latest news

ടിബി മുക്ത് ഭാരത് അഭിയാന്റെ ഭാഗമായി ക്ഷയരോഗ മുക്ത നാടിനായി ജില്ലയില്‍ ജോയിന്റ് സ്‌ക്വാഡ് ഫോര്‍ ഹെല്‍ത്ത് -ജോഷ് ടീം സജ്ജമായി. ക്ഷയരോഗ ലക്ഷണങ്ങള്‍ കണ്ടെത്തല്‍, നേരത്തെയുളള പരിശോധന, ചികിത്സ, പോഷണം, പ്രതിരോധം തുടങ്ങിയ വിഷയങ്ങളില്‍ സമൂഹത്തില്‍ ബോധവത്കരണം നടത്തുകയും ക്ഷയരോഗത്തെ ചെറുക്കുകയും ചെയ്യുകയെന്നതാണ് ജോഷ് ടീമിന്റെ ലക്ഷ്യം.

ഗാര്‍ഹിക സന്ദര്‍ശനം, രോഗവ്യാപനം തടയാനുള്ള സാമൂഹിക ഇടപെടല്‍ തുടങ്ങിയ പ്രവര്‍ത്തനങ്ങളിലൂടെ യുവജനപങ്കാളിത്തമുള്ള ജോഷ് ടീം സജീവമാകും. കളക്ട്രേറ്റ് ഓഡിറ്റോറിയത്തില്‍ നടന്ന ജില്ലാതല ജോഷ് ടീം പ്രഖ്യാപനം അഡ്വ. സജീവ് ജോസഫ് എം.എല്‍.എ ഉദ്ഘാടനം ചെയ്തു. ഒരു കാലഘട്ടത്തിന്റെ ഭീതിയായിരുന്നു ക്ഷയരോഗമെന്നും ആരോഗ്യ സംവിധാനത്തിന്റെ ഫലപ്രദമായ ഇടപെടലിലൂടെ വലിയൊരു അളവ് വരെ അത് ഇല്ലാതാക്കാന്‍ കഴിഞ്ഞതായും അദ്ദേഹം പറഞ്ഞു. രോഗം പൂര്‍ണ്ണമയും സമൂഹത്തില്‍ നിന്നും തുടച്ചുമാറ്റുന്നതിനുള്ള വലിയ മുന്നേറ്റം നടന്നുവരികയാണ്. ജോഷ് ടീം സജ്ജമാകുന്നതോടെ ക്ഷയരോഗ മുക്ത നാട് എന്ന ലക്ഷ്യം അകലെയാവില്ല. ഇതിന് കൂട്ടായ പരിശ്രമങ്ങള്‍ അനിവാര്യമാണെന്നും സജീവ് ജോസഫ് എം.എല്‍.എ പറഞ്ഞു. ജോഷ് ടീം പോസ്റ്റര്‍ പ്രകാശനവും ഫ്ളാഗ് ഓഫും വളണ്ടിയര്‍മാര്‍ക്കുള്ള ബാഡ്ജ്, ക്യാപ് കൈമാറ്റവും ചടങ്ങില്‍ നടന്നു.

ജില്ലയില്‍ ക്ഷയരോഗ മുക്തമായ വളപട്ടണം, പാപ്പിനശ്ശേരി, ചെറുകുന്ന്, രാമന്തളി, കുഞ്ഞിമംഗലം, മാട്ടൂല്‍, എരുവേശ്ശി, മലപ്പട്ടം, ഉദയഗിരി ഗ്രാമപഞ്ചായത്തുകളെ ചടങ്ങില്‍ ആദരിച്ചു. ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അദ്ധ്യക്ഷത വഹിച്ചു. അസിസ്റ്റന്റ് കളക്ടര്‍ എസ്.സ്വാതി വിഷയാവതരണം നടത്തി. ജില്ലാ പ്രോഗ്രാം മാനേജര്‍ ഡോ. സി.അബൂബക്കര്‍ ക്ഷയരോഗ മുക്ത പ്രതിജ്ഞ ചൊല്ലിക്കൊടുത്തു. എല്‍.എസ്.ജി.ഡി ജോയിന്റ് ഡയറക്ടര്‍ പി.എം. ധനീഷ്, മേരാ യുവ ഭാരത് കണ്ണൂര്‍ ഡെപ്യൂട്ടി ഡയറക്ടര്‍ എച്ച്. സച്ചിന്‍, ഡെപ്യൂട്ടി ഡി.എം.ഒ ഡോ. ബി.സന്തോഷ്, ജില്ലാ ടി.ബി ഓഫീസര്‍ ഡോ.രശ്മി മാത്യു തുടങ്ങിയവര്‍ സംസാരിച്ചു. ജില്ലാ ടി.ബി സെന്റര്‍ കണ്‍സള്‍ട്ടന്റ് പള്‍മണോളജിസ്റ്റ് ഡോ. രജ്ന ശ്രീധരന്‍ ടി.ബി. ബോധവത്കരണ ക്ലാസ്സെടുത്തു. ജനപ്രതിനിധികള്‍, എന്‍.സി.സി, എന്‍.എസ്.എസ് പ്രവര്‍ത്തകര്‍, വിവിധ സന്നദ്ധ സേനാ വിഭാഗങ്ങള്‍ , ആരോഗ്യ പ്രവര്‍ത്തകര്‍ തുടങ്ങിയവര്‍ ചടങ്ങില്‍ പങ്കെടുത്തു.

പ്രതിരോധിക്കാം ക്ഷയരോഗത്തെ; ജോഷ് ടീം വീടുകളിലെത്തും

ക്ഷയരോഗ നിര്‍മ്മാര്‍ജ്ജനത്തിന് ജനപങ്കാളിത്ത അധിഷ്ഠിത ദേശീയ ക്യാമ്പയിനിന്റെ ഭാഗമായുള്ള ജോഷ് ടീം വീടുകളിലെത്തും. വിദ്യാര്‍ത്ഥികളും യുവജനങ്ങളും സന്നദ്ധ പ്രവര്‍ത്തകരും അണിനരിക്കുന്ന ജോഷ് ടീമിന്റെ നേതൃത്വത്തില്‍ നാടൊന്നാകെയുള്ള പ്രവര്‍ത്തനങ്ങളാണ് നടക്കുക. രോഗ ലക്ഷണമുള്ളവരെ കണ്ടെത്തുകയും യഥാസമയം ചികിത്സ ലഭ്യമാക്കുകയും ചെയ്യുക, ബോധവത്കരണ പ്രവര്‍ത്തനങ്ങള്‍ നടത്തുക, സാൂഹിക പിന്തുണ, അധിക പരിചരണം എന്നിവ ലഭ്യമാക്കുക തുടങ്ങിയവയാണ് വളണ്ടിയര്‍മാരുടെ ഉത്തരവാദിത്തം. ക്ഷയരോഗ ബാധിതരായവരുടെ പോഷകാരോഗ്യ സംരക്ഷണം, നിരീക്ഷണം തുടങ്ങിയവയെല്ലാം ഇതിന്റെ ഭാഗമായി ഉറപ്പാക്കും.

ത്രിതല പഞ്ചായത്ത് സംവിധാനത്തിനു കീഴിലാണ് ജോഷ് വളണ്ടിയര്‍മാര്‍ പ്രവര്‍ത്തിക്കുക. ബ്ലോക്ക്തല നോഡല്‍ ഓഫീസര്‍മാര്‍ പ്രവര്‍ത്തനങ്ങള്‍ ഏകോപിപ്പിക്കും. ആരോഗ്യ വകുപ്പിന്റെ നേതൃത്വത്തില്‍ ജോഷ് ടീം പ്രവര്‍ത്തനങ്ങള്‍ വിലയിരുത്തുകയും വ്യാപിപ്പിക്കുകയും ചെയ്യും. രോഗ നിര്‍മ്മാര്‍ജ്ജനത്തിനായി സജീവമായി പ്രവര്‍ത്തിക്കുന്ന ഗ്രാമപഞ്ചായത്തുകള്‍ക്ക് അവാര്‍ഡുകള്‍ നല്‍കും.

ജില്ലയില്‍ കഴിഞ്ഞ വര്‍ഷം 1430 ക്ഷയരോഗികള്‍

ജില്ലാ ടി.ബി സെന്ററിന്റെ കണക്ക് പ്രകാരം 2025ല്‍ കണ്ണൂര്‍ ജില്ലയില്‍ 1430 ക്ഷയരോഗ കേസുകളാണ് റിപ്പോര്‍ട്ട് ചെയ്തിട്ടുള്ളത്. ഇതില്‍ 147 രോഗികള്‍ മരണപ്പെട്ടു. ഈ വര്‍ഷം ആഗസ്റ്റ് 30 വരെയുള്ള കണക്കുകളില്‍ 840 രോഗികളാണ് ക്ഷയരോഗം ബാധിച്ച് ചികിത്സയിലുള്ളത്. ഈ വര്‍ഷം 64 രോഗികള്‍ മരണപ്പെട്ടു. പലപ്പോഴും രോഗ ലക്ഷണങ്ങളെ അവഗണിക്കുന്നതാണ് ചികിത്സയെ സങ്കീര്‍ണ്ണമാക്കുന്നതെന്ന് ജില്ലാ ടി.ബി ഓഫീസര്‍ ഡോ.രശ്മി മാത്യു പറഞ്ഞു. ശരിയായ ചികിത്സയിലൂടെയും പരിചരണത്തിലൂടെയും രോഗം പൂര്‍ണ്ണമായും ഭേദമാക്കാന്‍ കഴിയും. രോഗ ലക്ഷണങ്ങള്‍ മാറിയാലും ഡോക്ടറുടെ നിര്‍ദ്ദേശം അനുസരിച്ച് നിശ്ചിത കാലത്തേക്ക് മരുന്ന് കഴിക്കുന്നത് തുടരണം. സര്‍ക്കാര്‍ ആരോഗ്യ കേന്ദ്രങ്ങള്‍ വഴി ലഭ്യമാകുന്ന ഡോട്സ് ചികിത്സാ രീതികള്‍ പിന്തുടകയും പ്രധാനമാണ്. പാല്‍, മുട്ട, പയറുവര്‍ഗ്ഗങ്ങള്‍ തുടങ്ങിയ പോഷകാഹാരങ്ങളും മുടങ്ങാതെ കഴിക്കണം. ശരിയായ ജീവിതത്തിലേക്കുള്ള തിരിച്ചുവരിവിന് ഇതെല്ലാം ആവശ്യമാണെന്നും ഡോക്ടര്‍ അറിയിച്ചു.

രോഗ നിര്‍ണ്ണയത്തിന് എ.ഐ ടൂള്‍; ജില്ലയില്‍ നാലിടത്ത് സംവിധാനം

ക്ഷയരോഗ നിര്‍ണ്ണയം വേഗത്തിലാക്കുന്നതിന് ജില്ലയില്‍ ആധുനിക സംവിധാനങ്ങളും ലഭ്യമാണ്. എ.ഐ ടൂള്‍ സംവിധാനമുള്ള ഹാന്‍ഡ് ഹെല്‍ഡ് എക്സറേയാണ് ഇതില്‍ പ്രധാനപ്പെട്ടത്. എവിടേക്ക് വേണമെങ്കിലും കൊണ്ടുപാകാനും എളുപ്പത്തിലും കൂടുതല്‍ വ്യക്തതയോടെയും എക്സ് റേ എടുക്കാനും ഈ ഉപകരണം സഹായകമാണ്. പള്ളിക്കുന്ന് ജില്ലാ ടി.ബി സെന്റര്‍, തലശ്ശേരി ജനറല്‍ ആശുപത്രി, പയ്യന്നൂര്‍ താലൂക്ക് ആശുപത്രി, പേരാവൂര്‍ താലൂക്ക് ആശുപത്രി എന്നീ കേന്ദ്രങ്ങളിലാണ് ആദ്യഘട്ടത്തില്‍ ഈ സംവിധാനം ലഭ്യമായിട്ടുള്ളത്. രോഗ നിര്‍ണ്ണയും ഏറ്റവും വേഗത്തില്‍ നടത്തി ചികിത്സ തുടങ്ങാനും മറ്റും ഇതുവഴി കഴിയും. ഇതുകൂടാതെ രോഗ നിര്‍ണ്ണയം നടത്തുന്നതിന് ജില്ലയില്‍ പത്ത് മോളിക്യുലാര്‍ പരിശോധന കേന്ദ്രങ്ങളും സജ്ജമാണ്. ജില്ലയിലെ എല്ലാ സര്‍ക്കാര്‍ ആശുപത്രികളിലും സ്റ്റെപ്സ് പദവിയിലുള്ള 31 സ്വകാര്യ ആശുപത്രികളിലും ക്ഷയരോഗത്തിനുള്ള മരുന്നുകള്‍ സൗജന്യമായി വിതരണം ചെയ്യുന്നുണ്ട്.

സംസ്ഥാനത്ത് സ്പാകളുടെ മറവില്‍ നടക്കുന്ന നിയമവിരുദ്ധ പ്രവര്‍ത്തനങ്ങള്‍ പരിശോധിക്കാന്‍ കര്‍ശന നിര്‍ദേശം നല്‍കിയതായി ആഭ്യന്തര വകുപ്പ് മന്ത്രി രമേശ് ചെന്നിത്തല. കൊച്ചിയിലാണ് ഇത്തരം സ്പാകള്‍ കൂടുതലുള്ളതെന്നും അദ്ദേഹം പറഞ്ഞു. യാതൊരു ലൈസന്‍സുമില്ലാതെ പല സ്പാകളും ഒരു ബോര്‍ഡും വച്ച് പ്രവര്‍ത്തനം നടത്തിവരികയാണ്. ഇതിനെല്ലാമെതിരെ അന്വേഷണം നടത്താന്‍ സംസ്ഥാന പൊലീസ് മേധാവിക്ക് നിര്‍ദേശം നല്‍കിയിട്ടുണ്ടെന്ന് അദ്ദേഹം വ്യക്തമാക്കി.

ഗാര്‍ഹിക പീഡനങ്ങള്‍ക്കെതിരെ സ്പീക് അപ് പദ്ധതിയുമായി ആഭ്യന്തരവകുപ്പ്. ഗാര്‍ഹിക പീഡനങ്ങള്‍ കൂടി വരുന്ന പശ്ചാത്തലത്തിലാണ് പുതിയ പദ്ധതിയെന്ന് ആഭ്യന്തരമന്ത്രി പറഞ്ഞു. പരാതി നല്‍കുന്ന സ്ത്രീകളുടെ വിവരങ്ങള്‍ രഹസ്യമായി സൂക്ഷിക്കുമെന്ന് നോഡല്‍ ഓഫീസര്‍ ഐജി അജീതാ ബീഗം പറഞ്ഞു

സ്ത്രീധനത്തിന്റെ പേരില്‍ കൊടിയ പീഡനങ്ങളുടെ മുറിപ്പാടുമായുള്ള കൊല്ലത്തെ യുവതിയുടെ ചിത്രം ഇപ്പോള്‍ വലിയ ചര്‍ച്ചയാകുന്നുണ്ട്. സ്ത്രീധന പീഡനത്തിനിരയായി ജീവന്‍ നഷ്ടമായ വിസ്മയെയും ഉത്തരയെയും ഈ നാട് മറന്നിട്ടില്ല. അന്നുയര്‍ന്ന പ്രതിക്ഷേധങ്ങള്‍ക്കും പ്രഖ്യാപിക്കപ്പെട്ട വിവിധ പദ്ധതികള്‍ക്കും സ്ത്രീധനമെന്ന വിപത്തിനെ ചെറുക്കുന്നതിന് ഇനിയും കഴിഞ്ഞിട്ടില്ല. പരാതികള്‍ വീണ്ടും വീണ്ടും ഉയരുന്ന പശ്ചാത്തലത്തിലാണ് പുതിയ പദ്ധതി. സതിയെന്ന ദുരാചാരത്തെ കുഴിച്ചുമൂടിയെങ്കിലും വീടിന്റെ അകത്തളങ്ങളില്‍ പുതിയ രൂപത്തില്‍ സതി തുടരുന്നവെന്ന് പറഞ്ഞുകൊണ്ടാണ് സ്പീക് അപ് പദ്ധതി ആഭ്യന്തര മന്ത്രി പ്രഖ്യാപിക്കുന്നത്.

കഴിഞ്ഞ ഏഴുവര്‍ഷത്തിനിടെ ഗാര്‍ഹിക പീഡനത്തില്‍ ജീവനൊടുക്കിയത് 92 സ്ത്രീകളാണ്. 15,000 ത്തോളം പരാതികളാണ് പൊലീസിന് മുന്നിലെത്തിയത്. വിസ്മയയുടെ മരണത്തിന് അപരാജിത എന്ന പദ്ധതി പൊലിസ് ആവിഷ്‌കരിച്ചിരുന്നു. തുടക്കത്തില്‍ സമഗ്രമായി നടന്നുവെങ്കിലും ഉദ്യോഗസ്ഥ മാറ്റവും ഭരണമാറ്റവുമുണ്ടായതോടെ പദ്ധതി മെല്ലപ്പോക്കിലായി. ഓരോ മരണവും ചര്‍ച്ചയാകുമപോള്‍ നടത്തുന്ന പ്രഖ്യാപനങ്ങളും പദ്ധതികളും കാര്യക്ഷമമായി തുടര്‍ന്ന് കൊണ്ട് പോകാനാകാത്തത് പ്രധാന പ്രശ്‌നമാണ്.

സ്‌കൂളുകളിലെ ഉച്ചഭക്ഷണ വിതരണ പദ്ധതി അവതാളത്തിലെന്ന് മുന്‍ വിദ്യാഭ്യാസ മന്ത്രി വി ശിവന്‍കുട്ടി. 23.5 ലക്ഷം വിദ്യാര്‍ത്ഥികള്‍ക്കാണ് ഉച്ചഭക്ഷണം വിതരണം ചെയ്യുന്നത്. മനുഷ്യത്വരഹിതമായ നടപടിയാണ് ഇപ്പോള്‍ നടക്കുന്നത്. ഓഗസ്റ്റ്, സെപ്റ്റംബര്‍ മാസങ്ങളിലെ ഉച്ചഭക്ഷണ വിതരണത്തിനുള്ള തുക കുടിശികയാണ്. അങ്കണവാടികളിലെ പോഷകാഹാര വിതരണവും വലിയ പ്രതിസന്ധിയിലാണെന്ന് മുന്‍ വിദ്യാഭ്യാസ മന്ത്രി പറഞ്ഞു.

തദ്ദേശ സ്ഥാപനങ്ങളില്‍ നിന്ന് ഫണ്ട് ലഭിക്കാന്‍ കാലതാമസം നേരിടുകയാണ്. ഇതാണ് പ്രതിസന്ധിക്ക് കാരണം. ഇടതുപക്ഷം കൊണ്ടുവന്ന മാതൃകാ മെനു നടപ്പാക്കണമെന്ന് ശിവന്‍കുട്ടി ആവശ്യപ്പെട്ടു. അരിയും പച്ചക്കറിയും പുറത്തുനിന്ന് വിലകൊടുത്ത് വാങ്ങേണ്ട അവസ്ഥയാണ്. അധ്യാപകര്‍ സ്വന്തം കയ്യില്‍ നിന്ന് പൈസ എടുത്ത് സാധനം വാങ്ങേണ്ട സ്ഥിതിയാണ് നിലവിലുള്ളത്. പലരും സ്വര്‍ണ്ണം പണയം വെച്ച് പോലും സാധനങ്ങള്‍ വാങ്ങുകയാണ്. ചോറും രണ്ട് കറിയും മാത്രം ആണ് ഇപ്പോള്‍ നല്‍കുന്നത്. എഗ്ഗ് ഫ്രൈഡ് റൈസ് അടക്കം നല്‍കുന്നത് നിര്‍ത്തലാക്കി. ക്ഷേമ ആശ്വാസ പദ്ധതികളോട് പുറം തിരിഞ്ഞു നില്‍ക്കുന്ന സമീപനമാണ് സര്‍ക്കാരിന്റേതെന്ന് വി ശിവന്‍കുട്ടി വിമര്‍ശിച്ചു.

ഇന്ത്യയില്‍ തന്നെ ശ്രദ്ധിക്കപ്പെടുന്ന മേളയാണ് സ്‌കൂള്‍ ഒളിമ്പിക്‌സ്. കഴിഞ്ഞ സര്‍ക്കാര്‍ 25000 കുട്ടികള്‍ക്ക് താമസവും ഭക്ഷണവും എല്ലാം നല്‍കി. ഒരു പരാതിയും ഉണ്ടായിരുന്നില്ല. ഇപ്പോള്‍ സ്വര്‍ണ്ണ കപ്പ് പോലും കാണാന്‍ ഇല്ല. ഓരോ മേളയും കഴിയുമ്പോള്‍ അടുത്ത മേള എവിടെ നടത്തണം എന്ന് തീരുമാനിക്കും. ഇത്തവണ അത് ഉണ്ടായില്ല. പതാക പോലും കാണാന്‍ ഇല്ലാത്ത സ്ഥിതിയാണെന്ന് ശിവന്‍കുട്ടി പറഞ്ഞു.

സ്വാതന്ത്ര്യ സമര സേനാനി സോഷ്യോ വാസു (പി വാസു,103) അന്തരിച്ചു. വാര്‍ധക്യ സഹജമായ അസുഖത്തെ തുടര്‍ന്ന് ചികിത്സയിലായിരുന്നു. കോഴിക്കോട് ചെറുവണ്ണൂരിലെ വസതിയിലായിരുന്നു അന്ത്യം. ക്വിറ്റ് ഇന്ത്യ സമരത്തില്‍ പങ്കെടുത്തിട്ടുണ്ട്. സമരത്തില്‍ പങ്കെടുത്തതിനാല്‍ ബ്രിട്ടീഷ് പൊലീസിന്റെ ക്രൂരമായ മര്‍ദനത്തിന് ഇരയായിരുന്നു. ജയില്‍ വാസവും അനുഭവിച്ചിട്ടുണ്ട്.

എയിംസ് വേണമെന്ന ആവശ്യവുമായി കേന്ദ്രത്തിന് വീണ്ടും കത്തയക്കാന്‍ സംസ്ഥാനം. കേന്ദ്ര ആരോഗ്യമന്ത്രി ജെ പി നഡ്ഡയ്ക്ക് മന്ത്രി കെ മുരളീധരന്‍ കത്തയക്കും. കേരളത്തിന് ഉടന്‍ എയിംസ് നല്‍കില്ലെന്ന നിലപാട് കേന്ദ്രം വ്യക്തമാക്കിയതിന് പിന്നാലെയാണ് നീക്കം.

കേന്ദ്ര നിലപാട് ഇരട്ടത്താപ്പെന്ന് കത്തിലൂടെ അറിയിക്കും. കേരളം കണ്ടെത്തി നല്‍കിയ സ്ഥലത്തിന്റെ പട്ടികയില്‍ നിന്ന് ഒരു സ്ഥലം തിരഞ്ഞെടുത്ത് എയിംസ് അനുവദിക്കണമെന്നാണ് ആവശ്യം. എംപിമാര്‍ മുഖേന കേന്ദ്രത്തില്‍ സമ്മര്‍ദം ചെലുത്താനും ആലോചനയുണ്ട്.

നിരന്തരം കേരളത്തിന്റെ ആവശ്യം കേന്ദ്രസര്‍ക്കാരിനെ അറിയിച്ചിട്ടും ആവശ്യം പരിഗണിക്കാത്തതില്‍ അതൃപ്തി പരസ്യമാക്കി ആരോഗ്യ മന്ത്രി കെ മുരളീധരന്‍ ഇന്നലെ രംഗത്ത് വന്നിരുന്നു. കേരളത്തില്‍ എയിംസിന് അനുയോജ്യമായ 10 സ്ഥലങ്ങളുടെ പട്ടിക കേന്ദ്രസര്‍ക്കാരിന് നേരത്തെ കൈമാറിയിരുന്നു. കേന്ദ്ര ആരോഗ്യമന്ത്രിയുമായി കെ മുരളീധരന്‍ നടത്തിയ കൂടിക്കാഴ്ചയില്‍ കേരളത്തിന് എയിംസ് അനുവദിക്കുമെന്ന ഉറപ്പുനല്‍കിയിരുന്നു. ഹൈക്കോടതിയിലെ കേന്ദ്ര നിലപാട് ഇരട്ടത്താപ്പ് എന്നാണ് ആക്ഷേപം. കേന്ദ്ര നിലപാടില്‍ സംസ്ഥാനം പ്രതിഷേധം അറിയിക്കും. കേരളത്തില്‍ നിന്നുള്ള സഹമന്ത്രിയുടെ നിലപാടും സംസ്ഥാനം ചോദ്യം ചെയ്തേക്കും.

വിഖ്യാത ബോഡിവുഡ് നടനും സംവിധായകനുമായ നാനാ പടേകര്‍ അന്തരിച്ചു. 75 വയസായിരുന്നു. ഗോവയിലെ വസിതിയില്‍ ഹൃദയാഘാതത്തെ തുടര്‍ന്നായിരുന്നു അന്ത്യം. ബോധക്ഷയം സംഭവിച്ചയുടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പുലര്‍ച്ചെ 5.20നാണ് മരണം സ്ഥിരീകരിച്ചത്.

ഷാഹിദ് കപൂറും തൃപ്തി ദിമ്രിയും പ്രധാന വേഷങ്ങളിലെത്തിയ വിശാല്‍ ഭരദ്വാജിന്റെ റൊമാന്റിക് ആക്ഷന്‍ ത്രില്ലര്‍ ചിത്രമായ ‘ഓ റോമിയോ’യിലാണ് നാനാ പടേക്കര്‍ അവസാനമായി അഭിനയിച്ചു. 2026 ഫെബ്രുവരിയില്‍ പുറത്തിറങ്ങിയ ഈ ചിത്രത്തില്‍ മുംബൈ ഇന്റലിജന്‍സ് ബ്യൂറോ മേധാവിയായ ഇസ്മായില്‍ ഖാന്‍ എന്ന കഥാപാത്രത്തെയാണ് അദ്ദേഹം അവതരിപ്പിച്ചത്. 2026 മാര്‍ച്ചില്‍ പ്രൈം വീഡിയോയില്‍ റിലീസ് ചെയ്ത അനില്‍ കപൂറിന്റെ ‘സുബേദാര്‍’ എന്ന ചിത്രത്തിലും അദ്ദേഹം അഭിനയിച്ചിരുന്നു. ഇതിനുമുമ്പ് ‘ഹൗസ്ഫുള്‍ 5’ (2025), ‘വന്വാസ്’ (2024) എന്നീ ചിത്രങ്ങളിലും അദ്ദേഹം വേഷമിട്ടിരുന്നു.

1951ല്‍ മഹാരാഷ്ട്രയിലാണ് നാനാ പടേകറുടെ ജനനം. നട്‌സാമ്രാട്ട്, വജൂദ്, പരിന്ദ, അബ് തക് ഛപ്പന്‍, യശ്വന്ത് തുടങ്ങിയ ചിത്രങ്ങളാണ് അദ്ദേഹത്തെ ഏറെ പ്രശസ്തനാക്കിയത്. മൂന്ന് തവണ ദേശീയ ചലച്ചിത്ര പുരസ്‌കാരത്തിന് അര്‍ഹനായിട്ടുണ്ട്. ഹിന്ദി, മറാത്തി ഭാഷകളിലാണ് അദ്ദേഹം തിളങ്ങിയത്. അഭിനയത്തിന് പുറമേ സംവിധാന രംഗത്തും എഴുത്തിലും അദ്ദേഹം തിളങ്ങി.

സംസ്ഥാനത്ത് ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇന്ന് അഞ്ച് ജില്ലകളില്‍ യെല്ലോ അലര്‍ട്ട് നല്‍കിയിട്ടുണ്ട്. മലപ്പുറം, ഇടുക്കി, എറണാകുളം, കോട്ടയം, പത്തനംതിട്ട ജില്ലകളിലാണ് യെല്ലോ അലര്‍ട്ട്.

ഒറ്റപ്പെട്ട ഇടങ്ങളില്‍ ഇടിമിന്നലോട് കൂടിയ ശക്തമായ മഴയ്ക്കും, മണിക്കൂറില്‍ 40 കിലോമീറ്റര്‍ വരെ വേഗതയുള്ള ശക്തമായ കാറ്റിനുമാണ് സാധ്യത. ഇരട്ട ചക്രവാതച്ചുഴിയുടെയും, ന്യൂനമര്‍ദ്ദപാത്തിയുടെയും സ്വാധീന ഫലമായാണ് മഴ ശക്തമാകുന്നത്. സംസ്ഥാനത്ത് കള്ളക്കടല്‍ ജാഗ്രതാ നിര്‍ദേശവും ദേശീയ സമുദ്ര വിവര വിശകലന കേന്ദ്രം പുറപ്പെടുവിച്ചിട്ടുണ്ട്. മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്ന് മുന്നറിയിപ്പ്.

വാഹന മോഡിഫിക്കേഷനില്‍ പുതിയ ഉത്തരവിറക്കി മോട്ടോര്‍ വാഹന വകുപ്പ്. അനുമതിയോടെ ചെയ്യാവുന്ന മോഡിഫിക്കേഷന്‍ ആണ് ഉത്തരവില്‍ ഉള്‍പ്പെടുത്തിയത്. ആര്‍സിയില്‍ മാറ്റം വരുത്തി വാഹനത്തിന്റെ നിറം മാറ്റാം, ഒരേ മോഡലിലുള്ള എന്‍ജിന്‍ മാറ്റിവയ്ക്കാം, ഒരേ മോഡലുള്ള ഷാസി മാറ്റിവയ്ക്കാം, ബോഡി ഘടന പരിഷ്‌കരിക്കാം, അനുയോജ്യമായ പ്രത്യേക വാഹനം ആക്കി മാറ്റാം, ഇതല്ലാതെയുള്ള മറ്റ് മോഡിഫിക്കേഷന്‍ അനുവദനീയമല്ലെന്നും എം.വി.ഡി ഉത്തരവില്‍ വ്യക്തമാക്കി.

എല്ലാ മാറ്റങ്ങളും ഗതാഗതവകുപ്പിന്റെ അനുമതിയോടെ മാത്രമേ പാടുള്ളു എന്ന് ഉത്തരവില്‍ പറയുന്നു. 1988-ലെ മോട്ടോര്‍ വാഹന നിയമത്തിലെയും ചട്ടങ്ങളിലെയും വ്യവസ്ഥകള്‍ പ്രകാരമാണ് അനുമതി വാങ്ങേണ്ടത്. അനുവദിച്ച മാറ്റങ്ങള്‍ ആര്‍.സിയില്‍ രേഖപ്പെടുത്തേണ്ട ചുമതലയും റജിസ്റ്റിങ് അതോറിറ്റിക്കാണ്. ഈ ഏഴുമാറ്റങ്ങള്‍ക്ക് പുറമേയുള്ള എല്ലാ മോഡിഫിക്കേഷനുകളും അനുമതിയില്ലാതെ വാഹനങ്ങളില്‍ വരുത്തുന്ന മാറ്റങ്ങളും നിരോധിച്ചിട്ടുണ്ട്.

സംസ്ഥാനത്തെ സര്‍ക്കാര്‍ കോളേജുകളുടെ നിയന്ത്രണത്തിലുള്ള ഹോസ്റ്റലുകളുടെ പ്രവര്‍ത്തനം കൂടുതല്‍ സുതാര്യവും വ്യവസ്ഥാപിതവുമാക്കുന്നതിനായി ഉന്നത വിദ്യാഭ്യാസ വകുപ്പ് സമഗ്രമായ മാര്‍ഗ്ഗനിര്‍ദ്ദേശങ്ങള്‍ പുറപ്പെടുവിച്ചു. ഹോസ്റ്റലുകളിലെ വാര്‍ഡന്‍, ട്യൂട്ടര്‍ നിയമനം, മധ്യവേനലവധിക്കാലത്തെ പ്രവര്‍ത്തനം, അനധികൃത താമസക്കാരെ ഒഴിവാക്കല്‍ എന്നിവ സംബന്ധിച്ചാണ് കോളേജ് വിദ്യാഭ്യാസ ഡയറക്ടറേറ്റ് പുതിയ സര്‍ക്കുലര്‍ ഇറക്കിയത്.

ഹോസ്റ്റലുകളുടെ നടത്തിപ്പുമായി ബന്ധപ്പെട്ട് ഡ്രായിങ് ആന്‍ഡ് ഡിസ്ബര്‍സിങ് അധികാരമുള്ള അധ്യാപകരെയാണ് പ്രിന്‍സിപ്പല്‍മാര്‍ വാര്‍ഡനായി നിയമിക്കേണ്ടത്. ഒപ്പം താമസിക്കുന്ന വിദ്യാര്‍ത്ഥികളുടെ പഠനനിലവാരം ഉയര്‍ത്തുന്നതിനായി ഓരോ അക്കാദമിക വര്‍ഷവും ട്യൂട്ടര്‍മാരെയും നിയമിക്കണം. അധ്യാപകരുടെ സമ്മതം രേഖാമൂലം വാങ്ങിയ ശേഷം കോളേജ് കൗണ്‍സില്‍ യോഗം ചേര്‍ന്ന് എടുക്കുന്ന തീരുമാനത്തിന്റെ അടിസ്ഥാനത്തിലായിരിക്കണം വാര്‍ഡന്‍ നിയമനം നടത്തേണ്ടത്. വനിതാ ഹോസ്റ്റലുകളില്‍ പുരുഷ അധ്യാപകരെ വാര്‍ഡനായി നിയമിക്കുന്നതിന് മുന്‍പായി കോളേജ് വിദ്യാഭ്യാസ വകുപ്പ് ഡയറക്ടറേറ്റില്‍ നിന്ന് മുന്‍കൂര്‍ അനുമതി നേടിയിരിക്കണം.

വാര്‍ഡന്‍, ട്യൂട്ടര്‍ നിയമന ഉത്തരവുകളില്‍ കൗണ്‍സില്‍ തീരുമാനം കൃത്യമായി പരാമര്‍ശിക്കണമെന്നും, ഓരോ നിയമനവും ജൂണ്‍ 1 മുതല്‍ മാര്‍ച്ച് 31 വരെയുള്ള ഒരു അധ്യയന വര്‍ഷത്തേക്ക് മാത്രമായിരിക്കും നിജപ്പെടുത്തുകയെന്നും വ്യക്തമാക്കുന്നു. ഈ നിയമനങ്ങള്‍ക്കെല്ലാം കോളേജ് വിദ്യാഭ്യാസ ഡയറക്ടറുടെ സാധൂകരണ ഉത്തരവ് യഥാസമയം വാങ്ങിയിരിക്കേണ്ടതുമാണ്. സര്‍വ്വകലാശാലകള്‍ മധ്യവേനലവധി (ഏപ്രില്‍-മേയ് മാസങ്ങളില്‍) പ്രഖ്യാപിക്കുമ്പോള്‍ കോളേജുകള്‍ക്കൊപ്പം ഹോസ്റ്റലുകള്‍ക്കും അവധിയായിരിക്കും. എന്നാല്‍ സര്‍വ്വകലാശാല പരീക്ഷകളോ സെമസ്റ്റര്‍ ക്ലാസുകളോ മറ്റ് അടിയന്തര സാഹചര്യങ്ങളോ ഉള്ളപക്ഷം, പരീക്ഷാ ടൈംടേബിളോ ക്ലാസ് ഷെഡ്യൂളോ ലഭ്യമാക്കി ഡയറക്ടറുടെ മുന്‍കൂര്‍ അനുമതി വാങ്ങിയ ശേഷം മാത്രമേ മാര്‍ച്ച് 31-ന് ശേഷവും ഹോസ്റ്റലുകള്‍ പ്രവര്‍ത്തിക്കാന്‍ പാടുള്ളൂ.