ശിക്കും. 16 മാസമെന്ന കുറഞ്ഞ സമയത്തില്‍ ബയോമൈനിംഗ് പൂര്‍ത്തിയാക്കുമെന്നാണ് വാഗ്ദാനം.