മട്ടന്നൂര്‍ നഗരസഭ തിരഞ്ഞെടുപ്പ്; 38811 വോട്ടര്‍മാര്‍ ശനിയാഴ്ച ബൂത്തിലേക്ക്
മട്ടന്നൂര്‍: നഗരസഭ പൊതുതിരഞ്ഞെടുപ്പിന്റെ വോട്ടെടുപ്പ് ആഗസ്റ്റ് 20 ശനിയാഴ്ച രാവിലെ 7 മുതല്‍ വൈകിട്ട് 6 മണി വരെ നടക്കും. വോട്ടര്‍ പട്ടികയില്‍ ആകെ 38811 വോട്ടര്‍മാരുണ്ട്. 18201 പുരുഷന്മാര്‍, 20608 സ്ത്രീകള്‍, രണ്ട് ട്രാന്‍സ്‌ജെന്‍ഡറുകള്‍. ഇലക്ട്രോണിക് വോട്ടിംഗ് മെഷീനുകളും തിരഞ്ഞെടുപ്പ് സാമഗ്രികളും വെള്ളിയാഴ്ച ഉച്ചയോടെ മട്ടന്നൂര്‍ എച്ച്.എസ്.എസില്‍ നിന്ന് സെക്ടറല്‍ ഓഫീസര്‍മാര്‍ ഏറ്റുവാങ്ങി പോളിംഗ് ബൂത്തുകളില്‍ എത്തിച്ചു. വിതരണത്തിന് പൊതുനിരീക്ഷക ആര്‍ കീര്‍ത്തി മേല്‍നോട്ടം വഹിച്ചു. വൈകിട്ടോടെ ബൂത്തുകള്‍ വോട്ടെുപ്പിന് സജ്ജമായി. ഓരോ വാര്‍ഡിലും ഒന്ന് വീതം 35 പോളിംഗ് ബൂത്തുകളാണുള്ളത്. ആകെയുള്ള 35 വാര്‍ഡുകളിലായി 111 സ്ഥാനാര്‍ഥികളാണ് ജനവിധി തേടുന്നത്-49 പുരുഷന്മാരും 62 സ്ത്രീകളും. 18 വാര്‍ഡുകള്‍ സ്ത്രീകള്‍ക്കും ഒരെണ്ണം പട്ടികജാതി വിഭാഗത്തിനും സംവരണം ചെയ്തിട്ടുണ്ട്. ഓരോ ബൂത്തിലും ഒരു പ്രിസൈഡിംഗ് ഓഫീസര്‍, ഒരു ഫസ്റ്റ് പോളിംഗ് ഓഫീസര്‍, രണ്ട് പോളിംഗ് ഓഫീസര്‍മാര്‍, ഒരു പോളിംഗ് അസിസ്റ്റന്റ് എന്നിങ്ങനെ അഞ്ച് പേരാണ് ഉള്ളത്. 175 പോളിംഗ് ഉദ്യോഗസ്ഥരെയും റിസര്‍വ് ഉദ്യോഗസ്ഥരെയുമാണ് നിയോഗിച്ചിട്ടുള്ളത്.
