ഹൈക്കോടതി മുന് ചീഫ് ജസ്റ്റിസ് എസ്. മണികുമാറിനെ മനുഷ്യാവകാശ കമ്മീഷന് ചെയര്മാനായി നിയമിക്കാന് സര്ക്കാര് തീരുമാനിച്ചു. പ്രതിപക്ഷ നേതാവ് വിഡി സതീശന്റെ വിയോജനക്കുറിപ്പോടെയാണ് അദ്ദേഹത്തിന്റെ നിയമനം.
മുഖ്യമന്ത്രി പിണറായി വിജയനും സ്പീക്കര് എഎന് ഷംസീറും നിയമനത്തെ അനുകൂലിച്ച് രംഗത്തെത്തി. വിശദമായ വിയോജനക്കുറിപ്പ് പ്രതിപക്ഷ നേതാവ് സര്ക്കാരിനു കൈമാറും.
മണികുമാര് 2019 ഒക്ടോബര് 11നാണ് കേരള ഹൈക്കോടതി ചീഫ് ജസ്റ്റിസായത്. അതിന് മുമ്പ് അദ്ദേഹം മദ്രാസ് ഹൈക്കോടതി ജഡ്ജിയായി പ്രവര്ത്തിച്ചിട്ടുണ്ട്. മനുഷ്യാവകാശ കമ്മിഷന് ചെയര്മാനെ തിരഞ്ഞെടുക്കുന്നത് സ്പീക്കര്, മുഖ്യമന്ത്രി, പ്രതിപക്ഷ നേതാവ് എന്നിവരടങ്ങിയ സമിതിയാണ്. പ്രതിപക്ഷ നേതാവ് വിയോജിച്ചാലും നിയമനം നടത്തുന്നതില് നിയമപരമായി യാതൊരു തടസ്സവുമില്ല.
എസ്. മണികുമാര് കേരള ഹൈക്കോടതിയില്നിന്ന് വിരമിച്ചത് ഏപ്രില് 24നാണ്. അസിസ്റ്റന്റ് സോളിസിറ്റര് ജനറലായി പ്രവര്ത്തിച്ചിരുന്ന അദ്ദേഹം 2006 ജൂലൈയിലാണ് മദ്രാസ് ഹൈക്കോടതി ജഡ്ജിയായത്.