വടകര എംഡിഎംഎ കേസ് പ്രതി കീര്ത്തനക്ക് കുത്തേറ്റു. പങ്കാളി വിനീഷ് ആണ് ആക്രമിച്ചത്. പൊലീസ് സ്റ്റേഷനില് ഒപ്പിടാനെത്തിയപ്പോഴാണ് ആക്രമണം. ഇന്ന് രാവിലെ വടകര പൊലീസ് സ്റ്റേഷന് മുന്നിലായിരുന്നു സംഭവം. ഹൈക്കോടതിയുടെ ജാമ്യവ്യവസ്ഥ പ്രകാരം വടകര പൊലീസ് സ്റ്റേഷനില് ഹാജരാകാന് എത്തിയതായിരുന്നു കീര്ത്തന. സ്റ്റേഷന് സമീപം വിനീഷ് ആക്രമിക്കുകയായിരുന്നു. പ്രതി വിനീഷിനെ ഉടന് പോലീസ് കസ്റ്റഡിയില് എടുത്തു. വടകര താലൂക്ക് ആശുപത്രിയില് പ്രവേശിപ്പിച്ച കീര്ത്തനയെ മെഡിക്കല് കോളേജിലേക്ക് മാറ്റി.
തിരുവോണം ബമ്പര് ഭാഗ്യവാന് ആരെന്ന് ഇന്നറിയാം. ഉച്ചയ്ക്ക് ഒന്നരമണിക്ക് തിരുവനന്തപുരം ഗോര്ഖി ഭവനിലാണ് നറുക്കെടുപ്പ്. ആരോഗ്യവകുപ്പ് മന്ത്രി കെ മുരളീധരന് നറുക്കെടുപ്പിന്റെ ഉദ്ഘാടനം നിര്വഹിക്കും.സംസ്ഥാന ലോട്ടറി വകുപ്പിന്റെ തിരുവോണം ബമ്പര് ഭാഗ്യക്കുറിക്ക് ഇത്തവണ റെക്കോര്ഡ് വില്പ്പനയാണ് ഉണ്ടായത്.
അച്ചടിച്ച 90 ലക്ഷം ടിക്കറ്റുകളും വിറ്റുപോയി. കേരള ലോട്ടറി ഏജന്സികളിലും ടിക്കറ്റ് സ്റ്റോക്ക് ഔട്ട് ആയിട്ടുണ്ട്. ഏറ്റവും കൂടുതല് വില്പ്പന നടന്നത് പാലക്കാട് ജില്ലയിലാണ്. പാലക്കാട് മാത്രം 20 ലക്ഷത്തിലധികം ടിക്കറ്റുകള് വിറ്റുപോയി. ടിക്കറ്റ് വിപണിയില് തൃശൂര് ജില്ലാ രണ്ടാംസ്ഥാനത്തും തിരുവനന്തപുരം മൂന്നാം സ്ഥാനത്തും നില്ക്കുന്നു. ഏറ്റവും കുറവ് വില്പ്പന നടന്നത് കാസര്ഗോഡ് ജില്ലയിലാണ്. 30 കോടി രൂപയാണ് തിരുവോണം ബമ്പറിന്റെ ഒന്നാം സമ്മാനം. രണ്ടാം സമ്മാനം ഒരു കോടി വീതം 20 പേര്ക്ക്. മൂന്നാം സമ്മാനം 25 ലക്ഷം രൂപ വീതം 20 പേര്ക്ക്. നാലാം സമ്മാനം 5 ലക്ഷം രൂപ വീതം 10 പേര്ക്കാണ്.125.54 കോടി രൂപയാണ് ആകെ സമ്മാന തുക.
സുല്ത്താന് ബത്തേരി പൊലീസ് സ്റ്റേഷനില് നിന്ന് മോഷണം പോയ തൊണ്ടിമുതല് കണ്ടെത്തി. പ്രതി സീനിയര് സിപിഒ സബിത്തുമായുള്ള തെളിവെടുപ്പിലാണ് കണ്ടെത്തിയത്. സ്റ്റേഷനില് നിന്ന് 500 മീറ്റര് അകലെയുള്ള പൊലീസ് ക്വാര്ട്ടേഴ്സില് നിന്നാണ് ഹാന്സ് ചാക്കുകള് കണ്ടെത്തിയത്. ഹാന്സ് ചാക്കുകള് സൂക്ഷിച്ചിരുന്നത് കല്പ്പറ്റയിലായിരുന്നു. കേസ് എടുത്തതിന് അടുത്ത ദിവസം പുലര്ച്ചെ ഹാന്സ് ചാക്കുകള് ക്വാര്ട്ടേഴ്സിലെത്തിച്ചെന്ന് പൊലീസ് പറയുന്നു.
സെപ്റ്റംബര് 28 തിങ്കള് മുതല് 30 ബുധന് ദേശവ്യാപകമായി ബാങ്ക് പണിമുടക്ക് നടക്കുന്ന പശ്ചാത്തലത്തില് ഉപഭോക്താക്കള്ക്ക് ആശ്വാസമായി എസ്ബിഐ. ഈ ദിവസങ്ങളില് എ.ടി.എം സേവന നിരക്കുകള് എസ്ബിഐ ഒഴിവാക്കി. പണിമുടക്ക് സമയത്ത് ഉപഭോക്താക്കള്ക്ക് തടസ്സമില്ലാതെ പണം പിന്വലിക്കുന്നതിനായി രാജ്യത്തെ ഏത് ബാങ്കിന്റെ എടിഎം ഉപയോഗിച്ചാലും അത്തരം ഇടപാടുകള്ക്ക് അധിക നിരക്ക് ഈടാക്കില്ലെന്ന് എസ്ബിഐ വ്യക്തമാക്കി. എക്സ് പ്ലാറ്റ്ഫോമിലൂടെയാണ് ബാങ്ക് ഇക്കാര്യം അറിയിച്ചത്. ബാങ്ക് ഇടപാടുകള് നടത്തുന്നവര് ശ്രദ്ധിക്കേണ്ട കാര്യങ്ങള് ഉള്പ്പെടെയുള്ള വിവരങ്ങള് അറിയാം.
പറവൂര് താലൂക്ക് ആശുപത്രിയില് ഗുരുതര അനാസ്ഥ. മോര്ച്ചറിയില് സൂക്ഷിച്ചിരുന്ന മൃതദേഹം അഴുകി. പരുവത്തുരുത് സ്വദേശിയുടെ മൃതദേഹമാണ് മൊബൈല് ഫ്രീസര് തകരാറിലായതിനെ തുടര്ന്ന് അഴുകിയത്. ആരോഗ്യമന്ത്രിക്ക് ഉള്പ്പെടെ പരാതി നല്കി മകന് വിനീഷ്.
ഇക്കഴിഞ്ഞ 16നാണ് ശുചിമുറിയില് തലയിടിച്ച് വീണ് മരണപ്പെട്ട പരുവത്തുരുത്ത് സ്വദേശിയുടെ മൃതദേഹം പറവൂര് താലൂക്ക് ആശുപത്രിയിലെ മൊബൈല് ഫ്രീസറില് സൂക്ഷിക്കുന്നത്. അസ്വഭാവിക മരണമെന്ന റിപ്പോര്ട്ടുള്ളതിനാല് പോസ്റ്റ്മോര്ട്ടം ചെയ്യുന്നതിനു വേണ്ടിയാണ് ഫ്രീസറില് സൂക്ഷിച്ചത്. പിറ്റേന്ന് രാവിലെ എട്ടു മണിയോടുകൂടി മൃതദേഹം പോസ്റ്റ്മോര്ട്ടത്തിനായി കളമശ്ശേരി മെഡിക്കല് കോളേജില് എത്തിച്ചു. അപ്പോഴാണ് മൃതദേഹം അഴുകി എന്നുള്ള കാര്യം ബന്ധുക്കള് അറിയുന്നത്.
സ്വകാര്യ വാഹനത്തിലെ കെ എം ഷാജിയുടെ ഔദ്യോഗിക യാത്രയില് മന്ത്രിക്കെതിരെ നടപടിയാവശ്യപ്പെട്ട് പരാതി. ഗതാഗത കമ്മിഷണര്ക്ക് പരാതി നല്കി ഹൈക്കോടതി അഭിഭാഷകന്. കെഎം ഷാജിയുടെ നടപടി മന്ത്രിമാരുടെ പെരുമാറ്റച്ചട്ടത്തിന് വിരുദ്ധമെന്ന് പരാതിയില് പറയുന്നു.
സ്വകാര്യ കാറില് കേരള സ്റ്റേറ്റ് എന്ന് ഉപയോഗിച്ചതും നിയമവിരുദ്ധമെന്നും പരാതിയില് പറയുന്നു. സ്വകാര്യ വാഹനത്തില് ഔദ്യോഗിക നമ്പര് ഉപയോഗിച്ചതും നിയമവിരുദ്ധം. ദേശീയപതാകയും ചിഹ്നവും കെഎം ഷാജി ദുരുപയോഗം ചെയ്തു. കെ എം ഷാജിയുടെ നടപടി മോട്ടോര് വാഹന നിയമത്തിലെ വ്യവസ്ഥകള്ക്ക് വിരുദ്ധം. ഉടമ വാഹനം വിട്ടുനല്കിയത് പരസ്പര നേട്ടത്തിന് വേണ്ടിയെന്നും പരാതിയില് പറയുന്നു.
വാഹനത്തിന്റെ രജിസ്ട്രേഷന് ഗതാഗത വകുപ്പ് പരിശോധിക്കണമെന്നും ആവശ്യമുണ്ട്. വാഹനം ഗതാഗത വകുപ്പ് പരിശോധിക്കണമെന്നും പരാതിയില് ആവശ്യപ്പെട്ടു. ഔദ്യോഗിക ചിഹ്നങ്ങള് ദുരുപോഗം ചെയ്തതില് നടപടിയെടുക്കണമെന്നും ചൂണ്ടിക്കാണിച്ചിട്ടുണ്ട്.
ഔദ്യോഗിക വാഹനത്തിന് പകരം സ്വകാര്യ വ്യക്തിയുടെ ആഡംബര കാര് ഉപയോഗിച്ചത് വിവാദമായതോടെ മന്ത്രി കാര് തിരിച്ചേല്പ്പിച്ചിരുന്നു. കണ്ണൂര് തില്ലങ്കേരി സ്വദേശി യാക്കൂബിന്റെ കാറാണ് തിരിച്ചുനല്കിയത്.
മഹിളാ മോര്ച്ച മുന് സംസ്ഥാന അധ്യക്ഷ അഡ്വ. നിവേദിത സുബ്രഹ്മണ്യന് ദേശീയ വനിതാ കമ്മീഷന് അംഗം. വനിതാ ശിശുക്ഷേമ വകുപ്പ് ഇത് സംബന്ധിച്ച വിജ്ഞാപനം പുറത്തിറക്കി. ഗുരുവായൂര് സ്വദേശിയാണ് നിവേദിത. കേരളത്തിലെ സ്ത്രീകള്ക്ക് ലഭിച്ച അംഗീകാരമാണിതെന്ന് നിവേദിത പ്രതികരിച്ചു.
പരിസ്ഥിതി ലോല മേഖലയുമായി ബന്ധപ്പെട്ട കേന്ദ്ര വിജ്ഞാപനത്തില് അഭിപ്രായം രേഖപ്പെടുത്താനുള്ള സമയപരിധി ഇന്ന് അവസാനിക്കാനിരിക്കെ നിലപാടറിയിച്ച് സംസ്ഥാന സര്ക്കാര്. പരിസ്ഥിതി ലോല പ്രദേശങ്ങളുടെ വിസ്തീര്ണ്ണം 8,590 ചതുരശ്ര കിലോമീറ്റര് ആയി കുറക്കണമെന്നാണ് കേരളത്തില് പരിസ്ഥിതിലോല മേഖലകള് വരുന്ന വില്ലേജുകളുടെ എണ്ണം 131 ല് നിന്ന് 98 ആക്കണമെന്നും സര്ക്കാര് ആവശ്യപ്പെട്ടു.
ജൂലൈ 27നാണ് കേന്ദ്ര സര്ക്കാര് വിജ്ഞാപനം ഇറക്കിയത്. ഇന്നലെയാണ് സംസ്ഥാന സര്ക്കാര് കേന്ദ്രത്തെ തങ്ങളുടെ നിലപാടറിയിച്ചത്. പരിസ്ഥിതി ലോല മേഖലകളില് നിന്ന് ജനവാസമേഖലകളേയും കൃഷിയിടങ്ങളേയും ഒഴിവാക്കണമെന്ന നിലപാടിലാണ് സര്ക്കാര്. നിലവിലെ പരിസ്ഥിതി ലോല മേഖലകള് ഉള്പ്പെട്ട 131 വില്ലേജുകളില് നിന്ന് 33 എണ്ണം കുറയ്ക്കണമെന്നും കേരളം ആവശ്യപ്പെട്ടു. 9993.7 ചതുരശ്ര കിലോമീറ്റര് വിസ്തീര്ണം എന്നത് 8590 കിലോമീറ്ററാക്കി ചുരുക്കണമെന്നും ആവശ്യപ്പെട്ടു.
കോട്ടയം ജില്ലയില് പരിസ്ഥിതി ലോല പ്രദേശങ്ങള് ഉള്പ്പെട്ട 4 വില്ലേജുകളും ഇടുക്കി ജില്ലയില് 54 വില്ലേജുകളുമുണ്ട്. ഈ പ്രദേശത്തെ ചില വില്ലേജുകള് ഒഴിവാക്കണമെന്നാണ് സംസ്ഥാന സര്ക്കാര് ആവശ്യപ്പെടുന്നത്. കരട് വിജ്ഞാപനവുമായി ബന്ധപ്പെട്ട് ജനങ്ങള്ക്ക് പ്രതികരിക്കാനുള്ള ചില അവസരങ്ങളും കേന്ദ്ര പരിസ്ഥിതി മന്ത്രാലയം നല്കിയിരുന്നു. 60 ദിവസങ്ങളാണ് അഭിപ്രായം അറിയിക്കാന് നല്കിയിരുന്നത്. ആ സമയപരിധിയും ഇന്ന് അവസാനിക്കാനിരിക്കുകയാണ്.
ശബരിമല മണ്ഡലകാല മുന്നൊരുക്കം നേരിട്ട് അറിയിക്കാന് ദേവസ്വം മന്ത്രി കെ മുരളീധരനുമായി കൂടിക്കാഴ് നടത്തി തിരുവിതാംകൂര് ദേവസ്വം ബോര്ഡ് പ്രസിഡന്റ് കെ ജയകുമാര്. വിവാദങ്ങള്ക്കിടെ ആദ്യമായാണ് ഇരുവരും തമ്മില് കൂടിക്കാഴ്ച നടത്തിയത്. ദേവസ്വം ബോര്ഡും സര്ക്കാരും സഹകരിച്ച് പ്രവര്ത്തിക്കുമെന്ന് മന്ത്രി കെ മുരളീധരന് പറഞ്ഞു. ആശങ്കയും അസംതൃപ്തിയും മാറിയെന്നും എല്ലാം ശുഭം എന്ന് ദേവസ്വം പ്രസിഡന്റ് കെ ജയകുമാറും പറഞ്ഞു.
ഇത്തവണത്തെ മണ്ഡല മകരവിളക്ക് ദര്ശനം ഭംഗിയായി നടക്കുമെന്ന് കെ മുരളീധരന് പറഞ്ഞു. ദേവസ്വം ബോര്ഡ് പൂര്ണമായും സഹകരിക്കുമെന്ന് കെ ജയകുമാര് പറഞ്ഞിട്ടുണ്ട്. നല്ലൊരു ധാരണയിലേക്ക് എത്തിയിട്ടുണ്ട്. ബോര്ഡും ഗവണ്മെന്റും ഒരുമിച്ച് നിന്നുകൊണ്ടുതന്നെ ഈ വര്ഷത്തെ ദര്ശനം സുഗമമാക്കും എന്ന കാര്യത്തില് അദ്ദേഹം ഉറപ്പ് നല്കിയിട്ടുണ്ട്. അതുകൊണ്ട് തന്നെ ആശങ്കയ്ക്ക് അവകാശമില്ല. ഒരുമിച്ച് നീങ്ങും. മുഖ്യമന്ത്രി അദ്ദേഹവുമായി സംസാരിച്ചിരുന്നു. അതിന്റെ അടിസ്ഥാനത്തില് ബോര്ഡും ഗവണ്മെന്റും ഒരുമിച്ച് പ്രവര്ത്തിച്ചുകൊണ്ട് ഭക്തജനങ്ങള്ക്ക് ഒരു ബുദ്ധിമുട്ടുമില്ലാത്ത രീതിയില് ഇത്തവണ കാര്യങ്ങള് ഭംഗിയായി നടക്കും അദ്ദേഹം പറഞ്ഞു.
കണ്ണൂര്: കഴിഞ്ഞ ഒരു വര്ഷത്തിനിടെ അതീവ ഗുരുതരാവസ്ഥയില് ആശുപത്രിയില് പ്രവേശിപ്പിക്കപ്പെട്ട 13 രോഗികളില് 10 പേരെയും അത്യാധുനിക എക്മോ (ഇ.സി.എം.ഒ) ചികിത്സയിലൂടെ കണ്ണൂര് ആസ്റ്റര് മിംസ് ജീവിതത്തിലേക്ക് വിജയകരമായി തിരികെ എത്തിച്ചു. ദേശീയ-അന്താരാഷ്ട്ര ശരാശരിയേക്കാള് 77 ശതമാനം മികച്ച വിജയനിരക്ക് കൈവരിച്ചാണ് ആശുപത്രിയിലെ ക്രിട്ടിക്കല് കെയര് വിഭാഗം ഈ നേട്ടം സ്വന്തമാക്കിയത്. ആശുപത്രിയിലെ വിദഗ്ധരടങ്ങുന്ന അത്യാഹിത വിഭാഗം, കാര്ഡിയോളജി, പള്മണോളജി, നെഫ്രോളജി തുടങ്ങിയ വിഭാഗങ്ങളുടെ ഏകോപിച്ചുള്ള അടിയന്തര ഇടപെടലാണ് ഈ നൂതന ചികിത്സയില് നിര്ണായകമായത്.
കഠിനമായ അണുബാധകള്, ഇന്ഫ്ലുവന്സ, ന്യൂമോണിയ, അക്യൂട്ട് റെസ്പിറേറ്ററി ഡിസ്ട്രസ് സിന്ഡ്രോം (എ.ആര്.ഡി.എസ്) തുടങ്ങിയ രോഗങ്ങള് മൂര്ച്ഛിച്ച് ഹൃദയത്തിന്റെയും ശ്വാസകോശത്തിന്റെയും പ്രവര്ത്തനം പൂര്ണമായി തകരാറിലാകുന്ന ഘട്ടത്തിലാണ് എക്മോ ചികിത്സ ജീവന്രക്ഷയായി മാറുന്നത്. ഗുരുതരാവസ്ഥയിലുള്ള രോഗികള്ക്ക് സാധാരണ വെന്റിലേറ്ററുകള് നല്കുമ്പോള് അത് ശ്വാസകോശത്തെ അമിതമായി സമ്മര്ദ്ദത്തിലാക്കുകയും, സങ്കീര്ണ്ണതകള്ക്ക് കാരണമാകുകയും ചെയ്യാം. എന്നാല് എക്മോ സാങ്കേതികവിദ്യ ഈ പ്രതിസന്ധിയെ വിജയകരമായി മറികടക്കുന്നു. ഈ ചികിത്സയില് ശരീരത്തിന് പുറത്തുള്ള യന്ത്രം കൃത്രിമ ഹൃദയമായും ശ്വാസകോശമായും പ്രവര്ത്തിച്ച് രക്തത്തിലേക്ക് നേരിട്ട് ഓക്സിജന് എത്തിക്കുകയും യഥാസമയം കാര്ബണ് ഡൈ ഓക്സൈഡ് പുറന്തള്ളുകയും ചെയ്യുന്നു. ഇതുവഴി കേടുപാടുകള് സംഭവിച്ച അവയവങ്ങള്ക്ക് പൂര്ണ്ണ വിശ്രമം ലഭിക്കുകയും ശരീരം സ്വയം സുഖപ്പെടാനുള്ള നിര്ണ്ണായക സമയം രോഗിക്ക് ലഭിക്കുകയും ചെയ്യുന്നു.
ആഗോള ശരാശരിയേക്കാള് മികച്ച വിജയനിരക്കിലൂടെ വടക്കന് മലബാറിലെ വൈദ്യശാസ്ത്ര രംഗത്ത് അത്യാധുനിക പരിചരണ മികവിന്റെയും കൃത്യതയുടെയും പുതിയ പ്രതീകമായി മാറുകയാണ് കണ്ണൂര് ആസ്റ്റര് മിംസ്.
ക്രിട്ടിക്കല് കെയര് വിഭാഗം ഡയറക്ടര് ഡോ. അമിത്ത് ശ്രീധരന്, ക്രിട്ടിക്കല് കെയര് വിഭാഗം മേധാവി ഡോ. റിനോയ് ചന്ദ്രന്, കാര്ഡിയോ തൊറാസിക് സര്ജറി വിഭാഗം ഡോ. പ്രസാദ് സുരേന്ദ്രന്, കാര്ഡിയോ തൊറാസിക് അനസ്തേഷ്യ ഡോ. ഗണേഷ് .എം, ഡോ. നിലഞ്ജന്, ജിനു (പെര്ഫ്യൂഷനിസ്റ്റ്), അഖില് (നഴ്സിംഗ് വിഭാഗം), റെസ്പിറേറ്ററി തെറാപ്പിസ്റ്റ് കൃഷ്ണന് , ഫിസിയോതെറാപ്പി വിഭാഗം മേധാവി വിശ്വനാഥന് തുടങ്ങിയവരുടെ നേതൃത്വത്തിലുള്ള മെഡിക്കല് സംഘമാണ് ചികിത്സ വിജയകരമായി പൂര്ത്തീകരിച്ചത്.
മരണമുഖത്തുനിന്നാണ് ഈ അത്യാധുനിക ചികിത്സയുടെ പിന്ബലത്തോടെ രോഗികളെ നമ്മള് ജീവിതത്തിലേക്ക് തിരികെ കൊണ്ടുവന്നതെന്ന് ഡോ. അമിത്ത് ശ്രീധരന് പ്രതികരിച്ചു. കൃത്യമായ സമയത്തുള്ള ഇടപെടലും പ്രത്യേക പരിശീലനം ലഭിച്ച മെഡിക്കല് സംഘത്തിന്റെ കൂട്ടായ പരിശ്രമവുമാണ് ഈ ചികിത്സയില് നിര്ണ്ണായകമാകുന്നതെന്ന് അദ്ദേഹം കൂട്ടിച്ചേര്ത്തു.
വിദേശ രാജ്യങ്ങളിലും മെട്രോ നഗരങ്ങളിലും മാത്രം ലഭ്യമായിരുന്ന അത്യാധുനിക ചികിത്സാസൗകര്യങ്ങള് മേഖലയില് ലഭ്യമാക്കാനും ഈ അപൂര്വ്വ നേട്ടത്തിലൂടെ കണ്ണൂരിന്റെ പേര് അന്താരാഷ്ട്ര തലത്തില് ശ്രദ്ധിക്കപ്പെടുന്ന നിലയിലേക്ക് ഉയര്ത്താനും സാധിച്ചു എന്ന് കണ്ണൂര് ആസ്റ്റര് മിംസ് ചീഫ് ഓപ്പറേറ്റിംഗ് ഓഫീസര് ഡോ. അനൂപ് നമ്പ്യാര് പറഞ്ഞു. പ്രദേശത്തിന്റെ ആരോഗ്യ മേഖലയില് ചരിത്രപരമായ ഒരു മാറ്റത്തിനാണ് ആശുപത്രി വഴിതുറന്നിരിക്കുന്നതെന്ന് അദ്ദേഹം കൂട്ടിച്ചേര്ത്തു. സങ്കീര്ണ്ണമായ സാങ്കേതികവിദ്യകളും വിദഗ്ധ ഡോക്ടര്മാരുടെ സേവനവും ലഭ്യമാക്കി നാടിന് അന്താരാഷ്ട്ര നിലവാരത്തിലുള്ള ചികിത്സ ഉറപ്പാക്കാന് ആശുപത്രി പ്രതിജ്ഞാബദ്ധമാണെന്നും പ്രാദേശിക തലത്തില് സാധാരണക്കാര്ക്ക് ഏറ്റവും മികച്ച പരിചരണം ഉറപ്പാക്കുന്നതിലും കണ്ണൂര് ആസ്റ്റര് മിംസ് ഒരു നിര്ണ്ണായക വഴിത്തിരിവായി മാറിയിരിക്കുകയാണെന്ന് ആശുപത്രി അധികൃതര് വ്യക്തമാക്കി.
