ട്രെയിനുകളിലെ രാത്രി മൊബൈല്‍ ചാര്‍ജിങ്ങിന് കടുത്ത നിയന്ത്രണവുമായി റെയില്‍വേ. രാത്രി 11 മണി മുതല്‍ പുലര്‍ച്ചെ 5 മണി വരെ കോച്ചുകളിലെ ചാര്‍ജിങ് പോയിന്റുകളിലേക്കുള്ള വൈദ്യുതി വിതരണം വിച്ഛേദിക്കാന്‍ എല്ലാ സോണുകള്‍ക്കും നിര്‍ദേശം നല്‍കി. ചാര്‍ജിങ് പോയിന്റുകള്‍ പ്രവര്‍ത്തിക്കുന്നില്ലെന്ന് ഉറപ്പാക്കാന്‍ മിന്നല്‍ പരിശോധന നടത്താനും നിര്‍ദേശം നല്‍കി. നിയമം നടപ്പിലാക്കാത്ത ട്രെയിനുകളിലെ ജീവനക്കാര്‍ക്കെതിരെ കര്‍ശന നടപടിയുണ്ടാകും. 2014 ല്‍ റെയില്‍വേ ബോര്‍ഡ് കൊണ്ടുവന്ന നിയമമാണ് കര്‍ശനമായി പാലിക്കാന്‍ സോണുകള്‍ക്ക് കത്ത് നല്‍കിയത്. കഴിഞ്ഞ വെളളിയാഴ്ച്ച മുംബൈ – ഹൗറ മെയിലില്‍ വച്ചുണ്ടായ അപകടത്തിന്റെ പശ്ചാത്തലത്തിലാണ് നിയന്ത്രണം. ഒഡീഷയില്‍ വച്ച് എസി കോച്ചില്‍ പവര്‍ബാങ്ക് പൊട്ടിത്തെറിച്ചായിരുന്നു അപകടം. യാത്രക്കാര്‍ പരിക്കേല്‍ക്കാതെ രക്ഷപ്പെട്ടെങ്കിലും ജീവനക്കാര്‍ക്ക് വീഴ്ച്ചയുണ്ടായതായി റെയില്‍വെ വിലയിരുത്തി.
