Kerala news

തില്ലങ്കേരി പൂമരം യുവശക്തി കലാകായികവേദി, ഡി.വൈ.എഫ്.ഐ പൂമരം, പാറേങ്ങാട് യൂണിറ്റ്, എ.കെ.ജി ഗ്രന്ഥാലയം എന്നിവയുടെ സംയുക്താഭിമുഖ്യത്തില്‍ നടത്തുന്ന ഓണാഘോഷത്തോടനുബന്ധിച്ചുള്ള സാംസ്‌കാരിക സദസ്സാണ് പൂമരത്ത് നടന്നത്. ചടങ്ങ് കെ.കെ ശൈലജ ടീച്ചര്‍ എം.എല്‍.എ ഉദ്ഘാടനം ചെയ്തു. വാര്‍ഡ് മെമ്പര്‍ പി.ഡി മനീഷ അധ്യക്ഷത വഹിച്ചു. ഇരട്ടി നഗരസഭ കൗണ്‍സിലര്‍ കെ സുരേഷ്, വാര്‍ഡ് മെമ്പര്‍ രമണി മിന്നി, എം ഭാസ്‌കരന്‍ മാസ്റ്റര്‍, മുരളീധരന്‍ കൈതേരി, ഒ.എം വിനീഷ്, സരീഷ് പൂമരം, കെ.പി പ്രവീണ്‍, കെ രമിഷ, ഇ.ആര്‍ വിപിന്‍, ഇ സുബിന്‍, നിരഞ്ജന, നിതീഷ് പുതുശ്ശേരി, എന്‍ രാജന്‍ തുടങ്ങിയവര്‍ പങ്കെടുത്തു.

തൊണ്ടിയില്‍ യുണൈറ്റഡ് മര്‍ച്ചന്റ് ചേമ്പര്‍ തൊണ്ടിയില്‍ യൂണിറ്റിന്റെ ആഭിമുഖ്യത്തില്‍ ഓണാഘോഷ വിളംബര ജാഥ നടത്തി. തുടര്‍ന്ന് നടന്ന പൊതുയോഗത്തില്‍ പ്രസിഡന്റ് ബിനോയ് ജോണ്‍ അധ്യക്ഷത വഹിച്ചു. ജില്ലാ ജനറല്‍ സെക്രട്ടറി ഷിനോജ് നരിതൂക്കില്‍ പേരാവൂര്‍ ഗ്രാമപഞ്ചായത്ത് മെമ്പര്‍മാരായ കെ.വി ബാബു, രാജു ജോസഫ് തുടങ്ങിയവര്‍ ഓണക്കിറ്റ് വിതരണം ചെയ്തു. മണത്തണ-പേരാവൂര്‍ യൂണിറ്റുകളിലെ ഭാരവാഹികളായ നിധിന്‍ മാലത്ത്, സന്തോഷ് കോക്കാട്ട്, കെ.എഫ് ലിബിന്‍ തുടങ്ങിയവരും പരിപാടിയില്‍ പങ്കാളികളായി.

ഒടുവില്‍ പേ വിഷ പ്രതിരോധ വാക്‌സീന്റെ ഗുണനിലവാര പരിശോധനക്ക് തയാറായി കേരള സര്‍ക്കാര്‍. ഇമ്യൂണോ ഗ്ലോബുലിനും പേ വിഷ പ്രതിരോധ വാക്‌സീനും പരിശോധിക്കും. ഇതിനായി പേ വിഷ പ്രതിരോധ വാക്‌സീന്‍ എടുത്തിട്ടും മരണം സംഭവിച്ചവര്‍ക്ക് നല്‍കിയ ബാച്ച് ഇമ്യൂണോ ഗ്ലോബുലിന്റെയും പ്രതിരോധ വാക്‌സീന്റെയും അതത് ബാച്ചുകളാണ് ഗുണനിലവാര പരിശോധനക്ക് അയക്കുന്നത്. കസൌളിയിലെ സെന്‍ട്രല്‍ ഡ്രഗ്‌സ് ലാബിലേക്ക് അയച്ചാണ് ഇമ്യൂണോ ഗ്ലോബുലിനും പേവിഷ പ്രതിരോധ വാക്‌സീനും ഗുണ നിലവാരം ഉള്ളതാണോ എന്ന് പരിശോധിക്കുക. കേരളം വാങ്ങിയ വിന്‍സ് ബയോ പ്രോഡക്ടിന്റെ ഇമ്യൂണോ ഗ്ലോബുലിനും ഗുജറാത്ത് ആസ്ഥാനമായ ചിറോറാബിന്റെ പേ വിഷ പ്രതിരോധ വാക്‌സീനും ആണ് പരിശോധിക്കുന്നത്.

ഇമ്യൂണോ ഗ്ലോബുലിന്റേയും പേ വിഷ പ്രതിരോധ വാക്‌സീന്റേയും ഗുണനിലവാരം കേന്ദ്ര ലാബിലേക്ക് അയച്ച് ഗുണനിലവാരം ഉറപ്പാക്കാന്‍ തീരുമാനിച്ചത് ഇന്നലെയാണ് . ഇതനുസരിച്ച് ആരോഗ്യവകുപ്പ് മെഡിക്കല്‍ സര്‍വീസസ് കോര്‍പറേഷന് നിര്‍ദേശം നല്‍കി. മെഡിക്കല്‍ സര്‍വീസസ് കോര്‍പറേഷന്‍ നിര്‍ദേശം ഡ്രഗ്‌സ് കണ്‍ട്രോളര്‍ വകുപ്പിന് കൈമാറി കഴിഞ്ഞു.

കൊട്ടിയൂര്‍:ചേംബര്‍ ഓഫ് കൊട്ടിയൂരിന്റെ നേതൃത്വത്തില്‍ ഓണാഘോഷം സംഘടിപ്പിച്ചു.പേരാവൂര്‍ ബ്ലോക്ക് പഞ്ചായത്തംഗം കെ.എന്‍ സുനീന്ദ്രന്‍ ഉദ്ഘാടനം ചെയ്തു.ചേംബര്‍ പ്രസിഡന്റ് സി.കെ വിനോദ് അധ്യക്ഷത വഹിച്ചു.സെക്രട്ടറി എ.എം ഷിന്റോ ,ടി.പി ഷാജി, കെ.പി സരസ്സന്‍ എന്നിവര്‍ സംസാരിച്ചു .തുടര്‍ന്ന് ഓണ സദ്യയും, അംഗങ്ങള്‍ക്ക് ഓണകിറ്റും നല്‍കി.

എം.ബി.ബി.എസ് പോലെ ബി.ഡി.എസും (ഡെന്റല്‍ യു.ജി.) അഞ്ചരവര്‍ഷമാകുന്നു. സെമസ്റ്റര്‍ സമ്പ്രദായം, ഒരുവര്‍ഷ നിര്‍ബന്ധിത ഇന്റേണ്‍ഷിപ്പ്, പുതിയ വിഷയങ്ങള്‍ എന്നിവ ഉള്‍പ്പെടുത്തി പാഠ്യപദ്ധതി പരിഷ്‌കരിക്കുന്നതിനുള്ള കരടുമാര്‍ഗനിര്‍ദേശങ്ങള്‍ ഡെന്റല്‍ കൗണ്‍സില്‍ ഓഫ് ഇന്ത്യ കേന്ദ്രസര്‍ക്കാരിനു സമര്‍പ്പിച്ചു.കോഴ്സിന്റെ കാലാവധി വര്‍ധിപ്പിക്കുന്നതാണ് പാഠ്യപദ്ധതിയിലെ പ്രധാന മാറ്റം. നിലവില്‍ നാലുവര്‍ഷ കോഴ്സും ഒരു വര്‍ഷ ഇന്റേണ്‍ഷിപ്പുമെന്നത് എം.ബി.ബി.എസിനു സമാനമായി നാലര വര്‍ഷ കോഴ്സും ഒരു വര്‍ഷ ഇന്റേണ്‍ഷിപ്പുമായി മാറും.വാര്‍ഷിക സമ്പ്രദായം അവസാനിപ്പിച്ച് സെമസ്റ്റര്‍ സംവിധാനം നടപ്പാക്കും.ആകെ ഒന്‍പതു സെമസ്റ്ററുകള്‍. ഓരോന്നിലും നാലു വിഷയങ്ങള്‍. ഇതില്‍ ആദ്യ രണ്ടെണ്ണം പൂര്‍ത്തിയാക്കിയശേഷം അടുത്തതു പഠിക്കാന്‍ അവസരമുണ്ടാകും. വിദ്യാര്‍ഥികളിലെ അധികസമ്മര്‍ദം ഒഴിവാക്കാനാണിത്.

സംസ്ഥാനത്ത് ഇത്തവണ മഴജാഗ്രതയില്‍ ഓണക്കാലം. ഉത്രാടദിനമായ ഇന്ന് അതിതീവ്ര മഴയ്ക്കാണ് സാധ്യത. വയനാട്, കണ്ണൂര്‍, കാസര്‍കോട് ജില്ലകളില്‍ റെഡ് അലേര്‍ട്ട് പ്രഖ്യാപിച്ചു. തിരുവനന്തപുരം, കൊല്ലം ഒഴികെയുള്ള ഒന്‍പത് ജില്ലകളില്‍ ഓറഞ്ച് അലേര്‍ട്ടാണുള്ളത്. തിരുവോണദിനമായ നാളെ മൂന്ന് ജില്ലകളില്‍ ഓറഞ്ചും ഏഴ് ജില്ലകളില്‍ യെല്ലോ അലേര്‍ട്ടും പ്രഖ്യാപിച്ചിട്ടുണ്ട്. ഉച്ചയ്ക്ക് ശേഷം മഴ കൂടുതല്‍ ശക്തമാകും.

കോമറിന്‍ മേഖലയിലെ ചക്രവാതച്ചുഴിയാണ് മഴ ശക്തമാകാന്‍ കാരണം. ഒപ്പം ബംഗാള്‍ ഉള്‍ക്കടലിന് മുകളില്‍ മറ്റൊരു ചക്രവാതച്ചുഴി രൂപപ്പെടാനുള്ള സാധ്യതയും നിലനില്‍ക്കുന്നു. കഴിഞ്ഞദിവസങ്ങളില്‍ ശക്തമായ മഴ ലഭിച്ച പ്രദേശങ്ങളില്‍ കൂടുതല്‍ ജാഗ്രതവേണമെന്നാണ് അറിയിപ്പ്.

ഇരിട്ടി : കിളിയന്തറയിൽ വച്ചുണ്ടായ അപകടത്തിലാണ് പേരട്ട സ്വദേശി വള്ളിപ്പെരിയാടൻ പ്രമോദ് മരിച്ചത്. ഒപ്പം ഉണ്ടായിരുന്ന ശ്യാംജിത്ത്, ജയരാജൻ ,മെൽവിൻ എന്നിവരെ പരിക്കുകളോടെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ചൊവ്വാഴ്ച രാത്രി 11 മണിയോടെയാണ് അപകടം.

ഇരിട്ടി ഭാഗത്തുനിന്നും കൂട്ടുപുഴ ഭാഗത്തേക്ക് പോവുകയായിരുന്ന കാർ റോഡ് അരികിലെ സോളാർ ലൈറ്റിന്റെ തൂണിൽ ഇടിച്ച് മറിയുകയായിരുന്നു.

അത്തൂര്‍: കോളയാട് പഞ്ചായത്ത് അത്തൂര്‍ 88-ാം നമ്പര്‍ അംഗനവാടിയില്‍ ഓണാഘോഷം സംഘടിപ്പിച്ചു. ഭാസ്‌കരന്‍ അധ്യക്ഷത വഹിച്ചു. അംഗനവാടി വര്‍ക്കര്‍ ശ്യാമള,ഹെല്‍പര്‍ ഷീന,ഷീജ,ഹസീന,സുമ എന്നിവര്‍ സംബന്ധിച്ചു.

പേരാവൂര്‍: സൈറസ് ഹോസ്പിറ്റലിന്റെ നേതൃത്വത്തില്‍ ഓണാഘോഷം സംഘടിപ്പിച്ചു. പൂക്കളമിട്ടും, ഓണസദ്യ ഒരുക്കിയും, മാവേലി വേഷം കെട്ടിയുമാണ് ഓണം ആഘോഷിച്ചത്. ജനറല്‍ മാനേജര്‍ ടിന്റു ജിമ്മി, ഡോ. ആന്‍മരിയ, ഡോ. യുനൈസ്, ഡോ. മല്ലിക അര്‍ജുന്‍, പി.ആര്‍.ഒമാരായ ക്രിസ്റ്റിന്‍ വര്‍ഗീസ്, സിനിയ മോള്‍ തുടങ്ങിയവര്‍ നേതൃത്വം നല്‍കി.

കേളകം: പേരാവൂര്‍, ഇരിട്ടി പോലീസ് സബ് ഡിവിഷനുകളില്‍ കണ്ണൂര്‍ റൂറല്‍ ജില്ലാ കമ്മിറ്റിയുടെ നേതൃത്വത്തില്‍ വിവിധ കലാപരിപാടികളോടെ ഓണാഘോഷം സംഘടിപ്പിച്ചു. സ്റ്റേഷനുകളില്‍ നടന്ന പൂക്കള മത്സരത്തില്‍ പേരാവൂര്‍ സബ് ഡിവിഷനില്‍ കേളകം സ്റ്റേഷനും, ഇരിട്ടി സബ് ഡിവിഷനില്‍ ഉളിക്കല്‍ സ്റ്റേഷനും ഒന്നാം സമ്മാനം നേടി. മാലൂര്‍ സ്റ്റേഷനില്‍ നടന്ന ചടങ്ങില്‍ എസ്.എസ്.എല്‍.സി, പ്ലസ് ടു പരീക്ഷയില്‍ എ പ്ലസ് നേടിയ പോലീസ് ഉദ്യോഗസ്ഥരുടെ മക്കള്‍ക്ക് പേരാവൂര്‍ ഡി.വൈ.എസ്.പി എ.വി ജോണ്‍ മൊമന്റോ വിതരണം ചെയ്തു.