Kerala news

കൂത്തുപറമ്പ്: പാനൂര്‍ സംസ്ഥാന പാതയില്‍ വള്ളങ്ങാട് നേതാജി വായനശാലയ്ക്ക് സമീപം വാഹനാപകടം. സംസ്ഥാന പാതയില്‍ അപകട പരമ്പര ആവര്‍ത്തിക്കുമ്പോഴും ബന്ധപ്പെട്ട അധികാരികള്‍ യാതൊരു നടപടിയും സ്വീകരിക്കുന്നില്ല. പ്രസ്തുത പാതയില്‍ വാഹന അപകടങ്ങളും ജീവഹാനിയും സംഭവിച്ചിട്ടും മനുഷ്യ ജീവന് വില കല്‍പ്പിക്കാതെ നിയമത്തെ വെല്ലുവിളിച്ചു കൊണ്ടുള്ള വാഹനങ്ങളുടെ അമിതവേഗം ജനങ്ങളില്‍ ഭീതി പരുത്തുന്നു. റോഡ് നിര്‍മ്മാണത്തിലെ അശാസ്ത്രീയതയും നിയമ സംവിധാനങ്ങളുടെ പോരായ്മയും അപകടങ്ങള്‍ക്ക് കാരണമാകുന്നു.റോഡില്‍ ഡിവൈഡറുകളും മറ്റ് അനുബന്ധ സംവിധാനങ്ങളും ഒരുക്കണമെന്നും ബന്ധപ്പെട്ട അധികാരികള്‍ കര്‍ശന നിയമനടപടികള്‍ സ്വീകരിക്കണമെന്നും റോഡ് ആക്സിഡന്റ് ആക്ഷന്‍ ഫോറം ജില്ലാ പ്രസിഡണ്ട് എന്‍ കൃഷ്ണന്‍കുട്ടിയും ജനറല്‍ സെക്രട്ടറി സി ടി അജയകുമാറും ബന്ധപ്പെട്ടവരോട് ആവശ്യപ്പെട്ടു.

തൊണ്ടിയില്‍: പേരാവൂര്‍ തൊണ്ടിയില്‍ ജിമ്മിജോര്‍ജ് റോഡരികില്‍ മാലിന്യ നിക്ഷേപം. വീടുകളില്‍ നിന്നുള്ള പാമ്പേഴ്‌സ് ഉള്‍പ്പെടെയുള്ള മാലിന്യങ്ങളാണ് രാത്രിയുടെ മറവില്‍ ഇവിടെ നിക്ഷേപിച്ചിട്ടുള്ളത്. മാലിന്യം നിക്ഷേപിച്ചവരെ കണ്ടെത്തി ഫൈന്‍ ഇടാക്കുന്നതുള്‍പ്പെടെയുള്ള നിയമനടപടികള്‍ സ്വീകരിക്കുമെന്ന് വാര്‍ഡ് മെമ്പര്‍ നൂറുദ്ദീന്‍ മുള്ളേരിക്കല്‍ പറഞ്ഞു. ഇതിന് സമീപത്തായി കാഞ്ഞിരപുഴ പുഴയോരത്തും മാലിന്യം നിക്ഷേപിക്കുന്നത് പതിവാണ്. മാലിന്യം നിക്ഷേപിച്ചവരെ കണ്ടെത്തി പിഴ ഈടാക്കുന്നതിനൊപ്പം ഇവരെ കൊണ്ട് തന്നെ മാലിന്യം നീക്കം ചെയ്യിപ്പിക്കണമെന്നാണ് നാട്ടുകാരുടെ ആവശ്യം.

സംസ്ഥാനത്ത് സ്വര്‍ണവില കുത്തനെ ഇടിഞ്ഞു.ഒരു പവന്‍ സ്വര്‍ണത്തിന് 320 രൂപയുടെ കുറവാണ് ഇന്നുണ്ടായത്. ഇന്നലെ 400 രൂപ വര്‍ദ്ധിച്ചിരുന്നു.അന്താരാഷ്ട്ര വിപണിയിലെ വില വ്യതിയാനങ്ങളാണ് സംസ്ഥാനത്തെ സ്വര്‍ണവിലയില്‍ പ്രതിഫലിക്കുന്നത്. ഒന്‍പത് മാസത്തിന് ശേഷത്തെ ഏറ്റവും ഉയര്‍ന്ന നിരക്കിലായിരുന്നു ഇന്നലെ സ്വര്‍ണവില.

ഒരു ഗ്രാം 22 കാരറ്റ് സ്വര്‍ണത്തിന്റെ വില ഇന്ന് 40 രൂപ കുറഞ്ഞു. ഇന്നലെ 50 രൂപ ഉയര്‍ന്നിരുന്നു. വിപണിയില്‍ ഇന്നത്തെ വില 4990 രൂപയാണ്. ഒരു ഗ്രാം 18 കാരറ്റ് സ്വര്‍ണത്തിന്റെ വില ഇന്ന് 30 രൂപ കുറഞ്ഞു. ഇന്നലെ 40 രൂപ വര്‍ദ്ധിച്ചിരുന്നു. ഇന്നത്തെ വിപണി വില 4125 രൂപയാണ്.

പേരാവൂര്‍: കണ്‍സ്ട്രക്ഷന്‍ വര്‍ക്കേഴ്സ് ആന്‍ഡ് സൂപ്പര്‍വൈസേഴ്സ് അസോസിയേഷന്‍ പേരാവൂര്‍ യൂണിറ്റിന്റെ നേതൃത്വത്തില്‍ മുരിങ്ങോടിയില്‍ നിര്‍മ്മിച്ച് നല്‍കുന്ന സ്നേഹ വീടിന്റെ താക്കോല്‍ദാനം ഡിസംബര്‍ 16 ന് വെള്ളിയാഴ്ച വൈകുന്നേരം 5 മണിക്ക് അഡ്വ. സണ്ണി ജോസഫ് എംഎല്‍എ നിര്‍വഹിക്കുമെന്ന് ഭാരവാഹികള്‍ പേരാവൂരില്‍ നടത്തിയ വാര്‍ത്ത സമ്മേളനത്തില്‍ പറഞ്ഞു.സ്നേഹ വീടിന്റെ താക്കോല്‍ദാന ചടങ്ങ് പേരാവൂര്‍ പഴയ ബസ് സ്റ്റാന്‍ഡില്‍ പേരാവൂര്‍ ഗ്രാമ പഞ്ചായത്ത് പ്രസിഡണ്ട് പി.പി വേണുഗോപാലിന്റെ അധ്യക്ഷതയില്‍ പേരാവൂര്‍ എം.എല്‍.എ അഡ്വ. സണ്ണി ജോസഫ് നിര്‍വഹിക്കുമെന്ന് ഭാരവാഹികളായ കടത്തനാടന്‍ റൈജു, പി. ഗിരീഷ് കുമാര്‍, ദിവാകരന്‍, ചങ്ങാതിക്കൂട്ടം പ്രതിനിധി പ്രശാന്ത് കുമാര്‍ തുടങ്ങിയവര്‍ വാര്‍ത്ത സമ്മേളനത്തില്‍ പങ്കെടുത്തു.

പേരാവൂര്‍: വ്യാപാരോത്സവം 2022 ഡിസംബര്‍ 19 മുതല്‍ 2023ഏപ്രില്‍ 30 വരെ 130 ദിവസങ്ങളിലായി നടക്കുമെന്ന് ഭാരവാഹികള്‍ പേരാവൂര്‍ പ്രസ് ക്ലബില്‍ നടത്തിയ വാര്‍ത്താ സമ്മേളനത്തില്‍ പറഞ്ഞു. പേരാവൂരിലെ വ്യാപാര സ്ഥാപനങ്ങളില്‍ നിന്ന് ഇടപാട് നടത്തുന്ന ഉപഭോക്താക്കള്‍ക്ക് ലഭിക്കുന്ന സമ്മാന കൂപ്പണുകള്‍ ആഴ്ച തോറും നറുക്കെടുത്ത് സ്വര്‍ണ നാണയങ്ങള്‍ നല്‍കും.ഒന്നാം സമ്മാനമായി കാര്‍,രണ്ടാം സമ്മാനമായി റഫ്രിജറേറ്റര്‍,മൂന്നാം സമ്മാനമായി വാഷിംഗ് മെഷീന്‍,നാലാം സമ്മാനമായി എല്‍.ഇ.ഡി ടി.വി എന്നിവ ഉപഭോക്താക്കള്‍ക്ക് ലഭിക്കും. പുറമെ,പ്രോത്സാഹന സമ്മാനങ്ങളും.ജനുവരി മുതല്‍ ഏപ്രില്‍ വരെ എല്ലാ മാസാവസാനവും ടൗണ്‍ കേന്ദ്രീകരിച്ച് കലാപരിപാടികളും പ്രാദേശിക മത്സരങ്ങളും സംഘടിപ്പിക്കും. വാര്‍ത്താ സമ്മേളനത്തില്‍ യുണൈറ്റഡ് മര്‍ച്ചന്റ് ചേംബര്‍ രക്ഷാധികാരി ഷിനോജ് നരിതൂക്കില്‍,പ്രസിഡന്റ് കെ.എം.ബഷീര്‍,സെക്രട്ടറി ബേബി പാറക്കല്‍,ട്രഷറര്‍ വി.കെ.രാധാകൃഷ്ണന്‍,ജോ.സെക്രട്ടറി നവാസ് ഇന്ത്യന്‍ ഇലക്ടോണിക്സ് എന്നിവര്‍ സംബന്ധിച്ചു.

രാജ്യത്തെ ഗോതമ്പ് ശേഖരം ഡിസംബറില്‍ ആറ് വര്‍ഷത്തിനിടയിലെ ഏറ്റവും താഴ്ന്ന നിലയിലേക്ക്. സര്‍ക്കാര്‍ വെയര്‍ഹൗസുകളില്‍ സൂക്ഷിച്ചിരുന്ന ഗോതമ്പ് ശേഖരം കുറഞ്ഞതായി സര്‍ക്കാര്‍ ഇന്നലെ പുറത്തുവിട്ട കണക്കുകളില്‍ വ്യക്തമാക്കുന്നു. വര്‍ദ്ധിച്ചു വരുന്ന ആവശ്യകതയും വിളവ് കുറഞ്ഞതും ഗോതമ്പിന്റെ വിലയെ റെക്കോര്‍ഡ് ഉയരത്തിലേക്ക് എത്തിച്ചിരുന്നു. ഗോതമ്പ് വില കുറയ്ക്കാന്‍ സര്‍ക്കാര്‍ വെയര്‍ഹൗസുകളിലെ സ്റ്റോക്കുകള്‍ പുറത്തിറക്കാനുള്ള ഗവണ്‍മെന്റിന്റെ ശ്രമങ്ങള്‍ ഉണ്ടായിരുന്നു. 37.85 ദശലക്ഷം ടണ്ണില്‍ നിന്ന് സംസ്ഥാന വെയര്‍ഹൗസുകളിലെ ഗോതമ്പ് ശേഖരം ഈ മാസത്തിന്റെ തുടക്കത്തില്‍ 19 ദശലക്ഷം ടണ്ണായി കുറഞ്ഞു. ഫുഡ് കോര്‍പ്പറേഷന്‍ ഓഫ് ഇന്ത്യ തയ്യാറാക്കിയ കണക്കുകള്‍ പ്രകാരം നവംബറില്‍ സര്‍ക്കാരിന്റെ കരുതല്‍ ശേഖരം 2 ദശലക്ഷം ടണ്‍ കുറഞ്ഞു.

ഇതിനു മുന്‍പും രാജ്യത്തെ ഗോതമ്പ് ശേഖരത്തില്‍ കുറവ് വന്നിരുന്നു. 2014-ലും 2015-ലും തുടര്‍ച്ചയായ വരള്‍ച്ച കാരണം ഗോതമ്പ് ശേഖരം 16.5 ദശലക്ഷം ടണ്ണായി കുറഞ്ഞിരുന്നു. 2016 ന് ശേഷമുള്ള ഏറ്റവും താഴ്ന്ന നിലയിലാണ് നിലവില്‍ രാജ്യത്തെ ഗോതമ്പ് ശേഖരം. നാല് മാസത്തിന് ശേഷം മാത്രമേ പുതിയ വിളവെടുപ്പ് ഉണ്ടാകൂ. വില കുറയ്ക്കാനുള്ള സര്‍ക്കാര്‍ ശ്രമങ്ങള്‍ കൂടുതല്‍ പ്രയാസകരമാകുകയാണ് എന്ന് വ്യാപാരികള്‍ അഭിപ്രായപ്പെടുന്നു. വില കുറയ്ക്കാന്‍ ഒരു മാസത്തില്‍ 2 ദശലക്ഷം ടണ്ണില്‍ കൂടുതല്‍ കരുതല്‍ ശേഖരം പുറത്തിറക്കാന്‍ സാധിക്കില്ല. കര്‍ഷകരുടെ വിതരണം ഏതാണ്ട് നിലച്ചതിനാല്‍ വില കൂടാനുള്ള സാധ്യതയുമുണ്ട്.

ലോകത്തിലെ ഏറ്റവും വലിയ രണ്ടാമത്തെ ധാന്യ ഉല്‍പ്പാദക രാജ്യമായിരുന്നിട്ടും, വിളവെടുപ്പില്‍ പെട്ടെന്നുണ്ടായ ഇടിവ് മൂലം രാജ്യത്ത് ഗോതമ്പിന്റെ വില ഉയര്‍ത്തുകയാണ്. മെയ് മാസത്തില്‍ കയറ്റുമതി നിരോധനം നടപ്പാക്കിയെങ്കിലും ഇന്ത്യയില്‍ ഗോതമ്പ് വില കുതിച്ചുയര്‍ന്നു.മെയ് മാസത്തില്‍ കയറ്റുമതി നിരോധനത്തിന് ശേഷം പ്രാദേശിക ഗോതമ്പ് വില ഏകദേശം 28 ശതമാനം ഉയര്‍ന്ന് ടണ്ണിന് 26,785 രൂപയായി.പുതിയ സീസണില്‍ ഗോതമ്പ് ഉല്‍പ്പാദനം സാധാരണ നിലയിലേക്ക് ഉയരുമെങ്കിലും ഏപ്രില്‍ മുതല്‍ പുതിയ വിളവെടുപ്പ് ഉണ്ടാകുന്നത് വരെ വില ഉയരും.

ചെട്ടിയാംപറമ്പ്: ഗവ. യു.പി സ്‌കൂളിന്റെ ആഭിമുഖ്യത്തില്‍ വായനച്ചങ്ങാത്തം വീട്ടുമുറ്റ വായന സദസ്സ് സംഘടിപ്പിച്ചു. നാലാം ക്ലാസ്സ് വിദ്യാര്‍ത്ഥിനിയായ ആത്മിക ഷിജുവിന്റെ വീട്ടില്‍ സംഘടിപ്പിച്ച സദസ്സില്‍ യുവസാഹിത്യ പ്രതിഭ അമൃത കേളകം കുട്ടികളോട് സംവദിച്ചു. വിജയശ്രീ ടീച്ചര്‍, വിനു കെ.അര്‍ എന്നിവര്‍ നേതൃത്വം നല്‍കി. പി ടി എ അംഗങ്ങളും രക്ഷിതാക്കളും ചടങ്ങില്‍ പങ്കെടുത്തു.

സംസ്ഥാനത്ത് സ്വര്‍ണവില കുതിച്ചുയര്‍ന്നു. ഒരു പവന്‍ സ്വര്‍ണത്തിന് 400 രൂപ വര്‍ദ്ധിച്ച് 40240 രൂപയായി. ഇന്നലെ സ്വര്‍ണവില മാറ്റമില്ലാതെ തുടര്‍ന്നിരുന്നു. അന്താരാഷ്ട്ര വിപണിയില്‍ സ്വര്‍ണവില കുതിച്ചുയര്‍ന്നതാണ് സംസ്ഥാന വിപണിയില്‍ വില ഉയരാനുള്ള കാരണം. ഒരു ഗ്രാം 22 കാരറ്റ് സ്വര്‍ണത്തിന്റെ വില ഇന്നലെ 50 രൂപ വര്‍ദ്ധിച്ചു. വിപണിയില്‍ ഇന്നത്തെ വില 5030 രൂപയാണ്. ഒരു ഗ്രാം 18 കാരറ്റ് സ്വര്‍ണത്തിന്റെ വില 40 രൂപ വര്‍ദ്ധിച്ചു. ഇന്നത്തെ വിപണി വില 4155 രൂപയാണ്.

പേരാവൂര്‍: പശ്ചിമഘട്ട നീര്‍ചാലുകളെ ഡിജിറ്റല്‍ രൂപത്തില്‍ രേഖപ്പെടുത്തുന്ന മാപ്പത്തോണ്‍ സര്‍വ്വേ പേരാവൂര്‍ പഞ്ചായത്തില്‍ ആരംഭിച്ചു. പേരാവൂര്‍ പഞ്ചായത്ത്തല സര്‍വ്വേ പ്രവര്‍ത്തനം ചെവിടിക്കുന്ന് തോടരികില്‍ വൈസ് പ്രസിഡന്റ് നിഷ ബാലകൃഷ്ണന്‍ ഉദ്ഘാടനം ചെയ്തു. കെ.വി ശരത് അധ്യക്ഷനായി. നവകേരളം കര്‍മ്മപദ്ധതി ജില്ലാ കോര്‍ഡിനേറ്റര്‍ ഇ.കെ സോമശേഖരന്‍ പദ്ധതി വിശദീകരണം നടത്തി. നവകേരളം കര്‍മ്മപദ്ധതിയുടെ ഭാഗമായി റീ ബില്‍ഡ് കേരളയുടെയും ഐ ടി മിഷന്റെയും സഹായത്താല്‍ ഹരിതകേരള മിഷനാണ് മാപ്പത്തോണ്‍ സര്‍വ്വേ നടത്തുന്നത്. കണ്ണൂര്‍ ജില്ലയിലെ മുഴക്കുന്ന് പഞ്ചായത്തില്‍ നേരത്തെ പൂര്‍ത്തിയാക്കിയ സര്‍വ്വേ പശ്ചിമഘട്ടത്തോട് ചേര്‍ന്ന് കിടക്കുന്ന മുഴുവന്‍ പഞ്ചായത്തിലെയും നീര്‍ച്ചാലുകള്‍ സര്‍വ്വേ ചെയ്ത് ഡിജിറ്റല്‍ രൂപത്തിലാക്കും. 13 മുതല്‍ 17 വരെയാണ് പേരാവൂര്‍ പഞ്ചായത്തിലെ നീര്‍ച്ചാലുകള്‍ സര്‍വ്വേ നടത്തുക. പഞ്ചായത്ത് അംഗങ്ങളായ റീന മനോഹരന്‍, നൂറുദ്ധീന്‍,രാജു ജോസഫ്, രഞ്ജുഷ തുടങ്ങിയവര്‍ സംസാരിച്ചു.

ഇരിട്ടി: വ്യവസായ വാണിജ്യ വകുപ്പ് ഒരു വര്‍ഷം ഒരു ലക്ഷം സംരഭങ്ങള്‍ എന്ന ലക്ഷ്യത്തോടെ ഇരിട്ടി ബ്ലോക്ക്തല സംരംഭകത്വ ബോധവല്‍ക്കരണ ശില്പശാല നടത്തി. ഇരിട്ടി ബ്ലോക്ക് പഞ്ചായത്ത് പ്രസിഡന്റ് കെ വേലായുധന്‍ ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്റ് നജീദ സ്വാദിഖ് എം.കെ അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം ഷിജി നടുപറമ്പില്‍, നഗരസഭ കൗണ്‍സിലര്‍ അബ്ദുള്‍ റഷീദ് വി.പി, ബ്ലോക്ക് പഞ്ചായത്ത് സെക്രട്ടറി എബ്രഹാം തോമസ്, വ്യവസായ ഓഫീസര്‍ പ്രതീപന്‍ കെ.കെ,അഭിലാഷ് കാഞ്ഞിരങ്ങാട് എന്നിവര്‍ സംസാരിച്ചു.