latest news

സംസ്ഥാനത്ത് വീണ്ടും സ്വര്‍ണ വില വര്‍ധിച്ചു. ഗ്രാമിന് 40 രൂപയും പവന് 320 രൂപയും വര്‍ധിച്ച് ഗ്രാമിന് 4,795 രൂപയിലും പവന് 38,360 രൂപയിലുമാണ് ഇന്ന് വ്യാപാരം പുരോഗമിക്കുന്നത്. ഈ മാസം രേഖപ്പെടുത്തുന്ന ഏറ്റവും ഉയര്‍ന്ന വിലയിലാണിത്. മൂന്നു ദിവസം ഒരേ വില തുടര്‍ന്ന ശേഷമാണ് ചൊവ്വാഴ്ച സ്വര്‍ണ വില വര്‍ധിച്ചത്. ഗ്രാമിന് 4,755 രൂപയും പവന് 38,040 രൂപയുമായിരുന്നു തിങ്കളാഴ്ച. ഓഗസ്റ്റ് ഒന്നിന് രേഖപ്പെടുത്തിയ ഗ്രാമിന് 4,710 രൂപയും പവന് 37,680 രൂപയുമാണ് ഈ മാസത്തെ ഏറ്റവും കുറഞ്ഞ നിരക്ക്.

പേരാവൂര്‍: പുതിയ സംരംഭങ്ങള്‍ തുടങ്ങാന്‍ ആഗ്രഹിക്കുന്നവര്‍ക്കും തുടങ്ങിയവര്‍ക്കും സുവര്‍ണ്ണാവസരമായി പേരാവൂര്‍ പഞ്ചായത്ത് തലത്തില്‍ ലോണ്‍ – ലൈസന്‍സ് മേള നടത്തുന്നു. ആഗസ്റ്റ് 12 ന് വെള്ളിയാഴ്ച രാവിലെ 10 മണി മുതല്‍ പേരാവൂര്‍ ബ്ലോക്ക് പഞ്ചായത്ത് ഹാളില്‍ വെച്ചാണ് മേള സംഘടിപ്പിക്കുന്നത്. 7 ഓളം ബാങ്കുകള്‍ പങ്കെടുക്കുന്ന മേളയില്‍ അപേക്ഷകര്‍ക്ക് നേരിട്ട് ബാങ്കുമായി ആശയവിനിമയം നടത്താനും ലോണ്‍ കരസ്ഥമാക്കാനുമുള്ള അവസരം ഉണ്ടാവുന്നതാണ്. മേള പേരാവൂര്‍ ബ്ലോക്ക് പഞ്ചായത്ത് പ്രസിഡണ്ട കെ സുധാകരന്‍ ഉദ്ഘാടനം ചെയ്യും.
ഗ്രാമ പഞ്ചായത്ത് പ്രസിഡണ്ട് പി.പി വേണുഗോപാലന്‍ അധ്യക്ഷത വഹിക്കും. പുതിയ സര്‍ക്കാര്‍ പദ്ധതി പ്രകാരം 4% മാത്രം ആണ് പലിശ.ഉത്പാദന, സേവന, വ്യാപാര മേഖലകളില്‍ ലോണ്‍ ലഭ്യമാണ്.ഏതെങ്കിലും രീതിയില്‍ സംരംഭ ആശയം ഉള്ളവര്‍ മേളയില്‍ പങ്കെടുക്കേണ്ടതാണ്. രജിസ്‌ട്രേഷനും മറ്റു വിവരങ്ങള്‍ക്കും 7012671658 എന്ന നമ്പറില്‍ ബന്ധപ്പെടുക.

സംസ്ഥാനത്ത് വീണ്ടും തീവ്ര ന്യൂനമര്‍ദ്ദ സാധ്യതയുണ്ടെന്ന് കാലാവസ്ഥാ കേന്ദ്രം മുന്നറിയിപ്പ്. വടക്ക് പടിഞ്ഞാറന്‍ ബംഗാള്‍ ഉള്‍ക്കടലിലെ ശക്തികൂടിയ ന്യൂനമര്‍ദ്ദം, തീവ്ര ന്യൂനമര്‍ദ്ദമാകാനുള്ള സാധ്യതയുള്ളതിനാലാണ് കേരളത്തില്‍ മഴ ശക്തിപ്പെടുന്നത്. ഈ സാഹചര്യത്തില്‍ അടുത്ത ദിവസങ്ങളില്‍ വ്യാപക മഴയ്ക്ക് സാധ്യതയെന്നാണ് കാലാവസ്ഥ വകുപ്പിന്റെ മുന്നറിയിപ്പ്. ഓഗസ്റ്റ് 12 -ാം തീയതി വരെ കേരളത്തില്‍ ശക്തമായ മഴയ്ക്ക് സാധ്യതയുണ്ടെന്ന് ഇന്നലെ തന്നെ കാലാവസ്ഥ കേന്ദ്രം അറിയിച്ചിരുന്നു. ഇന്ന് കേരളത്തില്‍ 8 ജില്ലകളിലും യെല്ലോ അലര്‍ട്ട് പ്രഖ്യാപിച്ചു. ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് ഇന്ന് യെല്ലോ അലര്‍ട്ടുള്ളത്.

പേരാവൂര്‍: ദേശീയ വ്യാപാര ദിനത്തോടനുബന്ധിച്ച് വ്യാപാരി വ്യവസായി ഏകോപന സമിതി പേരാവൂര്‍ യൂണിറ്റിന്റെ നേതൃത്വത്തില്‍ പതാക ദിനം ആചരിച്ചു.യൂണിറ്റ് പ്രസിഡണ്ട് കെ.കെ രാമചന്ദ്രന്‍ പതാക ഉയര്‍ത്തി. സംഘടന നേതാക്കളായ പി പുരുഷോത്തമന്‍, എസ് ബഷീര്‍, തങ്കശ്യാം, മനോജ് താഴെപുര, സമീര്‍, ഷീജ ജയരാജ്, സീന ബാബു തുടങ്ങിയവര്‍ പങ്കെടുത്തു. തുടര്‍ന്ന് മധുര പലഹാര വിതരണവും നടന്നു.

ഇന്ന് മുഹറം പത്ത്. ഇസ്ലാമിക കലണ്ടറായ ഹിജ്‌റയിലെ ആദ്യ മാസമാണ് മുഹറം. ഇസ്ലാമില്‍ വളരെയേറെ പ്രാധാന്യം മുഹറത്തിന് നല്‍കി വരുന്നു. പത്തോളം പ്രവാചകന്മാരെ പ്രതിസന്ധികളില്‍ നിന്ന് അള്ളാഹു ആദരിച്ച മാസമായാണ് മുഹറത്തെ കണക്കാക്കുന്നത്. ഇസ്ലാം മതവിശ്വാസികളുടെ പുതുവത്സരമായ മുഹറം അവിസ്മരണീയമായ ചരിത്ര സ്മരണ സംഗമത്താല്‍ മഹത്വമാക്കപ്പെട്ടതാണ്. മുഹറം മാസത്തിന്റെ ഒമ്പത്, പത്ത് ദിവസങ്ങളില്‍ നോമ്പനുഷ്ടിക്കല്‍ ഇസ്ലാം മത വിശ്വാസികള്‍ക്ക് സുന്നത്താണ്. ഒരു നോമ്പിന് മുപ്പത് നോമ്പിന്റെ പുണ്യം ലഭിക്കുമെന്നാണ് വിശ്വാസം. ഇസ്ലാമിക ചരിത്രത്തിലെ പ്രധാനപ്പെട്ട സംഭവങ്ങള്‍ നടന്ന മാസമായാണ് മുഹറം കണക്കാക്കുന്നത്. ആദ്യ പ്രവാചകനായ ആദം നബിയുടെ കാലം മുതല്‍ മുഹമ്മദ് നബിയുടെ കാലം വരെയുള്ള എല്ലാ പ്രവാചകരുമായും ബന്ധപ്പെട്ട പ്രധാന സംഭവങ്ങള്‍ നടന്നത് മുഹറം മാസത്തിലാണ്. ഓരോ ഇസ്ലാം മത വിശ്വാസികളും ജീവിതത്തിലെ തെറ്റുകളെയും പോരായ്മകളെയും വിലയിരുത്തി സല്‍പ്രവര്‍ത്തനങ്ങള്‍ അനുഷ്ഠിക്കാന്‍ ഒരുങ്ങുന്ന പുതുവര്‍ഷമാണ് മുഹ്‌റം മുതല്‍ ആരംഭിക്കുന്നത്.

ഇരിട്ടി പയഞ്ചേരിമുക്കില്‍ ബസ് ബൈക്കിലിടിച്ച് രണ്ടുപേര്‍ക്ക് പരിക്ക്. ഇരിട്ടി ജബ്ബാര്‍ക്കടവ് സ്വദേശികളായ രമ, സിദ്ധു എന്നിവര്‍ക്കാണ് പരിക്ക് പറ്റിയത്. ഇവരെ ഇരിട്ടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

തെറ്റുവഴി: ഉരുള്‍പ്പൊട്ടലില്‍ നാശം സംഭവിച്ച തെറ്റുവഴി കൃപാഭവന് കൊട്ടിയൂര്‍ വ്യാസ ഫൈന്‍ ആര്‍ട്സ് സൊസൈറ്റി ധനസഹായം നല്‍കി. വ്യാസ സെക്രട്ടറി കെ.പി പസന്ത്, വൈസ് പ്രസിഡണ്ട് കൃഷ്ണന്‍ നായര്‍, സോണി, അനില്‍ കുമാര്‍ എന്നിവര്‍ പങ്കെടുത്തു.

ഇരിട്ടി: സി.ഐ.ടി.യു, എ.ഐ.കെ.എസ്, കെ.എസ്.കെ.ടി.യു എന്നിവയുടെ നേതൃത്വത്തില്‍ സാമൂഹിക ജാഗരണ്‍ പ്രചരണ ജാഥ കൂളിചേമ്പ്രയില്‍ നിന്ന് ആരംഭിച്ച് ഇരിട്ടിയില്‍ സമാപിച്ചു. സി.പി.ഐ.എം ഇരിട്ടി ഏരിയ സെക്രട്ടറി കെ.വി സക്കീര്‍ ഹൂസൈന്‍ ഉദ്ഘാടനം ചെയ്തു. വി.കെ മനോഹരന്‍, കെ നന്ദനന്‍, പി വിജയന്‍, പി അശോകന്‍, സദാനന്ദന്‍ മാസ്റ്റര്‍ തുടങ്ങിയവര്‍ സംസാരിച്ചു.

വെള്ളര്‍വള്ളി: പേരാവൂര്‍ ക്ഷീരവികസന വകുപ്പിന്റെയും വെള്ളര്‍വള്ളി ക്ഷീരോല്‍പാദക സഹകരണ സംഘത്തിന്റെയും സംയുക്താഭിമുഖ്യത്തില്‍ ക്ഷീര കര്‍ഷക സമ്പര്‍ക്ക പരിപാടി വെള്ളര്‍വള്ളി ക്ഷീരോല്‍പാദക സഹകരണ സംഘത്തില്‍ നടന്നു. വാര്‍ഡ് മെമ്പര്‍ നിഷ പ്രദീപന്‍ ഉദ്ഘാടനം ചെയ്തു. സംഘം പ്രസിഡണ്ട് ജോസ് കിഴക്കേടത്ത് അധ്യക്ഷത വഹിച്ചു. ശുദ്ധമായ പാലുല്‍പാദനം എന്ന വിഷയത്തില്‍ പേരാവൂര്‍ ക്ഷീര വികസന ഓഫീസര്‍ കെ അനുശ്രീയും, ക്ഷീര കര്‍ഷകര്‍ നേരിടുന്ന വെല്ലുവിളികള്‍ പിരഹാരങ്ങള്‍ എന്ന വിഷയത്തില്‍ ബിനു രാജും ക്ലാസെടുത്തു. 16-ാം വാര്‍ഡ് മെമ്പര്‍ ജോസ് ആന്റണി, സംഘം സെക്രട്ടറി പി.എം മിഥുല, ടി.ഡി തങ്കച്ചന്‍, ടി ബാലകൃഷ്ണന്‍ എന്നിവര്‍ സംസാരിച്ചു.

പാല്‍ച്ചുരം: റോഡില്‍ മണ്ണിടിഞ്ഞ് വീണ് ചെളി രൂപപ്പെട്ടതിനെ തുടര്‍ന്ന് പേരാവൂര്‍ ഫയര്‍ ആന്റ് റെസ്‌ക്യൂ അംഗങ്ങള്‍ വെള്ളം ഉപയോഗിച്ച് റോഡ് വൃത്തിയാക്കി. ഫയര്‍ഫോഴ്സ് അംഗങ്ങളായ ബെന്നി, ജിതിന്‍ എന്നിവര്‍ നേതൃത്വം നല്‍കി.