ദീപങ്ങളുടെ ഉത്സവമായ ദീപാവലി ആഘോഷത്തില്‍ രാജ്യം. തിന്മയ്ക്ക് മേല്‍ നന്മ നേടുന്ന വിജയത്തെ ആഘോഷമാക്കുന്ന ഉത്സവമാണ് ദീപാവലി. മണ്‍ചിരാതില്‍ ദീപം തെളിയിച്ചും പടക്കം പൊട്ടിച്ചും മധുരം വിതരണം ചെയ്തും കുട്ടികള്‍ തൊട്ട് മുതിര്‍ന്നവര്‍ വരെ ദീപങ്ങള്‍ക്ക് നിറച്ചാര്‍ത്തൊരുക്കുന്ന ദിവസം. ദീപം കൊളുത്തി മധുരത്തിന് ഒപ്പം ആനന്ദം പങ്കിട്ടാണ് രാജ്യം മുഴുവന്‍ ദീപാവലി ആഘോഷിക്കുന്നത്. വടക്കേ ഇന്ത്യയില്‍ പുതുവസ്ത്രവും മെഹന്തിയും മധുരവും ദീപാവലിക്ക് പകിട്ടേകുന്നു.
ദീപാവലിയെക്കുറിച്ച് പല ഐതിഹ്യങ്ങളുണ്ട്. പതിനാല് വര്‍ഷത്തെ വനവാസത്തിന് ശേഷം അയോധ്യയിലെത്തുന്ന ശ്രീരാമന്റെ വരവിന്റെ ആഘോഷമാണ് ദീപാവലിയെന്നാണ് ഒരു കഥ. ശ്രീകൃഷ്ണന്‍ നരകാസുരനെ വധിച്ചതിന്റെ ആഘോഷമാണെന്നും മറ്റൊരു കഥയും പറയുന്നു. കഥകള്‍ക്ക് അപ്പുറം ഒരു ജനതയെ ഒറ്റ കുടക്കീഴില്‍ എത്തിക്കുന്ന നന്മയുടെ വെളിച്ചം പരത്തുന്ന ഉത്സവമാണ് ദീപാവലി.
സ്വകാര്യ ബസുകളുടെ മരണപാച്ചിലിന് കടിഞ്ഞാണിടാന്‍ സര്‍ക്കാര്‍. ബസ്സുകളുടെ ടൈമിംഗ് ശാസ്ത്രീയമായി പരിഷ്‌കരിക്കുമെന്ന് ഗതാഗത മന്ത്രി സി പി ജോണ്‍. തന്റെ മകള്‍ക്ക് സംഭവിച്ചത് ഇനി മാറ്റാര്‍ക്കും ഉണ്ടാകരുത് എന്ന് ഇന്‍ഫോപാര്‍ക്കിന് സമീപം സ്വകാര്യ ബസിടിച്ച് മരിച്ച അക്ഷരയുടെ പിതാവ് ഒമാനാക്കുട്ടന്‍ പ്രതികരിച്ചിരുന്നു. വിഷയത്തില്‍ ഹൈക്കോടതി രൂക്ഷവിമര്‍ശനവും ഉന്നയിച്ചിരുന്നു. ഇതിന് പിന്നാലെയാണ് മരണപ്പാച്ചിലിന് തടയിടാന്‍ അതിവേഗ നടപടികള്‍ ഗതാഗത വകുപ്പ് കൊണ്ടുവരുന്നത്.
ബസ്സുകളുടെ ടൈമിംഗ് ശാസ്ത്രീയമായി പരിഷ്‌കരിക്കുന്നത് ആര്‍ടിഒമാര്‍ അത് പരിശോധിക്കും. പതിനഞ്ചാം തീയതി മുതല്‍ റോഡ് സേഫ്റ്റി മിഷന്‍ ഗതാഗത വകുപ്പ് ആരംഭിക്കുമെന്ന് സിപി ജോണ്‍ പറഞ്ഞു. സ്വകാര്യ ബസുകള്‍ മാത്രമല്ല മറ്റ് വാഹനങ്ങളും മരണപ്പാച്ചില്‍ നടത്തുന്നുവെന്നും ചേരാനല്ലൂര്‍ അപകടം ഉള്‍പ്പെടെ പരാമര്‍ശിച്ചുകൊണ്ട് മന്ത്രി പറഞ്ഞു. ബസുകളുടെ ടൈമിംഗ് മാറ്റാന്‍ പോകുകയാണ്. ഒരു കിലോമീറ്ററിന് രണ്ടരമിനിറ്റാണ് എറണാകുളം ടൗണില്‍ നല്‍കിയിരിക്കുന്നത്. അത് അപര്യാപ്തമാണ്. ഇതുള്‍പ്പെടെ ആര്‍ടിഒമാര്‍ പരിശോധിച്ച ശേഷം പരിഷ്‌കരിക്കുമെന്നും മന്ത്രി വ്യക്തമാക്കി.
സംസ്ഥാനത്ത് വീണ്ടും ഷിഗെല്ല. മലപ്പുറത്തും കോഴിക്കോടുമായി അഞ്ച് പേര്‍ക്ക് ഷിഗെല്ല രോഗബാധ സ്ഥിരീകരിച്ചു. രണ്ട് ജില്ലകളിലുമായി രോഗബാധിതരുടെ എണ്ണം വര്‍ധിക്കുന്ന സാഹചര്യത്തില്‍ ആരോഗ്യവകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്
മലപ്പുറം അമരമ്പലത്തെ കടയില്‍നിന്ന് ലഘുഭക്ഷണം കഴിച്ച നാല് വയസുകാരിക്കും പാലുണ്ടയിലെ കടയില്‍നിന്ന് മന്തി കഴിച്ച രണ്ട് പേര്‍ക്കുമാണ് ഷിഗെല്ല സ്ഥിരീകരിച്ചത്. രോഗലക്ഷണങ്ങളോടെ ആശുപത്രിയില്‍ കഴിയുന്ന ഏതാനും പേരുടെ പരിശോധനാഫലം കൂടി ലഭിക്കാനുണ്ട്. പ്രദേശത്ത് 23 ഓളം പേര്‍ക്ക് വയറിളക്കം, ഛര്‍ദി, വയറുവേദന തുടങ്ങിയ ലക്ഷണങ്ങളുണ്ട്. രോഗബാധിതരുടെ വീടുകളില്‍ ആരോഗ്യവകുപ്പിന്റെ നേതൃത്വത്തില്‍ ക്ലോറിനേഷന്‍ നടത്തി.
കോഴിക്കോടും രണ്ട് പേര്‍ക്ക് ഷിഗെല്ല സ്ഥിരീകരിച്ചു. മേപ്പയില്‍ സീനിയര്‍ ബേസിക് സ്‌കൂളിലെ രണ്ട് കുട്ടികള്‍ക്കാണ് രോഗം സ്ഥിരീകരിച്ചത്. ഛര്‍ദിയും പനിയും വയറിളക്കവും അനുഭവപ്പെട്ടതിനെ തുടര്‍ന്ന് കുട്ടികളെ ആശുപത്രിയില്‍ പ്രവേശിപ്പിച്ചിരുന്നു. നേരത്തെ ഇതേ സ്‌കൂളിലെ ഒരു കുട്ടിക്കും ഷിഗെല്ല സ്ഥിരീകരിച്ചിരുന്നു.സ്‌കൂളില്‍ ഉച്ചഭക്ഷണത്തോടൊപ്പം മുട്ടക്കറിയും തൈരും കഴിച്ച കുട്ടികള്‍ക്കാണ് രോഗലക്ഷണങ്ങള്‍ കണ്ടത്. രണ്ട് ജില്ലകളിലുമായി രോഗബാധിതരുടെ എണ്ണം വര്‍ധിക്കുന്ന സാഹചര്യത്തില്‍ ആരോഗ്യവകുപ്പ് ജാഗ്രതാ നിര്‍ദേശം നല്‍കിയിട്ടുണ്ട്.
സംസ്ഥാനത്തെ പോളിംഗ് സ്റ്റേഷനുകളുടെ പുനക്രമീകരണം, കേരളത്തിന്റെ നടപടികള്‍ ഇന്ത്യന്‍ തെരഞ്ഞെടുപ്പ് കമ്മീഷന്‍ അംഗീകരിച്ചു. സംസ്ഥാനം സമര്‍പ്പിച്ച പോളിംഗ് സ്റ്റേഷനുകളുടെ പുനക്രമീകരണ നടപടികള്‍ക്കാണ് കമ്മീഷന്റെ അംഗീകാരം. പുന ക്രമീകരണത്തിന് മുന്‍പ് സംസ്ഥാനത്ത് 30471 പോളിംഗ് സ്റ്റേഷനുകളാണ് ഉണ്ടായിരുന്നത്. പുന ക്രമീകരണത്തിന്റെ ഭാഗമായി 216 പുതിയ പോളിംഗ് സ്റ്റേഷനുകള്‍ രൂപീകരിച്ചു. 5 പൊളിസ്റ്റേഷനുകള്‍ സംയോജിപ്പിച്ചു. 178 പോളിംഗ് സ്റ്റേഷനുകളുടെ സ്ഥലം മാറ്റുകയും ചെയ്തു. സംസ്ഥാനത്തെ ആകെ പോളിംഗ് സ്റ്റേഷനുകളുടെ എണ്ണം 30682 ആയി. സൗകര്യങ്ങള്‍ മെച്ചപ്പെടുത്തുന്നതിന്റെ ഭാഗമായാണ് പുനക്രമീകരണം നടന്നത്.
അതേസമയം ആറ് സംസ്ഥാനങ്ങളില്‍ എസ്‌ഐആര്‍ നടപടികളുടെ ഭാഗമായി വോട്ടര്‍ പട്ടികയില്‍ നിന്ന് ഒഴിവാക്കപ്പെട്ട വോട്ടര്‍മാര്‍ക്ക് പേര് ചേര്‍ക്കാന്‍ ഒരവസരം കൂടി നല്‍കാന്‍ നിര്‍ദേശിച്ച് കേന്ദ്ര തിരഞ്ഞെടുപ്പ് കമ്മീഷന്‍. ഒഴിവാക്കിയ വോട്ടര്‍മാര്‍ക്ക് എന്യൂമറേഷന്‍ ഫോം പൂരിപ്പിച്ച് നല്‍കാന്‍ ഒരവസരം കൂടി നല്‍കാനാണ് നിര്‍ദേശം. മഹാരാഷ്ട്ര, ഹരിയാന, ആന്ധ്രാപ്രദേശ്, ജാര്‍ഖണ്ഡ്, തെലങ്കാന, നാഗാലാന്‍ഡ് എന്നീ സംസ്ഥാനങ്ങളിലെയും കേന്ദ്രഭരണ പ്രദേശമായ ദില്ലിയിലെയും ചീഫ് ഇലക്ടറല്‍ ഓഫീസര്‍മാര്‍ക്കാണ് കേന്ദ്ര തിരഞ്ഞെടുപ്പ് കമ്മീഷന്റെ നിര്‍ദേശം
എന്യൂമറേഷന്‍ ഫോമുകള്‍ ലഭിച്ചിട്ടും പല കാരണങ്ങളാല്‍ വോട്ട് ഒഴിവാക്കപ്പെട്ട വോട്ടര്‍മാരെ സഹായിക്കുകയാണ് നടപടിയുടെ ലക്ഷ്യം
വയനാട് ഉരുള്‍ പൊട്ടല്‍ ദുരന്തത്തില്‍ ഉറ്റവരെ നഷ്ടമായ ശ്രുതി പുതിയ ജീവിതത്തിലേക്ക്. ഗുരുവായൂര്‍ ക്ഷേത്രത്തില്‍ വച്ചായിരുന്നു വിവാഹം. വയനാട് കളക്ടേറ്റിലെ ജീവനക്കാരനായ സന്ദീപാണ് വരന്‍. രക്ഷിതാക്കാളുടെ സ്ഥാനത്ത് നിന്ന് മുന്‍ മന്ത്രി കെ രാജനാണ് ചടങ്ങില്‍ പങ്കെടുത്തത്. രാവിലെ ?ഗുരുവായൂര്‍ ക്ഷേത്ര നടയിലായിരുന്നു വിവാഹം. എല്ലാം അറിഞ്ഞ് കൈപിടിച്ചെന്നും സന്തോഷത്തോടെ ജീവിക്കാന്‍ കഴിയണമെന്നാണ് പ്രാര്‍ത്ഥനയെന്നും ശ്രുതി പറഞ്ഞു. സന്തോഷത്തോടെ ജീവിതത്തിലേക്ക് കടക്കുന്നുവെന്നും എല്ലാവര്‍ക്കും നന്ദിയുണ്ടെന്നും വരന്‍ സന്ദീപും പ്രതികരിച്ചു. വയനാട് ദുരന്തത്തില്‍ വീട്ടിലെ 9 അം?ഗങ്ങളെ നഷ്ടപ്പെട്ട ശ്രുതിയുടെ പ്രതിശ്രുത വരനും വാഹനാപകടത്തില്‍ മരിച്ചിരുന്നു. ജീവിതത്തില്‍ ഒറ്റപ്പെട്ടുപോയ ശ്രുതിക്ക് അന്നത്തെ സര്‍ക്കാരാണ് കൈത്താങ്ങായത്.
വാഹനമോഡിഫിക്കേഷന് അനുമതി നല്‍കാന്‍ സംസ്ഥാന സര്‍ക്കാരിന് അധികാരമില്ലെന്ന് ഗതാഗത മന്ത്രി സി പി ജോണ്‍. മോട്ടോര്‍ വാഹന നിയമത്തിലെ വ്യവസ്ഥകള്‍ പ്രകാരം വാഹനങ്ങളുടെ രൂപമാറ്റം കേന്ദ്ര നിയമങ്ങള്‍ക്കും സുരക്ഷാ മാനദണ്ഡങ്ങള്‍ക്കും വിധേയമായിരിക്കണമെന്നും മന്ത്രി നിയമസഭയില്‍ വ്യക്തമാക്കി. അനധികൃത മോഡിഫിക്കേഷന് 5000 രൂപ വീതം പിഴ ഈടാക്കും. മെയ് 18 മുതല്‍ സെപ്റ്റംബര്‍ 30 വരെ അനധികൃത രൂപമാറ്റത്തിന് 5.53 കോടി രൂപ പിഴ ചുമത്തിയതായി മന്ത്രി സഭയില്‍ രേഖാമൂലം അറിയിച്ചു.
നെടുമ്പാശ്ശേരി മിനി കൂപ്പര്‍ വാഹനാപകട കേസില്‍ സുഹൈല്‍ സജീവ് ഒഴികെയുള്ള മൂന്ന് പ്രതികള്‍ക്ക് ജാമ്യം നല്‍കി ഹൈക്കോടതി. സുഹൈല്‍ സജീവിന് പത്ത് ദിവസത്തിന് ശേഷം ജാമ്യം നല്‍കുമെന്നും ഹൈക്കോടതി വ്യക്തമാക്കി. നാല് പ്രതികളുടെ ജാമ്യാപേക്ഷയിലാണ് ഹൈക്കോടതി തീരുമാനം. സുഹൈലിന് പുറമെയുള്ള നിനവ്, ജോയല്‍, അമീന്‍ എന്നീ പ്രതികള്‍ക്കാണ് ഇന്ന് ജാമ്യം അനുവദിച്ചത്.
അപകടം ദൗര്‍ഭാഗ്യകരമെന്ന് ചൂണ്ടിക്കാട്ടിയ ഹൈക്കോടതി എല്ലാ തെളിവുകളും ശേഖരിച്ചല്ലോ എന്നും ചോദിച്ചു. ഒരു മാസമായി പ്രതികള്‍ റിമാന്‍ഡിലെന്നും കോടതി നിരീക്ഷിച്ചു. കസ്റ്റഡിയില്‍ തുടരാന്‍ മതിയായ കാരണം വേണമെന്നും പൊതുബോധത്തിന് അനുസരിച്ച് തീരുമാനമെടുക്കാനാവില്ലെന്നും കോടതി പറഞ്ഞു. നിയമവും നടപടിക്രമങ്ങളും നോക്കിയാണ് തീരുമാനമെടുത്തതെന്നും ഹൈക്കോടതി ചൂണ്ടിക്കാട്ടി. അതേസമയം പ്രതികളുടെ ജാമ്യാപേക്ഷയെ പ്രൊസിക്യൂഷന്‍ എതിര്‍ത്തിരുന്നു. തെളിവ് ഇനിയും ശേഖരിക്കാനുണ്ടെന്നും മൊഴി നല്‍കാന്‍ ആരും മുന്നോട്ട് വരില്ലെന്നും പ്രോസിക്യൂഷന്‍ ചൂണ്ടിക്കാട്ടി. പത്ത് ദിവസത്തിനകം അന്വേഷണം പൂര്‍ത്തിയാക്കാം എന്നും പ്രോസിക്യൂഷന്‍ കോടതിയെ അറിയിച്ചു.
സംസ്ഥാനത്ത് മഴ ശക്തമാകും.തിങ്കളാഴ്ച വരെ ശക്തമായ മഴയ്ക്കും ഇടിമിന്നലിനും സാധ്യത. ഇന്ന് പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലേര്‍ട്ട് പ്രഖ്യാപിച്ചിട്ടുണ്ട്. നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലും യെല്ലോ അലേര്‍ട്ട് ഉണ്ട്. മഴയോടൊപ്പം 40 കിലോമീറ്റര്‍ വരെ ശക്തമായ കാറ്റിനും സാധ്യതയുണ്ട്.
വിവാദങ്ങള്‍ക്കൊടുവില്‍ എക്സൈസ് കമ്മീഷണര്‍ സീറാം സാംബശിവറാവുവിനെ മാറ്റി. ബാര്‍ ലൈസന്‍സ് വിവാദത്തെ തുടര്‍ന്നാണ് മാറ്റം. നെടുമ്പാശേരി വിമാനത്താവളത്തില്‍ പുതിയ ബാര്‍ ലൈസന്‍സ് അനുവദിച്ചതിലും, മൂന്ന് ബിയര്‍- വൈന്‍ പാര്‍ലറുകള്‍ക്ക് ബാര്‍ പദവി നല്‍കിയതില്‍ ഉദ്യോഗസ്ഥരെ പിന്തുണച്ചതിലും എക്സൈസ് മന്ത്രി കടുത്ത അതൃപ്തി അറിയിച്ചിരുന്നു. ഇതിന് പിന്നാലെയാണ് മാറ്റം.
സംസ്ഥാനത്ത് വൈദ്യുതിക്ഷാമം ഉണ്ടാകേണ്ട കാലാവസ്ഥയല്ല നിലവിലുള്ളതെന്നും, വൈദ്യുതി രംഗത്ത് പ്രതിസന്ധിയുണ്ടെന്ന് മുഖ്യമന്ത്രി പറയുന്നത് ദുരൂഹമാണെന്നും പ്രതിപക്ഷ നേതാവ് പിണറായി വിജയന്‍. കേരളത്തിലെ വൈദ്യുതിക്ഷാമം കൃത്രിമമായി സൃഷ്ടിച്ചതാണ്. ഇതിന് പിന്നില്‍ അതീവ ഗൗരവമുള്ള കാര്യങ്ങളുണ്ടെന്നും പിണറായി വാര്‍ത്താ സമ്മേളനത്തില്‍ പറഞ്ഞു.വടക്കേ ഇന്ത്യയില്‍ ഉള്‍പ്പെടെ നല്ല മഴ ലഭിച്ചതോടെ രാജ്യത്ത് ആകെ വൈദ്യുതി ലഭ്യത മെച്ചപ്പെട്ട നിലയിലാണ്. പക്ഷേ, സര്‍ക്കാരും മുഖ്യമന്ത്രിയും വൈദ്യുതി പ്രതിസന്ധിയെന്നാണ് പറയുന്നത്.
വൈദ്യുതി ബോര്‍ഡ് എടുത്ത നിലപാട് തള്ളുന്ന സര്‍ക്കാരിന്റെ നടപടി സംശയാസ്പദമാണ്. വൈദ്യുതി ബോര്‍ഡും വകുപ്പ് മന്ത്രിയും സ്വീകരിച്ച നിലപാടിന് വിരുദ്ധമായാണ് മുഖ്യമന്ത്രി പ്രവര്‍ത്തിക്കുന്നതെന്ന് പിറണായി അഭിപ്രായപ്പെട്ടു. സാധാരണ നിലയില്‍ കാര്യങ്ങള്‍ കൈകാര്യം ചെയ്യേണ്ടത് വൈദ്യുതി ബോര്‍ഡാണ്; അതിന്റെ പ്രധാന ഉത്തരവാദിത്തവും അവര്‍ക്കാണ്. കരാര്‍ ഒപ്പിടാന്‍ തീരുമാനിച്ചത് താനാണെന്ന് മുഖ്യമന്ത്രി തന്നെ പറയുന്നു. അങ്ങനെയെങ്കില്‍ പിന്നെന്തിനാണ് വകുപ്പും മന്ത്രിയും ബോര്‍ഡും? പൂര്‍ണ ഉത്തരവാദിത്തം മുഖ്യമന്ത്രി ഏറ്റെടുക്കുമ്പോള്‍ അതില്‍ എന്തോ ഒളിച്ചുവയ്ക്കാനുണ്ടെന്ന് പിണറായി പറഞ്ഞു.
അഴിമതി ആരോപണങ്ങള്‍ക്ക് മുഖ്യമന്ത്രിക്ക് മറുപടിയില്ല. സുതാര്യമായ നടപടിക്രമങ്ങളിലൂടെയാണ് വൈദ്യുതി വാങ്ങേണ്ടത്. നല്ല കഴിവുള്ള ഐഎഎസ് ഉദ്യോഗസ്ഥനാണ് രാജമാണിക്യം. കാര്യങ്ങള്‍ പരിശോധിച്ചപ്പോള്‍ ക്രമക്കേടുകള്‍ ബോധ്യപ്പെട്ടതിനെത്തുടര്‍ന്നാണ് അദ്ദേഹം വിയോജിപ്പ് രേഖപ്പെടുത്തിയത്. എന്നാല്‍ തങ്ങള്‍ക്ക് വഴങ്ങാത്ത ഉദ്യോഗസ്ഥനെ സ്ഥാനമാറ്റുകയാണ് സര്‍ക്കാര്‍ ചെയ്തത്.
കെഎസ്ഇബിക്കോ രാജമാണിക്യത്തിനോ എതിര്‍പ്പില്ലെന്ന് പറയുമ്പോഴും അവരുടെ വിയോജനക്കത്തിന് വിരുദ്ധമായ തീരുമാനങ്ങളാണ് മുഖ്യമന്ത്രി കൈക്കൊള്ളുന്നത്. ഔദ്യോഗിക കത്ത് ഇല്ലെന്ന വാദം തെറ്റാണെന്ന് അത് പുറത്തുവന്നതിലൂടെ വ്യക്തമായി. രാജ്യത്തെ കുത്തക കമ്പനികളാണ് വൈദ്യുതി ഉത്പാദനം നടത്തുന്നത്. സര്‍ക്കാര്‍ നടപടി കുത്തകകളുടെ താല്‍പര്യം സംരക്ഷിക്കാനുള്ള പ്രതിസന്ധി സൃഷ്ടിക്കലാണോ എന്നത് പരിശോധിക്കണമെന്നും പിണറായി ആവശ്യപ്പെട്ടു.
