latest news

കേരളപ്പിറവിയുടെ എഴുപതാം വാര്‍ഷികം കേരളത്തെ ഇന്ത്യയിലെ ഒന്നാമത്തെ സംസ്ഥാനമാക്കി മാറ്റാനുള്ള സ്വപ്നയാത്രയുടെ തുടക്കമാണെന്ന് മുഖ്യമന്ത്രി വി ഡി സതീശന്‍. നിയമസഭയിലെ ശങ്കര നാരായണന്‍ തമ്പി ഹാളില്‍ നടന്ന ‘ഫെസ്റ്റിവല്‍ ഓഫ് കേരളം 2026’ ന്റെ ലോഗോ പ്രകാശന ചടങ്ങില്‍ സംസാരിക്കുകയായിരുന്നു അദ്ദേഹം. കേരളത്തെ ഇന്നത്തെ നിലയിലേക്ക് ഉയര്‍ത്താന്‍ കഠിനാധ്വാനം ചെയ്ത എണ്ണമറ്റ നല്ല മനുഷ്യരെ അനുസ്മരിച്ച മുഖ്യമന്ത്രി, ഇനിയും കൂടുതല്‍ ഉയരങ്ങളിലേക്ക് നമ്മള്‍ വളരേണ്ടതുണ്ടെന്ന് ഓര്‍മിപ്പിച്ചു. ഒരുപാട് സ്വപ്നങ്ങള്‍ നെയ്തുകൂട്ടിയാണ് മുന്നോട്ട് പോകുന്നതെന്നും വിശ്രമമില്ലാത്ത കഠിനാധ്വാനത്തിലൂടെ മാത്രമേ അത് യാഥാര്‍ഥ്യമാക്കാനാകൂ എന്നും കൂട്ടിച്ചേര്‍ത്തു.

സംസ്ഥാന രൂപീകരണത്തിന്റെ ഏഴ് പതിറ്റാണ്ടുകള്‍ അടയാളപ്പെടുത്തുന്ന വാര്‍ഷിക ആഘോഷങ്ങളുടെ ആദ്യഘട്ടമായി ചെന്നൈ, ബെംഗളൂരു, മുംബൈ, ന്യൂഡല്‍ഹി, കൊല്‍ക്കത്ത നഗരങ്ങളില്‍ ‘ഫെസ്റ്റിവല്‍ കേരള’ സംഘടിപ്പിക്കും. കേരളത്തിന്റെ തനതായ കലാരൂപങ്ങളും സാംസ്‌കാരിക പാരമ്പര്യവും പ്രദര്‍ശിപ്പിക്കുന്നതിനൊപ്പം സംസ്ഥാനത്തേക്ക് കൂടുതല്‍ നിക്ഷേപങ്ങള്‍ ആകര്‍ഷിക്കാനും കേരളത്തെ ലോകത്തിന് മുന്നില്‍ അവതരിപ്പിക്കാനും നവംബര്‍ ഒന്നിന് ആരംഭിക്കുന്ന ഫെസ്റ്റിവല്‍ കേരളയിലൂടെ അവസരമൊരുങ്ങും.

രാജ്യത്തെ ഏറ്റവും ഉയര്‍ന്ന വിദ്യാഭ്യാസ നിലവാരം, മികച്ച ആരോഗ്യരംഗം, വ്യവസായ-സംരംഭകത്വ പുരോഗതി, തൊഴിലവസര സൃഷ്ടി, ഭദ്രമായ ധനസ്ഥിതി, ശക്തമായ ക്ഷേമ-വികസന പ്രവര്‍ത്തനങ്ങള്‍ എന്നിവയിലൂടെ കേരളത്തെ ലോകത്തിന്റെ മുന്‍നിരയിലേക്ക് നയിക്കാനാണ് സര്‍ക്കാര്‍ ലക്ഷ്യമിടുന്നത്. തനതായ കല, സാഹിത്യം, എഴുത്ത്, വായന എന്നിവ സംരക്ഷിച്ചു നിര്‍ത്തുമ്പോള്‍ തന്നെ, കേരളം ഇതുവരെ മുന്‍പന്തിയില്‍ നിന്ന മേഖലകളില്‍ ആ ആധിപത്യം തുടരുകയും പിന്നിലായ മേഖലകളില്‍ മുന്നിലേക്ക് കൈപിടിച്ചു കൊണ്ടുപോകുകയും ചെയ്യും. കേരളത്തെ പുതിയ ഉയരങ്ങളിലേക്ക് എത്തിക്കാനുള്ള ഈ കൂട്ടായ യത്‌നത്തിന് എല്ലാവരുടെയും പിന്തുണയുണ്ടാവണമെന്നും മുഖ്യമന്ത്രി അഭ്യര്‍ത്ഥിച്ചു.

സര്‍ക്കാര്‍ ഫണ്ടുകളുടെ വിനിയോഗം എങ്ങനെയെന്ന് അറിയാനുള്ള പൂര്‍ണ അവകാശം പൗരന്മാര്‍ക്കുണ്ടെന്നും അവകാശം വിനിയോഗിക്കാന്‍ ജനങ്ങള്‍ തയ്യാറാകണമെന്നും സംസ്ഥാന മുഖ്യവിവരാവകാശ കമ്മിഷണര്‍ വി. ഹരിനായര്‍. ദേശീയ വിവരാവകാശ വാരാചരണത്തിന്റെ ഭാഗമായി സംസ്ഥാന വിവരാവകാശ കമ്മിഷന്റെ ആഭിമുഖ്യത്തില്‍ വയനാട് പൂതാടി അങ്ങാടിശ്ശേരി ഉന്നതിയിലെ എം.പി.സി.യില്‍ നടന്ന വിവരാവകാശ ബോധവത്കരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വിവരാവകാശ നിയമം 2005 പ്രകാരം പൗരന്മാര്‍ക്ക് ലഭിക്കുന്ന അവകാശങ്ങളെക്കുറിച്ചും അവ ഫലപ്രദമായി വിനിയോഗിക്കേണ്ട രീതികളെക്കുറിച്ചും പൊതുജനങ്ങളില്‍ അവബോധം സൃഷ്ടിക്കുകയാണ് ലക്ഷ്യം. വിവരാവകാശ നിയമ പ്രകാരം സമര്‍പ്പിക്കുന്ന അപേക്ഷകള്‍ക്ക് സര്‍ക്കാര്‍ ഉദ്യോഗസ്ഥര്‍ 30 ദിവസത്തിനകം മറുപടി നല്‍കണം. മറുപടി നല്‍കുന്നതില്‍ വീഴ്ച വരുത്തുന്ന ഉദ്യോഗസ്ഥരില്‍ നിന്ന് നിയമ പ്രകാരം പിഴ ഈടാക്കാന്‍ വ്യവസ്ഥയുണ്ടെന്നും അദ്ദേഹം പറഞ്ഞു.

ടിഎസ്ബി ഫണ്ടുകള്‍ ശരിയായ രീതിയിലാണോ വിനിയോഗിക്കുന്നതെന്ന് പരിശോധിക്കാന്‍ ജനങ്ങള്‍ ജാഗ്രത പുലര്‍ത്തണമെന്ന് വിവരാവകാശ കമ്മിഷണര്‍ ഡോ. എം. ശ്രീകുമാര്‍ പറഞ്ഞു. വിവരാവകാശ അപേക്ഷകള്‍ നിയമം അനുശാസിക്കുന്ന രീതിയില്‍ സമര്‍പ്പിക്കേണ്ടതിന്റെ ആവശ്യകത സംബന്ധിച്ച് കമ്മിഷണര്‍ ഡോ. സോണിച്ചന്‍ പി. ജോസഫ് വിശദീകരിച്ചു. അപേക്ഷകള്‍ക്ക് നിശ്ചിത സമയത്തിനകം മറുപടി നല്‍കാതിരുന്നാല്‍ നിയമപ്രകാരം പ്രതിദിനം 250 രൂപ നിരക്കില്‍ പിഴ ചുമത്താന്‍ വ്യവസ്ഥയുണ്ടെന്ന് കമ്മിഷണര്‍ അഡ്വ. ടി.കെ. രാമകൃഷ്ണന്‍ പറഞ്ഞു. പ്രമോട്ടര്‍മാരുടെ നിയമനം, തൊഴില്‍, തൊഴിലുറപ്പ് വേതനം, വീടുകളുടെ അറ്റകുറ്റപണി പൂര്‍ത്തിയാക്കാതെ കരാറുകാര്‍ പിന്മാറുന്നത് ഉള്‍പ്പെടെയുള്ള വിവിധ വിഷയങ്ങളില്‍ ഉന്നതികളിലെ നിവാസികള്‍ സംശയങ്ങള്‍ ഉന്നയിച്ചു.

മുണ്ടക്കൈചൂരല്‍മല ദുരന്ത ബാധിതര്‍ക്ക് നഷ്ട പരിഹാരം അനുവദിച്ച് സര്‍ക്കാര്‍ ഉത്തരവ്. ദുരന്തത്തില്‍ നാശനഷ്ടങ്ങള്‍ നേരിട്ട വ്യാപാരികള്‍ക്കും വാണിജ്യ കെട്ടിട ഉടമകള്‍ക്കുമാണ് നഷ്ട പരിഹാരം അനുവദിച്ചത്. 7,19,99,400 രൂപയാണ് അനുവദിച്ചത്. കെട്ടിട നമ്പറുകള്‍ ഉള്ള 128 കടമുറികള്‍ 48 പേരുടെ പേരിലാണ് ഉള്ളത്. ഉടമകളായ 48 പേര്‍ക്കും ലൈസന്‍സുള്ള വാണിജ്യ സംരംഭകര്‍ക്കുമാണ് നഷ്ടപരിഹാരം നല്‍കുക. 28 പേരാണ് ലൈസന്‍സുള്ള വാണിജ്യ സംരംഭകര്‍. തുക ഉടനെ കൈമാറും.

ചേരാനല്ലൂര്‍ വാഹനാപകടക്കേസില്‍ പതിനേഴുകാരന്റെ പിതാവായ അഡീഷണല്‍ സെഷന്‍സ് ജഡ്ജിയുടെ അറസ്റ്റ് തടഞ്ഞ് ഹൈക്കോടതി. ജഡ്ജി സഹകരിക്കുന്നുണ്ടെന്നും എന്തിനാണ് അറസ്റ്റെന്നും കോടതി. തെളിവ് നശിപ്പിച്ചെങ്കില്‍ കണ്ടെത്തണമെന്നും കോടതി നിര്‍ദേശിച്ചു. അന്വേഷണ ഉദ്യോഗസ്ഥന് മുന്‍പില്‍ ഹാജരാവാന്‍ കോടതി നിര്‍ദേശം നല്‍കി.

വാഹനാപകടത്തിന് പിന്നാലെ പൊലീസ് സ്റ്റേഷനില്‍ നേരിട്ട് പോയതില്‍ കോടതിക്ക് അഡീഷണല്‍ സെഷന്‍സ് ജഡ്ജ് വിശദീകരണം നല്‍കിയിരുന്നു. പിതാവെന്ന നിലയിലാണ് പൊലീസ് സ്റ്റേഷനിലെത്തിയത്. ഔദ്യോഗിക ആവശ്യങ്ങള്‍ക്ക് പൊലീസ് സ്റ്റേഷനില്‍ പോകാനാണ് ജില്ലാ ജഡ്ജിയുടെ അനുമതി വേണ്ടതെന്നും ജഡ്ജിയുടെ വിശദീകരണം.

കായിക മേളയിലെ ഭക്ഷണത്തില്‍ പുഴുവിനെ കണ്ടെന്ന ആരോപണം ഉന്നയിച്ച കായിക അധ്യാപകന്‍ ജിജോ ജെയിംസിനെ അന്വേഷണ വിധേയമായി സസ്‌പെന്‍സ് ചെയ്തു. അടിസ്ഥാന രഹിതമായ ആരോപണമാണെന്നും ജിജോ ജെയിംസിനെ സസ്‌പെന്‍ഡ് ചെയ്യുകയാണെന്നും വിദ്യാഭ്യാസ വകുപ്പ് പുറത്തിറക്കിയ കുറിപ്പില്‍ അറിയിച്ചു. അധ്യാപകനെ നേരത്തെ അറസ്റ്റ് ചെയ്തിരുന്നു. പെരുമ്പാവൂര്‍ സ്വദേശിയാണ് ജിജോ ജെയിംസ്. ഇന്നലെ ഉച്ചയ്ക്കായിരുന്നു സംഭവം. ആരോപണം ഉന്നയിച്ചതിന് പിന്നാലെ സ്ഥലത്ത് സംഘര്‍ഷം ഉണ്ടായിരുന്നു.

സപ്ലൈകോയുടെ സ്വന്തം ബ്രാന്‍ഡായ ശബരിയുടെ പുതിയ ഉല്‍പ്പന്നങ്ങളായ മൈദ, റവ എന്നിവ വിപണിയിലിറക്കുന്നു. ശബരി ആട്ട, ശബരി ഗോള്‍ഡ് ചായപ്പൊടി, ശബരി ഹോട്ടല്‍ ബ്ലെന്‍ഡ് ചായപ്പൊടി എന്നിവ പുതിയ ബ്രാന്‍ഡഡ് പാക്കിംഗില്‍ പുനരവതരിപ്പിക്കുകയും ചെയ്യും. ഒക്ടോബര്‍ 31ന് വൈകിട്ട് മൂന്നിന് എറണാകുളം ഐഎംഎ ഹൗസില്‍ നടക്കുന്ന ചടങ്ങ് ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബ് ഔദ്യോഗികമായി ഈ പുതിയ ഉത്പന്നങ്ങള്‍ വിപണിയിലിറക്കും

തൃക്കാക്കര എംഎല്‍എ ഉമ തോമസ് ചടങ്ങില്‍ അധ്യക്ഷത വഹിക്കും. ഉപഭോക്താക്കള്‍ക്ക് കൂടുതല്‍ മികച്ച സേവനം ഉറപ്പാക്കുന്നതിന്റെ ഭാഗമായി സപ്ലൈകോയുടെ ഓണ്‍ലൈന്‍ ഉപഭോക്തൃ പരാതി പരിഹാര സംവിധാനം ചടങ്ങില്‍ ഹൈബി ഈഡന്‍ എം പി ഉദ്ഘാടനം ചെയ്യും. ഉപഭോക്താക്കളുടെ പരാതികള്‍ കൂടുതല്‍ വേഗത്തിലും കാര്യക്ഷമമായും പരിഹരിക്കുന്നതിന് ഈ സംവിധാനം സഹായകമാകും.

കായികമേളയിലെ ഭക്ഷണത്തില്‍ പുഴുവെന്ന ആരോപണത്തില്‍ പ്രതികരണവുമായി വിദ്യാഭ്യാസ മന്ത്രി എന്‍ ഷംസുദ്ദീന്‍. കായികമേള മനപൂര്‍വം അലമ്പാക്കാന്‍ ചിലര്‍ ശ്രമിക്കുന്നുവെന്നും അത് നടക്കാന്‍ പോകുന്നില്ലെന്നും മന്ത്രി പറഞ്ഞു. ഇത് പഴയ നമ്പരാണ്. ഇതൊന്നും കൊണ്ട് മേള അലമ്പാകാന്‍ പോകുന്നില്ല. ഇത് ഭംഗിയായി നടക്കുന്നുവെന്നും അങ്ങനെത്തന്നെ പൂര്‍ത്തിയാകുമെന്നും വിദ്യാഭ്യാസ മന്ത്രി പറഞ്ഞു.

വാര്‍ത്ത റിപ്പോര്‍ട്ട് ചെയ്ത മാധ്യമപ്രവര്‍ത്തകന് മര്‍ദനമേറ്റ സംഭവത്തെക്കുറിച്ചും മന്ത്രി പ്രതികരിച്ചു. മാധ്യമപ്രവര്‍ത്തകരെയല്ല ആരെ മര്‍ദിച്ചാലും അതാര് ചെയ്താലും തെറ്റ് തന്നെയാണ്. ഇക്കാര്യത്തില്‍ അന്വേഷണം നടക്കും. അതിന് ശേഷം വേണ്ട നടപടി സ്വീകരിക്കുമെന്നും മന്ത്രി വ്യക്തമാക്കി.

കുട്ടികള്‍ വര്‍ഷങ്ങളുടെ പ്രയത്നത്തിന് ശേഷമാണ് ഇത്തരം മേളകള്‍ക്കെത്തുന്നതെന്നും അത് അലങ്കോലപ്പെടുത്താന്‍ ശ്രമിക്കരുതെന്നും മന്ത്രി പറഞ്ഞു. ജനങ്ങളുടെ അംഗീകാരത്തോടെ അഞ്ച് വര്‍ഷം ഭരിക്കാനെത്തിയ സര്‍ക്കാരാണിത്. ഞങ്ങളെക്കൊണ്ട് ഇത്തരം മേളകള്‍ നടത്താനാകില്ലെന്ന് വരുത്തിത്തീര്‍ക്കാന്‍ ശ്രമിക്കുന്നവരുണ്ട്. എന്നാല്‍ കായിമ മേളയും വരാനിരിക്കുന്ന ശാസ്ത്ര, കലാ മേളകളും ഭംഗിയായി തന്നെ നടക്കുമെന്നും മന്ത്രി പറഞ്ഞു.

സംസ്ഥാന സ്‌കൂള്‍ കായികമേളയിലെ ഭക്ഷണത്തില്‍ പുഴുവിനെ കണ്ടെന്ന് ആരോപിച്ച അധ്യാപകന്‍ അറസ്റ്റില്‍. പെരുമ്പാവൂര്‍ വെങ്ങോല ശലേം സ്‌കൂളിലെ കായിക അധ്യാപകന്‍ ജിജോ ജെയിംസിനെയാണ് കസ്റ്റഡിയിലെടുത്ത് അറസ്റ്റ് രേഖപ്പെടുത്തിയത്. കായിക മേളയ്ക്കിടെ കലാപം ഉണ്ടാക്കാന്‍ ശ്രമിച്ചു, സാമ്പാറില്‍ നിന്ന് ലഭിച്ചെന്ന വ്യാജേന പുഴുവിനെ പ്രദര്‍ശിപ്പിച്ചെന്നും എഫ്ഐആറില്‍ ആരോപിക്കുന്നു.

ഇന്നലെ രാവിലെയായിരുന്നു കായികമേളയ്ക്കിടെ വിളമ്പിയ സാമ്പാറില്‍ പുഴുവെന്ന ആരോപണം ഉയര്‍ന്നത്. സംഭവം വലിയ ചര്‍ച്ചകള്‍ക്ക് വഴിവെച്ചതോടെ അധ്യാപകന്‍ ജിജോ ജെയിംസ് തനിക്ക് പരാതിയില്ലെന്ന് എഴുതി നല്‍കിയിരുന്നു. എന്നാല്‍ ഇദ്ദേഹത്തെ കസ്റ്റഡിയിലെടുത്ത് അറസ്റ്റ് രേഖപ്പെടുത്തുകയായിരുന്നു.

അധ്യാപകന്റെ ആരോപണത്തെ പൂര്‍ണ്ണമായും തള്ളുന്ന നിലപാടാണ് വിദ്യാഭ്യാസ മന്ത്രി സ്വീകരിച്ചത്. കടുത്ത രാഷ്ട്രീയ വിരോധം വെച്ചാണ് ചിലര്‍ പ്രവര്‍ത്തിക്കുന്നതെന്നും ആരോപണം ഉന്നയിച്ച അധ്യാപകന്റേത് നാടകം ആണെന്നുമായിരുന്നു എന്‍ ഷംസുദ്ദീന്‍ പ്രതികരിച്ചത്.

റോഡ് അപകടങ്ങളും മരണവും വര്‍ധിക്കുന്ന സാഹചര്യത്തില്‍ ഇടപെട്ട് ഹൈക്കോടതി. ബന്ധപ്പെട്ട വകുപ്പുകള്‍ നിര്‍ദ്ദേശങ്ങള്‍ സമര്‍പ്പിക്കണമെന്ന് ഹൈക്കോടതി. നവംബര്‍ 3-ന് കേസ് പരിഗണിക്കുമ്പോള്‍ നിര്‍ദേശങ്ങള്‍ അറിയിക്കണമെന്ന് കോടതി ആവശ്യപ്പെട്ടു. സ്വമേധയാ എടുത്ത കേസിലാണ് ഹൈക്കോടതി നിര്‍ദേശം. ബന്ധപ്പെട്ട വകുപ്പുകള്‍ നിര്‍ദേശങ്ങള്‍ സമര്‍പ്പിക്കണമെന്ന് ഹൈക്കോടതി വ്യക്തമാക്കി.

നവംബര്‍ 3-ന് കേസ് പരിഗണിക്കുമ്പോള്‍ നിര്‍ദേശങ്ങള്‍ അറിയിക്കണം. വിവിധ വകുപ്പുകളുടെ ഏകോപനത്തിന് ചീഫ് സെക്രട്ടിറിയെ നോഡല്‍ ഓഫീസറായി നിശ്ചയിച്ചിട്ടുണ്ട്. കേരള റോഡ് സുരക്ഷാ അതോറിറ്റുിയുടെ നേതൃത്വത്തില്‍ ഏകീകൃത നിരീക്ഷണ പ്ലാറ്റ്‌ഫോം വികസപ്പിക്കണെമന്നും കോടതി നിര്‍ദേശിച്ചു. കൂടാതെ, 45 ദിവസത്തിനകം പ്ലാറ്റ്‌ഫോം സജ്ജമാക്കണമെന്നും ബ്ലാക് സ്‌പോട്ടുകള്‍ കണ്ടെത്തി പരിഹരിക്കണം, അമിതവേഗവും അപകടകരമായ ഡ്രൈവിംഗ് നിയന്ത്രിക്കണം, റോഡുകളുടെ തകരാര്‍ പരിഹരിക്കണം എന്നും കോടതി നിര്‍ദേശിച്ചു.

എസ്‌ഐആറില്‍ സുപ്രധാന നീരീക്ഷണവുമായി സുപ്രീംകോടതി. ഫോം 6, 7, 8 എന്നിവയുടെ അടിസ്ഥാന ഘടനയില്‍ മാറ്റം വരുത്താനാകില്ല. കമ്മീഷന് അധിക വ്യവസ്ഥകള്‍ ചേര്‍ക്കാം എന്നാല്‍ ചട്ടങ്ങള്‍ മറികടക്കാനാവില്ലെന്ന് കോടതി. രേഖകളിലെ പൊരുത്തകേടുകളുടെ പേരില്‍ വോട്ടര്‍മാരെ ഒഴിവാക്കുന്നതിന് അന്തിമ അനുമതി നല്‍കിയിട്ടില്ലെന്നും സുപ്രീംകോടതി. 2003ലെ വോട്ടര്‍പട്ടികയില്‍ പേരുള്ളവരെ രേഖകളിലെ പൊരുത്തക്കേടുകളുടെ പേരില്‍ ഒഴിവാക്കുന്നത് എന്തിനാണെന്ന് കോടതി ചോദിച്ചു.

എന്യുമറേഷന്‍ ഫോം നല്‍കാത്തതിന്റെ പേരില്‍ വോട്ടവകാശം എന്നെന്നേക്കുമായി നിഷേധിക്കാനാകുമോ എന്നും സുപ്രീംകോടതി ചോദിച്ചു. ഡല്‍ഹി എസ്‌ഐആര്‍ കേസിനിടെയാണ് സുപ്രീംകോടതി ചോദ്യങ്ങള്‍ ഉന്നയിച്ചത്. രേഖകളിലെ പൊരുത്തകേടുകളുടെ പേരില്‍ വോട്ടര്‍മാരെ ഒഴിവാക്കുന്നതിന് അന്തിമ അനുമതി നല്‍കിയിട്ടില്ലെന്ന് സുപ്രീംകോടതി വ്യക്തമാക്കി. പശ്ചിമബംഗാളില്‍ ഈ പരിശോധന അനുവദിച്ചത് ഇടക്കാല ക്രമീകരണമായി മാത്രമാണ്. ബിഹാര്‍ വിധിയില്‍ ഇതിന്റെ നിയമസാധുത പരിഗണിച്ചിട്ടില്ല. പേര്, പ്രായം, വിലാസം, ഉള്‍പ്പെടെയുള്ളവയിലെ വ്യത്യാസങ്ങള്‍ ചൂണ്ടിക്കാട്ടിയുള്ള ഒഴിവാക്കലിലാണ് കോടതി നീരീക്ഷണം.

പട്ടികയില്‍ പേരുചേര്‍ക്കാനുള്ള ഫോമുകള്‍ സ്വീകരിക്കുന്നത് പരിഗണിക്കാനും, ആവശ്യമെങ്കില്‍ ഒക്ടോബര്‍ 30 എന്ന സമയപരിധി നീട്ടിനല്‍കാനും തിരഞ്ഞെടുപ്പ് കമ്മീഷനോട് ചീഫ് ജസ്റ്റിസ് സൂര്യ കാന്ത്, ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങുന്ന ബെഞ്ച് നിര്‍ദ്ദേശിച്ചു. രണ്ടാഴ്ചയ്ക്കുള്ളില്‍ ഇക്കാര്യത്തില്‍ കോടതിക്ക് റിപ്പോര്‍ട്ട് സമര്‍പ്പിക്കാന്‍ കമ്മീഷനോട് ആവശ്യപ്പെട്ടിട്ടുണ്ട്.