latest news

തിരുവനന്തപുരം ഡിസിസി ഓഫീസിന് നേരെ കല്ലേറ്. മുന്‍വശത്തെ ഗ്ലാസ് ഉള്‍പ്പെടെ എറിഞ്ഞു തകര്‍ത്തു. ഡിസിസി ഓഫീസ് ആഭ്യന്തരമന്ത്രി രമേശ് ചെന്നിത്തല സന്ദര്‍ശിച്ചു. പാര്‍ട്ടി ഓഫീസുകള്‍ ആക്രമിക്കുന്നത് വെച്ചുപൊറുപ്പിക്കില്ലെന്ന് രമേശ് ചെന്നിത്തല പറഞ്ഞു.

ശക്തമായ നടപടിയുണ്ടാകുമെന്നും ചെന്നിത്തല പറഞ്ഞു. പാര്‍ട്ടി ഓഫീസുകള്‍ കേരളത്തില്‍ ഒരിടത്തും ആരും ആക്രമിക്കാറില്ല. അങ്ങനെയൊരു സംസ്‌കാരമല്ല നമ്മുടേത്. ആര് ചെയ്താലും ശരി അവരുടെ മേല്‍ ശക്തമായ നടപടിയുണ്ടാകും. അക്കാര്യത്തില്‍ യാതൊരു സംശയവുമില്ല. പ്രതിഷേധത്തിലൊന്നും തെറ്റില്ല, പക്ഷേ അത് അക്രമാസക്തമായാല്‍ പൊലീസ് പ്രവര്‍ത്തിക്കും അദ്ദേഹം പറഞ്ഞു.

കെപിസിസി അധ്യക്ഷന്‍ മന്ത്രി സണ്ണി ജോസഫും ഡിസിസി ഓഫീസ് സന്ദര്‍ശിച്ചു. കൊടിമരങ്ങള്‍ തകര്‍ത്തു. മണ്ഡലം കമ്മിറ്റി ഓഫീസ് തകര്‍ത്തു. തീയിട്ട് നശിപ്പിച്ചു. അതിന്റെ ഭാഗമായിട്ടും തുടര്‍ച്ചയായിട്ടും ബിജെപി നേതൃത്വത്തിന്റെ ഒത്താശയോടും അറിവോടും പ്രേരണയോടും കൂടിയാണ് തിരുവനന്തപുരത്തെ ഡിസിസി ഓഫീസിന് നേരെയുണ്ടായ കല്ലേറും കൈയേറ്റവും എന്ന് മനസിലാക്കുന്നു. പ്രതികളെ നിയമത്തിന് മുന്നില്‍ കൊണ്ടുവരണമെന്ന് പൊലീസിനോട് ആവശ്യപ്പെടുന്നു. മന്ത്രിമാര്‍ക്കെതിരെ ബിജെപി പ്രവര്‍ത്തകരുടെ കരിങ്കൊടി പ്രതിഷേധമുണ്ടായിരുന്നു. അതിന് ഏതെങ്കിലും ഓഫീസ് ആക്രമിക്കലല്ല. ഇതൊരു ഗുണ്ടായിസ്റ്റ് രാഷ്ട്രീയമാണ്. അവര്‍ക്കെതിരെ ദേശീയ തലത്തില്‍ ഉയരുന്ന രാഷ്ട്രീയ പ്രശ്നങ്ങളുണ്ട്. തിരഞ്ഞെടുപ്പ് കമ്മീഷനുമായി ബന്ധപ്പെട്ട വിഷത്തില്‍ ഉള്‍പ്പടെ പ്രതിപക്ഷ കക്ഷികള്‍ ശക്തമായ പ്രതിഷേധമുയര്‍ത്തുകയാണ്. ആ പ്രതിഷേധത്തില്‍ നിന്ന് ശ്രദ്ധതിരിക്കാന്‍ വേണ്ടിയാണ് ബിജെപിയുടെ നേതൃത്വത്തില്‍ ഇത്തരം പ്രതിഷേധങ്ങള്‍ തലസ്ഥാന നഗരിയില്‍ തന്നെ നടത്തുന്നത്. കോണ്‍ഗ്രസ് അക്രമത്തില്‍ വിശ്വസിക്കുന്നില്ല. എന്നാല്‍ അക്രമരാഷ്ട്രീയത്തിന് വഴങ്ങിക്കൊടുക്കുകയുമില്ല. പ്രവര്‍ത്തകരെ കയറൂരി വിടുകയാണ് ബിജെപി. അവരെ നിയന്ത്രിക്കാന്‍ ബിജെപി നേതൃത്വത്തിന് കഴിയണം സണ്ണി ജോസഫ് പറഞ്ഞു.

യാത്രയ്ക്ക് കൂടുതല്‍ പൊലീസ് വാഹനം വിന്യസിച്ചതില്‍ പൊലീസിനോട് കയര്‍ത്ത് മുഖ്യമന്ത്രി വി ഡി സതീശന്‍. തിരുവനന്തപുരം ഡിസിപിയോടാണ് അദ്ദേഹം അതൃപ്തി അറിയിച്ചത്. പൈലറ്റിന്റെ എണ്ണം കൂട്ടരുതെന്ന് മുഖ്യമന്ത്രി കര്‍ശന നിര്‍ദേശം നല്‍കി.

മുഖ്യമന്ത്രിക്ക് മുന്‍ കാലങ്ങളിലേത് പോലെ നിറയെ എസ്‌കോര്‍ട്ട്, പൈലറ്റ് വാഹനങ്ങള്‍ വേണ്ട എന്നത് വി ഡി സതീശന്‍ അധികാരമേറ്റ ശേഷം എടുത്ത ആദ്യ തീരുമാനങ്ങളില്‍ ഒന്നായിരുന്നു. അത് അദ്ദേഹം നടപ്പാക്കി വരികയും ചെയ്തിരുന്നു. എന്നാല്‍ മുഖ്യമന്ത്രിയ്ക്കും മന്ത്രിമാര്‍ക്കുമെതിരെ യുവമോര്‍ച്ച പ്രതിഷേധം ശക്തമാക്കുന്ന പശ്ചാത്തലത്തില്‍ സുരക്ഷ കൂട്ടാന്‍ പൊലീസ് തീരുമാനിക്കുകയായിരുന്നു. എന്നാല്‍ കൂടുതല്‍ പൈലറ്റ് വാഹനങ്ങള്‍ കണ്ടതോടെ മുഖ്യമന്ത്രി തന്റെ കടുത്ത അനിഷ്ടം ഡിസിപിയെ അറിയിച്ചു. അധികമായി വന്ന വാഹനങ്ങള്‍ പിന്നീട് മടക്കി അയയ്ക്കുകയായിരുന്നു.

സംസ്ഥാനത്ത് നാളെ മുതല്‍ ശക്തമായ മഴയ്ക്ക് സാധ്യത. കേന്ദ്ര കാലാവസ്ഥ വകുപ്പ് 6 ജില്ലകളില്‍ യെല്ലോ മുന്നറിയിപ്പ് പ്രഖ്യാപിച്ചു. മലപ്പുറം, പാലക്കാട,് എറണാകുളം, ഇടുക്കി, കോട്ടയം, പത്തനംതിട്ട ജില്ലകളിലാണ് മഴ മുന്നറിയിപ്പ്. ഇന്ന് ഇടുക്കി പത്തനംതിട്ട ജില്ലകളില്‍ മഴ മുന്നറിയിപ്പുണ്ട്. ഒറ്റപ്പെട്ട ശക്തമായ മഴയ്ക്കാണ് സാധ്യത.

ഇനി അതിശക്തമായ നിലയിലേക്ക് മഴയുടെ അളവു പോകില്ലെന്നും കേന്ദ്ര കാലാവസ്ഥ വകുപ്പ് പ്രവചിക്കുന്നുണ്ട്. മറ്റന്നാളും 3 ജില്ലയില്‍ മഴമുന്നറിയിട്ടുണ്ട്. പാലക്കാട്, മലപ്പുറംസ വയനാട് ജില്ലകളിലാണ് മഴ മുന്നറിയിപ്പ് നല്‍കിയിരിക്കുന്നത്. മൂന്നാം തിയതി പത്തനംതിട്ട, ഇടുക്കി ജില്ലകളില്‍ ശക്തമായ മഴയുണ്ടാകുമെന്നുമാണ് പ്രവചനം. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്‍ത്ഥമാക്കുന്നത്.

പഹല്‍ഗാം ഭീകരാക്രമണത്തിലെ അവസാന സൂത്രധാരനെയും ഇന്ത്യന്‍ സൈന്യം വധിച്ചു. ജമ്മു കശ്മീരിലെ ബദ്ഗാമില്‍ സുരക്ഷാ സേനയും ഭീകരരും തമ്മിലുണ്ടായ ഏറ്റുമുട്ടലില്‍ ലഷ്‌കര്‍ കൊടുംഭീകരന്‍ മൂസയെ ആണ് സൈന്യം വധിച്ചത്. ഇന്നലെ രാത്രിയോടെയാണ് ഏറ്റുമുട്ടല്‍ തുടങ്ങിയത്. ബദ്ഗാം ജില്ലയില്‍ ഉള്‍പ്പെടുന്ന സ്ഥലത്തായിരുന്നു ഓപ്പറേഷന്‍ ആരംഭിച്ചതെന്ന് സുരക്ഷാസേന വ്യക്തമാക്കുന്നു. പുലര്‍ച്ചെയോട് കൂടിയാണ് ഒരു ഭീകരനെ വധിച്ചതെന്ന് സുരക്ഷാസേന സ്ഥിരീകരിക്കുന്നുണ്ട്.

പഹല്‍ഗാം ഭീകരാക്രമണത്തിലെ നാല് ഭീകരരുടെ ചിത്രങ്ങളാണ് പുറത്തുവന്നിരുന്നത്. അവരില്‍ ആദ്യ രണ്ട് ഭീകരരെ ഓപ്പറേഷന്‍ മഹാദേവയിലൂടെ സുരക്ഷാ സേന വധിച്ചിരുന്നു. പിന്നീട് ബദ്ഗാമില്‍ നടന്ന ഏറ്റുമുട്ടലില്‍ ഒരാളെക്കൂടി വധിച്ചിരുന്നു. നാലാമനെ മാത്രം സുരക്ഷാസേനയക്ക് കണ്ടെത്താന്‍ സാധിച്ചിരുന്നില്ല. തുടര്‍ന്നാണ് ഇന്നലെ രാത്രി മുതല്‍ പുലര്‍ച്ചെ വരെ നടന്ന ഏറ്റുമുട്ടലില്‍ ലഷ്‌കര്‍ കൊടുംഭീകരന്‍ മൂസയെ സുരക്ഷാസൈന്യം വധിച്ചത്.

സംസ്ഥാനത്ത് വീണ്ടും വൈദ്യുതി പ്രതിസന്ധി രൂക്ഷമാകുന്നു. മധ്യപ്രദേശില്‍ നിന്നുള്ള 200 മെഗാ വാട്ട് ലഭിക്കാത്തതിനെ തുടര്‍ന്ന് ഇന്നലെ സംസ്ഥാനത്ത് വൈദ്യുതി നിയന്ത്രണം ഉണ്ടായി. കഴിഞ്ഞദിവസം പീക് അവറില്‍ 800 മെഗാ വാട്ട് വൈദ്യുതിയുടെ കുറവുണ്ടായി. രാത്രി 9 മണിക്ക് ശേഷവും വൈദ്യുതി ലഭ്യമായില്ല. മാറ്റകരാര്‍ അടിസ്ഥാനത്തിലുള്ള വൈദ്യുതി ലഭിച്ചില്ലെങ്കില്‍ ഇന്നും സംസ്ഥാനത്ത് വൈദ്യുതി നിയന്ത്രണം ഉണ്ടായേക്കും.

300 മെഗാവാട്ട് കടംകൊടുക്കല്‍ അവസാനിച്ച സാഹചര്യത്തില്‍ വൈദ്യുതി പ്രതിസന്ധി നീങ്ങുമെന്നായിരുന്നു മുമ്പ് വിലയിരുത്തപ്പെട്ടിരുന്നത്. എന്നാല്‍ ഇപ്പോഴും പ്രതിസന്ധിയുണ്ടെന്നാണ് കഴിഞ്ഞ ദിവസത്തെ വൈദ്യുതി നിയന്ത്രണവും സൂചിപ്പിക്കുന്നത്. ഇന്നലെ പലയിടത്തും ഒന്നിലേറെ തവണ രാത്രിയില്‍ പവര്‍ കട്ടുണ്ടായി. ചൂട് ഉയരുന്നതും മഴ ലഭിക്കാത്തതും വൈദ്യുതി ഉപഭോഗം ഉയര്‍ന്നുതന്നെ നില്‍ക്കുന്നതിനും കാരണമായി.

സംസ്ഥാനത്തുണ്ടാക്കുന്ന വൈദ്യുതിയില്‍ വലിയ രീതിയില്‍ കുറവുണ്ടായിട്ടുണ്ട്. ഉത്തരേന്ത്യന്‍ സംസ്ഥാനങ്ങളില്‍ ഉന്നത ഉദ്യോഗസ്ഥര്‍ നേരിട്ടെത്തി ചര്‍ച്ചകള്‍ നടത്തിയിട്ടും പ്രതിസന്ധി അയയുന്നില്ലെന്നതാണ് നിലവിലെ സാഹചര്യം.

നിയമസഭ കയ്യാങ്കളി കേസില്‍ വിചാരണ നവംബര്‍ മൂന്നിന് ആരംഭിക്കും. 7 വര്‍ഷത്തിന് ശേഷമാണ് കേസില്‍ തിരുവനന്തപുരം സിജെഎം കോടതില്‍ വിചാരണ നടക്കുന്നത്. സിപിഐഎം നേതാക്കളായ വി.ശിവന്‍കുട്ടിയും ഇ.പി ജയരാജനും ഉള്‍പ്പടെയുള്ളവരാണ് പ്രതികള്‍. കെ ടി ജലീല്‍, കെ അജിത്, സി കെ സദാശിവന്‍, കെ കുഞ്ഞുമുഹമ്മദ് എന്നിവരാണ് പ്രതിപ്പട്ടികയിലുള്ള മറ്റുള്ളവര്‍. 2015 മാര്‍ച്ച് 13ന് കെ എം മാണിയുടെ ബജറ്റ് അവതരണം പ്രതിപക്ഷം തടസപ്പെടുത്തുന്നതിനിടെയാണ് സംഘര്‍ഷമുണ്ടായത്.

കെ എം മാണി ധനമന്ത്രിയായിരിക്കെ ബജറ്റ് അവതരണ വേളയില്‍ നിയമസഭ തടസ്സപ്പെടുത്തി പൊതുമുതല്‍ നശിപ്പിച്ചു എന്നാണ് എല്‍ഡിഎഫ് നേതാക്കള്‍ക്കെതിരായ കേസ്. ബാര്‍ കോഴ അഴിമതിയില്‍ കെ.എം മാണിക്ക് പങ്കുണ്ടെന്ന് ആരോപിച്ചായിരുന്നു പ്രതിപക്ഷം സഭയുടെ നടുത്തളത്തിലിറങ്ങി പ്രതിഷേധിച്ചത്. സംഘര്‍ഷത്തിനിടെ നിയമസഭയിലുണ്ടായ നാശ നഷ്ടം ചൂണ്ടിക്കാട്ടിയാണ് പോലീസ് കേസെടുത്തിരുന്നത്. സ്പീക്കറുടെ ഡയസില്‍ കയറി കസേര മറിച്ചിടുകയും ഉപകരണങ്ങള്‍ നശിപ്പിക്കുകയും ചെയ്തിരുന്നു. ഇതില്‍ നിയമസഭാ സെക്രട്ടറിയുടെ പരാതിയില്‍ പോലീസ് കേസെടുത്തിരുന്നത്.

ഇരിട്ടി : മഹാത്മാഗാന്ധി കോളേജിലെ 2004- 2007 ബാച്ചിലെ ബി.എസ് .സി ഫിസിക്‌സ് വിദ്യാര്‍ത്ഥിയായിരുന്ന ജെയിസ് ടോമിന്റെ സ്മരണാര്‍ത്ഥം ഇരിട്ടി എംജി കോളേജ് ഫിസിക്‌സ് ഡിപ്പാര്‍ട്ട്‌മെന്റും ഫിസിക്‌സ് പൂര്‍വ്വ വിദ്യാര്‍ത്ഥികളും സംയുക്തമായി കോളേജില്‍ വെച്ച് ജെയ്‌സ് ടോം അനുസ്മരണവും ജെയ്‌സ്‌ടോം മെമ്മോറിയല്‍ സയന്‍സ് ക്വിസ് മത്സരങ്ങളും നടത്തി. ആറളം ഗവണ്മെന്റ് ഹയര്‍ സെക്കന്ററി സ്‌കൂള്‍ റിട്ടയേര്‍ഡ് പ്രിന്‍സിപ്പാള്‍ ജോയ് കുട്ടി കെ ജോസഫ് ഉദ്ഘാടനം ചെയ്തു. കോളേജ് പ്രിന്‍സിപ്പാള്‍ ഇന്‍ ചാര്‍ജ്ജ് സന്ധ്യ സി.വി അദ്ധ്യക്ഷത വഹിച്ചു. എം ജി കോളേജ് ഫിസിക്‌സ് വിഭാഗം മുന്‍ മേധാവി ഡോ. ദേവദാസന്‍. കെ.വി അനുസ്മരണ പ്രഭാഷണം നടത്തി. ഫിസിക്‌സ് വിഭാഗം മേധാവി ഡോ. സപ്ന. പി, ഐക്യുഎസി കോര്‍ഡിനേറ്റര്‍ പ്രൊഫ.ഡോ.അനീഷ്‌കുമാര്‍.കെ, കോളേജ് സൂപ്രണ്ട് മിനി ജോണ്‍ എം.ജെ, ക്വിസ് മാസ്റ്റര്‍ വി.എം. പ്രണവ് ചന്ദ്രന്‍, ഡോ.ലിനേഷ് ജെ,അഥീന എസ് മോഹന്‍, പി.വി.ബിനോയി എന്നിവര്‍ സംസാരിച്ചു. ഹയര്‍സെക്കണ്ടറി, ഹൈസ്‌കൂള്‍ വിഭാഗങ്ങളിലെ വിദ്യാര്‍ത്ഥികള്‍ക്കായിരുന്നു ക്വിസ് മത്സരങ്ങള്‍ സംഘടിപ്പിച്ചിരുന്നത്. വിവിധ സ്‌കൂളുകളില്‍ നിന്നായി ഹയര്‍ സെക്കണ്ടറി വിഭാഗത്തില്‍ പതിനെട്ട് ടീമുകളും ഹൈസ്‌കൂള്‍ വിഭാഗത്തില്‍ നിന്ന് ഇരുപത്തിയെട്ട് ടീമുകളും ക്വിസ് മത്സരങ്ങളില്‍ പങ്കെടുത്തു. ഹയര്‍ സെക്കണ്ടറി വിഭാഗത്തില്‍ മണത്തണ ഗവ. ഹയര്‍ സെക്കന്ററി സ്‌കൂള്‍ ഒന്നാം സ്ഥാനം നേടിയപ്പോള്‍ രണ്ടാം സ്ഥാനം ചാവശ്ശേരി ഗവ. ഹയര്‍ സെക്കണ്ടറി സ്‌കൂളും മൂന്നാം സ്ഥാനം മട്ടന്നൂര്‍ ഹയര്‍സെക്കണ്ടറി സ്‌കൂളും കരസ്ഥമാക്കി. ഹൈസ്‌കൂള്‍ വിഭാഗത്തില്‍ ഒന്നാം സ്ഥാനം കൂത്തുപറമ്പ് ഹയര്‍സെക്കണ്ടറി (തൊക്കിലങ്ങാടി ) സ്‌കൂളും രണ്ടാം സ്ഥാനം എടൂര്‍ സെന്റ് മേരീസ് ഹയര്‍ സെക്കണ്ടറി സ്‌കൂള്‍, മൂന്നാം സ്ഥാനം മട്ടന്നൂര്‍ ഹയര്‍സെക്കണ്ടറി സ്‌കൂളും നേടി. വിജയികള്‍ക്ക് ഉപഹാരങ്ങളും കേഷ് അവാര്‍ഡുകളും പങ്കെടുത്ത മുഴുവന്‍ വിദ്യാര്‍ത്ഥികള്‍ക്കും സര്‍ട്ടിഫിക്കറ്റുകളും വിതരണം ചെയ്തു. വിദ്യാര്‍ത്ഥികളും രക്ഷിതാക്കളുമടക്കം ഇരുന്നൂറോളം പേര്‍ പരിപാടിയില്‍ പങ്കെടുത്തു. 2004- 07 വര്‍ഷ ഫിസിക്‌സ് വിദ്യാര്‍ത്ഥിയായിരുന്ന ജെയ്‌സ് ടോം 2012 ല്‍ മദ്രാസ് ഐഐടിയില്‍ ഗവേഷക പഠനം നടത്തുകയായിരുന്ന കാലയളവിലാണ് അപകടത്തെ തുടര്‍ന്ന് മരണപ്പെട്ടത്. 2013 മുതല്‍ കോളേജ് ഫിസിക്‌സ് വിഭാഗവും ഫിസിക്‌സ് പൂര്‍വ്വ വിദ്യാര്‍ത്ഥികളും ചേര്‍ന്ന് എല്ലാ വര്‍ഷവും ജെയ്‌സ് ടോമിന്റെ അനുസ്മരണത്തിന്റെ ഭാഗമായി വിവിധ പരിപാടികള്‍ നടത്തി വരാറുണ്ട്. ക്വിസ് മത്സരങ്ങളുടെ ഭാഗമായി കോളേജ് തല ക്വിസ് മത്സരങ്ങള്‍ കൂടി ഉടന്‍ സംഘടിപ്പിക്കുമെന്ന് കോളേജ് പ്രിന്‍സിപ്പള്‍ ഇന്‍ ചാര്‍ജജ് സന്ധ്യ സി.വി അറിയിച്ചു.

നടി അന്‍സിബ ഹസന്‍ നല്‍കിയ കേസില്‍ എഫ്ഐആര്‍ റദ്ദ് ചെയ്യണമെന്ന് ആവശ്യപ്പെട്ട് ലക്ഷ്മിപ്രിയ ഹൈകോടതിയില്‍. ലക്ഷ്മി പ്രിയയുടെ ഹര്‍ജിയില്‍ സര്‍ക്കാരിന് നോട്ടീസ് നല്‍കി. പാവപെട്ടവരുടെ പ്രശ്നം കിടക്കുമ്പോള്‍ ഇവരുടെ പ്രശ്നം തീര്‍ക്കാനെ സമയമുള്ളല്ലോ എന്ന് കോടതി പരാമര്‍ശം. അമ്മ സംഘടനയ്ക്ക് വേണ്ടി സ്പെഷ്യല്‍ കോടതി വേണമല്ലോ എന്ന് ഹൈക്കോടതി.

അതേസമയം, അന്‍സിബ ഹസന്‍ നല്‍കിയ പരാതിയില്‍ ലക്ഷ്മി പ്രിയക്കെതിരെ സ്ത്രീത്വത്തെ അപമാനിച്ചതിനുള്ള ആചട 74 ചേര്‍ത്തിട്ടുണ്ട് എന്ന വിശദീകരണവുമായി പാലാരിവട്ടം പൊലീസ് രംഗത്തെത്തി. എഫ്‌ഐആറില്‍ ടൈപ്പിങ് പിഴ സംഭവിച്ചു എന്നാണ് വിശദീകരണം. ലക്ഷ്മിപ്രിയക്കെതിരെ സ്ത്രീത്വത്തെ അപമാനിച്ചതിനുള്ള വകുപ്പ് ചുമത്തിയില്ലെന്ന് ചൂണ്ടികാണിച്ച് അന്‍സിബ കോടതിയെ സമീപിക്കാന്‍ ഇരിക്കെയാണ് വിശദീകരണം.

പാലാരിവട്ടം എസ്എച്ച്ഒക്കെതിരെ കോടതി അലക്ഷ്യ ഹര്‍ജി ജൂഡിഷ്യല്‍ മജിസ്ട്രേറ്റ് കോടതിയില്‍ നല്‍കാനായിരുന്നു അന്‍സിബയുട നീക്കം. അന്വേഷണ ചുമതല മറ്റൊരു എസ്എച്ച്ഒയ്ക്ക് നല്‍കണമെന്ന് ആവശ്യപ്പെടാനും തീരുമാനിച്ചിരുന്നു. സമൂഹ മാധ്യമത്തിലൂടെ തന്നെ അപമാനിച്ചുവെന്ന അന്‍സിബയുടെ പരാതിയില്‍ കോടതി നിര്‍ദേശ പ്രകാരമാണ് ലക്ഷ്മിപ്രിയക്കെതിരെ പൊലീസ് കേസ് എടുത്തത്. എന്നാല്‍, മനനഷ്ടവുമായി ബന്ധപ്പെട്ട വകുപ്പ് മാത്രം ചേര്‍ത്ത് കേസ് എടുത്തതാണ് വിമര്‍ശനത്തിനിടയാക്കിയത്.

മുഖ്യമന്ത്രി വി ഡി സതീശന്റെ സുരക്ഷ വര്‍ധിപ്പിക്കും. ഇന്റലിജന്‍സ് എഡിജിപി ഉത്തരവിറക്കി. പൊതുപരിപാടികളില്‍ മാധ്യമ പ്രവര്‍ത്തകര്‍ ഉള്‍പ്പടെ മുഖ്യമന്ത്രിയെ സ്പര്‍ശിക്കുന്ന സാഹചര്യം ഉണ്ടാകുന്നു. അതിനാല്‍ പരിപാടികളിലും യാത്രകളിലും മതിയായ പൊലീസ് വിന്യാസം നടത്തണമെന്നാണ് ഉത്തരവ്.

പൊതുപരിപാടികളില്‍ പങ്കെടുക്കുന്നതിനായി എത്തിച്ചേരുന്ന അവസരങ്ങളില്‍ അനിയന്ത്രിതമായ ജനക്കൂട്ടം അദ്ദേഹത്തെ സമീപിക്കുകയും ശരീരത്തില്‍ സ്പര്‍ശിക്കത്തക്ക വിധം പെരുമാറുകയും ചെയ്യുന്നതായി ശ്രദ്ധയില്‍ പെട്ടിട്ടുണ്ടെന്ന് ഉത്തരവില്‍ പറയുന്നു. സംസ്ഥാനത്ത് ഏറ്റവും ഉയര്‍ന്ന സുരക്ഷാ കാറ്റഗറിയില്‍ ഉള്‍പ്പെട്ട മുഖ്യമന്ത്രിയുടെ പരിപാടികളിലോ യാത്രകളിലോ ഇത്തരം സാഹചര്യങ്ങള്‍ ഉണ്ടാകുന്നത് ഗുരുതരമായ സുരക്ഷാ വീഴ്ചയ്ക്ക് കാരണമാകുന്ന കാര്യമാണെന്നും ഉത്തരവ് ചൂണ്ടിക്കാട്ടുന്നു.

അതിനാല്‍, മുഖ്യമന്ത്രി പങ്കെടുക്കുന്ന പരിപാടി സ്ഥലങ്ങളിലും അദ്ദേഹത്തിന്റെ യാത്രാവേളകളിലും ആവശ്യമായ പൊലീസ് വിന്യാസം നടത്തേണ്ടതും യൂണിഫോം ഡ്യൂട്ടിക്ക് പുറമേ മഫ്തി വേഷത്തില്‍ പൊലീസ് ഉദ്യോഗസ്ഥരെ വിന്യസിച്ച് അനിഷ്ട സംഭവങ്ങള്‍ക്ക് ഇടവരാത്ത വിധം പൂര്‍ണ സുരക്ഷ ഒരുക്കേണ്ടതു അനിവാര്യമാണെന്നും വ്യക്തമാക്കുന്നു. ജില്ലാ പൊലീസ് മേധാവികള്‍ ഇക്കാര്യത്തില്‍ ആവശ്യമായ ശ്രദ്ധനല്‍കി മുന്‍കരുതലുകള്‍ സ്വീകരിക്കണമെന്നാണ് നിര്‍ദേശം.