Kerala news

വരള്‍ച്ച നേരിടുന്നതിന് ബന്ധപ്പെട്ട ഓരോ വകുപ്പും തദ്ദേശസ്ഥാപനങ്ങളും ആവശ്യമായ മുന്നൊരുക്കവും മുന്‍കരുതല്‍ നടപടികളും ഒരാഴ്ചയ്ക്കകം പൂര്‍ത്തിയാക്കണമെന്ന് ജില്ലാ ദുരന്ത നിവാരണ അതോറിറ്റി യോഗത്തില്‍ ജില്ലാകലക്ടര്‍ അരുണ്‍ കെ വിജയന്‍ നിര്‍ദ്ദേശിച്ചു. വരും ദിവസങ്ങളില്‍ വേനല്‍ ഇനിയും കടുക്കുമെന്നാണ് മുന്നറിയിപ്പ്. അതിനാല്‍ ജാഗ്രതയോടെ ഈ സാഹചര്യത്തെ കാണണമെന്നും കലക്ടര്‍ പറഞ്ഞു. ജില്ലയില്‍ 13 തദ്ദേശസ്ഥാപനങ്ങളിലാണ് നിലവില്‍ വരള്‍ച്ചയും കുടിവെള്ള ക്ഷാമവും റിപോര്‍ട്ട് ചെയ്തിട്ടുള്ളത്. ചപ്പാരപ്പടവ്, ചെറുപുഴ, ചിറക്കല്‍, കണിച്ചാര്‍, കാങ്കോല്‍-ആലപ്പടമ്പ്, കേളകം, കീഴല്ലൂര്‍, നടുവില്‍, ന്യൂമാഹി, പെരിങ്ങോം-വയക്കര, രാമന്തളി, പാനൂര്‍, ശ്രീകണ്ഠാപുരം എന്നിവയാണവ. ഈ സംഖ്യയും കൂടാനാണ് സാധ്യത.
വിവിധ വകുപ്പുകള്‍ വരള്‍ച്ചയെ നേരിടുന്നതിന് നടത്തേണ്ട പ്രവര്‍ത്തനങ്ങളും യോഗം നിര്‍ദ്ദേശിച്ചു. കുടിവെള്ളക്ഷാമ സാധ്യതയുള്ള പ്രദേശങ്ങള്‍ മുന്‍കൂട്ടി കണ്ടെത്തി പഞ്ചായത്ത് തലത്തില്‍ കുടിവെള്ള വിതരണം നടത്താനുള്ള ചുമതല തദ്ദേശ സ്വയംഭരണ വകുപ്പിനാണ്. പ്രാദേശികമായി കുടിവെള്ള ലഭിക്കുന്നതിനുള്ള തണ്ണീര്‍ പന്തലുകള്‍ സ്ഥാപിക്കുക, കിയോസ്‌കുകള്‍ പരിശോധിച്ച് പുനരുജ്ജീവിപ്പിക്കുക, ടാങ്കര്‍ ലോറികളിലെ ജലവിതരണം, അതിനായി ഫില്ലിംഗ് സ്റ്റേഷനുകള്‍ ഒരുക്കല്‍, ജലസ്രോതസ്സുകളുടെ പുനരുജ്ജീവനം, ജലമലിനീകരണമില്ലെന്നുറപ്പ് വരുത്തല്‍, പൊതുകിണറുകളുടെ സംരക്ഷണം; പുനരുജ്ജീവനം, തൊഴിലുറപ്പ് തൊഴിലുകളുടെ സമയക്രമീകരണം, പരിധിയിലുള്ള ആരോഗ്യ സ്ഥാപനങ്ങളില്‍ മരുന്നുകള്‍ ഉറപ്പ് വരുത്തല്‍, ബോധവല്‍ക്കരണം എന്നിവയും തദ്ദേശ സ്വയംഭരണ വകുപ്പ് നിര്‍വ്വഹിക്കണം.
വേനല്‍ക്കാല രോഗ ബോധവല്‍ക്കരണം, ആശുപത്രികളിലേയും ആരോഗ്യ കേന്ദ്രങ്ങളിലേയും സമയക്രമീകരണം, ആവശ്യമായ മരുന്നുകളും ഉപകരണങ്ങളും ലഭ്യമാക്കല്‍,ഒ ആര്‍ എസ് , ശുദ്ധജലം ഐസ് പാക്ക് എന്നിവ പി എച്ച് സി കളിലും മറ്റ് ആശുപത്രികളിലും ഉറപ്പ് വരുത്തല്‍. കടുത്ത ചൂടിലുള്ള ആരോഗ്യപ്രശ്നങ്ങളും രോഗങ്ങളും നിരീക്ഷിക്കല്‍ തുടങ്ങിയവ ആരോഗ്യ വകുപ്പ് നിര്‍വ്വഹിക്കണം.
വാര്‍ഷിക പരീക്ഷാ സമയത്ത് കുട്ടികള്‍ക്ക് കുടിവെള്ളം ലഭ്യമാക്കുക, പരീക്ഷ ഹാളുകളിലും ക്ലാസ് മുറികളിലും ഫാനുകളും വായുസഞ്ചാരവും ഉറപ്പ് വരുത്തുക, മുഴുവന്‍ വിദ്യാലയങ്ങളിലും വാട്ടര്‍ ബെല്‍ സമ്പ്രദായം നടപ്പാക്കുക, ഒ ആര്‍ എസ്, ജീവന്‍ രക്ഷാമരുന്നുകള്‍ ലഭ്യമാക്കുക. സൂര്യാഘാതമേറ്റാല്‍ ചെയ്യേണ്ട പ്രഥമ ശുശ്രൂഷ സംബന്ധിച്ച് അധ്യാപകരേയും ജീവിക്കാരെയും ബോധവല്‍ക്കരിക്കുക, അസംബ്ലികള്‍, പി ഇ ടി പിരീഡുകള്‍ നിയന്ത്രിക്കുക, യൂണിഫോമില്‍ ഇളവ് നല്‍കുക, സ്വകാര്യ വിദ്യാഭ്യാസ സ്ഥാപനങ്ങള്‍ ഇത്തരം നിര്‍ദ്ദേശങ്ങള്‍ പാലിക്കുന്നുവെന്നുറപ്പ് വരുത്തുക തുടങ്ങിയവയാണ് വിദ്യാഭ്യാസ വകുപ്പ് ചെയ്യണ്ടത്.
തൊഴില്‍ സമയക്രമീകരണം, തൊഴിലാളികള്‍ക്ക് വിശ്രമസ്ഥലം ശുദ്ധജല ലഭ്യത, ഐസ് പാക്കറ്റ്, ഒ ആര്‍ എസ് തുടങ്ങിയവ ലഭ്യമാക്കല്‍, അതിഥി തൊഴിലാളികള്‍ക്കായി ഇതര ഭാഷകളില്‍ നിര്‍ദേശങ്ങള്‍ നല്‍കുക. തൊഴിലിടങ്ങളിലെ പരിശോധന തുടങ്ങിയവ ലേബര്‍ ഓഫീസ് നിര്‍വ്വഹിക്കണം.
ജലക്ഷാമം രൂക്ഷമായ കൃഷിയിടങ്ങള്‍ കണ്ടെത്തല്‍, ജലസ്രോതസുകളുടെ പുനരുജജീവനം, ഡ്രിപ് ഇറിഗേഷന്‍ പ്രോത്സാഹിപ്പിക്കല്‍, ബോധവല്‍ക്കരണം തുടങ്ങിയവ കൃഷിവകുപ്പ് നടത്തണം
കുടിവെള്ളക്ഷാമ സാധ്യതയുള്ള പ്രദേശങ്ങള്‍ കണ്ടെത്തല്‍, കുടിവെള്ള വിതരണം നടപ്പിലാക്കല്‍, മഴയുടെ അളവ്, അണക്കെട്ടുകളിലേയും ജലലഭ്യത, അന്തരീക്ഷതാപനില നിരീക്ഷിക്കല്‍, കണ്‍ട്രോള്‍ റൂം ഒരുക്കല്‍, കനാല്‍ മാര്‍ഗ്ഗമുള്ള ജലസേചനം, ബോധവല്‍ക്കരണ ക്യാമ്പയിന്‍ എന്നിവ വാട്ടര്‍ അതോറിറ്റി നിര്‍വ്വഹിക്കണം
ആശുപത്രികള്‍ പോലുള്ള പ്രധാന സ്ഥാപനങ്ങള്‍ക്ക് ഒരു കാരണവശാലും ഒരു സമയത്തും വൈദ്യുതി മുടങ്ങുന്നില്ലെന്ന് ഉറപ്പ് വരുത്തുക, പകല്‍ 11 മുതല്‍ മൂന്ന് മണി വരെ വൈദ്യുതി മുടങ്ങാതെ നോക്കുക, ലൈന്‍ മാന്‍മാര്‍ മറ്റ് ജോലിക്കാര്‍ എന്നിവര്‍ക്ക് സൂര്യാഘാതം, സൂര്യതാപം സംബന്ധിച്ച അറിയിപ്പ് നല്‍കുക തുടങ്ങിയ കാര്യങ്ങള്‍ വൈദ്യുതി വകുപ്പ് നിര്‍വ്വഹിക്കണം. അങ്കണവാടികള്‍ ഉഷണകാലത്ത് തുറന്ന് പ്രവര്‍ത്തിക്കണം. എത്തിയ കുഞ്ഞുങ്ങളെ പകല്‍ സമയം പുറത്ത് വിടരുത്. വനത്തില്‍ താമസിക്കുന്ന ആദിവാസികളുടെ സുരക്ഷ ഉറപ്പ് വരുത്തണം. ട്രാഫിക് ഡ്യൂട്ടിയിലുളള പൊലീസ് ഉദ്യോഗസ്ഥരെ മൂന്ന് മണിക്കൂര്‍ ഷിഫ്റ്റ് അടിസ്ഥാനത്തില്‍ മാറ്റണം. വെയിലത്ത് ജോലി ചെയ്യുന്ന പൊലീസ് ഉദ്യോഗസ്ഥര്‍ കൂളിംഗ് ഗ്ലാസുകള്‍, കൈമുട്ട് വരെ ഇറക്കമുള്ള ഗ്ലൗസുകള്‍ എന്നിവ ധരിക്കണം, മൃഗങ്ങള്‍ക്ക് ആവശ്യമായ ജല ലഭ്യത ഉറപ്പാക്കണം. മൃഗാശുപത്രികളില്‍ ആവശ്യമായ മരുന്നുകള്‍ ഉറപ്പ് വരുത്തണം.
വനിതാ ശിശുക്ഷേമ വകുപ്പ്, സാമൂഹ്യ നീതി വകുപ്പ്, പട്ടികജാതി പട്ടിക വര്‍ഗ്ഗ വകുപ്പ്, പൊലീസ്, മൃഗസംരക്ഷണ വകുപ്പ്, വനം വന്യജീവി സംരക്ഷണ വകുപ്പ്, അഗ്നിരക്ഷാസേന, ടൂറിസം, ഐ ആന്റ് പി ആര്‍ ഡി തുടങ്ങിയ വകുപ്പുകള്‍ വേനല്‍കാല മുന്നൊരുക്കത്തിന്റെ ഭാഗമായി ചെയ്യേണ്ട കാര്യങ്ങളും യോഗം നിര്‍ദ്ദേശിച്ചു. കലക്ട്രേറ്റ് കോണ്‍ഫറന്‍സ് നാളില്‍ ചേര്‍ന്ന യോഗത്തില്‍
ജില്ലാ പഞ്ചായത്ത് പ്രസിഡണ്ട് പി പി ദിവ്യ, സബ് കലക്ടര്‍ സന്ദീപ് കുമാര്‍, ഡി എഫ് ഒ വൈശാഖ്, ഡി എം ഡെപ്യൂട്ടി കലക്ടര്‍ കെ അജേഷ്, മറ്റ് ജനപ്രതിനിധികള്‍ ഉദ്യോഗസ്ഥര്‍ എന്നിവര്‍ പങ്കെടുത്തു.

സംസ്ഥാനത്ത് വന്യജീവി ആക്രമണത്തില്‍ രണ്ടു മരണം. കോഴിക്കോടും തൃശൂരുമാണ് വന്യജീവി ആക്രമണം ഉണ്ടായത്. കോഴിക്കോട് കക്കയത്ത് കാട്ടുപോത്തിന്റെ ആക്രമണത്തില്‍ പാലാട്ട് അബ്രഹാം(62) ആണ് മരിച്ചത്. തൃശൂരില്‍ കാട്ടാനയുടെ ആക്രമണത്തില്‍ തൃശ്ശൂര്‍ വാച്ച്മരത്തെ ഊരു മൂപ്പന്‍ രാജന്റെ ഭാര്യ വത്സ (62)യും മരിച്ചു.

കൃഷിയിടത്തില്‍വെച്ചാണ് അബ്രഹാമിനുനേരെ കാട്ടുപോത്തിന്റെ ആക്രമണമുണ്ടായത്. പരിക്കേറ്റ അബ്രഹാമിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചെങ്കിലും മരിക്കുകയായിരുന്നു. തൃശൂര്‍ വാച്ച്മരത്ത് കാടിനുള്ളില്‍ വനവിഭവങ്ങള്‍ ശേഖരിക്കാന്‍ പോകുന്നതിനിടെയാണ് വത്സയ്ക്കുനേരെ കാട്ടാന ആക്രമണം ഉണ്ടായത്. പെരിങ്ങല്‍ക്കുത്തില്‍ വെച്ചാണ് കാട്ടാന ആക്രമണം ഉണ്ടായത്.

ഇരിട്ടി :അതിരൂക്ഷമായ വന്യമൃഗശല്യം മൂലം മനുഷ്യവാസം അസാധ്യമായിരിക്കുന്ന സാഹചര്യത്തിലും വന്യമൃഗങ്ങളുടെ ആക്രമണത്തില്‍ ഓരോ ദിവസവും നിരവധി മനുഷ്യര്‍ കൊല്ലപ്പെടുകയും ഗുരുതരമായി പരിക്കേല്‍ക്കുകയും കൃഷി നശിപ്പിക്കപ്പെടുകയും ചെയ്യുന്നതു മൂലം കര്‍ഷകര്‍ക്ക് മണ്ണില്‍ പണിയെടുത്ത് ജീവിക്കാന്‍ കഴിയാത്ത സാഹചര്യത്തിലും, ഡല്‍ഹി കര്‍ഷക പ്രക്ഷോഭത്തിന് പിന്‍തുണയര്‍പ്പിച്ചും സ്വതന്ത്ര കര്‍ഷക സംഘടനകളുടെ ദേശീയ ഐക്യവേദിയായ രാഷ്ട്രീയ കിസാന്‍ മഹാസംഘ് സംസ്ഥാന തല പ്രക്ഷോഭം ആരംഭിക്കുന്നു.

വന്യമൃഗശല്യത്തിന് ശാശ്വത പരിഹാരം ഉണ്ടാക്കുക, വനത്തിന്റെ വ്യാപ്തിയിലധികമുള്ള വന്യമൃഗങ്ങളെ വെടിവെച്ച് കൊല്ലുക, കൊല്ലപ്പെടുന്നവരുടെ അനന്തരാവകാശികളുടെ നഷ്ടപരിഹാരം 50 ലക്ഷമാക്കി വര്‍ദ്ധിപ്പിക്കുക തുടങ്ങി വിവിധ ആവശ്യങ്ങള്‍ ഉന്നയിച്ച് കൊണ്ട് 8ന് വെള്ളിയാഴ്ച 3 മണി മുതല്‍ 10ന് ഞായറാഴ്ച വൈകുന്നേരം 5 മണി വരെ സംസ്ഥാന ഭാരവാഹികള്‍ ഇരിട്ടിയില്‍ നടത്തുന്ന 50 മണിക്കൂര്‍ ഉപവാസത്തോടെ പ്രക്ഷോഭം ആരംഭിക്കും.

ഉപവാസ സമരം 3 മണിക്ക് തലശേരി ആര്‍ച്ച് ബിഷപ്പ് ഡോ. ജോസഫ് പാംപ്ലാനി ഉദ്ഘാടനം ചെയ്യും. വൈകുന്നേരം 5 മണിക്ക് ഉപവാസ പന്തലില്‍ ലോക വനിതാ ദിനത്തോടനുബന്ധിച്ച് വനിതാ സമ്മേളനം നടത്തും.

ശനിയാഴ്ച 3.30 ന് ഡല്‍ഹി കര്‍ഷക പ്രക്ഷോഭത്തിന് പിന്തുണയര്‍പ്പിച്ച് നടക്കുന്ന ഐക്യദാര്‍ഡ്യ സമ്മേളനം പ്രമുഖ സാഹിത്യകാരന്‍ കല്ലറ്റ നാരായണന്‍ ഉല്‍ഘാടനം ചെയ്യും .

ഞായറാഴ്ച നടക്കുന്ന സമാപന സമ്മേളനം കണ്ണര്‍ ബിഷപ്പ് ഡോ.അലക്‌സ് വടക്കും തല ഉദ്ഘാടനം ചെയ്യും. ഉപവാസ പന്തലില്‍ മുഴുവന്‍ സമയവും ജപ്തി നടപടികള്‍ നേരിടുന്നവര്‍ക്കുള്ള ഹെല്‍പ്പ് ഡസ്‌ക് ഉണ്ടായിരിക്കുമെന്നും സംസ്ഥാന ചെയര്‍മാന്‍ അഡ്വ. ബിനോയ് തോമസ് അറിയിച്ചു.

പേരാവൂര്‍: ബ്ലോക്ക് പഞ്ചായത്ത്,പേരാവൂര്‍ താലൂക്ക് ആശുപത്രി എന്നിവയുടെ നേതൃത്വത്തില്‍ മുരിങ്ങോടി ജനകീയ ആരോഗ്യകേന്ദ്രത്തില്‍ വച്ച് ക്യാന്‍സര്‍ നിര്‍ണ്ണയ ക്യാമ്പ് സംഘടിപ്പിച്ചു.പേരാവൂര്‍ ബ്ലോക്ക് പഞ്ചായത്ത് പ്രസിഡന്റ് കെ സുധാകരന്‍ ഉദ്ഘാടനം ചെയ്തു.വൈസ് പ്രസിഡന്റ് പ്രീത ദിനേശന്‍ അധ്യക്ഷത വഹിച്ചു.താലൂക്ക് ആശുപത്രി സൂപ്രണ്ട് ഡോ.അശ്വിന്‍ ,ബ്ലോക്ക് പഞ്ചായത്തംഗം പ്രീതി ലത,ഡോ.അബ്ദുള്‍ റഷീദ് ,ഹെല്‍ത്ത് ഇന്‍സ്‌പെക്ടര്‍ കെ മോഹനന്‍ തുടങ്ങിയവര്‍ സംസാരിച്ചു.

ഇരിട്ടി:ആറളം ഫാമില്‍ നിന്നും വെള്ളി, ശനി, ഞായര്‍ ദിവസങ്ങളില്‍ കാട്ടാനകളെ തുരത്തുന്നതിനാലും ആറളം ഫാമില്‍ നിരോധനാജ്ഞ പ്രഖ്യാപിച്ചതിനാലും കുട്ടികളുടെ സുരക്ഷ പരിഗണിച്ച് ആറളം ഫാം സ്‌കൂളില്‍ പത്താം തരം വിദ്യാര്‍ത്ഥികള്‍ക്കായി നടന്നു വരുന്ന റസിഡന്‍ഷ്യല്‍ ക്യാമ്പും ഹയര്‍ സെക്കന്ററി വിദ്യാര്‍ത്ഥികള്‍ക്കായി നടന്നു വരുന്ന പകല്‍ ക്യാമ്പും ഞായറാഴ്ച വരെ നിര്‍ത്തിവച്ചതായി പ്രധാനാധ്യാപകന്‍ അറിയിച്ചു.

പേരാവൂര്‍:തുണ്ടിയില്‍ ശ്രീ മുച്ചിലോട്ട് ഭഗവതി ക്ഷേത്രം കളിയാട്ട മഹോത്സവം മാര്‍ച്ച് 20,21,22 തീയതികളില്‍ നടക്കും.20 ന് വൈകുന്നേരം 3.30 ന് കലവറ നിറക്കല്‍ ഘോഷയാത്ര,തിരുവായുധമെഴുന്നള്ളത്ത്,കുഴിയടുപ്പില്‍ തീക്കൂട്ടല്‍,21 ന് പുലര്‍ച്ചെ നരമ്പില്‍ ഭഗവതി തോറ്റം,കണ്ണങ്ങോട്ട് ഭഗവതി,പുള്ളൂര്‍കാളി എന്നീ തെയ്യക്കോലങ്ങള്‍,വൈകുന്നേരം മുച്ചിലോട്ട് ഭഗവതിയുടെ തോറ്റം,കൂടിയാട്ടം,താലപ്പൊലി,വിവിധ തെയ്യങ്ങളുടെ വെള്ളാട്ടം,കുറിച്യരുടെ ഗോത്ര ആരാധന,22 ന് പുലര്‍ച്ചെ നരമ്പില്‍ ഭഗവതി,മുച്ചിലോട്ട് ഭഗവതിയുടെ കൊടിയില തോറ്റം ,രാവിലെ കണ്ണങ്ങോട്ട് ഭഗവതി,വിഷ്ണുമൂര്‍ത്തി,പുള്ളൂര്‍ക്കാളി ,ഉച്ചക്ക് മേലേരി കയ്യേല്‍ക്കല്‍,മുച്ചിലോട്ട് ഭഗവതിയുടെ തിരുമുടി നിവരല്‍,ഭഗവതിയുടെ തിരുനൃത്തം,രാത്രി തിരുമുടി ആറാടിക്കല്‍

സ്വര്‍ണവില സര്‍വകാല റെക്കോര്‍ഡില്‍.സ്വര്‍ണവില പവന് 47,560ലെത്തി. 560 രൂപയുടെ വര്‍ധനവാണ് ചൊവാഴ്ചയുണ്ടായത്. ഗ്രാമിന് 80 രൂപ കൂടി 5945 രൂപയുമായി. ഇതോടെ ഒരു വര്‍ഷത്തിനിടെ പവന്റെ വിലയിലുണ്ടായ വര്‍ധന ഏഴായിരത്തോളം രൂപയാണ്.

ആഗോള വിപണിയിലെ വില വര്‍ധനവാണ് രാജ്യത്തെ കുതിപ്പിന് കാരണം. ഒരു ട്രോയ് ഔണ്‍സിന് 2,115 ഡോളര്‍ നിലവാരത്തിലാണ് സ്പോട് ഗോള്‍ഡില്‍ വ്യാപാരം നടക്കുന്നത്.

സംസ്ഥാനത്ത് എട്ട് ജില്ലകളില്‍ സാധാരണയെക്കാള്‍ 2 മുതല്‍ 4 °C വരെ താപനില ഉയരാന്‍ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ആലപ്പുഴ, കൊല്ലം, കോട്ടയം, തൃശൂര്‍, പാലക്കാട്, കണ്ണൂര്‍, എറണാകുളം, കോഴിക്കോട് ജില്ലകളില്‍ യല്ലോ അലേര്‍ട്ട് പ്രഖ്യാപിച്ചു. ആലപ്പുഴ, കൊല്ലം, കോട്ടയം, തൃശൂര്‍, പാലക്കാട്, കണ്ണൂര്‍ ജില്ലകളില്‍ ഉയര്‍ന്ന താപനില 37°C വരെയും എറണാകുളം, കോഴിക്കോട് ജില്ലകളില്‍ ഉയര്‍ന്ന താപനില 36°C വരെയും വര്‍ധിക്കാന്‍ സാധ്യതയുണ്ട്.

പകല്‍ ചൂടിനൊപ്പം രാത്രി താപനിലയും ഉയരുകയാണ്. പലയിടങ്ങളിലും രാത്രി താപനില നിലവില്‍ 28°c നും 30°c ഇടയിലാണ്. ഉയര്‍ന്ന ചൂട് സൂര്യാഘാതം, സൂര്യാതപം, നിര്‍ജലീകരണം തുടങ്ങി നിരവധി ഗുരുതരമായ ആരോഗ്യപ്രശ്‌നങ്ങള്‍ക്ക് കാരണമാകുമെന്നതിനാല്‍ പൊതുജനങ്ങള്‍ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി വ്യക്തമാക്കി. കേരളതീരത്തും, തെക്കന്‍ തമിഴ്‌നാട് തീരത്തും ഉയര്‍ന്ന തിരമാലക്കും കടലാക്രമണത്തിനും സാധ്യതയുള്ളതിനാല്‍ മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണം.

പേരാവൂര്‍:പേരാവൂര്‍ ബ്ലോക്ക് പഞ്ചായത്ത്,പേരാവൂര്‍ താലൂക്ക് ആശുപത്രി എന്നിവയുടെ നേതൃത്വത്തില്‍ ഫൈറ്റ് ക്യാന്‍സര്‍ പദ്ധതി പ്രകാരം മാര്‍ച്ച് 5 ന് ചൊവ്വാഴ്ച മുരിങ്ങോടി ജനകീയ ആരോഗ്യകേന്ദ്രത്തില്‍ വച്ച് ക്യാന്‍സര്‍ നിര്‍ണ്ണയ ക്യാമ്പ് സംഘടിപ്പിക്കും.പേരാവൂര്‍ ബ്ലോക്ക് പഞ്ചായത്ത് പ്രസിഡന്റ് കെ സുധാകരന്‍ ഉദ്ഘാടനം ചെയ്യും.

ഇരിട്ടി:സിറ്റി ലയണ്‍സ് ക്ലബ്ബ് എടത്തൊട്ടി ഡി പോള്‍ കോളജുമായി സഹകരിച്ച് വിദ്യാര്‍ഥികള്‍ക്ക് വേണ്ടി ലഹരി വിരുദ്ധ ബോധവല്‍ക്കരണ സെമിനാര്‍ നടത്തി.ഫാ. ജോര്‍ജ് പൊട്ടയില്‍ ഉദ്ഘാടനം ചെയ്തു. ഇരിട്ടി സിറ്റി ലയണ്‍സ് പ്രസിഡന്റ് അഡ്വ :ആന്റണി പുളിയന്‍ മാക്കല്‍ അധ്യക്ഷത വഹിച്ചു. ഡോ. ജി ശിവരാമകൃഷ്ണന്‍ ക്ലാസ് നയിച്ചു. സിറ്റി ലയണ്‍സ് സെക്രട്ടറി ബിജു എന്‍ കെ,ബെന്നി പാലക്കല്‍ അശോകന്‍,
വിദ്യാര്‍ത്ഥി പ്രതിനിധി റിഷാള്‍ എന്നിവര്‍ സംസാരിച്ചു.തലശേരി ജനറല്‍ ഹോസ്പിറ്റല്‍ ബ്ലഡ് സെന്ററുമായി സഹകരിച്ച് രക്ത ദാനവും നടത്തി