ഇരിട്ടി:വള്ളിത്തോട് 32 ലെ പുളിങ്ങോട് ഹൗസിൽ പുളിയങ്ങോടൻ മുഹമ്മദ്കുട്ടി- സൈനബ ദമ്പതികളുടെ മകൻ മുഹമ്മദ് അഫ്സൽ (19) ആണ് മരണപ്പെട്ടത്. ഉളിയിൽ ദാറുൽ ഹിദായ സ്ഥാപനത്തിൽ പഠനം നടത്തുന്ന വിദ്യാർത്ഥിയാണ്.കഴിഞ്ഞ വെള്ളിയാഴ്ച്ച ഇരിട്ടി -മട്ടന്നൂർ റൂട്ടിൽ വളോരയിൽ വെച്ചായിരുന്നു അപകടം. മട്ടന്നൂർ ഭാഗത്തേക്ക് അഫ്സൽസഞ്ചരിച്ച സ്കൂട്ടറിൽ ഏതിരെ വരികയായിരുന്ന ടിപ്പർ ലോറി ഇടിക്കുകയായിരുന്നു. ഗുരുതരമായി പരിക്കേറ്റ അഫ്സൽ കണ്ണൂർ സ്വകാര്യാശുപത്രിയിൽ ചികിൽസയിലിരിക്കെ ബുധനാഴ്ച്ചരാത്രി യോടെയാണ് മരണപ്പെട്ടത്. സഹോദരങ്ങൾ: ഫവാസ് ( യുഎഇ) , മിസ്റിയ, ആമിനഖബറടക്കം നാളെ
സംസ്ഥാനത്ത് ഇന്ന് സ്വർണവില കുത്തനെ കുറഞ്ഞു. തുടർച്ചയായാ നാല് ദിവസത്തെ വർദ്ധനവിന് ശേഷം ഇന്നലെ സ്വർണവില മാറ്റമില്ലാതെ തുടർന്നിരുന്നു. ഇന്ന് ഒറ്റയടിക്ക് 1200 രൂപയാണ് കുറഞ്ഞത്. ഒരു പവൻ സ്വർണത്തിന് ഇന്നത്തെ വിപണി വില 71840 രൂപ
ജൂൺ തുടങ്ങിയതിന്ശേഷം 1,680 രൂപയോളമാണ് സ്വർണത്തിന് വർദ്ധിച്ചത്. ഇന്നത്തെ വമ്പൻ ഇടിവ് വിവാഹ വിപണിക്ക് ഉണർവേകും. ഇന്ന് രു ഗ്രാം 22 കാരറ്റ് സ്വർണത്തിന്റെ വിപണി വില 150 രൂപ കുറഞ്ഞു. ഇന്നത്തെ വില 8980 രൂപയാണ്. ഒരു ഗ്രാം 18 കാരറ്റ് സ്വർണത്തിന്റെ വിപണി വില 125 രൂപ വർധിച്ചിരുന്നു. ഇന്നത്തെ വിപണി വില 7365 രൂപയാണ്. ഒരു ഗ്രാം സാധാരണ വെള്ളിയുടെ വില 113 രൂപയാണ്.
കാലവര്‍ഷം ദുര്‍ബലമായതോടെ സംസ്ഥാനത്തെ വൈദ്യുതി ഉപഭോഗം അപ്രതീക്ഷിതമായി കുതിച്ചുയരുന്നു. ആവശ്യത്തിന് വൈദ്യുതിയില്ലാതായതോടെ വൈദ്യുതി ബോര്‍ഡിന് വ്യാഴാഴ്ച ലോഡ് ഷെഡ്ഡിങ്ങും നടപ്പാക്കേണ്ടിവന്നു. രാത്രി ഒന്‍പതുമുതല്‍ വെള്ളിയാഴ്ച പുലര്‍ച്ചെ ഒരുമണിവരെ പലസമയങ്ങളിലായാണ് ലോഡ് ഷെഡ്ഡിങ് ഏര്‍പ്പെടുത്തിയത്. ഇതിന്റെ ആഘാതം കുറയ്ക്കാന്‍ വൈദ്യുതി ബോര്‍ഡ് ആഭ്യന്തര ജലവൈദ്യുതോത്പാദനം സമീപകാല റെക്കോഡിലേക്ക് ഉയര്‍ത്തുകയും ചെയ്തു.
വ്യാഴാഴ്ച രാത്രി പവര്‍ എക്സ്ചേഞ്ചില്‍നിന്ന് കേരളം 1000 മെഗാവാട്ട് ആവശ്യപ്പെട്ടെങ്കിലും കിട്ടിയത് 75 മെഗാവാട്ട് മാത്രമായിരുന്നു. ഉപഭോഗം ഉയര്‍ന്നാല്‍ വരുംദിവസങ്ങളിലും ലോഡ് ഷെഡ്ഡിങ് വേണ്ടിവരുമെന്നാണ് സൂചന.
സംസ്ഥാനത്തെ രാത്രിവൈദ്യുതി ഉപഭോഗത്തില്‍ അഞ്ചുദിവസം കൊണ്ട് 1.29 കോടി യൂണിറ്റിന്റെ വര്‍ധനയാണുണ്ടായത്. ജൂണ്‍ ഒന്നിന് 7.31 കോടി യൂണിറ്റായിരുന്നു വൈദ്യുതി ഉപഭോഗം. വ്യാഴാഴ്ച ഇത് 8.60 കോടി യൂണിറ്റായി. മഴക്കാലമായതിനാല്‍ ഉപഭോഗം ഇത്രയും ഉയരുമെന്ന് ബോര്‍ഡ് പ്രതീക്ഷിച്ചിരുന്നില്ല. ഇതിനാല്‍ പുറമേനിന്ന് വൈദ്യുതി എത്തിക്കാന്‍ മുന്‍കൂട്ടി ശ്രമിച്ചിരുന്നുമില്ല.
വ്യാഴാഴ്ച സമീപകാല ചരിത്രത്തിലെ റെക്കോഡായ 4.09 കോടി യൂണിറ്റിലേക്കാണ് ജലവൈദ്യുതോത്പാദനം ഉയര്‍ന്നത്. ജൂണ്‍ ഒന്നിന് ഇത് 3.85 കോടി യൂണിറ്റായിരുന്നു.
കടുത്ത വേനലില്‍പ്പോലും 2.3 മുതല്‍ 2.8 കോടി യൂണിറ്റുവരെ മാത്രമേ വൈദ്യുതി ബോര്‍ഡിന്റെ ഉത്പാദനം ഉണ്ടാകാറുള്ളൂ. വ്യാഴാഴ്ച രാത്രിയാവശ്യം നിറവേറ്റാന്‍ ജലവൈദ്യുതോത്പാദനവും മതിയാവില്ലെന്നു കണ്ടതോടെയാണ് ലോഡ് ഷെഡ്ഡിങ്ങിലേക്ക് പോയത്. ഉപഭോഗത്തില്‍ 300 മെഗാവാട്ടിന്റെ കുറവ് വരുത്താന്‍ ഓരോ പ്രദേശത്തിന്റെ സ്വഭാവമനുസരിച്ച് 10 മിനിറ്റുമുതല്‍ അരമണിക്കൂര്‍വരെയായിരുന്നു ലോഡ് ഷെഡ്ഡിങ്.
ബലിപെരുന്നാളിനോട് അനുബന്ധിച്ച് സര്‍ക്കാര്‍ അവധി ശനിയാഴ്ചത്തേക്ക് മാറ്റി. സര്‍ക്കാരിന്റെ അവധി കലണ്ടറില്‍ നാളെ ആയിരുന്നു. മാസപ്പിറവി വൈകിയതിനാല്‍ ബലിപെരുന്നാള്‍ മറ്റന്നാളാണെന്ന് മതപണ്ഡിതര്‍ വ്യക്തമാക്കിയിരുന്നു. ഈ സാഹചര്യത്തിലാണ് അവധി ദിവസവും മാറ്റിയത്.
ഇന്നത്തെ കാലത്ത്, ഷോർട്ട്-ഫോം വീഡിയോകൾ വളരെ ജനപ്രിയമായിക്കൊണ്ടിരിക്കുകയാണ്. അതിലൊന്നാണ് യൂട്യൂബ് ഷോർട്ട്സ്. ലോകമെമ്പാടുമുള്ള കോടിക്കണക്കിന് ഉപയോക്താക്കൾ യൂട്യൂബിൽ ഷോർട്ട്സ് വീഡിയോകൾ കാണാൻ ഇഷ്‍ടപ്പെടുന്നു. ഉപയോക്താക്കളുടെ സൗകര്യാർത്ഥം കമ്പനി കാലാകാലങ്ങളിൽ പുതിയ സവിശേഷതകൾ അവതരിപ്പിച്ചുകൊണ്ടിരിക്കുന്നു. ഇപ്പോഴിതാ യൂട്യൂബ് ഷോർട്ട്സിൽ ഒരു പുതിയ ഫീച്ചര്‍ വന്നിരിക്കുന്നു. ഗൂഗിൾ ലെൻസ് ആണ് ഈ പുതിയ ഫീച്ചർ. ഇത് വീഡിയോയിൽ കാണിച്ചിരിക്കുന്ന കാര്യങ്ങളെക്കുറിച്ച് തിരയുന്നത് എളുപ്പമാക്കി. ഈ സവിശേഷതയെക്കുറിച്ച് വിശദമായി അറിയാം.ഷോർട്ട്സ് വീഡിയോകളിൽ ഗൂഗിൾ ലെൻസിന്‍റെ സവിശേഷത നൽകാൻ തുടങ്ങിയതോടെ ഇപ്പോൾ ഷോർട്ട്സ് കാണുമ്പോൾ, അതിൽ കാണുന്ന ഏത് കാര്യത്തെക്കുറിച്ചോ, സ്ഥലത്തെക്കുറിച്ചോ അല്ലെങ്കിൽ മറ്റ് കാര്യത്തെക്കുറിച്ചോ ഉള്ള വിവരങ്ങൾ നിങ്ങൾക്ക് തിരയാൻ കഴിയും.ഈ ഫീച്ചർ ആക്‌സസ് ചെയ്യാൻ, നിങ്ങൾ ഒരു ഷോർട്ട്സ് വീഡിയോ കാണുമ്പോൾ അത് താൽക്കാലികമായി നിർത്തുക. മുകളിലുള്ള മെനുവിൽ നിങ്ങൾക്ക് ലെൻസ് ഓപ്ഷൻ കാണാം. അത് തിരഞ്ഞെടുക്കുക. ഇതിനുശേഷം, സ്ക്രീനിൽ ദൃശ്യമാകുന്ന എന്തിനെക്കുറിച്ചും അതിൽ സ്പർശിച്ചുകൊണ്ടോ, ചുറ്റും ഒരു വര വരച്ചോ അല്ലെങ്കിൽ ഹൈലൈറ്റ് ചെയ്തുകൊണ്ടോ നിങ്ങൾക്ക് തിരയാൻ കഴിയും. ഇത് തിരയൽ ഫലങ്ങൾക്ക് മുകളിൽ ദൃശ്യമാകും. ഒരു സ്ഥലം, പ്രശസ്തമായ കെട്ടിടം, വസ്തു, അല്ലെങ്കിൽ കാഴ്ചക്കാർക്ക് കൂടുതലറിയാൻ താൽപ്പര്യമുള്ള മറ്റെന്തെങ്കിലും എന്നിവ തിരിച്ചറിയുന്നതിന് ഈ ഫീച്ചർ സഹായിക്കുന്നു.ഈ സവിശേഷത ഇപ്പോഴും ബീറ്റ ഘട്ടത്തിലാണെങ്കിലും, ലെൻസ് തിരയൽ ഫലങ്ങളിൽ പരസ്യങ്ങൾ കാണിക്കില്ല. അടിക്കുറിപ്പ് വിവർത്തനം ചെയ്യുന്നതിനായി ഈ സവിശേഷതയിൽ ഒരു ബട്ടണും നൽകിയിട്ടുണ്ട്. യൂട്യൂബ് ഷോപ്പിംഗിലേക്കോ പണമടച്ചുള്ള ഉൽപ്പന്ന പ്രമോഷനുകളിലേക്കോ ഉള്ള അഫിലിയേറ്റ് ലിങ്കുകൾ അടങ്ങിയിരിക്കുന്ന ഷോർട്‍സ് വീഡിയോകളിൽ ഈ ഫീച്ചർ ലഭ്യമാകില്ല.
ഉള്ളടക്കം തിരയുന്ന രീതി കൂടുതൽ ആക്‌സസ് ചെയ്യാവുന്നതും സംവേദനാത്മകവുമാക്കുക എന്നതാണ് ഈ സവിശേഷതയുടെ ലക്ഷ്യമെന്ന് യൂട്യൂബിന്റെ മാതൃ കമ്പനിയായ ഗൂഗിൾ പറയുന്നു. ഇതോടെ, പ്ലാറ്റ്‌ഫോമിൽ നിന്ന് പുറത്തുപോകാതെ തന്നെ കാഴ്ചക്കാർക്ക് വീഡിയോ കാണാനും അതുമായി ബന്ധപ്പെട്ട വിവരങ്ങൾ എളുപ്പത്തിൽ നേടാനും സാധിക്കും. ഈ ആഴ്ച അവസാനത്തോടെ എല്ലാ ഉപഭോക്താക്കൾക്കും ഈ ബീറ്റ സവിശേഷത ലഭിക്കും. ടിക് ടോക്ക്, ഇൻസ്റ്റാഗ്രാം റീൽസ് പോലുള്ള മറ്റ് ജനപ്രിയ പ്ലാറ്റ്‌ഫോമുകളുമായി മത്സരിക്കാൻ ഈ പുതിയ ഫീച്ചർ യൂട്യൂബ് ഷോർട്ട്സിനെ സഹായിക്കും. കാരണം അവയിൽ നിലവിൽ അത്തരമൊരു വിഷ്വൽ സെർച്ച് ഫീച്ചർ ഇല്ല.
പുതിയ അധ്യയന വർഷം ആരംഭിക്കാനിരിക്കേ ജില്ലയിലെ വിദ്യാലയങ്ങളിൽ രാസലഹരി ഉൾപ്പെടെ എല്ലാ വിധത്തിലുമുള്ള ലഹരികൾക്കും മയക്കുമരുന്നിനും എതിരെ കർക്കശ പരിശോധനയും നടപടിയും സ്വീകരിക്കാൻ ജില്ലാ വികസന സമിതി യോഗം തീരുമാനിച്ചു. ജില്ലയിൽ ഹോട്ട്‌സ്‌പോട്ടുകളായി കണ്ടെത്തിയ വിദ്യാലയങ്ങളിൽ പ്രത്യേക നിരീക്ഷണം നടത്തും. പുകയിലയും ലഹരി പദാർഥങ്ങളും വിൽക്കുന്ന കടകൾ കണ്ടെത്തിയാൽ തദ്ദേശ സ്ഥാപനങ്ങളും എക്‌സൈസ് വകുപ്പും പോലീസും സംയുക്ത പരിശോധന നടത്തി ലൈസൻസ് റദ്ദാക്കുന്നത് ഉൾപ്പെടെയുള്ള കർശന നിയമ നടപടികൾ സ്വീകരിക്കും. ലഹരിക്കെതിരായ നടപടികൾക്ക് വിദ്യാർഥികളിൽനിന്ന് വിവരം ശേഖരിക്കും. എല്ലാ വിദ്യാലയങ്ങളിലും സ്‌കൂൾ തുറന്ന് ഒരാഴ്ചയ്ക്കകം ജാഗ്രതാ സമിതികൾ ചേരാൻ യോഗം തീരുമാനിച്ചു. കെ വി സുമേഷ് എംഎൽഎയാണ് യോഗത്തിൽ വിഷയം ഉന്നയിച്ചത്. രജിസ്‌ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളിയുടെ ആസ്തി വികസന ഫണ്ടിൽ ഉൾപ്പെടുത്തി കണ്ണൂർ കലക്ടറേറ്റ് വളപ്പിൽ 30 ലക്ഷം രൂപ ചെലവിൽ നിർമ്മിക്കുന്ന സൗഹൃദ കേന്ദ്രത്തിന്റെ നിർമ്മാണം ജൂൺ 10ന് ആരംഭിക്കുമെന്ന് പൊതുമരാമത്ത് കെട്ടിടവിഭാഗം എക്‌സിക്യൂട്ടീവ് എഞ്ചിനീയർ അറിയിച്ചു. ഉളിക്കൽ പോലീസ് സ്റ്റേഷൻ പരിധിയിൽ ഉളിക്കൽ മുതൽ കോളിത്തട്ട് വരെയുള്ള ഭാഗത്ത് കണിയാർ വയൽ ഉളിക്കൽ റോഡിൽ മഞ്ചക്കരി മണ്ണേരി ഭാഗത്ത് ജല ജീവൻ മിഷൻ പൈപ്പുകൾ സ്ഥാപിക്കുന്നതിനായി എടുത്ത കുഴികൾ അടച്ചുവെന്നും ഇത്തരം പ്രവൃത്തികൾ എല്ലാവിധ മുൻകരുതലും എടുത്തശേഷമാണ് ചെയ്യാറുള്ളതെന്നും ജലവിഭവ വകുപ്പ് എക്‌സിക്യൂട്ടീവ് എഞ്ചിനീയർ അറിയിച്ചു. കൂത്തുപറമ്പ് നിയോജക മണ്ഡലത്തിലെ രണ്ട് നഗരസഭകളിലും അഞ്ച് പഞ്ചായത്തുകളിലും കുടിവെള്ളക്ഷാമം രൂക്ഷമായ പ്രദേശങ്ങളിൽ കുടിവെള്ളം എത്തിക്കുന്നതിനുള്ള നടപടികൾ സ്വീകരിച്ചതായി തദ്ദേശ വകുപ്പ് ജോയിന്റ് ഡയറക്ടറും പാനൂർ നഗരസഭാ സെക്രട്ടറിയും അറിയിച്ചു. തൃപ്പങ്ങോട്ടൂർ, പാട്യം പഞ്ചായത്തുകളിൽ അനുവദിച്ച അംബേദ്കർ സെറ്റിൽമെന്റ് പദ്ധതിയിൽ ഉൾപ്പെട്ട പാട്യം പഞ്ചായത്തിലെ കടവിൽ മുണ്ടയാട് നഗർ പ്രവൃത്തികൾക്ക് പഞ്ചായത്ത് ഡിപിആർ ലഭ്യമാക്കിയിട്ടുണ്ടന്ന് ഐ.ടി.ഡി.പി.സി പ്രൊജക്റ്റ് ഓഫീസർ അറിയിച്ചു. എന്നാൽ നരിക്കോട്ട് മല നഗർ പ്രവൃത്തിക്ക് ജൂൺ 15 നു മുൻപ് ഡി.പി.ആർ ലഭ്യമാക്കണമെന്ന് ജില്ലാകളക്ടർ നിർദ്ദേശിച്ചു. നടാൽ പാലം നിർമ്മാണവുമായി ബന്ധപ്പെട്ട പ്രവൃത്തികൾക്ക് പദ്ധതിപ്രദേശത്ത് ട്രൈബൽ സെറ്റിൽമെന്റ് ഇല്ലെന്നുള്ള സർട്ടിഫിക്കറ്റ് ലഭ്യമാക്കുന്നതിന് നടപടികളെടുക്കാൻ ഐ.ടി.ഡി.പി ക്ക് ജില്ലാ കളക്ടർ നിർദ്ദേശം നൽകി.
എം.എൽ.എ ഫണ്ട് ഉപയോഗിച്ചുള്ള പ്രവൃത്തികൾക്ക് സമയബന്ധിതമായി എസ്റ്റിമേറ്റ് നൽകുന്നതിന് നിർവ്വഹണ ഉദ്യോഗസ്ഥർക്ക് നിർദ്ദേശം നൽകിയതായി എൽ.എസ്.ജി.ഡി ജോയിന്റ് ഡയറക്ടർ അറിയിച്ചു. കാലവർഷത്തിൽ ഉണ്ടാകുന്ന വിളനാശത്തിന് ധനസഹായം നൽകുന്നതിനുള്ള നടപടികൾ ത്വരിതപ്പെടുത്തണമെന്ന് കൃഷിവകുപ്പിന് കളക്ടർ നിർദ്ദേശം നൽകി. ദേശീയപാത വികസനത്തിന്റെ ഭാഗമായി ഉണ്ടായ കൃഷി നാശത്തിന് അടിയന്തിര നടപടിയെടുക്കാൻ ദേശീയപാത പ്രൊജക്റ്റ് ഓഫീസർക്ക് കളക്ടർ നിർദ്ദേശം നൽകി. ജില്ലാ കലക്ടർ അരുൺ കെ.വിജയൻ അധ്യക്ഷനായ യോഗത്തിൽ എം.എൽ.എമാരായ കെ.പി.മോഹനൻ, കെ.വി. സുമേഷ് എന്നിവർ സംസാരിച്ചു. സബ് കളക്ടർ കാർത്തിക് പാണിഗ്രഹി, അസിസ്റ്റന്റ് കളക്ടർ എഹ്‌തെദ മുഫാസിർ എന്നിവർ പങ്കെടുത്തു.
ഏഴിമല നാവിക അക്കാദമിയിൽ നിന്നും 186 ട്രെയിനികൾ പരിശീലനം പൂർത്തിയാക്കി ഇന്ത്യൻ നാവിക സേനയുടെ ഭാഗമായി. പാസ്സിംഗ് ഔട്ട് പരേഡിൽ ദക്ഷിണ നാവിക കമാൻഡ് ഫ്ലാഗ് ഓഫീസർ കമാൻഡിംഗ്-ഇൻ-ചീഫ് വൈസ് അഡ്മിറൽ വി ശ്രീനിവാസ് അഭിവാദ്യം സ്വീകരിച്ചു. ഇന്ത്യൻ നേവൽ അക്കാദമി കോഴ്‌സ്, നേവൽ ഓറിയന്റേഷൻ കോഴ്‌സ് (എക്സ്റ്റെൻഡഡ്), നേവൽ ഓറിയന്റേഷൻ കോഴ്‌സ് (റെഗുലർ), നേവൽ ഓറിയന്റേഷൻ കോഴ്‌സ് (കോസ്റ്റ് ഗാർഡ്) എന്നിവയിലെ കേഡറ്റുകൾ, മിഡ്ഷിപ്മെൻ ഉൾപ്പെടെ 186 പേരാണ് പരിശീലനം പൂർത്തിയാക്കിയത്. ഇവരിൽ ബംഗ്ലാദേശ്, ശ്രീലങ്ക, ടാൻസാനിയ രാജ്യങ്ങളിൽ നിന്നുള്ള കേഡറ്റുകളും ഉൾപ്പെടുന്നു. ആഗോളതലത്തിൽ ഇന്ത്യയുടെ നാവിക പരിശീലന മികവ് പ്രദർശിപ്പിക്കുന്ന വേദിയാണിതെന്നും പരിശീലനം പൂർത്തിയായവർക്ക് അഭിനന്ദനങ്ങൾ നേരുന്നതായും കമാൻഡിംഗ്-ഇൻ-ചീഫ് വൈസ് അഡ്മിറൽ വി ശ്രീനിവാസ് പറഞ്ഞു. തുടർന്ന് അദ്ദേഹം പരേഡ് അവലോകനം ചെയ്തു.
ബി. ടെക് കോഴ്സിനുള്ള രാഷ്ട്രപതിയുടെ സ്വർണ്ണ മെഡലിന് നകുൽ സക്സേന അർഹനായി. ഏറ്റവും മികച്ച കേഡറ്റിനുള്ള രാജ്യ രക്ഷാ മന്ത്രി ട്രോഫി ടാൻസാനിയയിൽ നിന്നുള്ള കിയോണ്ടോ മൈക്കൽ ഫ്ലോറൻസിന് ലഭിച്ചു. മുൻ എൻഡിഎ ട്രെയിനികളിൽ മെറിറ്റിൽ മികവ് തെളിയിച്ച നിതിൻ എസ് നായർ, പവാർ രോഹിത് പ്രകാശ്, രജനീഷ് സിംഗ്, കൊമ്മു ഡേവിഡ് എന്നിവർ പുരസ്‌കാരങ്ങൾ ഏറ്റുവാങ്ങി. അക്കാദമിക്, സർവീസ് വിഷയങ്ങൾ, ഔട്ട്ഡോർ പരിശീലനം, ഡ്രിൽ, സ്പോർട്സ്, പാഠ്യേതര പ്രവർത്തനങ്ങൾ എന്നിവയുൾപ്പെടെ വിവിധ പരിശീലനങ്ങളിൽ മികവ് പ്രകടിപ്പിച്ചതിന് ചീറ്റ സ്‌ക്വാഡ്രണിന് കമാൻഡന്റിന്റെ ചാമ്പ്യൻ സ്‌ക്വാഡ്രൺ ബാനർ ലഭിച്ചു. എഫ്ഒസിഎൻസി സൗത്ത് ഐഎൻഎ കമാൻഡന്റ്മാരും പരിശീലകരുടെ മാതാപിതാക്കളും പരിശീലനം പൂർത്തിയാക്കിയ ഓഫീസർമാരെ സ്ട്രിപ്പുകൾ അണിയിച്ചു. ഇവർ നാവികസേനാ കപ്പലുകളിലും ഇതര സ്ഥാപനങ്ങളിലും സവിശേഷ പരിശീലനം നേടും.
ഐഎൻഎ കമാൻഡന്റ് വൈസ് അഡ്മിറൽ സി.ആർ പ്രവീൺ നായർ, ബ്രഹ്മോസ് എയറോസ്പേസ് ഡയറക്ടർ ജനറൽ ഡോ. ജെയ്തീർഥ് ആർ. ജോഷി, അസിസ്റ്റന്റ് ചീഫ് ഓഫ് മെറ്റീരിയൽ(എൻ എസ് എം) ആർഎഡിഎം സി രഘുറാം, ചീഫ് സ്റ്റാഫ് ഓഫീസർ (എസ് എൻ സി) ആർഎഡിഎം ബി എസ് സോധി, മറ്റ് മുതിർന്ന ഉദ്യോഗസ്ഥർ, പരിശീലകരുടെ കുടുംബാംഗങ്ങൾ തുടങ്ങിയവർ പങ്കെടുത്തു.
സംസ്ഥാനത്ത് മഴ മുന്നറിയിപ്പിൽ മാറ്റം. നാല് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. കണ്ണൂർ, കാസർകോട്, എറണാകുളം, ആലപ്പുഴ ജില്ലകളിലാണ് ഓറഞ്ച് അലർട്ട്. മറ്റ് ജില്ലകളിൽ യെല്ലോ അലർട്ടാണ്. അതിതീവ്ര മഴ മുന്നറിയിപ്പുകളില്ലെങ്കിലും ഒറ്റപ്പെട്ടയിടങ്ങളിൽ ശക്തമായ മഴ കിട്ടിയേക്കും. കഴിഞ്ഞ ദിവസങ്ങളിലെ അത്ര ശക്തമായ മഴയ്ക്ക് ഇനി സാധ്യതയില്ല. ഈ സീസണിലെ ആദ്യ തീവ്രമഴ ദിവസങ്ങൾ അവസാനിക്കുന്നുവെന്നാണ് കാലാവസ്ഥ നിരീക്ഷണ കേന്ദ്രത്തിന്റെ വിലയിരുത്തൽ.
പ്രളയ സാധ്യത മുന്നറിയിപ്പ്
അപകടകരമായ രീതിയിൽ ജലനിരപ്പുയരുന്നതിനെ തുടർന്ന് സംസ്ഥാന ജലസേചന വകുപ്പ് ചില നദികളിൽ ഓറഞ്ച്, മഞ്ഞ അലർട്ടുകൾ പ്രഖ്യാപിച്ചു. ഈ നദികളുടെ തീരത്തുള്ളവർ ജാഗ്രത പാലിക്കണം. പത്തനംതിട്ട: അച്ചൻകോവിൽ (കോന്നി GD സ്റ്റേഷൻ), മണിമല (തോന്ദ്ര – വള്ളംകുളം സ്റ്റേഷൻ) കാസറഗോഡ്: ഉപ്പള നദി (ഉപ്പള സ്റ്റേഷൻ), നീലേശ്വരം (ചെയ്യം റിവർ സ്റ്റേഷൻ), മൊഗ്രാൽ (മധുർ സ്റ്റേഷൻ), ഷിറിയ (പുത്തിഗെ സ്റ്റേഷൻ)
യാതൊരു കാരണവശാലും നദികളിൽ ഇറങ്ങാനോ നദി മുറിച്ചു കടക്കാനോ പാടില്ല. തീരത്തോട് ചേർന്ന് താമസിക്കുന്നവർ ജാഗ്രത പാലിക്കേണ്ടതാണ്. അധികൃതരുടെ നിർദേശാനുസരണം പ്രളയ സാധ്യതയുള്ളയിടങ്ങളിൽ നിന്ന് മാറി താമസിക്കാൻ തയ്യാറാവണം.
പ്രധാന നാളികേര ഉത്പാദകരാജ്യങ്ങളായ ഇൻഡൊനീഷ്യയും ഫിലിപ്പീൻസും ആഭ്യന്തര നാളികേര വ്യവസായമേഖലയെ ശക്തിപ്പെടുത്താൻ പച്ചത്തേങ്ങ കയറ്റുമതിയിലേർപ്പെടുത്തിയ നിയന്ത്രണം തേങ്ങയുടെ ആഗോള ആവശ്യകത ഉയർത്തുന്നു. ഫിലിപ്പീൻസിൽ പച്ചത്തേങ്ങ കയറ്റുമതിക്ക് നിരോധനമുണ്ട്. പുതിയ സാഹചര്യത്തിൽ ഇത് കർശനമാക്കി.
ആറുമാസത്തേക്ക് പച്ചത്തേങ്ങ കയറ്റുമതി നിരോധിക്കാൻ ഇൻഡൊനീഷ്യൻ വ്യവസായമന്ത്രാലയവും ശുപാർശ ചെയ്തു. കയറ്റുമതിചെയ്യുന്ന മറ്റ് നാളികേര ഉത്പന്നങ്ങൾക്ക് ചുങ്കമേർപ്പെടുത്താനും ശുപാർശയുണ്ട്. ഈ നീക്കം ആഗോളവിപണിയിൽ നാളികേരക്ഷാമത്തിന് വഴിയൊരുക്കുമെന്ന ആശങ്കയുയർന്നതോടെ ചൈനയുൾപ്പെടെയുള്ള രാജ്യങ്ങൾ തേങ്ങ വാങ്ങിക്കൂട്ടുന്നുണ്ട്. ഇത് നാളികേരവിലയിലും പ്രതിഫലിച്ചുതുടങ്ങി. റെക്കോഡ് വിലയാണ് തേങ്ങയ്ക്കും കൊപ്രയ്ക്കുമെല്ലാം.
കഴിഞ്ഞ സെപ്റ്റംബർമുതൽ തേങ്ങവില കൂടിയത് കർഷകർക്ക് ഗുണകരമാണെങ്കിലും കൂടിയ വിലയും ആവശ്യത്തിന് തേങ്ങ കിട്ടാത്തതും നാളികേരാധിഷ്ഠിത വ്യവസായമേഖലയെ സാരമായി ബാധിച്ചിട്ടുണ്ട്. ഇത് പരിഹരിക്കാനാണ് ഫിലിപ്പീൻസിന്റെയും ഇൻഡൊനീഷ്യയുടെയും ശ്രമം.
കയറ്റുമതി നിരോധിച്ച് വ്യവസായങ്ങൾക്കാവശ്യമായ തേങ്ങ രാജ്യത്ത് ലഭ്യമാക്കുകയാണ് ലക്ഷ്യം. ഇതിനെതിരേ കർഷകരിൽനിന്ന് പ്രതിഷേധമുയർന്നിട്ടുണ്ട്. തേങ്ങ കയറ്റുമതിചെയ്യാതെ രാജ്യത്തുമാത്രം ഉപയോഗിക്കുമ്പോൾ വിലയിടിയുമെന്നാണ് കർഷകരുടെ വാദം. കുതിച്ചുയർന്ന വെളിച്ചെണ്ണവിലയുൾപ്പെടെ നിയന്ത്രിക്കുകയെന്ന ലക്ഷ്യവും ഈ രാജ്യങ്ങൾക്കുണ്ട്.
ലോകത്തെ നാളികേര കയറ്റുമതിയുടെ ഏറിയപങ്കും വഹിക്കുന്ന ഇൻഡൊനീഷ്യ, ഫിലിപ്പീൻസ് എന്നീരാജ്യങ്ങൾ കയറ്റുമതിയിൽ നിയന്ത്രണമേർപ്പെടുത്തുമ്പോൾ ആഗോള നാളികേരവിപണിയിൽ പ്രതിസന്ധിയുറപ്പാണ്. ഈ രാജ്യങ്ങളുമായി താരതമ്യംചെയ്യുമ്പോൾ ഇന്ത്യയിൽനിന്നുള്ള നാളികേര കയറ്റുമതി വളരെ കുറവാണ്. യൂറോപ്പ്, അമേരിക്ക, ഗൾഫ് രാജ്യങ്ങൾ, ചൈന എന്നിവയാണ് ലോകത്തെ പ്രധാന നാളികേര ഇറക്കുമതിരാജ്യങ്ങൾ.
തേങ്ങയിൽ കണ്ണുവെച്ച് ചൈന
നാളികേരക്കൃഷി പേരിനുമാത്രമേ ഉള്ളൂവെങ്കിലും ചൈന നാളികേരാധിഷ്ഠിത വ്യവസായത്തിൽ ശക്തമായ സാന്നിധ്യമാണ്. മറ്റുരാജ്യങ്ങളിൽനിന്ന് തേങ്ങ ഇറക്കുമതിചെയ്താണ് വ്യവസായം. ചിരട്ടയിൽനിന്നുള്ള ഉത്തേജിത കരി ഇന്ത്യപോലും ചൈനയിൽനിന്ന് ഇറക്കുമതിചെയ്യുന്നുണ്ട്. കഴിഞ്ഞവർഷം ഇന്ത്യ ഇറക്കുമതിചെയ്ത ഉത്തേജിത കരിയുടെ 49 ശതമാനവും ചൈനയിൽനിന്നാണ്. ഫിലിപ്പീൻസിൽ തേങ്ങ കയറ്റുമതി നിരോധനം നിലനിൽക്കുമ്പോഴും ചൈനയിലേക്ക് അനധികൃതമായി കടത്താൻ കൊണ്ടുവന്ന 232 മില്ല്യൺ ഫിലിപ്പീൻസ് കറൻസി മൂല്യമുള്ള തേങ്ങ അടുത്തിടെ സെബു തുറമുഖത്തുനിന്ന് പിടികൂടിയിരുന്നു. ഇപ്പോൾ വിയറ്റ്‌നാമുൾപ്പെടെയുള്ള രാജ്യങ്ങളിൽനിന്ന് ചൈന കഴിയാവുന്നത്ര തേങ്ങ സംഭരിക്കുന്നുണ്ട്. ചൈനയുടെ ഈ വാരിക്കൂട്ടലും വിലയെ സ്വാധീനിച്ചു.
പച്ചത്തേങ്ങ, കൊപ്ര, ഉണ്ടക്കൊപ്ര, രാജാപ്പുർ കൊപ്ര, കൊട്ടത്തേങ്ങ എന്നീ നാളികേര ഇനങ്ങളുടെയെല്ലാം വില റെക്കാഡിലെത്തി.
വില ഇങ്ങനെ: ബ്രാക്കറ്റിൽ ഒരുവർഷംമുൻപുള്ള വില. (വില ക്വിന്റലിന്, കൊട്ടത്തേങ്ങയുടേത് ആയിരം എണ്ണത്തിന്).
ഇരിട്ടി:റോഡിലുണ്ടായിരുന്ന പോത്തിന് വാഹനമിടിച്ച് ഡ്രൈവറടക്കം 2 പേര്‍ക്ക് പരിക്ക്.പരിക്കളം സ്വദേശി മനീഷ്, ജോസഫ് എന്നിവരാണ് ഇരിട്ടി സ്വകാര്യാശുപത്രിയില്‍ ചികില്‍സ തേടിയത്.ഇന്ന് പുലര്‍ച്ചെ ഉളിയില്‍ ടൗണില്‍ വച്ചാണ് അപകടം .തലശ്ശേരിയില്‍ നിന്നും പരിക്കളത്തേക്ക് പോകുകയായിരുന്ന ഓട്ടോ ടാക്‌സിയാണ് അപകടത്തില്‍പ്പെട്ടത്. വാഹനത്തിന്റെ മുന്‍ഭാഗം തകര്‍ന്നു. കനത്ത മഴയില്‍ സമീപത്തെ പറമ്പില്‍ നിന്നുമാണ് പോത്ത് റോഡിലെത്തിയതെന്ന് പറയുന്നു. പോത്ത് അപടക സ്ഥലത്ത് വെച്ച് ചത്തു.
