ജനസംഖ്യ സെന്‍സസ് അടുത്ത വര്‍ഷം ജനുവരി 25 ന് ആരംഭിക്കും. ഫെബ്രുവരി 28 വരെയാണ് ജനസംഖ്യ സെന്‍സസ്. തിരഞ്ഞെടുപ്പ് നടക്കുന്ന സംസ്ഥാനങ്ങളില്‍ ഈ വര്‍ഷം ജനസംഖ്യാ സെന്‍സസ് തന്നെ നടക്കും. വീടുതോറുമുള്ള സെന്‍സസ് ആരംഭിക്കുന്നതിന് മുന്‍പ് പൗരന്മാര്‍ക്ക് സെല്‍ഫ് എന്യൂമറേഷന് അവസരം നല്‍കും. നാല്‍പത് ചോദ്യങ്ങളായിരിക്കും ജനസംഖ്യ സെന്‍സസില്‍ ഉള്‍പ്പെടുത്തുക. ജാതി, മതം, മാതാപിതാക്കളുടെ ജനനതിയതി, ബാങ്ക് അക്കൗണ്ടുകളുടെ എണ്ണം പങ്കാളിയുടെ പേര്, ഫോണ്‍ നമ്പര്‍ എന്നിവയെക്കുറിച്ച് പ്രത്യേക ചോദ്യങ്ങള്‍ ഉണ്ടാകും.
സെന്‍സസില്‍ 13 എണ്ണം പുതിയ ചോദ്യങ്ങളാണ്. സെല്‍ഫ് എന്യൂമറേഷന് അവസരം 2027 ജനുവരി 10 മുതല്‍ 24 വരെ നടക്കും. ഇത് നിര്‍ബന്ധമല്ല. ജനസംഖ്യാ സെന്‍സസുമായി ബന്ധപ്പെട്ട വിവരങ്ങള്‍ പരിശോധിച്ചു തിരുത്തുന്നതിനുള്ള ഘട്ടം 2027 മാര്‍ച്ച് 1 മുതല്‍ 5 വരെ നടക്കും. 1948-ലെ സെന്‍സസ് ആക്ട്, 1990-ലെ സെന്‍സസ് ചട്ടങ്ങള്‍ എന്നിവയിലെ വ്യവസ്ഥകള്‍ക്ക് അനുസൃതമായാണ് ഇന്ത്യയിലെ സെന്‍സസ് നടത്തുന്നത്. ഇന്ത്യയില്‍ അവസാനമായി സെന്‍സസ് നടന്നത് 2011-ല്‍, രണ്ട് ഘട്ടങ്ങളിലായാണ്.
2021-ല്‍ നടത്താനിരുന്ന സെന്‍സസിന്റെ ആദ്യ ഘട്ടത്തിനായുള്ള എല്ലാ ഒരുക്കങ്ങളും പൂര്‍ത്തിയാക്കിയിരുന്നു. ചില സംസ്ഥാനങ്ങളിലും കേന്ദ്രഭരണ പ്രദേശങ്ങളിലും 2020 ഏപ്രില്‍ 1 മുതല്‍ ഇതിന്റെ പ്രവര്‍ത്തനങ്ങള്‍ ആരംഭിക്കാനാണ് നിശ്ചയിച്ചിരുന്നത്. എന്നാല്‍, രാജ്യത്തുടനീളം കോവിഡ്-19 മഹാമാരി പടര്‍ന്നുപിടിച്ച സാഹചര്യത്തില്‍, സെന്‍സസ് നടപടികള്‍ മാറ്റിവെക്കുകയുണ്ടായി. ഏറ്റവും വലിയ ജനസംഖ്യാ കണക്കെടുപ്പ് പ്രക്രിയയായ ഇതിനായി 11,718 കോടി രൂപ കേന്ദ്ര മന്ത്രിസഭ അനുവദിച്ചിരിക്കുന്നത്.
