വടകര എല്ഡിഎഫ് സ്ഥാനാര്ത്ഥി കെകെ ശൈലജക്ക് വക്കീല് നോട്ടീസ് അയച്ച് ഷാഫി പറമ്പില്. കെകെ ശൈലജ വാര്ത്താ സമ്മേളനത്തില് അപകീര്ത്തിപ്പെടുത്തിയെന്ന് ഷാഫി പറമ്പില്. 24 മണിക്കൂറിനുള്ളില് കെകെ ശൈലജ മാപ്പ് പറയണമെന്ന് ഷാഫി പറമ്പില് ആവശ്യപ്പെട്ടു. മാപ്പ് പറഞ്ഞില്ലെങ്കില് നിയമനടപടിയിലേക്ക് കടക്കുമെന്നും ഷാഫി പറമ്പില് അറിയിച്ചു.
കെകെ ശൈലജയെ അപകീര്ത്തിപ്പെടും വിധത്തിലുള്ള വീഡിയോ പ്രചരിപ്പിച്ചുവെന്നയാരുന്നു ഷാഫി പറമ്പിലിനെതിരെ ഉയര്ന്ന ആരോപണം. മോശം വീഡിയോ പ്രചരിപ്പിക്കുന്നുവെന്ന് കാട്ടി ശൈലജ പൊലീസില് പരാതിയും നല്കിയിരുന്നു. എന്നാല് വീഡിയോയെ കുറിച്ച് താന് പറഞ്ഞിട്ടില്ലെന്ന് കെകെ ശൈലജ വ്യക്തമാക്കി രംഗത്തെത്തി. ഇതിന് പിന്നാലെയാണ് ഷാഫി പറമ്പില് നിയമനടപടികളിലേക്ക് കടക്കാന് ഒരുങ്ങുന്നത്.
തനിക്കെതിരെ അശ്ലീല വിഡിയോ പ്രചരിപ്പിക്കുന്നതായി എവിടെയും പറഞ്ഞിട്ടില്ലെന്നും മോര്ഫ് ചെയ്ത പോസ്റ്ററെന്നാണ് പറഞ്ഞതെന്നും കെകെ ശൈലജ കഴിഞ്ഞദിവസം പറഞ്ഞിരുന്നു.