ഗതിനിര്‍ണയത്തിനായി വിദേശരാജ്യങ്ങളെ ആശ്രയിക്കുന്നത് അവസാനിപ്പിക്കുക ലക്ഷ്യമിട്ട് ഇന്ത്യ വികസിപ്പിച്ച NVS 03-യെ ഭ്രമണപഥത്തില്‍ എത്തിച്ചു. ഇന്നലെ രാത്രി 11.51ന് ശ്രീഹരിക്കോട്ടയിലെ രണ്ടാം വിക്ഷേപണത്തറയില്‍ ജി.എസ്.എല്‍.വി.-എഫ് 18 റോക്കറ്റിലാണ് ഉപഗ്രഹം വിക്ഷേപിച്ചത്. പുലര്‍ച്ചെ 12.09ന്, 18 മിനിറ്റ് 50 സെക്കന്‍ഡില്‍ വിജയകരമായി ഉപ?ഗ്രഹം ഭ്രമണപഥത്തിലെത്തി. തദ്ദേശീയ നാവിഗേഷന്‍ സംവിധാനമായ ‘നാവിക്’ പരമ്പരയിലെ ആധുനിക ഉപഗ്രഹമാണിത്.
GSLV യുടെ ഇരുപതാം വിക്ഷേപണ ദൗത്യമാണ് വിജയകരമായി പൂര്‍ത്തിയായത്. ISROയുടെ വൈദഗ്ധ്യം സാക്ഷ്യപെടുത്തുന്ന ദൗത്യമാണെന്നും ടീമിന്റെ കൂട്ടായ പരിശ്രമത്തിന്റെ ഫലമാണെന്നും ISRO ചെയര്‍മാന്‍ വി നാരായണന്‍ പറഞ്ഞു. ഒരൊറ്റ ലക്ഷ്യത്തിനായി ഒന്നിച്ച് ഒരുപോലെ അധ്വാനിച്ചാല്‍ എന്ത് ഫലം നേടാന്‍ കഴിയും എന്നതിന്റെ ഉദാഹരണമാണ് ഈ ദൗത്യവിജയമെന്ന് മിഷന്‍ ഡയറക്ടറും മലയാളിയുമായ തോമസ് കുര്യന്‍ പറഞ്ഞു.
അമേരിക്കയുടെ ജി.പി.എസ് പോലെ ഇതും പൊസിഷനിങ്, നാവിഗേഷന്‍, ടൈമിങ് സേവനങ്ങള്‍ നല്‍കുന്നതിനുള്ളതാണ് ഇന്ത്യയെയും അതിര്‍ത്തികളില്‍ നിന്ന് ഏകദേശം 1,500 കിലോമീറ്റര്‍ ചുറ്റളവിലുള്ള പ്രദേശങ്ങളെയും നാവിക് ഉള്‍ക്കൊള്ളും. ശൃംഖലയെ കൂടുതല്‍ ശക്തിപ്പെടുത്തുന്നതിനായി ഐ.എസ്.ആര്‍.ഒ എന്‍.വി.എസ്-04, എന്‍.വി.എസ്-05 എന്നിവയും വികസിപ്പിക്കുന്നുണ്ട്.
