Local News

ചിക്കമംഗളൂരുവിൽ കാണാതായ മലയാളി പെൺകുട്ടി ശ്രീനന്ദയ്ക്കായി മൂന്ന് ദിവസത്തിലേറെയായി തുടർന്ന തിരച്ചിൽ അവസാനിച്ചത് കണ്ണീരിൽ. 1500 അടിയോളം താഴ്ചയിൽനിന്ന് ശ്രീനന്ദയുടെ മൃതദേഹം കണ്ടെത്തി. പാലക്കാട്ടുനിന്ന് കുടുംബത്തോടൊപ്പം വിനോദസഞ്ചാരത്തിനെത്തിയതായിരുന്നു പത്താംക്ലാസ് വിദ്യാർഥിനിയായ ശ്രീനന്ദ. ചൊവ്വാഴ്ച വൈകിട്ടോടെയാണ് കുട്ടിയെ കാണാതാകുന്നത്.ചിക്കമംഗളൂരുവിലെ ബാബാബുഡാൻ ഗിരികുന്നിലെ മാണിക്കധാര വെള്ളച്ചാട്ടം കാണാനെത്തിയപ്പോഴാണ് ശ്രീനന്ദയെ കാണാതായത്. മാണിക്കധാര വെള്ളച്ചാട്ടത്തിന് തൊട്ടടുത്ത് നിന്നാണ് മൃതദേഹം കണ്ടെത്തിയത്. മരണത്തിൽ കുടുംബം ദുരൂഹത ആരോപിക്കുന്നുണ്ട്.

വനംവകുപ്പുംപോലീസും നാട്ടുകാരുമടങ്ങുന്ന നൂറോളം പേരുടെസംയുക്ത പരിശോധനയിലാണ് മൃതദേഹം കണ്ടെത്തിയത്.

പാലക്കാട് കടമ്പഴിപുറത്തെ രമേശിന്റെ മകൾ ശ്രീനന്ദ(15)യെയാണ് ചൊവ്വാഴ്ച വൈകീട്ടോടെ കാണാതായത്. 40-ഓളം കുടുംബാംഗങ്ങളുടെ സംഘത്തിനൊപ്പം ചിക്കമംഗളൂരുവിൽ വിനോദയാത്രയക്ക് എത്തിയതായിരുന്നു. ചൊവ്വാഴ്ച വൈകിട്ട് 5:20ന് കുടുംബത്തോടൊപ്പം എടുത്ത ഫോട്ടോയിൽ കുട്ടി പിറകിൽ നിൽക്കുന്നുണ്ട്. എന്നാൽ 5:35ന് എടുത്ത് ഫോട്ടോകളിൽ കുട്ടിയെ കാണാനില്ല. തുടർന്ന് പ്രദേശത്ത് ശക്തമായ തിരച്ചിൽ നടത്തി വരുന്നതിനിടെയാണ് മൃതദേഹം കണ്ടെത്തിയത്. നൂറോളം പേരടങ്ങുന്ന സംഘം ഇന്ന രാവിലെ മുതൽ പ്രദേശത്ത് തിരച്ചിൽ നടത്തിയിരുന്നു. കേരള പോലീസ് സംഘവും ഇവിടെ എത്തിയിരുന്നു.

വെഞ്ഞാറമൂട് കെഎസ് ആര് ടിസി ബസിന് തീപിടിച്ചു. ആര്‍ക്കും പരിക്കില്ല. രാവിലെ ഒന്‍പത് മണിയോടെയാണ് സംഭവം. പറശ്ശിനിക്കടവ് നിന്നും തിരുവനന്തപുരത്തേക്ക് വരികയായിരുന്ന എ സി സ്ലീപ്പര്‍ ബസിന്‍റെ മുന്‍ഭാഗത്ത് ആണ് തീ കണ്ടത്. പുക പടര്‍ന്നതോടെ ഡ്രൈവര്‍ ബസ് ഉടൻ തന്നെ നിര്‍ത്തി യാത്രക്കാരെ ഇറക്കുകായയിരുന്നു. തുടർന്നു അഗ്നി ശമന സേന എത്തി തീ അണച്ചു. ഫയര്‍ഫോഴ്സ് എത്തുന്നതിന് മുന്‍പ് തന്നെ സമീപത്തുണ്ടായിരുന്ന വീട്ടുകാരും നാട്ടുകാരും ചേര്‍ന്ന് വെള്ളം ഒഴിച്ച് തീ നിയന്ത്രണ വിധേയമാക്കാൻ ശ്രമിച്ചു. ബസിൽ നിന്ന് യാത്രക്കാരെ വേഗത്തിലിറക്കാനായതിനാൽ വലിയ അപകടമാണ് ഒഴിവായത്. തീപിടിക്കാനുണ്ടായ കാരണം വ്യക്തമല്ല. അടുത്തിടെ പുതുതായി ഇറക്കിയ സ്ലീപ്പര്‍ ബസിനാണ് തീപിടിച്ചത്.

മുണ്ടക്കൈ-ചൂരൽമല ഉരുൾപൊട്ടൽ ദുരന്തബാധിതർക്കുള്ള ഭവനപദ്ധതിക്കായി കോൺഗ്രസ് വാങ്ങിയ ഭൂമിയിൽ കുടിൽക്കെട്ടി സമരവുമായി ഡിവൈഎഫ്ഐ. കുന്നംപറ്റയില്‍ കോൺഗ്രസിന്റെ ഭൂമിക്ക് പുറത്തുള്ള വഴിയിലാണ് ഡിവൈഎഫ്ഐ പ്രവര്‍ത്തകര്‍ കുടിൽ കെട്ടുന്നത്. വീട് നിര്‍മാണം ആരംഭിക്കാത്തതിലാണ് പ്രതിഷേധം. ഡിവൈഎഫ്ഐ സംസ്ഥാന പ്രസിഡന്റ് വി വസീഫിൻ്റെ നേതൃത്വലാണ് കുടിൽ കെട്ടുന്നത്. ദുരന്തബാധിതരെ കോണ്‍ഗ്രസ് വഞ്ചിക്കുന്നുവെന്ന് ഡിവൈഎഫ്ഐ ആരോപിച്ചു. വീട് പോയിട്ട് പിരിച്ച തുക എത്രയെന്ന് പറയാൻ പോലും കോൺഗ്രസിന് കഴിയുന്നില്ലെന്ന് വി വസീഫ് വിമര്‍ശിച്ചു.

കെ കെ ശൈലജ ടീച്ചര്‍ അടുത്ത മുഖ്യമന്ത്രിയാകുമോ എന്ന ചോദ്യത്തിന് മറുപടിയുമായി മുഖ്യമന്ത്രിയും സിപിഎം പോളിറ്റ് ബ്യൂറോ അംഗവുമായ പിണറായി വിജയന്‍. മുഖ്യമന്ത്രിയെ തെരഞ്ഞെടുപ്പ് ഫലം വരുന്നതിന് മുമ്പ് തീരുമാനിക്കുന്ന പതിവ് സിപിഎമ്മിനും എല്‍ഡിഎഫിനും ഇല്ലെന്നാണ് പിണറായിയുടെ പ്രതികരണം. മട്ടന്നൂരിന് പകരം ശൈലജയെ പേരാവൂരില്‍ മത്സരിപ്പിക്കാനുള്ള തീരുമാനത്തെ കുറിച്ചും മുഖ്യമന്ത്രി വിശദീകരിച്ചു. കെ കെ ശൈലജ ടീച്ചറെ പേരാവൂരിലേക്ക് മത്സരിക്കാന്‍ അയച്ചത് ‘ഒതുക്കല്‍’ ആണെന്ന വിമര്‍ശനത്തെ പൂര്‍ണമായും നിഷേധിച്ചായിരുന്നു പിണറായിയുടെ മറുപടി.ഒന്നാം പിണറായി മന്ത്രിസഭയിലെ ഏറ്റവും കരുത്തുറ്റ സാന്നിധ്യമായിരുന്ന കെ.കെ. ശൈലജയെ രണ്ടാം മന്ത്രിസഭയിൽ നിന്ന് ഒഴിവാക്കിയത് രാഷ്ട്രീയ കേരളത്തെ ഞെട്ടിച്ച തീരുമാനമായിരുന്നു. കെ.കെ. ശൈലജയുടെ മാറ്റം ഒരു പ്രത്യേക വ്യക്തിയെ ലക്ഷ്യം വെച്ചുള്ളതല്ലെന്നും, മറിച്ച് സി.പി.എം കാലങ്ങളായി പിന്തുടരുന്ന സംഘടനാപരമായ അച്ചടക്കത്തിന്റെ ഭാഗമാണെന്നും മുഖ്യമന്ത്രി വിശദീകരിച്ചു. ആഗോളതലത്തിൽ തന്നെ അംഗീകരിക്കപ്പെട്ട ഒരു ‘പെർഫോമറെ’ എന്തുകൊണ്ട് മാറ്റിനിർത്തി എന്ന ചോദ്യത്തിന്, വൈകാരികതയില്ലാത്തതും എന്നാൽ പാർട്ടി നയങ്ങളിൽ ഊന്നിയതുമായ കൃത്യമായ മറുപടിയുമായി മുഖ്യമന്ത്രി പിണറായി വിജയൻ.

രണ്ട് തവണ എന്ന നിബന്ധനയും മണ്ഡലങ്ങളിലെ വിജയസാധ്യതയും

തുടർച്ചയായി രണ്ട് തവണ വിജയിച്ചവരെ മാറ്റുന്ന പാർട്ടിയുടെ പൊതുവായ നിലപാടാണ് കെ.കെ. ശൈലജയുടെ കാര്യത്തിലും ഉണ്ടായതെന്ന് മുഖ്യമന്ത്രി വിശദീകരിച്ചു. സ്പീക്കർ എ.എൻ. ഷംസീറിന്റെ ഉദാഹരണം ചൂണ്ടിക്കാട്ടിയാണ് അദ്ദേഹം ഇത് വ്യക്തമാക്കിയത്. ‘തലശ്ശേരി പോലൊരു മണ്ഡലത്തിൽ പുതിയൊരാളെ നിർത്തി വിജയിപ്പിക്കുക എന്നത് പാർട്ടിയെ സംബന്ധിച്ച് പ്രയാസമുള്ള കാര്യമല്ല. അങ്ങനെയുള്ള ഉറച്ച മണ്ഡലങ്ങളിൽ പുതിയ മുഖങ്ങളെ കൊണ്ടുവരാൻ പാർട്ടി എപ്പോഴും തയ്യാറാകും. എന്നാൽ ചില മണ്ഡലങ്ങളിൽ സ്ഥാനാർത്ഥിയുടെ വ്യക്തിപരമായ സ്വാധീനം വിജയത്തിന് അത്യന്താപേക്ഷിതമാണെന്ന് വരുമ്പോൾ അവിടെ മാറ്റങ്ങൾ വരുത്താൻ പാർട്ടി മടിക്കാറുണ്ടെന്ന്,’ മുഖ്യമന്ത്രി പറഞ്ഞു.

 കോൺഗ്രസിൽ മുഖ്യമന്ത്രി പദത്തിനായി മത്സരമില്ലെന്ന് പ്രതിപക്ഷ നേതാവ് വി ഡി സതീശൻ. ഒരു നേതാവിനെ ഇയര്‍ത്തിക്കാട്ടിയല്ല കോണ്‍ഗ്രസിന്‍റെ തെരഞ്ഞെടുപ്പ് പോരാട്ടമെന്നും എഐസിസിയുടെ നടപടിക്രമങ്ങൾ അനുസരിച്ചായിരിക്കും മുഖ്യമന്ത്രി തീരുമാനിക്കുകയെന്നും സതീശൻ പറഞ്ഞു. സിപിഎമ്മിലെ പോലെ ഒരു വടംവലിയും കോണ്‍ഗ്രസില്‍ ഉണ്ടാവില്ല. ജയിക്കുക എന്നത് മാത്രമാണ് ലക്ഷ്യമെന്നും പ്രതിപക്ഷ നേതാവ് കൂട്ടിച്ചേര്‍ത്തു. ഏഷ്യാനെറ്റ് ന്യൂസിന് അനുവദിച്ച പ്രത്യേക അഭിമുഖത്തിലാണ് വി ഡി സതീശന്റെ പ്രതികരണം.

സിപിഎം വിട്ട മുതിർന്ന നേതാവ് ടി.കെ. ഗോവിന്ദനെതിരേ രൂക്ഷവിമർശനവുമായി കണ്ണൂർ ജില്ലാ സെക്രട്ടറി കെ.കെ. രാഗേഷ്. ടി.കെ. ഗോവിന്ദൻ തളിപ്പറമ്പിൽ കോൺഗ്രസ് പിന്തുണയോടെ സ്വതന്ത്ര സ്ഥാനാർഥിയായി സിപിഎം സ്ഥാനാർഥി പി.കെ. ശ്യാമളയ്‌ക്കെതിരേ മത്സരിക്കുന്ന പശ്ചാത്തലത്തിലാണ് ‘വർഗവഞ്ചകരും ഒറ്റുകാരും ഓർക്കാൻ’ എന്ന ആമുഖത്തോടെ കെ.കെ. രാഗേഷിന്റെ ഫേയ്‌സ്ബുക്ക് പോസ്റ്റ് പുറത്തുവന്നത്.

കണ്ണൂർ ജില്ലയും തളിപ്പറമ്പ് നിയോജകമണ്ഡലം അടങ്ങുന്ന പ്രദേശവും സിപിഎമ്മിന്റെ ചരിത്രത്തിൽ ഉണ്ടാക്കിയിട്ടുള്ള വലിയ സ്വാധീനം ചൂണ്ടിക്കാട്ടിയാണ് രാഗേഷിന്റെ ഫേയ്‌സ്ബുക്ക് പോസ്റ്റ്. ന്നത്തെ തളിപ്പറമ്പ് നിയമസഭാമണ്ഡലം ഉൾക്കൊള്ളുന്ന പ്രദേശം കേരളത്തെ ഇളക്കിമറിച്ച എക്കാലത്തെയും വലിയ സമരങ്ങളുടെ സാക്ഷിയാണെന്നും മോറാഴയും പാടിക്കുന്നും കണ്ടക്കൈയും ബക്കളവും കൊളച്ചേരിയുമൊന്നും വെറും സ്ഥലനാമങ്ങളല്ല, ഹൃദയരക്തം കൊടുത്ത് നേടിയ അഭിമാനബോധത്തിന്റെ പ്രതീകങ്ങളാണെന്നും രാഗേഷ് കുറിപ്പിൽ പറയുന്നു.

തളിപ്പറമ്പിന്റെ ചരിത്രം അറിയാത്തത് വലിയ കുറ്റമല്ലെന്നും എന്നാൽ അതിനെ നിന്ദിക്കുന്നത് ക്ഷമിച്ചുകൂടാത്ത അപരാധമാണെന്നും രാഗേഷ് ചൂണ്ടിക്കാട്ടുന്നു. ‘വ്യാപകമായ ഉൾപ്പാർട്ടി ജനാധിപത്യവും കർശനമായ കേന്ദ്രീകൃത നേതൃത്വവും നിലനിർത്തിക്കൊണ്ട്, പാർട്ടി മെമ്പർമാരുടെ അവകാശങ്ങൾ സംരക്ഷിക്കുകയും അവരെക്കൊണ്ട് കടമകൾ നിറവേറ്റിക്കുകയും ചെയ്താൽ മാത്രമേ പാർട്ടിക്ക് വിശാലമായ ജനകീയൈക്യം കെട്ടിപ്പടുത്ത് ജനകീയ ജനാധിപത്യവിപ്ലവത്തിലേക്ക് മുന്നേറാൻ കഴിയൂ. കുലംകുത്തികൾക്കും വർഗവഞ്ചകന്മാർക്കും ചരിത്രത്തിൽ എവിടെയാണ് സ്ഥാനമെന്ന് നമുക്കറിയാം. ഈ തിരിച്ചറിവ് നാമോരോരുത്തരും സ്വയമാർജ്ജിക്കണം. പ്രസ്ഥാനത്തിന് കരുത്തുപകരണം’, രാഗേഷ് കുറിപ്പിൽ പറയുന്നു.

കെ.കെ. രാഗേഷിന്റെ ഫേയ്‌സ്ബുക്ക് കുറിപ്പിന്റെ പൂർണരൂപം:

വർഗവഞ്ചകരും ഒറ്റുകാരും ഓർക്കാൻ…

കേരളത്തിലെ കമ്മ്യൂണിസ്റ്റ് പാർട്ടിയുടെ ചരിത്രത്തിൽ ഇതിഹാസസമാനമായ ഏടുകൾ എഴുതിച്ചേർത്തിട്ടുണ്ട് കണ്ണൂർ ജില്ല. ഇന്നത്തെ തളിപ്പറമ്പ് നിയമസഭാമണ്ഡലം ഉൾക്കൊള്ളുന്ന പ്രദേശം കേരളത്തെ ഇളക്കിമറിച്ച എക്കാലത്തെയും വലിയ സമരങ്ങളുടെ സാക്ഷിയാണ്. മോറാഴയും പാടിക്കുന്നും കണ്ടക്കൈയും ബക്കളവും കൊളച്ചേരിയുമൊന്നും വെറും സ്ഥലനാമങ്ങളല്ല, ഹൃദയരക്തം കൊടുത്ത് നേടിയ അഭിമാനബോധത്തിന്റെ പ്രതീകങ്ങളാണ്. ആ കരുത്ത് തന്നെയാണ് ഈ പാർട്ടിയെ ഇന്നും നയിക്കുന്നത്.

വടക്കേമലബാറിലെ പട്ടിണിയെയും ദാരിദ്ര്യത്തെയും സാമൂഹികമായ അസമത്വത്തെയും നേരിടാൻ കോൺഗ്രസ്സല്ല കമ്മ്യൂണിസ്റ്റ് പാർട്ടിയാണ് തങ്ങൾക്കൊപ്പം നിൽക്കുന്നതെന്ന ജനങ്ങളുടെ തിരിച്ചറിവിനുള്ള സാക്ഷ്യപത്രമായിരുന്നു മോറാഴ. പിണറായി പാറപ്രത്ത് കമ്മ്യൂണിസ്റ്റ് പാർട്ടി രൂപംകൊണ്ട് എട്ടുമാസത്തിനുശേഷം നടന്ന മോറാഴ സംഭവമാണ് കോൺഗ്രസ് സോഷ്യലിസ്റ്റ് പാർട്ടിയിൽ നിന്നും കമ്മ്യൂണിസ്റ്റ് പാർട്ടിയിലേക്കുള്ള മാറ്റം പൂർണ്ണമാക്കിയത്. പാർട്ടി രൂപീകരിച്ച് നീണ്ട 17 വർഷത്തിനുശേഷമാണ് ബാലറ്റിലൂടെ നാം കേരളത്തിൽ അധികാരത്തിൽ വരുന്നത് എന്ന് ഓർമയിലുണ്ടാകണം. ഒളിവിലും തെളിവിലുമായി ത്യാഗോജ്ജ്വലമായ പോരാട്ടങ്ങളുടെ നീണ്ട വർഷങ്ങൾ…

ജന്മിനാടുവാഴിത്ത പീഡനങ്ങൾക്കെതിരെ കേരളത്തിലാദ്യമായി കർഷകസംഘം 1935ൽ രൂപീകരിക്കുന്നത് തളിപ്പറമ്പ് നിയമസഭാമണ്ഡലം ഉൾപ്പെടുന്ന കൊളച്ചേരിയിലാണ്. ഇന്ത്യൻ സ്വാതന്ത്ര്യസമരത്തിന്റെ തന്നെ ചാലകശക്തിയായി കർഷകസംഘം പിന്നീട് മാറുകയും ഇന്നും ഇന്ത്യൻകർഷകരുടെ ഐതിഹാസിക പോരാട്ടങ്ങൾക്ക് ഊർജ്ജം പകരുകയും ചെയ്യുന്നു. കേരളത്തിലെ പ്രധാന സ്ത്രീമുന്നേറ്റങ്ങളിലൊന്നായി ഇന്നും എണ്ണപ്പെടുന്ന കണ്ടക്കൈ പുല്ലുപറിക്കൽ സമരം നമ്മുടെ ഓർമകളെ ത്രസിപ്പിക്കേണ്ടതാണ്. സമരനായിക കുഞ്ഞാക്കമ്മ നാല്പതുദിവസത്തോളമാണ് ജയിലിൽ കഴിഞ്ഞത്. ഗ്രാമങ്ങളിലാകെ പോലീസിന്റെയും കോൺഗ്രസ് ഗുണ്ടാപ്പടയുടെയും നരനായാട്ടുതന്നെ നടന്നു. പുരുഷന്മാർക്ക് വീടുകളിൽ താമസിക്കാൻ കഴിയാതിരുന്ന ഒരു കാലമുണ്ടായിരുന്നു. സ്ത്രീകൾ കൊയ്ത്തരിവാളുകൾ രാകിമൂർച്ചകൂട്ടി പ്രതിരോധം തീർത്ത ഒരു കാലം.

1940കളുടെ അന്ത്യത്തിലും 50കളുടെ ആദ്യപാദത്തിലും വടക്കേമലബാറിൽ അതിരൂക്ഷമായ സമരപരമ്പരകളാണ് അരങ്ങേറിയത്. പത്തായപ്പുരകളിൽ ജന്മിമാർ പൂഴ്ത്തിവെച്ചിരുന്ന നെല്ല് പിടിച്ചെടുത്ത് പാവപ്പെട്ടവർക്ക് വിതരണം ചെയ്ത ചരിത്രപ്രസിദ്ധമായ നെല്ലെടുപ്പ് സമരങ്ങൾ നാടെമ്പാടും നടന്നു. രക്തരൂഷിതമായ സമരപരമ്പരകൾ. ഗുണ്ടാപ്പടയുടെയും പോലീസിന്റെയും മർദ്ദനവാഴ്ചകൾ. കൽത്തുറുങ്കുകളെ ഭേദിച്ച് ഉയർന്ന് വിമോചന മുദ്രാവാക്യങ്ങൾ. തുടയെല്ല്പൊട്ടി വീണുപോയപ്പോഴും ഇൻക്വിലാബ് വിളിച്ച രാഷ്ട്രീയബോധ്യങ്ങൾ. നിറതോക്കിന് മുമ്പിൽ പതറാത്ത രക്തസാക്ഷിക്കുന്നുകൾ…. അതെ, ചരിത്രം ഈ മണ്ണിലാണ് സ്പന്ദിക്കുന്നത്. അതറിയാത്തത് വലിയ കുറ്റമല്ല, എന്നാൽ അതിനെ നിന്ദിക്കുന്നത് ക്ഷമിച്ചുകൂടാത്ത അപരാധമാണ്.

വ്യാപകമായ ഉൾപ്പാർട്ടി ജനാധിപത്യവും കർശനമായ കേന്ദ്രീകൃത നേതൃത്വവും നിലനിർത്തിക്കൊണ്ട്, പാർട്ടി മെമ്പർമാരുടെ അവകാശങ്ങൾ സംരക്ഷിക്കുകയും അവരെക്കൊണ്ട് കടമകൾ നിറവേറ്റിക്കുകയും ചെയ്താൽ മാത്രമേ പാർട്ടിക്ക് വിശാലമായ ജനകീയൈക്യം കെട്ടിപ്പടുത്ത് ജനകീയ ജനാധിപത്യവിപ്ലവത്തിലേക്ക് മുന്നേറാൻ കഴിയൂ. കുലംകുത്തികൾക്കും വർഗവഞ്ചകന്മാർക്കും ചരിത്രത്തിൽ എവിടെയാണ് സ്ഥാനമെന്ന് നമുക്കറിയാം. ഈ തിരിച്ചറിവ് നാമോരോരുത്തരും സ്വയമാർജ്ജിക്കണം. പ്രസ്ഥാനത്തിന് കരുത്തുപകരണം.

പൊതുമരാമത്ത് മന്ത്രി മുഹമ്മദ് റിയാസുമായി ബന്ധപ്പെടുത്തി മരുമകൻ ആരോപണത്തിൽ മറുപടി പറഞ്ഞ് മുഖ്യമന്ത്രി പിണറായി വിജയൻ. മുഖ്യമന്ത്രിയാണ് സാധാരണ ഗതിയിൽ മന്ത്രിമാർക്ക് വകുപ്പുകൾ വിഭജിച്ചു നൽകുന്നത്. എന്നാൽ, ഇത് പാർട്ടിയും ബന്ധപ്പെട്ട കക്ഷികളും ചേർന്ന് എൽഡിഎഫ് ആണ് ഈ വിഭജനം വരുന്നത്. ഒരു കൂട്ടുകക്ഷി മന്ത്രിസഭ വരുമ്പോൾ മുഖ്യമന്ത്രി മാത്രമായിട്ടല്ല തീരുമാനമെടുക്കുന്നതെന്നും മുഖ്യമന്ത്രി പിണറായി വിജയൻ. എന്റെ പ്രത്യേകമായ താൽപ്പര്യത്തിന്റെ ഭാഗമായല്ല റിയാസിന് പൊതുമരാമത്ത് വകുപ്പും ടൂറിസവും നൽകിയത്. അത് സാധാരണ വകുപ്പുകൾ മാത്രമാണ്. അദ്ദേഹത്തിന്റെ പൊതുപ്രവർത്തനത്തിന്റെ ഭാഗമായാണ് മന്ത്രിയായി തുടരുന്നതെന്നും മകളുടെ ഭർത്താവ് ആയതു കൊണ്ട് അതിൽ നിന്ന് ഒഴിയാൻ പറ്റില്ലല്ലോ എന്നും മുഖ്യമന്ത്രിയുടെ പ്രതികരിച്ചു. അതത് സ്ഥലത്തിന്റെ പ്രത്യേകതകൾ നോക്കിയാണ് സ്ഥാനാർത്ഥികളെ തെരഞ്ഞെടുത്തിരിക്കുന്നതെന്നും ഏഷ്യാനെറ്റ് ന്യൂസ് എക്സിക്യൂട്ടീവ് എഡിറ്റര്‍ സിന്ധു സൂര്യകുമാറുമായുള്ള അഭിമുഖത്തിൽ മുഖ്യമന്ത്രി പിണറായി വിജയൻ പറഞ്ഞു.

‘