പ്ലസ് വൺ പ്രവേശനത്തിനുള്ള ഏകജാലക ഓൺലൈൻ അപേക്ഷാസമർപ്പണം 16 -ന് തുടങ്ങും. അവസാനതീയതി മേയ് 25. മൂന്നു മുഖ്യഘട്ട അലോട്മെന്റുകൾക്കുശേഷം ജൂൺ 24-ന് ക്ലാസുകൾ തുടങ്ങും. കഴിഞ്ഞ വർഷം ക്ലാസ് ആരംഭിച്ചത് ജൂലായ് അഞ്ചിനായിരുന്നു. സപ്ലിമെന്ററി അലോട്മെന്റുകളും പൂർത്തിയാക്കി ജൂലായ് 31-ന് പ്രവേശനനടപടികൾ അവസാനിപ്പിക്കും.
അഡ്മിഷൻ ഷെഡ്യൂൾ
- ട്രയൽ അലോട്മെന്റ്: മേയ് 29
- ആദ്യ അലോട്മെന്റ്: ജൂൺ അഞ്ച്
- രണ്ടാം അലോട്മെന്റ്: ജൂൺ 12
- മൂന്നാം അലോട്മെന്റ്: ജൂൺ 19
മാറ്റങ്ങൾ ഇങ്ങനെ
വെയിറ്റഡ് ഗ്രേഡ് പോയിന്റ് ആവറേജ് തുല്യമായി വന്നാൽ അക്കാദമിക മെറിറ്റിന് മുൻതൂക്കം ലഭിക്കുന്ന തരത്തിൽ ഗ്രേസ് മാർക്കിലൂടെയല്ലാതെയുള്ള അപേക്ഷകനെ റാങ്കിൽ ആദ്യം പരിഗണിക്കും.
പട്ടികവർഗ വികസന വകുപ്പിന് കീഴിലെ 14 മോഡൽ റെസിഡൻഷ്യൽ ഹയർ സെക്കൻഡറി സ്കൂളുകളിലെ പ്രവേശനം ഈ വർഷംമുതൽ ഏകജാലകസംവിധാനത്തിലൂടെ ആയിരിക്കും. ഒറ്റ അപേക്ഷ ഓൺലൈനായി സ്വീകരിച്ച് പ്രവേശനം സാധ്യമാക്കും.
പ്ലസ് വൺ സീറ്റുകളുടെ എണ്ണം
- ഹയർ സെക്കൻഡറി: 4,33,231
- വി.എച്ച്.എസ്.ഇ.: 33,030
- ഐ.ടി.ഐ: 61,429
- പോളിടെക്നിക്ക്: 9990
- എല്ലാ മേഖലകളിലുമായി ആകെ സീറ്റുകൾ: 5,37,680
- മാർജിനൽ സീറ്റ് വർധനയിലൂടെ ലഭ്യമാവുന്ന ആകെ സീറ്റുകൾ: 61,759
- 178 താത്കാലിക ബാച്ചുകളിലൂടെ ലഭ്യമാകുന്ന ആകെ സീറ്റുകൾ: 11,965