Kerala news

ഇരിട്ടി:കണ്ണൂര്‍ അന്താരാഷ്ട്ര വിമാനത്താവളത്തിന് പോയിന്റ് ഓഫ് കാള്‍ അനുവദിക്കുക, വിമാനത്താവളത്തിനോട് ചേര്‍ന്ന് ഹജ്ജ് ഹൗസ് നിര്‍മ്മിക്കുക എന്നീ ആവശ്യങ്ങള്‍ ഉയര്‍ത്തിപ്പിടിച്ചുകൊണ്ട് കേരള പ്രവാസി സംഘം കണ്ണൂര്‍ ജില്ലാ കമ്മിറ്റി ഡിസംബര്‍ 13 ,14, 15 തീയതികളില്‍ നടത്തുന്ന വാഹന പ്രചരണ ജാഥ ഡിസംബര്‍ 15 ന് രാവിലെ 10.30 ന് ഇരിട്ടിയില്‍ എത്തിച്ചേരും.ഡിസംബര്‍ 16ന് രാവിലെ 10 മണിക്ക് കണ്ണൂര്‍ അന്താരാഷ്ട്ര വിമാനതാവളത്തിലേക്ക് നടക്കുന്ന എയര്‍പോര്‍ട്ട് മാര്‍ച്ചും വിജയിപ്പിക്കുന്നതിന് വേണ്ടിയുള്ള ഇരിട്ടി ഏരിയ സംഘാടക സമിതി യോഗം ഏരിയ പ്രസിഡന്റ് തോമസിന്റെ അധ്യക്ഷതയില്‍ കേരള പ്രവാസി സംഘം ജില്ല വൈസ് പ്രസിഡന്റ് പ്രശാന്ത് എടക്കാനം ഉദ്ഘാടനം ചെയ്തു. പുരോഗമനപ്രസ്ഥാനത്തിന്റെ നേതാക്കളായ സത്യന്‍ ഇ.എസ്, സുമേഷ് എം, വൈ.വൈ. മാത്തായി, മനോഹരന്‍ കൈതപ്രം ,ചന്ദ്രന്‍ , കേരള പ്രവാസി സംഘം ഇരിട്ടി ഏരിയ സെക്രട്ടറി ധനേഷ്.കെ എന്നിവര്‍ സംസാരിച്ചു.
ചെയര്‍മാന്‍ :മനോഹരന്‍ കൈതപ്രം
വൈസ് ചെയര്‍മാന്‍മാര്‍-തോമസ് ജോസഫ്,ബിനോയ് പി.വി.,വേണുഗോപാലന്‍
കണ്‍വീനര്‍ : ധനേഷ്. കെ
ജോ: കണ്‍വീനര്‍:വൈവൈ. മത്തായി,അശ്വന്‍ കാരായി,
ദിനചന്ദ്രന്‍ അടക്കമുള്ള 51 അംഗ സംഘാടക സമിതി രൂപീകരിച്ചു.

അത്യാധുനിക രീതിയില്‍ പുനര്‍രൂപകല്‍പ്പന ചെയ്ത കേരള ടൂറിസത്തിന്റെ വെബ്സൈറ്റ് (www.keralatourism.org) ടൂറിസം മന്ത്രി പി.എ മുഹമ്മദ് റിയാസ് പുറത്തിറക്കി. 20-ലധികം ഭാഷകളില്‍ കേരളത്തിന്റെ അതുല്യമായ ടൂറിസം ആകര്‍ഷണങ്ങളും ഉത്പന്നങ്ങളും ഉള്‍ക്കൊള്ളുന്ന സമഗ്ര ഡിജിറ്റല്‍ ഗൈഡാണിത്.

നവീകരിച്ച വെബ്സൈറ്റ് കേരള ടൂറിസത്തിന് പുതിയ ചുവടുവയ്പാണെന്നും ടൂറിസം മേഖലയിലെ മത്സരം നേരിടുന്നതില്‍ ഇത് പ്രയോജനം ചെയ്യുമെന്നും മന്ത്രി പറഞ്ഞു. ടൂറിസം മേഖലയില്‍ കേരളം മത്സരിക്കുന്നത് മറ്റ് ഇന്ത്യന്‍ സംസ്ഥാനങ്ങളോടല്ല, ടൂറിസം വ്യവസായത്തില്‍ മുന്‍പന്തിയില്‍ നില്‍ക്കുന്ന നാലോ അഞ്ചോ പ്രധാന രാജ്യങ്ങളോടാണ്. ഈ പശ്ചാത്തലത്തില്‍ ഡിജിറ്റല്‍ സാധ്യതകള്‍ കൂടി പ്രയോജനപ്പെടുത്തിയുള്ള ടൂറിസം പ്രവര്‍ത്തനത്തിന് ഏറെ പ്രാധാന്യമുണ്ടെന്ന് തിരിച്ചറിഞ്ഞാണ് വെബ്സൈറ്റ് നവീകരിച്ചതെന്നും മന്ത്രി ചൂണ്ടിക്കാട്ടി.

അത്യാധുനികവും ആകര്‍ഷകവുമായ രീതിയില്‍ നവീകരിച്ച വെബ്സൈറ്റ് ഉപഭോക്തൃസൗഹൃദ രീതിയിലാണ് രൂപകല്‍പ്പന ചെയ്തിരിക്കുന്നതെന്ന് മന്ത്രി പറഞ്ഞു. കേരളത്തിലെ പ്രധാന ടൂറിസം കേന്ദ്രങ്ങള്‍, പുതിയ ടൂറിസം ഉത്പന്നങ്ങള്‍, പദ്ധതികള്‍, ഹോട്ടലുകള്‍, ഭക്ഷണം, ഉത്സവങ്ങള്‍, സ്ഥാപനങ്ങള്‍ തുടങ്ങിയവയെ കുറിച്ചുള്ള വിവരണങ്ങളും ചിത്രങ്ങളും വീഡിയോകളും വെബ്സൈറ്റിലുണ്ട്. ഇതുവഴി കൂടുതല്‍ ആഭ്യന്തര, വിദേശ വിനോദസഞ്ചാരികളെ ആകര്‍ഷിക്കാനായേക്കും.

2023-24 കാലഘട്ടത്തില്‍ മാത്രം ഒരു കോടിയോളം സന്ദര്‍ശകര്‍ കേരള ടൂറിസം വെബ്സൈറ്റിനുണ്ട്. രണ്ട് കോടിയിലേറെ പേജ് വ്യൂസും രേഖപ്പെടുത്തി. സൈറ്റിലെ വിഡിയോകള്‍ക്ക് നിരവധി സന്ദര്‍ശകരുണ്ട്. ലോകത്തിലെ പ്രമുഖ വിനോദസഞ്ചാര കേന്ദ്രമെന്ന നിലയിലുള്ള കേരളത്തിന്റെ സ്ഥാനം ഒന്നുകൂടി ഉറപ്പിക്കാന്‍ വെബ്സൈറ്റ് സഹായിക്കുമെന്നും മന്ത്രി കൂട്ടിച്ചേര്‍ത്തു.ടൂറിസം ഡയറക്ടര്‍ ശിഖ സുരേന്ദ്രന്‍, ടൂറിസം അഡീഷണല്‍ ഡയറക്ടര്‍ (ജനറല്‍) വിഷ്ണുരാജ് പി എന്നിവരും ചടങ്ങില്‍ പങ്കെടുത്തു.

കണ്ണൂര്‍ മുന്‍ എഡിഎം നവീന്‍ ബാബുവിന്റെ ഭാര്യ മഞ്ജുഷയ്ക്ക് സ്ഥലം മാറ്റം. കോന്നി തഹസീല്‍ദാര്‍ സ്ഥാനത്ത് നിന്നും പത്തനംതിട്ട കളക്ട്രേറ്റിലേക്കാണ് മാറ്റം. റവന്യൂ വകുപ്പ് സ്ഥലം മാറ്റ ഉത്തരവിറക്കി.

മഞ്ജുഷ അവധിയില്‍ തുടരുകയാണ്. കോന്നി തഹസില്‍ദാറായി തുടരാന്‍ കഴിയില്ലെന്ന് മഞ്ജുഷ റവന്യൂ വകുപ്പിനെ അറിയിച്ചിരുന്നു. ഭര്‍ത്താവിന്റെ മരണത്തെ തുടര്‍ന്ന് തഹസില്‍ദാര്‍ പോലുള്ള കൂടുതല്‍ ഉത്തരവാദിത്വമുള്ള ജോലി തല്‍ക്കാലം ചെയ്യാന്‍ കഴിയില്ലെന്നായിരുന്നു അറിയിച്ചത്. ഇതിന്റെ പശ്ചാത്തലത്തിലാണ് സ്ഥലം മാറ്റം. വിഷയത്തില്‍ കളക്ടറുടെ ഉത്തരവ് കൂടി ഇനി വരേണ്ടതുണ്ട്.

കേരള സംസ്ഥാന ഭാഗ്യക്കുറി വകുപ്പിന്റെ പൂജാ ബമ്പര്‍ നറുക്കെടുത്തു. ഒന്നാം സമ്മാനം 12 കോടി JC 325526 എന്ന നമ്പറിന് ലഭിച്ചു. രണ്ടാം സമ്മാനം ഒരുകോടി JA 378749, JB 939547, JC 616613, JD 211004, JE 584418 എന്ന നമ്പറുകള്‍ക്കാണ് ലഭിച്ചത്.

തിരുവനന്തപുരം ഗോര്‍ഖി ഭവനില്‍ വച്ച് രണ്ട് മണിയോടെ ആണ് നറുക്കെടുപ്പ് നടന്നത്. 12 കോടിയാണ് ഒന്നാം സമ്മാനം. നാല്‍പത്തി അയ്യായിരം ടിക്കറ്റുകളാണ് ഇത്തവണ പൂജാ ബമ്പറിന്റേതായി അച്ചടിച്ചത്. ഇതില്‍ 39,56,454 ടിക്കറ്റുകള്‍ വിറ്റഴിഞ്ഞിട്ടുണ്ട്.

പൂജാ ബമ്പറിന്റെ രണ്ടാം സമ്മാനം ഒരു കോടി രൂപ വീതം അഞ്ച് പേര്‍ക്ക് ലഭിക്കും. മൂന്നാം സമ്മാനം 10 ലക്ഷം രൂപയും (ഓരോ പരമ്പരകള്‍ക്കും രണ്ടു വീതം), നാലാം സമ്മാനമായി മൂന്നു ലക്ഷം രൂപയും(അഞ്ചു പരമ്പരകള്‍ക്ക്) ലഭിക്കും. അഞ്ചാം സമ്മാനമായി ലഭിക്കുന്നത് രണ്ടു ലക്ഷം രൂപയാണ്(അഞ്ചു പരമ്പരകള്‍ക്ക്). കൂടാതെ 5000, 1000, 500, 300 രൂപയുടെ മറ്റ് നിരവധി സമ്മാനങ്ങളും ഭാഗ്യാന്വേഷികളെ കാത്തിരിക്കുന്നു.

സമ്മാന വിവരങ്ങള്‍ ഇങ്ങനെ

ഒന്നാം സമ്മാനം (12 കോടി)

JC 325526

സമാശ്വാസ സമ്മാനം (1 ലക്ഷം)

ഇരിട്ടി: വര്‍ദ്ധിച്ച ടാപ്പിംഗ് കൂലിയും,മറ്റനുബന്ധച്ചെലവുകളും,പ്രതികൂല കാലാവസ്ഥയും,വന്യമൃഗശല്യവും റബര്‍ കര്‍ഷകരെ കടുത്ത സാമ്പത്തിക പ്രതിസന്ധിയിലേക്ക് തള്ളിവിട്ടിരിക്കുകയാണ്.ഈ സാഹചര്യത്തില്‍ റബറിന് 250 രൂപ ഇന്‍സെന്റീവ് പ്രഖ്യാപിക്കണമെന്ന് എകെസിസി കുന്നോത്ത് ഫൊറോന കമ്മിറ്റി ആവശ്യപ്പട്ടു.ടാപ്പിംഗ് തൊഴിലാളികളെ തൊഴിലുറപ്പ് പദ്ധതിയിലുള്‍പ്പെടുത്തി റബര്‍ കര്‍ഷകരെയും മലയോര മേഖലയേയും
സാമ്പത്തികപ്രയാസങ്ങളില്‍ നിന്നു കരകയറ്റണമെന്നും യോഗം സര്‍ക്കാറിനോട് അഭ്യര്‍ത്ഥിച്ചു.കുന്നോത്ത് സെന്റ് തോമസ് പാരീഷ് ഹാളില്‍ ചേര്‍ന്ന യോഗം എകെസിസി ഗ്ലോബല്‍ സമിതിയംഗം ബെന്നി പുതിയാമ്പുറം ഉദ്ഘാടനം ചെയ്തു.ഫൊറോനാ പ്രസിഡന്റ് മാത്യു വള്ളോംകോട്ട് അധ്യക്ഷത വഹിച്ചു.അല്‍ഫോന്‍സ് കളപ്പുര,ഷിബു കുന്നപ്പള്ളി , ഷാജൂ ഇടശ്ശേരി,എന്‍.വി.ജോസഫ് നെല്ലിക്കുന്നേല്‍,മാത്യു ജോസഫ്, ജോണ്‍സണ്‍ അണിയറ,ജെയിംസ് കൊച്ചുമുറി,സെബാസ്റ്റ്യന്‍ കക്കാട്ടില്‍,ബിനോയ് ചെരുവില്‍ എന്നിവര്‍ സംസാരിച്ചു

പാലക്കാട് നിയമസഭാ മണ്ഡലത്തില്‍ നിന്നും വിജയിച്ച കോണ്‍ഗ്രസ് നേതാവ് രാഹുല്‍ മാങ്കൂട്ടത്തില്‍, ചേലക്കര നിയമസഭ മണ്ഡലത്തില്‍ നിന്നും വിജയിച്ച സിപിഎമ്മിന്റെ യുആര്‍ പ്രദീപ് എന്നിവര്‍ എംഎല്‍എമാരായി സത്യപ്രതിജ്ഞ ചെയ്ത് ചുമതലയേറ്റു. യുആര്‍ പ്രദീപ് ആണ് ആദ്യം സത്യപ്രതിജ്ഞ ചെയ്തത്. സഗൗരവമായിരുന്നു സത്യപ്രതിജ്ഞ.

തുടര്‍ന്ന് രാഹുല്‍ മാങ്കൂട്ടത്തില്‍ സത്യപ്രതിജ്ഞ ചെയ്തു. ദൈവനാമത്തിലായിരുന്നു രാഹുലിന്റെ സത്യപ്രതിജ്ഞ. ആദ്യമായാണാണ് രാഹുല്‍ എംഎല്‍എയാകുന്നത്. രണ്ടാം തവണയാണ് യുആര്‍ പ്രദീപ് എംഎല്‍എയാകുന്നത്. നിയമസഭ ഹാളില്‍ നടന്ന ലളിതമായ ചടങ്ങിലായിരുന്നു സത്യപ്രതിജ്ഞ നടന്നത്. നിയമസഭ സ്പീക്കര്‍ എഎന്‍ ഷംസീര്‍ സത്യവാചകം ചൊല്ലികൊടുത്തു. മുഖ്യമന്ത്രിയും പ്രതിപക്ഷ നേതാവും മന്ത്രിമാരും അടക്കമുള്ള നേതാക്കള്‍ സംബന്ധിച്ചു.

സംസ്ഥാനത്തെ എല്ലാ സ്‌കൂള്‍ ബസുകളും വീണ്ടും ഫിറ്റ്നെസ് പരിശോധനക്ക് ഹാജരാക്കണമെന്ന് സംസ്ഥാന ഗതാഗത വകുപ്പ് കമ്മീഷണര്‍. വിനോദ സഞ്ചാര കാലമായതിനാല്‍ എല്ലാ സ്‌കൂളുകളില്‍ നിന്നും യാത്ര പോകുന്നതിനാലാണ് തീരുമാനം. ഒരാഴ്ചക്കുള്ളില്‍ എല്ലാ സ്‌കൂള്‍ ബസുകളും മോട്ടോര്‍ വാഹന വകുപ്പ് മുന്‍പാകെ ഹാജരാക്കി സ്‌കൂള്‍ മാനേജ്‌മെന്റുകള്‍ ഫിറ്റ്നസ് സര്‍ട്ടിഫിക്കറ്റ് വാങ്ങണമെന്നാണ് ഗതാഗത വകുപ്പ് കമ്മീഷണറുടെ ഉത്തരവില്‍ പറയുന്നത്.

ശബരിമലയില്‍ പ്രതിഷേധങ്ങള്‍ക്കും സമരങ്ങള്‍ക്കും വിലക്കേര്‍പ്പെടുത്തി ഹൈക്കോടതി. ശബരിമല, പമ്പ ,സന്നിധാനം എന്നിവിടങ്ങളിലെ പ്രതിഷേധങ്ങള്‍ക്കും സമരങ്ങള്‍ക്കും വിലക്കേര്‍പ്പെടുത്തിയിരിക്കുന്നത്. ഡോളി തൊഴിലാളി സമരം പോലെയുള്ളത് ആവര്‍ത്തിക്കരുതെന്ന് ഹൈക്കോടതി നിര്‍ദേശം. ശബരിമല തീര്‍ത്ഥാടന കേന്ദ്രമാണെന്നും സമരങ്ങള്‍ ഭക്തരുടെ ആരാധനാവകാശത്തെ ബാധിക്കുമെന്നും ഹൈക്കോടതി ചൂണ്ടിക്കാണിച്ചു.

ഡോളി സമരത്തെ ഹൈക്കോടതി രൂക്ഷമായി വിമര്‍ശിച്ചു. അയ്യപ്പ ഭക്തരെ ബുദ്ധിമുട്ടിക്കുന്നത് അംഗീകരിക്കാനാകില്ലെന്ന് ഹൈക്കോടതി വ്യക്തമാക്കി. ഡോളി ചാര്‍ജ് സംബന്ധിച്ച് നേരത്തെ തന്നെ കോടതി ഉത്തരവുണ്ടെന്ന് ദേവസ്വം ബഞ്ച് പറഞ്ഞു. എന്തെങ്കിലും പ്രശ്‌നം ഉണ്ടെങ്കില്‍ സീസണ്‍ തുടങ്ങുന്നതിനു മുമ്പ് ദേവസ്വം ബോര്‍ഡിന്റെ ശ്രദ്ധയില്‍പ്പെടുത്തണമായിരുന്നു. ഇത്തരം സമ്മര്‍ദ്ദ തന്ത്രങ്ങള്‍ ശബരിമലയില്‍ അനുവദിക്കില്ലെന്ന് ഹൈക്കോടതി വ്യക്തമാക്കി. വിശദമായ റിപ്പോര്‍ട്ട് സമര്‍പ്പിക്കാന്‍ പോലീസിന് നിര്‍ദേശം നല്‍കി.

വയനാട് ചുണ്ടേലിലെ ഓട്ടോ ഡ്രൈവറുടെ മരണം കൊലപാതകമെന്ന് പൊലീസ്. ഥാര്‍ ജീപ്പും ഓട്ടോറിക്ഷയും കൂട്ടിയിടിച്ച് ഓട്ടോ ഡ്രൈവര്‍ നവാസ് മരിച്ചതാണ് കൊലപാതകമെന്ന് തെളിയുന്നത്. പുത്തൂര്‍ വയല്‍ സ്വദേശി സുമില്‍ഷാദ്, അജിന്‍ എന്നിവര്‍ കസ്റ്റഡിയില്‍. ഇവര്‍ സഹോദരങ്ങളാണ്.

ഇരുകൂട്ടരും തമ്മില്‍ വ്യക്തി വൈരാഗ്യം ഉണ്ടായിരുന്നു എന്ന നിഗമനത്തില്‍ പൊലീസ്. ചുണ്ടേല്‍ എസ്റ്റേറ്റ് റോഡില്‍ സുമില്‍ഷാദ് ബോധപൂര്‍വ്വം നവാസിന്റെ ഓട്ടോറിക്ഷയില്‍ ഇടിക്കുകയായിരുന്നു. നവാസിന്റെ യാത്രാവിവരങ്ങള്‍ അറിയിച്ചത് സഹോദരന്‍. സിസിടിവി ദൃശ്യങ്ങള്‍ അന്വേഷണത്തില്‍ നിര്‍ണായകമായി. ഇരുവര്‍ക്കും എതിരെ കൊലക്കുറ്റം ചുമത്തി അറസ്റ്റ് ചെയ്യാന്‍ പോലീസ്.

സാധാരണ അപകടം എന്ന നിലയിലായിരുന്നു അന്വേഷണം നടന്നത്. എന്നാല്‍ നാട്ടുകാരും ബന്ധുക്കളും സംശയമുന്നയിച്ച് രംഗത്തെത്തി. തുടര്‍ന്ന് നടത്തിയ അന്വേഷണത്തിലാണ് കൊലപാതകമെന്ന് കണ്ടെത്തിയത്. നവാസിന്റെ സ്റ്റേഷനറി കടയും സുല്‍ഫിക്കറിന്റെ ഹോട്ടലും ചുണ്ടേല്‍ റോഡിന്റെ ഇരുവശത്താണ് സ്ഥിതി ചെയ്യുന്നത്. ഇത് സംബന്ധിച്ച് ഇരു കൂട്ടരും തമ്മില്‍ തര്‍ക്കമുണ്ടായിരുന്നു. തുടര്‍ന്നാണ് ആസൂത്രിതമായ കൊലപാതകം നടത്തിയത്.

വ്യക്തി വൈരാഗ്യത്തിന്റെ ഭാഗമായി സുല്‍ഫിക്കറിന്റെ ഹോട്ടലിന്റെ മുന്നില്‍ നവാസ് കൂടോത്രം ചെയ്ത കോഴിത്തല കൊണ്ടുവച്ച സിസിടിവി ദൃശ്യങ്ങള്‍ പുറത്തുവന്നിരുന്നതായി പൊലീസ് പറയുന്നു. ഇതിലുണ്ടായ പകയാണ് കൊലപാതകത്തിലേക്ക് നയിച്ചത്. ഉച്ചയോടുകൂടി പ്രതികളുടെ അറസ്റ്റ് രേഖപ്പെടുത്തും

ശബരിമല കാനനപാത ഭക്തര്‍ക്കായി ഇന്ന് തുറന്നു നല്‍കി. ഇന്ന് രാവിലെ 8 മണിവരെ 30,000 തീര്‍ഥാടകര്‍ ദര്‍ശനം നടത്തി. തിരക്ക് നിയന്ത്രണത്തിലും അടിസ്ഥാന സൗകര്യത്തിലും തൃപ്തിയാണ് ഭക്തര്‍ രേഖപ്പെടുത്തുന്നത്.

ശബരിമല കാനനപാത ഇന്ന് തീര്‍ത്ഥാടകര്‍ക്കായി തുറന്നു നല്‍കി. സത്രം മുക്കുഴി വഴിയുള്ള കാനനപാത ശബരിമല തീര്‍ത്ഥാടകര്‍ക്കായി ഇന്ന് രാവിലെ മുതല്‍ തുറന്നു നല്‍കുമെന്ന് ജില്ലാ കളക്ടര്‍ അറിയിച്ചു. പാത സഞ്ചാരയോഗ്യമെന്ന് വനം വകുപ്പില്‍ നിന്ന് റിപ്പോര്‍ട്ട് ലഭിച്ചതിനെ തുടര്‍ന്നാണ് നടപടി.

നേരത്തെ കാനനപാതയിലൂടെയുള്ള ശബരിമല തീര്‍ഥാടനം താത്കാലികമായി ഹൈക്കോടതി വിലക്കിയിരുന്നു . മോശം കാലാവസ്ഥ മുന്‍നിര്‍ത്തിയായിരുന്നു വിലക്ക്. വണ്ടിപ്പെരിയാര്‍, സത്രം, പുല്‍മേട്, എരുമേലി വഴിയുള്ള തീര്‍ഥാടനത്തിനാണ് വിലക്ക് ഏര്‍പ്പെടുത്തിയിരുന്നത്. പ്രദേശത്ത് ഞായറാഴ്ച മുതല്‍ കനത്ത മൂടല്‍മഞ്ഞായിരുന്നു. കാലാവസ്ഥാ അനുകൂലമായാല്‍ മാത്രമേ ഇതു വഴി ഭക്തരേ കടത്തിവിടുകയുള്ളൂ എന്ന് വനംവകുപ്പ് വ്യക്തമാക്കി.

അതേസമയം അതിശക്തമായി പെയ്യുന്ന മഴയെ അവഗണിച്ച് ശബരിമലയിലേക്കുള്ള തീര്‍ഥാടകരുടെ ഒഴുക്ക് തുടരുന്നു. കാനനപാത വഴിയും പുല്ലുമേട് വഴിയുമുള്ള യാത്രയ്ക്ക് നിരോധനം ഏര്‍പ്പെടുത്തിയിട്ട് പോലും ഇന്നലെ 86000 ലധികം തീര്‍ഥാടകര്‍ മലകയറി.

ഇതില്‍ തന്നെ 11,834 തീര്‍ഥാടകര്‍ തത്സമയ ബുക്കിങ് ഉപയോഗിച്ചാണ് മല ചവിട്ടിയത്. കനത്ത മഴയുണ്ടായിരുന്ന ഞായറാഴ്ച പോലും തീര്‍ഥാടകരുടെ എണ്ണത്തില്‍ വലിയ കുറവുണ്ടായില്ല. 60,980 തീര്‍ഥാടകരാണ് മല ചവിട്ടിയത്.