latest news

അരികൊമ്പന്‍ വിഷയത്തില്‍ സമര്‍പ്പിച്ച ഹര്‍ജി തള്ളി സുപ്രീംകോടതി. വിദഗ്ധസമിതി റിപ്പോര്‍ട്ടില്‍ ഇടപെടാന്‍ ആവില്ല എന്ന നിലപാട് സ്വീകരിച്ചാണ് സുപ്രീംകോടതി നടപടി. കേരള ഹൈക്കോടതി വിധിക്കെതിരെയാണ് സംസ്ഥാന സര്‍ക്കാര്‍ സുപ്രീംകോടതിയെ സമീപിച്ചത്.

വിദഗ്ധസമിതി റിപ്പോര്‍ട്ടിനെ മുഖവിലയ്ക്ക് എടുത്താണ് സുപ്രീം കോടതിയും അരി കൊമ്പന്‍ വിഷയത്തെ പരിഗണിച്ചത്. അരികൊമ്പനെ പിടികൂടി മൊരുക്കാന്‍ ഉള്ള അനുവാദം ആണ് തേടുന്നതെന്ന് സംസ്ഥാനം വ്യക്തമാക്കി. മെരുങ്ങിയതിന് ശേഷം കാട്ടാനയെ സ്വാഭാവിക അവാസവ്യവസ്ഥയിലെയ്ക്ക് അടക്കം വിടുന്നത് പരിഗണിയ്ക്കാം എന്നായിരുന്നു നിലപാട്. സുപ്രീംകോടതി ഈ നിലപാടിനോട് വിയോജിച്ചു. സംസ്ഥാനം തന്നെ നിയോഗിച്ചതാണ് വിദഗ്ധസമിതിയെ. വിശദമായി പഠനം നടത്തിയ ശേഷം സമിതി എടുത്ത തിരുമാനമാണ് ഹൈക്കോടതി അംഗികരിച്ചത്. ഇപ്പോള്‍ ഇതിനെ സംസ്ഥാനം ചോദ്യം ചെയ്യുന്നത് മനസ്സിലാകുന്നില്ലെന്ന് ചീഫ് ജസ്റ്റിസ് പറഞ്ഞു. വിദഗ്ധസമിതി റിപ്പോര്‍ട്ടില്‍ അതുകൊണ്ട് തന്നെ ഇടപെടില്ലെന്ന് സുപ്രീംകോടതി വ്യക്തമാക്കി.

കേരളത്തിന്റെ ഹര്‍ജ്ജി ഫയലില്‍ സ്വീകരിയ്ക്കാതെ സുപ്രീം കോടതി തള്ളി. 1971ലെ വന്യജീവി സംരക്ഷണ നിയമത്തിലെ 11 (1) വകുപ്പ് പ്രകാരം ഉപദ്രവകാരികളായ വന്യമൃഗങ്ങളുടെ കാര്യത്തില്‍ നടപടിയെടുക്കാനുള്ള അധികാരം ചീഫ് വൈല്‍ഡ് ലൈഫ് വാര്‍ഡനാണെന്നായിരുന്നു സംസ്ഥാനത്തിന്റെ വാദം. ഈ അധികാരത്തിന്റെ അടിസ്ഥാനത്തില്‍ അരിക്കൊമ്പനെ മയക്കുവെടിവെച്ച് പിടിച്ച് കോടനാട് ആനക്കൂട്ടിലേക്ക് മാറ്റാന്‍ ആയിരുന്നു ചീഫ് വൈല്‍ഡ് ലൈഫ് വാര്‍ഡന്‍ ഉത്തരവ്. ഈ തീരുമാനത്തില്‍ ഹൈകോടതി ഇടപെട്ടത് തെറ്റാണെന്ന് അരോപിയ്ക്കുന്നതായിരുന്നു സംസ്ഥാനത്തിന്റെ അപ്പീല്‍.

സംസ്ഥാനത്ത് 6 ജില്ലകളില്‍ താപനില മുന്നറിയിപ്പ്. താപനില സാധാരണയെക്കാള്‍ 2 മുതല്‍ 4 ഡിഗ്രി സെല്‍ഷ്യസ് വരെ ഉയരാം. പാലക്കാട് ഉയര്‍ന്ന താപനില 40 ഡിഗ്രി സെല്‍ഷ്യസിന് അടുത്തും കോഴിക്കോട്, കണ്ണൂര്‍, തൃശ്ശൂര്‍ ജില്ലകളില്‍ ഉയര്‍ന്ന താപനില 38 ഡിഗ്രി സെല്‍ഷ്യസിന് അടുത്തും തുടരും. കോട്ടയം, ആലപ്പുഴ ജില്ലകളില്‍ ഉയര്‍ന്ന താപനില 37 ഡിഗ്രി സെല്‍ഷ്യസിന് അടുത്ത് തുടരുമെന്നാണ് മുന്നറിയിപ്പ് ലഭിച്ചിരിക്കുന്നത്.

താമരശ്ശേരിയില്‍ നിന്ന് തട്ടിക്കൊണ്ടുപോയ പ്രവാസി മുഹമ്മദ് ഷാഫിയെ കണ്ടെത്തി. കര്‍ണാടകയില്‍ നിന്നാണ് കണ്ടെത്തിയത്. പ്രത്യക അന്വേഷണ സംഘമാണ് കര്‍ണാടകയില്‍ വെച്ച് ഷാഫിയെ കണ്ടെത്തിയത്. ഏപ്രില്‍ ഏഴാം തീയതിയാണ് ഷാഫിയെ തട്ടിക്കൊണ്ടുപോയത്. കര്‍ണാടകയില്‍ എവിടെ വെച്ചാണ് ഇയാളെ കണ്ടെത്തിയതെന്ന കാര്യം അന്വേഷണസംഘം സ്ഥിരീകരിക്കുന്നില്ല. പത്ത് ദിവസത്തോളമായി ഷാഫിയെ കാണാതായിട്ട്. ഇക്കഴിഞ്ഞ ഏഴാം തീയതിയാണ് ഷാഫിയെയും ഭാര്യയെയും മുഖംമൂടി ധരിച്ചെത്തിയ സംഘം തട്ടിക്കൊണ്ടുപോയത്. ഷാഫിയുടെ ഭാര്യയെ വഴിയില്‍ ഉപേക്ഷിച്ച ശേഷം ഇയാളെയും കൊണ്ട് കടന്നു കളയുകയായിരുന്നു. കഴിഞ്ഞ ദിവസം പൊലീസിന് സംഭവത്തെക്കുറിച്ച് കൃത്യമായ സൂചന ലഭിച്ചിരുന്നു.

സംഭവത്തില്‍ നാല് പേരുടെ അറസ്റ്റ് പോലീസ് രേഖപ്പെടുത്തിയിരുന്നു. കഴിഞ്ഞ ദിവസങ്ങളില്‍ പോലീസ് കസ്റ്റഡിയില്‍ എടുത്ത കാസര്‍കോട് സ്വദേശികളുടെ അറസ്റ്റാണ് രേഖപ്പെടുത്തിയത്. മുഹമ്മദ് നൗഷാദ്, ഇസ്മയില്‍ ആസിഫ്, അബ്ദുറഹ്മാന്‍, ഹുസൈന്‍ എന്നിവരാണ് അറസ്റ്റിലായത്. മുഹമ്മദ് ഷാഫിയെ തട്ടിക്കൊണ്ടുപോകുന്നതിന്റെ രണ്ടാഴ്ച മുന്‍പ് പരപ്പന്‍പൊയിലില്‍ നിരീക്ഷണത്തിനായി എത്തിയ സംഘം സഞ്ചരിച്ച കാര്‍ ഹുസൈനാണ് വാടകക്ക് എടുത്ത് നല്‍കിയത്. മറ്റു മൂന്നു പേര്‍ കാറില്‍ എത്തിയവരാണ് എന്നാണ് കിട്ടിയ വിവരം. അറസ്റ്റ് ചെയ്തവരെ താമരശ്ശേരി താലൂക്ക് ആശുപത്രിയില്‍ വൈദ്യ പരിശോധനക്ക് വിധേയരാക്കി.

പേരാവൂര്‍: ജില്ലാ പഞ്ചായത്തിന്റെ 2023-24 വാര്‍ഷിക പദ്ധതിയില്‍ ഉള്‍പ്പെടുത്തി 30 ലക്ഷം രൂപ ചിലവില്‍ നവീകരണ പ്രവര്‍ത്തി നടത്തുന്ന കുനിത്തലമുക്ക് എ.എസ്‌ നഗര്‍ തൊണ്ടിയില്‍ റോഡ് പ്രവര്‍ത്തി ഉദ്ഘാടനം ജില്ലാ പഞ്ചായത്ത് അംഗം ജൂബിലി ചാക്കോ നിര്‍വഹിച്ചു. വാര്‍ഡ് മെമ്പര്‍ നൂറുദ്ദീന്‍ മുള്ളേരിക്കല്‍ അധ്യക്ഷത വഹിച്ചു. പഞ്ചായത്ത് അംഗം റെജീന സിറാജ്,എ ബിജു,വി കെ വിനേശന്‍ എന്നിവര്‍ സംസാരിച്ചു.

വന്ദേഭാരത് എക്‌സ്പ്രസിന്റെ ആദ്യ പരീക്ഷണ ഓട്ടം പൂര്‍ത്തിയായി. പുലര്‍ച്ചെ 5.10 ന് തിരുവനന്തപുരത്തുനിന്ന് പുറപ്പെട്ട ട്രെയിന്‍ ഉച്ചയ്ക്ക് 12. 19ന് കണ്ണൂരില്‍ എത്തി. ഏഴ് മണിക്കൂര്‍ ഒമ്പത് മിനുട്ട് പിന്നിട്ടാണ് ട്രെയിന്‍ കണ്ണൂരിലെത്തിയത്.

കേരളത്തില്‍ തിരുവനന്തപുരം – കണ്ണൂര്‍ റൂട്ടിലോടുന്ന മറ്റ് ട്രെയിനുകളെ അപേക്ഷിച്ച് വന്ദേഭാരത് വേഗതയില്‍ ഒന്നാമതാണ്. നിലവില്‍ തിരുവനന്തപുരത്ത് നിന്ന് കണ്ണൂരിലെത്തിച്ചേരുന്ന ഏറ്റവും വേഗത കൂടിയ ട്രെയിന്‍ രാജധാനി എക്‌സ്പ്രസാണ്. 7.15 ന് തിരുവനന്തപുരത്തുനിന്ന് പുറപ്പെടുന്ന രാജധാനി എക്‌സ്പ്രസ് പുലര്‍ച്ചെ 3.12ന് കണ്ണൂരിലെത്തും. എട്ട് മണിക്കൂറോളം സമയമെടുത്താണ് ട്രെയിന്‍ കണ്ണൂരിലെത്തുന്നത്. എന്നാല്‍ രാജധാനിയേക്കാള്‍ ഒരു മണിക്കൂര്‍ നേരത്തെ വന്ദേഭാരത് പരീക്ഷണയോട്ടത്തില്‍ കണ്ണൂരിലെത്തി.

പേരാവൂര്‍: വലിച്ചെറിയല്‍ മുക്ത ക്യാമ്പയിന്റെ ഭാഗമായി പേരാവൂര്‍ പഞ്ചായത്ത് 9ാം വാര്‍ഡില്‍ പാതയോര ശുചീകരണം നടത്തി.വാര്‍ഡ് മെമ്പര്‍ റീന മനോഹരന്‍,പ്രദീപന്‍ പുത്തലത്ത്,മേറ്റുമാരായ നിഷ,ഷൈജ,ത്രേസ്യാമ്മ വര്‍ഗീസ് എന്നിവര്‍ നേതൃത്വം നല്‍കി.കുടുംബശ്രീ പ്രവര്‍ത്തകര്‍,തൊഴിലുറപ്പ് തൊഴിലാളികള്‍,ഹരിതകര്‍മ്മ സേനാംഗങ്ങള്‍ എന്നിവര്‍ ശുചീകരണ പ്രവര്‍ത്തിയില്‍ പങ്കാളികളായി.

എലത്തൂര്‍ ട്രെയിന്‍ തീവയ്പ്പ് കേസില്‍ ഷാരുഖ് സെയ്ഫിക്കെതിരെ യുഎപിഎ 16-ാം വകുപ്പ് ചുമത്തിയെന്ന് എഡിജിപി എം.ആര്‍ അജിത് കുമാര്‍. കൃത്യമായ തെളിവുകളുടെ അടിസ്ഥാനത്തിലാണ് യുഎപിഎ ചുമത്തിയിരിക്കുന്നത്. തീവയ്പ്പുമായി ബന്ധപ്പെട്ട് മറ്റ് സംസ്ഥാനങ്ങളില്‍ പൊലീസ് അന്വേഷണം നടത്തിയിട്ടുണ്ട്. വിപുലമായ അന്വേഷണമാണ് നടന്നതെന്നും എംആര്‍ അജിത് കുമാര്‍ പറഞ്ഞു.

ഇതുവരെയുള്ള അന്വേഷണത്തില്‍ ഷാരുഖ് സെയ്ഫിയാണ് അക്രമണം നടത്തിയതെന്ന് തെളിയിക്കുന്ന നിരവധി തെളിവുകള്‍ ലഭിച്ചിട്ടുണ്ടെന്ന് എഡിജിപി പറഞ്ഞു. പ്രതി റാഡിക്കലൈസ്ഡ് ആണ്. സക്കീര്‍ നായിക് അടക്കമുള്ളവരുടെ വീഡിയോകളടക്കം സ്ഥിരം കണ്ടിരുന്നു. കൃത്യമായ ആസൂത്രണം കേസില്‍ നടന്നിട്ടുണ്ടെന്നും എഡിജിപി പറഞ്ഞു.

പ്രതിക്ക് പ്രാദേശിക സഹായം ലഭിച്ചോയെന്ന കാര്യം അന്വേഷിച്ചുകൊണ്ടിരിക്കുകയാണെന്നും എഡിജിപി പറഞ്ഞു.

തൊണ്ടിയില്‍: ഷേണ്‍സ്റ്റാട്ട് വൈദിക സമൂഹത്തിന്റെ നേതൃത്വത്തില്‍ പേരാവൂര്‍ തൊണ്ടിയില്‍ ഷേണ്‍സ്റ്റാട്ട് ലാംഗ്യേജ് അക്കാദമി പ്രവര്‍ത്തനം ആരംഭിച്ചു.ഷേണ്‍സ്റ്റാട്ട് സഭ സുപ്പീരിയര്‍ ഫാ.പോള്‍ പനംകുളം ഉദ്ഘാടനം ചെയ്തു. സെന്റ് ജോസഫ് ഫൊറോന വികാരി ഫാ. ഡോ. തോമസ് കൊച്ചുകരോട്ട് വെഞ്ചരിപ്പ് കര്‍മ്മം നിര്‍വഹിച്ചു. പഞ്ചായത്ത് അംഗം കെ.വി ബാബു,അക്കാദമി ഡയറക്ടര്‍ ഫാ. ബിജോയി കൊട്ടേകുടിയില്‍, അഡ്മിനിസ്ട്രേറ്റര്‍ ഫാ. ക്രിസ്റ്റോ കാരക്കാട്ട്, ഫാ. ജോയി കൊഴ്യാക്കട്ട, സണ്ണി പൊട്ടങ്കല്‍, ബിജു കദളിക്കാട്ട്, തോമസ് കൂവേലില്‍ എന്നിവര്‍ സംബന്ധിച്ചു.ജര്‍മ്മന്‍,സ്പാനിഷ് ഭാഷകള്‍ പഠിപ്പിക്കുന്ന അക്കാദമി പേരാവൂര്‍ സെന്റ് ജോസഫ് ദേവാലയത്തിന് സമീപമാണ് പ്രവര്‍ത്തനം ആരംഭിച്ചത്.

പേരാവൂര്‍: കൊളവഞ്ചാല്‍ പുതുശ്ശേരി അബു ഹാലിദ് മസ്ജിദില്‍ സമൂഹ നോമ്പുതുറയും ഇഫ്താര്‍ വിരുന്നും സംഘടിപ്പിച്ചു. കാളിക്കുണ്ട് മുത്തപ്പന്‍ മഠപ്പുര പ്രസിഡന്റ് സി രവി , സെക്രട്ടറി സന്തോഷ്, കെ.എ. രജീഷ്, ടി.രാജന്‍, പാലോറന്‍ ശശി എന്നിവര്‍ സംസാരിച്ചു. പേരാവൂര്‍ ഖത്തീബ് മൂസ മൗലവി, പ്രസിഡന്റ് യു.വി. റഹിം, ട്രഷറര്‍ പൂക്കോത്ത് അബുബക്കര്‍ ഹാജി, ബഷീര്‍, റഫീഖ് വി.കെ, മായിന്‍ സി, സി സിദ്ധിക്ക്, പി.വി അന്‍സാര്‍, ഹാഷിം കെ, നിയാസ് പി.പി, ബഷീര്‍ വി.കെ, ഹര്‍ഷാദ് എന്നിവര്‍ ഇഫ്താര്‍ വിരുന്നിന് നേതൃത്വം നല്‍കി.

സുഡാനില്‍ കൊല്ലപ്പെട്ട കണ്ണൂര്‍ സ്വദേശി ആല്‍ബര്‍ട്ട് അഗസ്റ്റിന്റെ മൃതദേഹം ആശുപത്രിയിലേക്ക് മാറ്റി. ഇന്ന് പുലര്‍ച്ചെയോടെയാണ് ആംബുലന്‍സ് എത്തിച്ച് മൃതദേഹം മാറ്റിയത്. 24 മണിക്കൂറിനു ശേഷമാണ് നടപടി. കൊല്ലപ്പെട്ട ആല്‍ബര്‍ട്ടിന്റെ ഭാര്യ, മകള്‍ എന്നിവരെ സുരക്ഷിതസ്ഥാനത്തേക്ക് മാറ്റിയതായി ഇന്ത്യന്‍ എംബസി അറിയിച്ചു.

കണ്ണൂര്‍ ആലക്കോട് നെല്ലിപ്പാറ സ്വദേശിയും വിമുക്തഭടനുമായ ആല്‍ബര്‍ട്ട് അഗസ്റ്റിനാണ് സുഡാനില്‍ കൊല്ലപ്പെട്ടത്. തലസ്ഥാനമായ ഖാര്‍ത്തൂമില്‍ ഫ്ലാറ്റിന്റെ ജനലരികില്‍ നിന്ന് കാനഡയില്‍ വിദ്യാര്‍ത്ഥിയായ മകനുമായി ഫോണില്‍ സംസാരിക്കുകയായിരുന്നു. ഇതിനിടെയാണ് ആല്‍ബര്‍ട്ടിന് വെടിയേറ്റതെന്ന് ഭാര്യ സൈബല്ല വീട്ടുകാരെ അറിയിച്ചു. രണ്ട് ആഴ്ച മുന്‍പാണ് ഭാര്യ സൈബല്ലയും 9ാം ക്ലാസ് വിദ്യാര്‍ത്ഥിനിയായ മകളും സുഡാനിലെത്തിയത്.

ഇന്ത്യന്‍ ആര്‍മിയില്‍ നിന്ന് വിരമിച്ച ആല്‍ബര്‍ട്ട് അഗസ്റ്റിന്‍ 7 മാസം മുന്‍പാണ് സുഡാന്‍ തലസ്ഥാനമായ ഖാര്‍ത്തൂമിലെ ദാല്‍ ഗ്രാപ്പ് കമ്പനിയില്‍ സെക്യൂരിറ്റി ഓഫീസറായി ജോലിക്ക് ചേര്‍ന്നത്. അടുത്ത മാസം നാട്ടിലേക്ക് വരാനിരിക്കെയാണ് അപകടം. മകന്റെ മൃതതേഹം എത്രയും വേഗം നാട്ടിലെത്തിക്കാന്‍ നടപടി ആവശ്യപ്പെട്ട് ആല്‍ബര്‍ട്ടിന്റെ അച്ഛന്‍ അഗസ്റ്റിന്‍ കേന്ദ്ര സംസ്ഥാന സര്‍ക്കാറിന് കത്ത് നല്‍കിയിട്ടുണ്ട്. സഹായം ഉറപ്പാക്കുമെന്ന് കേന്ദ്രമന്ത്രി വി മുരളീധരന്‍ പ്രസ്താവനയില്‍ വ്യക്തമാക്കി.