Kerala news

പുത്തന്‍ പ്രതീക്ഷകളുമായി ഒരു അധ്യയന വര്‍ഷത്തെ കൂടി വരവേല്‍ക്കാന്‍ ഒരുങ്ങി കേരളം. ഒന്നാം ക്ലാസ് മുതല്‍ പന്ത്രണ്ടാം ക്ലാസ് വരെയുള്ള 42 ലക്ഷത്തോളം കുട്ടികളെ വരവേല്‍ക്കാന്‍ ആണ് സ്‌കൂളുകള്‍ ഒരുങ്ങുന്നത്. ഒന്നാം ക്ലാസില്‍ ഇത്തവണ മൂന്ന് ലക്ഷത്തിലധികം വിദ്യാര്‍ഥികള്‍ എത്തും എന്നാണ് വിദ്യാഭ്യാസ വകുപ്പിന്റെ പ്രതീക്ഷ.

10 വര്‍ഷത്തിനുശേഷം യുഡിഎഫ് സര്‍ക്കാര്‍ നേതൃത്വം നല്‍കുന്ന പ്രവേശനോത്സവത്തിന്റെ സംസ്ഥാനതല ഉദ്ഘാടനം നാളെ രാവിലെ 9.30 ന് തിരുവനന്തപുരം പട്ടം ഗവണ്‍മെന്റ് മോഡല്‍ ഗേള്‍സ് എച്ച്.എസ്.എസി ല്‍ മുഖ്യമന്ത്രി വി ഡി സതീശന്‍ ഉദ്ഘാടനം ചെയ്യും. സംസ്ഥാന പ്രവേശനോത്സവ ഗാനത്തിന് ഇത്തവണ എഐ ദൃശ്യാവിഷ്‌കാരവുമുണ്ടാകും. ആദ്യമായാണ് എഐയില്‍ ദൃശ്യാവിഷ്‌കാരവും പുറത്തിറക്കുന്നത്. റഫീഖ് അഹമ്മദിന്റെ വരികളില്‍ ഹിഷാം അബ്ദുല്‍ വഹാബാണ് ഗാനം പാടിയത്. മുഖ്യമന്ത്രിയുടെ ‘പൂക്കി’ ചിരിയോടെയാണ് ഗാനത്തിന്റെ ദൃശ്യാവിഷ്‌കാരം തുടങ്ങുന്നത് തന്നെ. പൊതുവിദ്യാഭ്യാസ മന്ത്രി എന്‍. ഷംസുദ്ദീനും എഐ ഗാനത്തില്‍ ഭാഗമാകുന്നുണ്ട്.

കണ്ണൂര്‍ എഡിഎം ആയിരുന്ന കെ നവീന്‍ ബാബുവിന്റെ മരണം സിബിഐയ്ക്ക് വിടാന്‍ സംസ്ഥാന സര്‍ക്കാര്‍. കുടുംബം മുഖ്യമന്ത്രി വി ഡി സതീശനെ കണ്ടതിന് പിന്നാലെയാണ് നീക്കം. വിഞ്ജാപനം ഉടന്‍ പുറത്തിറക്കും. കെ.നവീന്‍ ബാബുവിന്റെ മരണവുമായി ബന്ധപ്പെട്ട കേസില്‍ തുടര്‍ അന്വേഷണ റിപ്പോര്‍ട്ട് അന്വേഷണ സംഘം കോടതിയില്‍ സമര്‍പ്പിച്ചിരുന്നു. തലശ്ശേരി അഡിഷണല്‍ ജില്ലാ സെഷന്‍സ് കോടതി കേസില്‍ തുടര്‍ അന്വേഷണ റിപ്പോര്‍ട്ട് ആവശ്യപ്പെട്ടിരുന്നു.

നവീന്‍ ബാബുവിന്റെ ഭാര്യ മഞ്ജുഷയുടെ മൊഴിയും പുതിയ പരാതികളുടെ വിശദാംശങ്ങളും റിപ്പോര്‍ട്ടില്‍ ഉള്‍പ്പെടുത്തിയിട്ടുണ്ട്. കേസിലെ ഏകപ്രതിയായ കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റ് പി പി. ദിവ്യ ഔദ്യോഗിക ഫോണില്‍ നിന്ന് ജില്ലാ കളക്ടറുമായി നടത്തിയ ആശയവിനിമയം ഉള്‍പ്പെടെയുള്ള വിവരങ്ങളും തുടര്‍ അന്വേഷണത്തില്‍ പരിശോധിച്ചു. കോടതി നിര്‍ദ്ദേശിച്ച നാലു പ്രധാന കാര്യങ്ങളില്‍ കൂടുതല്‍ വ്യക്തത വരുത്തിയാണ് റിപ്പോര്‍ട്ട്.

രേഖാമൂലമുള്ള വിശദീകരണങ്ങളും അനുബന്ധ രേഖകളും റിപ്പോര്‍ട്ടിനൊപ്പം സമര്‍പ്പിച്ചിട്ടുണ്ട്. കുറ്റപത്രത്തിലെ വീഴ്ചകള്‍ ചൂണ്ടിക്കാട്ടി നവീന്‍ ബാബുവിന്റെ ഭാര്യ മഞ്ജുഷ നല്‍കിയ ഹര്‍ജിയിലാണ് കോടതി കൂടുതല്‍ അന്വേഷണം ആവശ്യപ്പെട്ടത്. ദിവ്യയുടെ ഔദ്യോഗിക ഫോണ്‍ രേഖകള്‍, ടി.വി.പ്രശാന്തന്റെ സ്വര്‍ണപ്പണയ ഇടപാടിന്റെ രേഖകള്‍, സി.സി ടിവി ദൃശ്യങ്ങളുടെ പൂര്‍ണരൂപം, വിജിലന്‍സ് ഉദ്യോഗസ്ഥരുടെ ഇടപെടല്‍ തുടങ്ങിയ വിഷയങ്ങളിലാണ് കോടതി വ്യക്തത തേടിയത്. റിപ്പോര്‍ട്ട് ഔദ്യോഗികമായി പരിഗണിക്കുന്നതോടെ വിചാരണ നടപടികളിലേക്ക് കടക്കും.

ബസ്സുകളില്‍ വിദ്യാര്‍ത്ഥികള്‍ക്കുള്ള യാത്രാ കണ്‍സഷന്‍ കാര്‍ഡ് ഈ അധ്യയന വര്‍ഷം മുതല്‍ ഡിജിറ്റലാകുന്നു. സര്‍ക്കാര്‍, എയ്ഡഡ്, സ്വയംഭരണ പദവിയുള്ളത്, സ്വകാര്യ-സമാന്തര സ്ഥാപനങ്ങള്‍
ഉള്‍പ്പെടെ എല്ലാ വിദ്യാഭ്യാസ സ്ഥാപനങ്ങളിലെ വിദ്യാര്‍ഥികള്‍ക്കും ഇത് ബാധകമാണ്.

ജില്ലാ കളക്ടറുടെ ചേംബറില്‍ ചേര്‍ന്ന സ്റ്റുഡന്‍സ് ട്രാവല്‍സ് ഫെസിലിറ്റി കമ്മിറ്റി യോഗത്തിലാണ് ആര്‍.ടി.ഒ ഉണ്ണികൃഷ്ണന്‍ ഇ. എസ് പുതിയ കണ്‍സഷന്‍ കാര്‍ഡ് പ്രാബല്യത്തില്‍ വരുന്ന കാര്യം വിശദീകരിച്ചത്.

ആദ്യമായി അതാത് വിദ്യാഭ്യാസ സ്ഥാപനം
മോട്ടോര്‍ വാഹന വകുപ്പിന്റെ എംവിഡി ലീഡ്‌സ് (MVD Leads) എന്ന വെബ്‌സൈറ്റില്‍ കയറി സ്ഥാപനം രജിസ്റ്റര്‍ ചെയ്യണം. ഇതിനുശേഷം ആ സ്ഥാപനത്തിലെ വിദ്യാര്‍ത്ഥി എംവിഡി ലീഡ്‌സ് എന്ന ആപ്പ് ഫോണില്‍ ഡൗണ്‍ലോഡ് ചെയ്തു,
മൊബൈല്‍ നമ്പറും പാസ്‌പോര്‍ട്ട് വലിപ്പത്തിലുള്ള ഫോട്ടോയും മറ്റ് വിവരങ്ങളും അപ്ലോഡ് ചെയ്ത് കാര്‍ഡിന് അപേക്ഷിക്കണം.
വിദ്യാര്‍ത്ഥിയുടെ അപേക്ഷ ആദ്യം സ്ഥാപന മേധാവിക്കാണ് ലഭിക്കുക. സ്ഥാപനമേധാവി അപ്പ്രൂവ് ചെയ്ത ശേഷം ആര്‍.ടി.ഒയ്ക്ക് ഫോര്‍വേഡ് ചെയ്യും. ആര്‍.ടി.ഒ തലത്തില്‍ കൂടി പരിശോധിച്ച് അര്‍ഹതപ്പെട്ടതാണെന്ന് ബോധ്യമായാലാണ് കണ്‍സെഷന്‍ കാര്‍ഡ് അനുവദിക്കുക.

വിദ്യാര്‍ഥികള്‍ക്ക് കാര്‍ഡ് ഡൗണ്‍ലോഡ് ചെയ്ത് ഫോണില്‍ സേവ് ചെയ്തു യാത്രവേളയില്‍ ബസ് കണ്ടക്ടറെ കാണിക്കാം. അല്ലെങ്കില്‍ പ്രിന്റ് ഔട്ട് എടുത്തും യാത്രവേളയില്‍ ഉപയോഗിക്കാം.

കാര്‍ഡിലെ ക്യുആര്‍ കോഡ് സ്‌കാന്‍ ചെയ്താല്‍ വിദ്യാര്‍ത്ഥിയുടെ പാസ്
യഥാര്‍ത്ഥമാണോ അല്ലയോ, കാലാവധി കഴിഞ്ഞോ എന്ന് അറിയാന്‍ കഴിയും. വിദ്യാര്‍ത്ഥിയുടെ പേര്, പഠിക്കുന്ന സ്ഥാപനം, വിലാസം, കോഴ്‌സ്, കാര്‍ഡിന്റെ കാലാവധി, ആര്‍.ടി.ഒ ഓഫീസ് പരിധി തുടങ്ങിയ എല്ലാ വിവരങ്ങളും കാര്‍ഡില്‍ ഉണ്ടാകും.

പുതിയ കാര്‍ഡ് പ്രാബല്യത്തില്‍ വരാന്‍ മൂന്നു മാസത്തെ സമയം അനുവദിച്ചിട്ടുണ്ട്. അത്രയും സമയം നിലവിലെ രീതിയില്‍ തന്നെ കണ്‍സഷന്‍ കാര്‍ഡ് ഉപയോഗിച്ച് വിദ്യാര്‍ത്ഥികള്‍ക്ക് യാത്ര ചെയ്യാം.

ഏതെങ്കിലും വിദ്യാര്‍ത്ഥി വിദ്യാഭ്യാസ സ്ഥാപനത്തിന്റെ അറിവോടെ കണ്‍സഷന്‍ കാര്‍ഡ് ദുരുപയോഗം ചെയ്യുന്നത് ശ്രദ്ധയില്‍പ്പെട്ടാല്‍ ആ സ്ഥാപനത്തിനെതിരെ തുടര്‍നടപടികള്‍ സ്വീകരിക്കുമെന്ന് ജില്ലാ കളക്ടര്‍ പി വിഷ്ണുരാജ് അറിയിച്ചു.

ബസുകള്‍ സ്‌കൂള്‍ സ്റ്റോപ്പില്‍ കൃത്യമായി നിര്‍ത്തി വിദ്യാര്‍ഥികളെ കയറ്റണം. അല്ലാത്തപക്ഷം കര്‍ശന നടപടി സ്വീകരിക്കും.

സ്‌കൂള്‍ കുട്ടികള്‍ സ്റ്റോപ്പില്‍ ബസ് കയറുകയോ ഇറങ്ങുകയോ ചെയ്യുമ്പോള്‍ ഒരു അധ്യാപകനെ അവിടെ നിയമിക്കണം. തിരക്കുള്ള, പ്രധാന ബസ് സ്റ്റോപ്പുകളില്‍ പോലീസിന്റെ സാന്നിധ്യവും ഉണ്ടാകണം.

സ്വാതന്ത്ര്യദിനം, റിപ്പബ്ലിക് ദിനം മുതലായ അവധി ദിവസങ്ങളില്‍ യൂണിഫോമില്‍ ബസില്‍ കയറുന്ന വിദ്യാര്‍ത്ഥികള്‍ക്ക് പാസ് അനുവദിക്കണമെന്നും കലക്ടര്‍ നിഷ്‌കര്‍ഷിച്ചു.

കണ്‍സെഷന്‍ സംബന്ധിച്ചു ബസുകള്‍ക്കെതിരെ വിദ്യാര്‍ത്ഥികള്‍ക്ക് പരാതിയുണ്ടെങ്കില്‍ അക്കാര്യം പ്രിന്‍സിപ്പലിനെ അറിയിക്കുകയും പ്രിന്‍സിപ്പല്‍ ഇക്കാര്യം ആര്‍.ടി.ഒയില്‍ അറിയിക്കുകയുമാണ് വേണ്ടത്.

സ്റ്റാന്‍ഡില്‍ സീറ്റുകള്‍ നിറയുന്നത് വരെ വിദ്യാര്‍ത്ഥികളെ കയറ്റാതെ മഴയത്തും വെയിലത്തും കാത്തുനിര്‍ത്താന്‍ പാടില്ല. വിദ്യാര്‍ത്ഥികളെ ഷെഡ്ഡില്‍ നിര്‍ത്തി ബുദ്ധിമുട്ടിക്കാത്ത രീതിയില്‍ ഘട്ടം ഘട്ടമായി തിരക്കനുസരിച്ചു ബസുകളില്‍ കയറ്റണമെന്ന് ആര്‍.ടി.ഒ നിര്‍ദേശിച്ചു.

രാവിലെ ഏഴ് മണി മുതല്‍ രാത്രി ഏഴ് മണി വരെ ആണ് കണ്‍സഷന്‍ കാര്‍ഡ് ലഭിക്കുന്ന സമയം. വിദ്യാര്‍ത്ഥി ബസില്‍ കയറുന്ന സമയം നോക്കിയാണ് ഇത് കണക്കാക്കുക.

നമ്മുടെ കുട്ടികള്‍ ആണ് എന്ന പരിഗണനയോടെ വേണം വിദ്യാര്‍ത്ഥികളോട് ഇടപെടാനെന്ന് ജില്ലാ കലക്ടര്‍ ഓര്‍മിപ്പിച്ചു.

അസി. കളക്ടര്‍ എസ് സ്വാതി, കണ്ണൂര്‍ ഡി.ഇ.ഒ ദീപ വി, വിദ്യാര്‍ത്ഥി സംഘടന പ്രതിനിധികള്‍, ജില്ലാ ബസ് ഓപറേറ്റേഴ്‌സ്, പാരലല്‍ കോളേജ് അസോസിയേഷന്‍, പോലീസ്, എം.വി.ഡി ഓഫീസ് പ്രതിനിധികള്‍ എന്നിവര്‍ യോഗത്തില്‍ പങ്കെടുത്തു.

സ്‌കൂള്‍ പ്രവേശനോത്സവം ജില്ലാതല ഉദ്ഘാടനം ജൂണ്‍ ഒന്നിന് ആയിത്തറ മമ്പറം സ്‌കൂളില്‍ നടക്കുമെന്ന് ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അറിയിച്ചു.

ജില്ലാ പഞ്ചായത്ത് പ്രസിഡണ്ട്, വൈസ് പ്രസിഡണ്ട്, ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ എന്നിവരുടെ നേതൃത്വത്തില്‍ മൂന്ന് സംഘങ്ങളായി നടത്തിയ ജില്ലയിലെ സ്‌കൂള്‍ സന്ദര്‍ശനം ഫലപ്രദമായിരുന്നുവെന്ന് ജില്ലാ പഞ്ചായത്ത് ഭരണസമിതി യോഗം വിലയിരുത്തി.

സ്‌കൂളുകളില്‍ നിന്നും ലഭിച്ച നിര്‍ദേശങ്ങളില്‍ അടിയന്തര പ്രാധാന്യമുള്ള പ്രവൃത്തികള്‍ നടപ്പിലാക്കും. ഇതിനുസരിച്ച് ആദ്യഘട്ടത്തില്‍ ഫര്‍ണിച്ചര്‍ ലഭ്യമാക്കും.

ജില്ലാ ആശുപത്രിയിലെ സൂപ്പര്‍ സ്പെഷാലിറ്റി കെട്ടിടത്തിന് അഗ്നിശമന സേനയുടെ നിരാക്ഷേപ പത്രം ലഭ്യമാക്കാന്‍ കണ്ണൂര്‍ കോര്‍പ്പറേഷനേയും സംസ്ഥാന സര്‍ക്കാരിനെയും സമീപിക്കും. അഗ്നിശമന സേനയുടെ നിരാക്ഷേപ പത്രം കിട്ടാത്തത് കെട്ടിടത്തിലെ വാട്ടര്‍ ടാങ്കിലേക്കുള്ള പൈപ്പ് ലൈന്‍ കണക്ഷന്‍ ശരിയാകാത്തതിനാലാണ്. ഈ പൈപ്പ് ലൈന്‍ സംഗീത തീയേറ്ററിന് അടുത്ത് നിന്ന് വേണം വലിക്കാന്‍. ഇതിനായി കോര്‍പ്പറേഷന്‍ അധികൃതരെ സമീപിച്ചു. ഇക്കാര്യം ഒരിക്കല്‍ കൂടി കോര്‍പ്പറേഷന്‍ മേയറുമായി ബന്ധപ്പെടുകയും സര്‍ക്കാറിനെ സമീപിക്കുകയും ചെയ്യുമെന്ന് പ്രസിഡന്റ് പറഞ്ഞു. കുടിവെള്ളം പമ്പ് ചെയ്യാനായി ഏകദേശം രണ്ട് കോടി രൂപയോളം ജില്ലാ പഞ്ചായത്ത് ഇതിനകം ജല അതോറിറ്റിക്ക് കൈമാറിയിട്ടുണ്ട്.

ഇക്കഴിഞ്ഞ എസ്എസ്എല്‍സി, പ്ലസ് ടു പരീക്ഷകളില്‍ മികച്ച വിജയം നേടിയ ജില്ലയിലെ എല്ലാ വിദ്യാര്‍ഥികളെയും സ്‌കൂളുകളെയും അഭിനന്ദിക്കാന്‍ കണ്ണൂര്‍ ഉള്‍പ്പെടെ എട്ട് സ്ഥലങ്ങളില്‍ വിജയോത്സവം സംഘടിപ്പിക്കും. ജൂണ്‍ ആറിന് തുടങ്ങി 13 ന് പൂര്‍ത്തിയാക്കും.

ചിറ്റാരിപ്പറമ്പ് ജിഎച്ച്എസിലെ പഴയ കെട്ടിടം പൊളിച്ചുമാറ്റാന്‍ 55,000 രൂപ തനത് ഫണ്ടില്‍ നിന്നും അനുവദിച്ചു.

എട്ടിക്കുളം എം.എ.എസ്.എസ് ജിഎച്ച്എസ്എസിലെ കുടിവെള്ള സൗകര്യം വിച്ഛേദിച്ചത് സംബന്ധിച്ച പരാതിയില്‍ ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്സന്റെ നേതൃത്വത്തില്‍ സ്‌കൂള്‍ സന്ദര്‍ശിച്ച് തുടര്‍നടപടികള്‍ സ്വീകരിക്കും.

അരോളി ജിഎച്ച്എസ് എസില്‍ മൂന്നുവശത്തുമുള്ള റീടെയ്നിംഗ് വാളും ചുറ്റുമതിലും പുനര്‍നിര്‍മിക്കാന്‍ പുതിയ പദ്ധതി തയ്യാറാക്കുന്നതിന് തദ്ദേശസ്വയംഭരണ വകുപ്പ് അസി. എക്സിക്യൂട്ടീവ് എഞ്ചിനീയറെ ചുമതലപ്പെടുത്തി.

വാര്‍ഷിക പദ്ധതിയില്‍ ഉള്‍പ്പെടുത്തി കടന്നപ്പള്ളി ജിഎച്ച്എസ്എസില്‍ കുഴല്‍ക്കിണര്‍ നിര്‍മ്മിക്കുന്നതിന് സെക്രട്ടറിയെ ചുമതലപ്പെടുത്തി.

രാമന്തളി ഗ്രാമപഞ്ചായത്തുമായിസഹകരിച്ച് രാമന്തളി ഒ.കെ.കെ.എസ് ജിഎച്ച്എസ്എസില്‍ ദ്രവ്യമാലിന്യ സംസ്‌കരണ പദ്ധതി തയ്യാറാക്കി നടപ്പിലാക്കാന്‍ തീരുമാനിച്ചു. മാട്ടൂല്‍ സി.എച്ച്.എം.കെ.എസ് ജിഎച്ച്എസിലെ കിഫ്ബി കെട്ടിടത്തില്‍ ലിഫ്റ്റ് സ്ഥാപിക്കാന്‍ 2026-27 ലെ ജില്ലാ പഞ്ചായത്ത് വാര്‍ഷിക പദ്ധതിയില്‍ ഫണ്ട് ലഭ്യതക്കനുസരിച്ച് പദ്ധതി തയ്യാറാക്കും.

കാഴ്ച പരിമിതി കാരണം വായന അപ്രാപ്യമായ ഭിന്നശേഷിക്കാര്‍ക്ക് പ്രശസ്തമായ 10 പുസ്തകങ്ങള്‍ ബ്രെയിലി ലിപിയില്‍ തയ്യാറാക്കിയിട്ടുണ്ട്. അവ ‘ബ്രെയിലി സാക്ഷരത ഡിജിറ്റല്‍ ബ്രെയിലി സാക്ഷരത’ നൂതന പ്രൊജക്റ്റ് പ്രകാരം പഠിതാക്കള്‍ക്ക് ക്ലാസ് നല്‍കി വരുന്ന പഠന കേന്ദ്രങ്ങളിലും ജില്ലയിലെ എട്ട് ലൈബ്രറികളിലും സൂക്ഷിക്കുന്നതിനുള്ള അനുമതിയും യോഗം നല്‍കി.

ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അധ്യക്ഷത വഹിച്ചു. വൈസ് പ്രസിഡണ്ട് ടി ഷബ്ന, ആരോഗ്യ-വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ പി രവീന്ദ്രനാഥ്, പൊതുമരാമത്ത് സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ എ പ്രദീപന്‍, ക്ഷേമകാര്യ സ്റ്റാന്‍ഡിങ് കമ്മിറ്റി അംഗം ലെജു എ.വി, ജില്ലാ പഞ്ചായത്ത് സെക്രട്ടറി റ്റൈനി സൂസന്‍ ജോണ്‍ എന്നിവര്‍ സംസാരിച്ചു.

സംസ്ഥാന ബജറ്റില്‍ സര്‍ക്കാര്‍ ജീവനക്കാര്‍ക്കായി വിസ്മയങ്ങള്‍ ഉണ്ടാകുമെന്ന് മുഖ്യമന്ത്രി വി ഡി സതീശന്‍. പുതിയ കേരളം ഉണ്ടാക്കുകയാണ് ലക്ഷ്യം. ഇന്ത്യയിലെ ഏറ്റവും കാര്യക്ഷമമായ സെക്രട്ടറിയേറ്റ് ആയി നമ്മുടെ മാറ്റുക ആണ് ലക്ഷ്യം.

മുഖ്യമന്ത്രിയുടെ ഓഫീസില്‍ മാറ്റത്തിനു തുടക്കമിടും. എത്ര രാത്രി ആയാലും തീര്‍ക്കാന്‍ പറ്റുന്ന മുഴുവന്‍ ഫയലുകളും തീര്‍ക്കും. അതിനുള്ള ക്രമീകരണങ്ങള്‍ ചെയ്യും. സിസ്റ്റമറ്റിക് ആയാല്‍ കാര്യമായ ജോലികള്‍ ജീവനക്കാര്‍ക്ക് ഉണ്ടാകില്ലെന്നും വി ഡി സതീശന്‍ വ്യക്തമാക്കി.

മുഖ്യമന്ത്രി വി.ഡി സതീശനെ വിമര്‍ശിച്ച് സമൂഹ മാധ്യമങ്ങളില്‍ പോസ്റ്റ് ഷെയര്‍ ചെയ്തു. തിരുവനന്തപുരത്ത് സര്‍ക്കാര്‍ സ്‌കൂള്‍ പ്രിന്‍സിപ്പലിനു സസ്‌പെന്‍ഷന്‍. ആറ്റിങ്ങല്‍ ഗവ.ബോയ്‌സ് ഹയര്‍ സെക്കണ്ടറി സ്‌കൂള്‍ പ്രിന്‍സിപ്പല്‍ ജവാദ് സുബൈറിനെയാണ് സസ്‌പെന്റ് ചെയ്തത്.

വിരമിക്കാന്‍ രണ്ടു ദിവസം മാത്രം ബാക്കി നില്‍ക്കെയാണ് സസ്‌പെന്‍ഷന്‍. മുഖ്യമന്ത്രിയുടെ ചിത്രം പരിഹാസപരമായി പങ്ക് വെച്ചെന്നും സസ്‌പെന്‍ഷന്‍ ഉത്തരവില്‍ പറയുന്നു. വിദ്യാര്‍ത്ഥികളിലും അധ്യാപകരിലും രാഷ്ട്രീയ ധ്രുവീകരണത്തിനു ശ്രമിച്ചെന്നും ഉത്തരവില്‍ പരാമര്‍ശം.

നേരത്തെ മുഖ്യമന്ത്രി വി ഡി സതീശനെ പരാമര്‍ശിച്ച് എഫ്ബി പോസ്റ്റ് ഷെയര്‍ ചെയ്ത കെഎസ്ആര്‍ടിസി ഡ്രൈവര്‍ക്ക് 23 ദിവസത്തിനുശേഷം സസ്പെന്‍ഷന്‍ ലഭിച്ചിരുന്നു. നെടുങ്കണ്ടം സബ് ഡിപ്പോയിലെ ഡ്രൈവര്‍ കല്ലാര്‍ സ്വദേശി എസ് സുനില്‍കുമാറിനെയാണ് സസ്പെന്‍ഡ് ചെയ്തത്.

മാസപ്പടി കേസിലെ ഇ ഡി അന്വേഷണം തടയണമെന്നാവശ്യപ്പെട്ട് ഹൈക്കോടതിയില്‍ അപ്പീല്‍ നല്‍കി സിഎംആര്‍എല്‍. നേരത്തെ സിംഗിള്‍ ബെഞ്ച് ഈ ആവശ്യം നിരസിച്ചിരുന്നു. എന്‍ഫോഴ്‌സ്‌മെന്റ് ഡയറക്ടറേറ്റ് നടത്തിയ പരിശോധനയില്‍ ലഭിച്ച തെളിവുകളുടെ അടിസ്ഥാനത്തില്‍ വീണ വിജയനെ ഇ ഡി ചോദ്യം ചെയ്യാന്‍ വിളിപ്പിക്കുന്നതിനിടെയാണ് ഹൈക്കോടതിയെ സമീപിച്ചത്. നോട്ടീസ് നല്‍കുന്ന കാര്യത്തില്‍ ഇന്ന് തീരുമാനമുണ്ടാകും.

റെയ്ഡില്‍ കണ്ടെടുത്ത ഡയറിയിലെ മറ്റ് പേരുകളെ കേന്ദ്രീകരിച്ചും തെളിവ് ശേഖരണം തുടങ്ങി. 2019-ല്‍ ക്ലോസ് ചെയ്ത വീണയുടെ അബുദാബി ബാങ്ക് അക്കൗണ്ടും ഇ ഡിയുടെ അന്വേഷണ പരിധിയിലാണ്. അക്കൗണ്ട് വഴിയുള്ള ഇടപാടുകള്‍ പരിശോധിക്കും. റെയ്ഡില്‍ 242 അക്കൗണ്ടുകളിലായി 18.36 കോടി രൂപ ഇ ഡി മരവിപ്പിച്ചിരുന്നു. ഇതില്‍ വീണയുടെ മൂന്നോളാം അക്കൗണ്ടുകള്‍ ഉള്‍പെടുന്നു.

കോഴിക്കോട് അത്തോളിയില്‍ ഡൈനിംഗ് ടേബിളില്‍ നിന്നും വീണ് പരിക്കേറ്റ മൂന്ന് വയസ്സുകാരി മരിച്ചു. മീത്തലെ ചാലക്കല്‍ സുബിന്‍ പ്രേം അഭിരാമി ദമ്പതികളുടെ മകള്‍ അലംകൃത (അല്ലി) ആണ് മരിച്ചത്.

ബുധനാഴ്ച രാവിലെ പത്തരയോടെയായിരുന്നു അപകടം. ഡൈനിംഗ് ടേബിളില്‍ കയറിയ കുട്ടി അബദ്ധത്തില്‍ നിലത്തേക്ക് വീഴുകയായിരുന്നു. ശബ്ദം കേട്ട് വീട്ടുകാര്‍ ഓടിയെത്തുമോഴേക്കും കുട്ടി ബോധരഹിതയായിരുന്നു. അലംകൃതയ്ക്ക് ടേബിളില്‍ കയറുന്ന ശീലം പതിവായിരുന്നുവെന്നും ബന്ധുക്കള്‍ പറഞ്ഞു. കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും വ്യാഴാഴ്ച പുലര്‍ച്ചെയോടെ മരണം സ്ഥിരീകരിച്ചു.

ഇന്ദിര ഗ്യാരണ്ടികളുമായി മുന്നോട്ടെന്നും ലഹരിക്കെതിരെ വിട്ടുവീഴ്ചയില്ലെന്നും പ്രഖ്യാപിച്ച് വി ഡി സതീശന്‍ സര്‍ക്കാരിന്റെ ആദ്യ നയപ്രഖ്യാപനം. സംസ്ഥാനത്തെ സാമ്പത്തിക സ്ഥിതി ഗുരുതരമാണെന്നും വെല്ലുവിളികളെ അവസരമാക്കി മാറ്റുമെന്നും നയപ്രഖ്യാപന പ്രസംഗത്തില്‍ ഗവര്‍ണര്‍ രാജേന്ദ്ര വിശ്വനാഥ അര്‍ലേക്കര്‍ പറഞ്ഞു.

സ്‌കൂള്‍ വിദ്യാര്‍ഥിനികള്‍ക്ക് മൂന്ന് ദിവസം വരെ ആര്‍ത്തവ അവധി നല്‍കും. പൊതുസ്വകാര്യ മേഖലയില്‍ സ്ത്രീകള്‍ക്ക് ആറുമാസം വരെ പ്രസവ അവധിയാക്കുമെന്നും നയപ്രഖ്യാപനപ്രസംഗത്തില്‍ പറയുന്നു.
ഒരു മണിക്കൂര്‍ 13 മിനിട്ട് വരെയാണ് നയപ്രഖ്യാപന പ്രസംഗം നീണ്ടു നിന്നത്. കെഎസ്ആര്‍ടിസിയില്‍ എല്ലാ സ്ത്രീകള്‍ക്കും സൗജന്യയാത്ര നടപ്പാക്കും. സര്‍ക്കാര്‍ ആഗ്രഹിക്കുന്നത് ജനപക്ഷത്ത് നിന്നുകൊണ്ടുള്ള സുതാര്യ ഭരണം. ക്ലീന്‍ ഗവേണന്‍സ്, സര്‍ക്കാര്‍ മുദ്രാവാക്യമെന്നും പ്രഖ്യാപനം.

സംസ്ഥാനത്തിന്റെ സാമ്പത്തിക സ്ഥിതി ജനങ്ങള്‍ക്ക് മുന്നില്‍ വിശദീകരിക്കാന്‍ ധവളപത്രം ഇറക്കുമെന്നും പ്ലസ് വണ്‍ സീറ്റുകള്‍ വര്‍ധിപ്പിക്കുമെന്നും എക്‌സൈസ് നയത്തില്‍ മാറ്റം വരുത്തുമെന്നും സംയോജിത ഗതാഗത സംവിധാനം നടപ്പാക്കുമെന്നടക്കം പ്രഖ്യാപനങ്ങളുണ്ടായി.

പ്രസംഗത്തില്‍ യുവാക്കളിലെ തൊഴിലില്ലായ്മ നിരക്കിലുള്ള ആശങ്കയാണ് ആദ്യം പരാമര്‍ശിച്ചത്. പുതുയുഗ കേരളത്തിനുള്ള പരിശ്രമം നടത്തുമെന്നും ഭരണ സംവിധാനത്തിന് സുതാര്യതയും വേഗവും ഉറപ്പാക്കുമെന്നും പ്രസംഗത്തില്‍ പറഞ്ഞു.

സംസ്ഥാനത്ത് ഇന്നും ഒറ്റപ്പെട്ട ഇടങ്ങളില്‍ ഇടിമിന്നലോട് കൂടിയ ശക്തമായ മഴയ്ക്ക് സാധ്യത. തെക്കന്‍ ജില്ലകളിലാണ് മഴ കനത്ത് പെയ്യാന്‍ സാധ്യത. മുന്‍കരുതലിന്റെ ഭാഗമായി 6 ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് മുന്നറിയിപ്പ് നല്‍കി.

തിരുവനന്തപുരം മുതല്‍ എറണാകുളം വരെയുള്ള ജില്ലകളിലാണ് യെല്ലോ അലര്‍ട്ട്. എന്നാല്‍ മഴമുന്നറിയിപ്പില്ലാത്ത ജില്ലകളിലും ഇടത്തരം നേരിയ മഴയ്ക്ക് സാധ്യതയുണ്ട്. ബംഗാള്‍ ഉള്‍ക്കടലിന് മുകളിലും അറബിക്കടലിന് മുകളിലും ചക്രവാതചുഴി രൂപപ്പെട്ടതിന്റെ സ്വാധീനഫലമായാണ് മഴ കനക്കുന്നത്. കൂടാതെ പടിഞ്ഞാറന്‍ കാറ്റിന്റെ സ്വാധീനവും ഇടവിട്ടുള്ള മഴയ്ക്ക് കാരണമാകുന്നുണ്ട്. മണിക്കൂറില്‍ 40 മുതല്‍ 50 കിലോമീറ്റര്‍ വേഗതയില്‍ കാറ്റ് വീശിയേക്കും. കടലാക്രമണത്തിനും ഉയര്‍ന്ന തിരമാലയ്ക്കും സാധ്യതയുള്ളതിനാല്‍ തീരദേശവാസികള്‍ക്കും മത്സ്യതൊഴിലാളികള്‍ക്കും ജാഗ്രത നിര്‍ദേശം നല്‍കിയിട്ടുണ്ട്. അതേസമയം, കേരള കര്‍ണാടക ലക്ഷദ്വീപ് തീരങ്ങളില്‍ മത്സ്യബന്ധനത്തിന് വിലക്കില്ല.