latest news

ഡല്‍ഹിയിലെ പൊലീസ് നടപടിയില്‍ ഇടപെടലുമായി സുപ്രീംകോടതി. സര്‍ക്കാരിനെ മറികടന്ന് ക്രമസമാധാനം നടപ്പാക്കാന്‍ പൊലീസിന് അധികാരമില്ലെന്ന് സുപ്രീംകോടതി പറഞ്ഞു. ജീവന് രക്ഷയും സ്വാതന്ത്ര്യവും ഒരു പോലെ പ്രധാനമാണ്. അത് പൗരനായാലും പൊലീസ് ഓഫീസറായാലും ഒരു പോലെയാണ്. എല്ലാ ഹര്‍ജികളും ഫയലില്‍ സ്വീകരിക്കാമെന്ന് സുപ്രീംകോടതി അറിയിച്ചു. സംഭവത്തില്‍ കേന്ദ്ര ക്യാബിനറ്റ് സെക്രട്ടറിയോട് റിപ്പോര്‍ട്ട് തേടി. ഡല്‍ഹി പൊലീസും ഡിഎംആര്‍സിയും റിപ്പോര്‍ട്ട് നല്‍കണമെന്ന് നിര്‍ദേശിച്ചു.

കസ്റ്റഡിയിലെടുക്കേണ്ടി വന്ന സാഹചര്യം അതിന് സ്വീകരിച്ച നടപടികളും വിശദീകരിക്കണമെന്ന് കോടതി നിര്‍ദേശിച്ചു. ഡല്‍ഹി പൊലീസ് കമ്മിഷണറും റിപ്പോര്‍ട്ട് നല്‍കണം. നിയന്ത്രണം പാടില്ലെന്ന ഉത്തരവ് പാലിച്ചോ എന്ന് വിശദീകരിക്കണം. ഇന്റര്‍നെറ്റ് നിരോധനം പാടില്ലെന്നും മറ്റന്നാള്‍ മറുപടി നല്‍കണമെന്നും കോടതി നിര്‍ദേശം നല്‍കി. ഹര്‍ജി ചൊവ്വാഴ്ച വീണ്ടും പരിഗണിക്കും.

ഡല്‍ഹിയില്‍ സ്വതന്ത്ര സഞ്ചാരം പൂര്‍ണമായി പുനഃസ്ഥാപിക്കണമെന്നും ഡല്‍ഹിയില്‍ ഉടനീളം ഉള്ള ബാരിക്കേടുകള്‍ പിന്‍വലിക്കണമെന്നും ഹര്‍ജിക്കാര്‍ ആവശ്യപ്പെട്ടു. ഇടക്കാല ഉത്തരവ് വേണമെന്ന് കപില്‍ സിബല്‍ ആവശ്യപ്പെട്ടു. സോളിസിറ്റര്‍ ജനറലിനെ കൂടി കേട്ട ശേഷം പരിഗണിക്കാമെന്ന് സുപ്രീംകോടതി അറിയിച്ചു.

അതിനിടെ നാളെ ഉച്ചതിരിഞ്ഞ് സുപ്രീംകോടതി ചീഫ് ജസ്റ്റീസുമായി ഇന്ത്യാസഖ്യം നേതാക്കള്‍ കൂടിക്കാഴ്ച നടത്തും. പ്രധാനമന്ത്രിയും ആഭ്യന്തരമന്ത്രിയും രാജ്യത്ത് സൃഷ്ടിച്ച സംഘര്‍ഷസാഹചര്യം ചീഫ് ജസ്റ്റിസിനെ അറിയിക്കുമെന്ന് എഐസിസി അധ്യക്ഷന്‍ മല്ലികാര്‍ജുന്‍ ഖര്‍ഗെ വ്യക്തമാക്കി. ജനാധിപത്യസംരക്ഷണത്തിനും ഭരണഘടനാ അവകാശങ്ങള്‍ക്കുമായുള്ള പോരാട്ടം തുടരുമെന്നും മല്ലികാര്‍ജുന്‍ ഖര്‍ഗെ പ്രസ്താവനയില്‍ പറഞ്ഞു.

ആസൂത്രണ ബോര്‍ഡിലെ പരീക്ഷ അട്ടിമറിയില്‍ പി എസ് സി ക്കെതിരെ ക്രൈംബ്രാഞ്ച്. 10 ചോദ്യങ്ങളുടെ ഉത്തരങ്ങള്‍ മൂല്യനിര്‍ണയം നടത്താത്തത് ക്ലറിക്കല്‍ വീഴ്ച അല്ലെന്നും അതു ബോധപൂര്‍വ്വമാണെന്നും ക്രൈം ബ്രാഞ്ച് ചൂണ്ടിക്കാട്ടി. എഫ് ഐ ആര്‍ റദ്ദാക്കാന്‍ പി എസ് സി കോടതിയെ സമീപിച്ചത് ദുരൂഹമാണ്. പി എസ് സി ചെയര്‍മാനും അംഗങ്ങളും അടങ്ങുന്ന പ്രതികളെ രക്ഷിക്കാനാണ് നീക്കം നടക്കുന്നതെന്നും ഹൈക്കോടതിയില്‍ ക്രൈംബ്രാഞ്ച് നല്‍കിയ റിപ്പോര്‍ട്ടിലുണ്ട്.

ആസൂത്രണ ബോര്‍ഡിലെ പരീക്ഷയിലെ ആദ്യ ഒന്നാം റാങ്കുകാരന്‍ അരുണ്‍ ജെ പ്രതാപന്‍ 10 ചോദ്യങ്ങള്‍ക്ക് അപൂര്‍ണ്ണമായ ഉത്തരമാണ് നല്‍കിയത്. ഈ ഉത്തരങ്ങള്‍ പരിശോധിക്കാതിരുന്നത് ബോധപൂര്‍വം എന്ന് കരുതണം. മാര്‍ക്ക് ഷീറ്റ് പരാതിക്കാര്‍ക്ക് കൈമാറാന്‍ ഉണ്ടായ കാലതാമസവും സംശയസ്പദമാണ്. ജയലാല്‍ എന്ന ഉദ്യോഗാര്‍ത്ഥി 2025 ജൂണ്‍ 11ന് ഉത്തര കടലാസിനായി അപേക്ഷ നല്‍കി. പി എസ് സി മറുപടി നല്‍കിയത് ഒരു വര്‍ഷത്തിന് ശേഷം 2026 ജൂണ്‍ 18 നായിരുന്നു. മനപ്പൂര്‍വമുള്ള വൈകിപ്പിക്കല്‍ ആണ് പി എസ്. സി നടത്തിയത്.

സംസ്ഥാന വനിതാ കമ്മീഷനില്‍ സാമ്പത്തിക ക്രമക്കേട് നടന്നതായി വിജിലന്‍സ് കണ്ടെത്തല്‍. കഴിഞ്ഞ ദിവസം വിജിലന്‍സ് നടത്തിയ പരിശോധനയിലാണ് ക്രമക്കേട് പുറത്തുവന്നത്. സിറ്റിംഗ് നടത്തിയതില്‍ അടക്കം കഴിഞ്ഞ സര്‍ക്കാരിന്റെ കാലത്ത് തുക അധികമായി എഴുതിയെടുത്തു എന്നാണ് കണ്ടെത്തല്‍. വിജിലന്‍സ് കണ്ടെത്തിയ പല ബില്ലുകളിലും വൈരുദ്ധ്യമുണ്ട്. 2022 മുതല്‍ 2025 വരെയുള്ള കാലയളവിലെ രേഖകളാണ് വിജിലന്‍സ് പരിശോധിച്ചത്.

വനിതാ കമ്മീഷന്‍ സംഘടിപ്പിച്ച വിവിധ പരിപാടികള്‍, സിറ്റിങ്ങുകള്‍ ഇതുമായി ബന്ധപ്പെട്ട രേഖകളും ബില്ലുകളും വിജിലന്‍സ് ശേഖരിച്ചു. 5000 രൂപയില്‍ താഴെ മാത്രം ചിലവ് വരുന്ന പരിപാടികള്‍ക്ക് മുപ്പതിനായിരം രൂപയിലധികാണ് എഴുതിയെടുത്തത്. വിശദമായ പരിശോധന വീണ്ടും നടത്തണമെന്ന് വിജിലന്‍സ് ആവശ്യപ്പെട്ടു.

കഴിഞ്ഞ സര്‍ക്കാരിന്റെ കാലത്ത് വനിതാ കമ്മീഷന്‍ സജീവമായി വിവിധ പരിപാടികള്‍ സംഘടിപ്പിച്ചിരുന്നു. ഈ പരിപാടികളുടെ ഭാഗമായാണ് സാമ്പത്തിക ക്രമക്കേട് നടന്നിട്ടുണ്ടെന്ന് വിജിലന്‍സ് കണ്ടെത്തിയിരിക്കുന്നത്. പി സതീദേവി അധ്യക്ഷയായിരുന്ന കാലത്താണ് ഈ ക്രമക്കേടുകള്‍ നടന്നിരിക്കുന്നത്. വരും ദിവസങ്ങളില്‍ വിശദമായ അന്വേഷണം വിജിലന്‍സിന്റെ ഭാ?ഗത്ത് നിന്നുണ്ടായേക്കാം.

എറണാകുളം: നെടുമ്പാശ്ശേരിയില്‍ വാഹനാപകടത്തില്‍ മൂന്ന് പേര്‍ക്ക് ദാരുണാന്ത്യം. മിനി കൂപ്പര്‍ ഇടിച്ചാണ് അപകടം ഉണ്ടായത്. സ്‌കൂട്ടര്‍ യാത്രികരായ രണ്ട് യുവതികളും ഒരു യുവാവും ആണ് മരിച്ചത്. വയനാട് സ്വദേശിനി ദേവിക (21), പാലക്കാട് സ്വദേശിനി ഗോപിക(22), സൗത്ത് കര്‍ണാടക സ്വദേശി ഇയാസ് (21) എന്നിവരാണ് മരിച്ചത്. പുലര്‍ച്ചെ 2 മണിയോടെ ആയിരുന്നു അപകടം. സംഭവത്തെ തുടര്‍ന്ന് രക്ഷപ്പെടാന്‍ ശ്രമിച്ച ഡ്രൈവറെ നാട്ടുകാര്‍ പിടികൂടി. ഡ്രൈവര്‍ സുഹൈല്‍ സജീവ് ആണ് പിടിയില്‍ ആയത്. ഇയാള്‍ ലഹരി ഉപയോഗിച്ചിരുന്നതായി സംശയമുണ്ട്. രാജഗിരിയില്‍ ബികോം വിദ്യാര്‍ത്ഥിയാണ്. അപകടത്തില്‍പ്പെട്ട മിനി കൂപ്പര്‍ നെടുമ്പാശേരി സ്റ്റേഷനിലേക്ക് മാറ്റി.

രോഗികള്‍ക്കും കൂട്ടിരിപ്പുകാര്‍ക്കും ഭക്ഷണം നല്‍കാനുള്ള ആദ്യ കമ്മ്യൂണിറ്റി കിച്ചന്റെ പ്രവര്‍ത്തനം ആലപ്പുഴ മെഡിക്കല്‍ കോളേജില്‍ അടുത്ത വര്‍ഷം ജനുവരിയില്‍ തുടങ്ങുമെന്ന് ആരോഗ്യ മന്ത്രി കെ മുരളീധരന്‍. കമ്മ്യൂണിറ്റി കിച്ചന്‍ തുടങ്ങിയ ശേഷം സ്വകാര്യ സംഘടനകളുടെ ഭക്ഷണവിതരണം മെഡിക്കല്‍ കോളേജ് ക്യാമ്പസിന് പുറത്താകും നടത്തുകയെന്നും മന്ത്രി പ്രഖ്യാപിച്ചു. അധികാരത്തിലേറിയതിന് ശേഷം മന്ത്രി മുരളീധരന്റെ പ്രഖ്യാപനമായിരുന്നു ആശുപത്രികളിലെ കമ്മ്യൂണിറ്റി കിച്ചന്‍. ആശുപത്രികളില്‍ ഇടത് യുവജന സംഘടന പൊതിച്ചോര്‍ വിതരണം ചെയ്യുന്നതുമായി ബന്ധപ്പെട്ടായിരുന്നു മന്ത്രിയുടെ പ്രസ്താവന. ആശുപത്രിക്കുള്ളില്‍ കൊടിയും വെച്ച് ഭക്ഷണ വിതരണം നടത്താന്‍ അനുവദിക്കില്ലെന്നായിരുന്നു മന്ത്രിയുടെ പ്രസ്താവന.

മെഡിക്കല്‍ കോളേജില്‍ ചികിത്സയില്‍ കഴിയുന്ന രോഗികള്‍ക്കും അവരുടെ കൂട്ടിരിപ്പുകാര്‍ക്കും വൃത്തിയുള്ളതും ഗുണനിലവാരമുള്ളതുമായ ഭക്ഷണം സൗജന്യമായോ കുറഞ്ഞ നിരക്കിലോ കൃത്യമായി ലഭ്യമാക്കുക എന്നതാണ് ഈ പദ്ധതിയുടെ പ്രാഥമിക ലക്ഷ്യമെന്ന് സര്‍ക്കാര്‍ പറയുന്നു.

നിലവില്‍ വിവിധ സന്നദ്ധ-സ്വകാര്യ സംഘടനകള്‍, വ്യക്തികള്‍ എന്നിവര്‍ മെഡിക്കല്‍ കോളേജ് ക്യാമ്പസിനുള്ളില്‍ കയറി നേരിട്ട് ആഹാരം വിതരണം ചെയ്യാറുണ്ട്. എന്നാല്‍ കമ്മ്യൂണിറ്റി കിച്ചന്‍ പ്രവര്‍ത്തനം തുടങ്ങുന്നതോടെ, ക്യാമ്പസിനുള്ളിലെ സ്വകാര്യ സംഘടനകളുടെ ഇത്തരം ഭക്ഷണവിതരണം നിര്‍ത്തിവെക്കും. സ്വകാര്യ സംഘടനകള്‍ക്ക് ഭക്ഷണം വിതരണം ചെയ്യണമെങ്കില്‍ അത് മെഡിക്കല്‍ കോളേജ് ക്യാമ്പസിന് പുറത്ത് വെച്ച് മാത്രമേ അനുവദിക്കൂ. ആശുപത്രി ക്യാമ്പസിനുള്ളിലെ തിരക്ക്, മാലിന്യപ്രശ്‌നങ്ങള്‍, ശുചിത്വമില്ലായ്മ എന്നിവ ഒഴിവാക്കാനാണ് കമ്മ്യൂണിറ്റി കിച്ചനെന്നും പറയുന്നു.

ഡല്‍ഹിയിലെ പ്രതിപക്ഷ നേതാവിന്റെ അറസ്റ്റില്‍ അന്വേഷണത്തിന് ചീഫ് സെക്രട്ടറിയെ ചുമതലപ്പെടുത്തി. മുഖ്യമന്ത്രിയാണ് അന്വേഷണത്തിന് നിര്‍ദ്ദേശം നല്‍കിയത്. കസ്റ്റഡിയിലെടുത്ത ശേഷമുള്ള കാര്യങ്ങളാണ് അന്വേഷിക്കുക. ഡല്‍ഹിയിലെ റസിഡന്റ് കമ്മീഷണറുമായി ബന്ധപ്പെട്ട് അന്വേഷണം നടത്താനാണ് നിര്‍ദ്ദേശം.

റെസിഡന്‍സ് കമ്മീഷണറുമായി ബന്ധപ്പെടാനും ഇടപെടാനും മുഖ്യമന്ത്രി നിര്‍ദ്ദേശം നല്‍കി. പിണറായിയെ കസ്റ്റഡിയിലെടുത്ത പൊലീസ് മൂന്നര മണിക്കൂറോളം വാഹനത്തില്‍ വട്ടംകറക്കിയതിനെ തുടര്‍ന്ന് അദ്ദേഹത്തിന് ശാരീരിക അസ്വസ്ഥത അനുഭവപ്പെട്ടെന്ന റിപ്പോര്‍ട്ടുകള്‍ക്ക് പിന്നാലെയാണ് മുഖ്യമന്ത്രിയുടെ ഇടപെടലുണ്ടായത്.

രാവിലെ പതിനൊന്ന് മണിയോടെ പിണറായിയടക്കമുള്ളവരെ കസ്റ്റഡിയിലെടുത്ത പൊലീസ് മൂന്നര മണിക്കൂറിന് ശേഷമാണ് മന്ദിര്‍ മാര്‍ഗ് പൊലീസ് സ്റ്റേഷനിലെത്തിച്ചത്. പിണറായിക്കൊപ്പം വാഹനത്തിലുണ്ടായിരുന്ന കെ എന്‍ ബാലഗോപാല്‍, ജോണ്‍ ബ്രിട്ടാസ് എന്നിവര്‍ പ്രതിഷേധിച്ചെങ്കിലും ഡല്‍ഹി പൊലീസ് അവഗണന തുടരുകയായിരുന്നു. പിണറായിയുടെ ഭക്ഷണവും മരുന്നുമടക്കം മുടങ്ങിയെന്ന് ഒപ്പമുള്ള നേതാക്കള്‍ ലൈവ് വീഡിയോയിലൂടെ വ്യക്തമാക്കുകയും ചെയ്തു.

പ്രായമായ ഒരു നേതാവിനോട് തികച്ചും മോശമായാണ് പെരുമാറിയതെന്നും നേതാക്കള്‍ ചൂണ്ടിക്കാട്ടി. നേരത്തെ സി പി എം ജനറല്‍ സെക്രട്ടറി എം എ ബേബി, സിപിഐഎം സംസ്ഥാന സെക്രട്ടറി എം വി ഗോവിന്ദന്‍, പി കെ ശ്രീമതി, കെ കെ ശൈലജ അടക്കമുള്ള നേതാക്കളെയും ഡല്‍ഹി പൊലീസ് കസ്റ്റഡിയിലെടുത്തിരുന്നു. കേരള ഹൗസില്‍ നിന്ന് മാര്‍ച്ചിന് ഒരുങ്ങുന്നതിനിടെയായിരുന്നു നടപടി. സി പി എം പിബി അംഗം വിജു കൃഷ്ണന്‍, സി ഐ ടി യു നേതാക്കള്‍, എസ് എഫ് ഐ ദേശീയ അധ്യക്ഷന്‍ ആദര്‍ശ് സജി എന്നിവരെയും കസ്റ്റഡിയിലെടുത്ത് നീക്കി.

സര്‍ക്കാര്‍ ഓഫീസുകളുടെ പ്രവര്‍ത്തി ദിവസങ്ങള്‍ അഞ്ച് ആക്കണമെന്ന ആവശ്യമുന്നയിച്ച് സര്‍വീസ് സംഘടനകളുടെ യോഗം ഈ മാസം 17ന് നടത്തും. പൊതുഭരണ വകുപ്പ് പ്രിന്‍സിപ്പല്‍ സെക്രട്ടറിയാണ് യോഗം വിളിച്ചത്. അടുത്ത ശനിയാഴ്ച്ച രാവിലെ 11 മണിക്ക് ഓണ്‍ലൈനായാണ് യോഗം. ഞായറാഴ്ച്ചക്ക് പുറമേ ശനിയാഴ്ച കൂടി അവധി നല്‍കാനാണ് നീക്കം. ശനിയാഴ്ച അവധി നല്‍കുന്നതിനെ വിവിധ സംഘടനകള്‍ സ്വാഗതം ചെയ്തു. എന്നാല്‍ നിലവിലുള്ള പൊതു അവധികളും കാഷ്വല്‍ ലീവുകളും ചുരുക്കുന്നതിനെ ചില സംഘടനകള്‍ എതിര്‍ത്തിട്ടുണ്ട്. സംഘടനകളുടെ അഭിപ്രായങ്ങള്‍ ഈ മാസം 12നകം അറിയിക്കാന്‍ നിര്‍ദ്ദേശം നല്‍കി.

ഭരണം കാര്യക്ഷമാക്കുന്നതിനും ജീവനക്കാരുടെ ക്ഷേമം ഉറപ്പാക്കുന്നതിനുമായാണ് ആഴ്ചയില്‍ അഞ്ച് പ്രവര്‍ത്തി ദിവസം, രണ്ട് അവധി ദിനം എന്ന നിര്‍ദേശം സര്‍ക്കാര്‍ നടപ്പാക്കാനാലോചിക്കുന്നത്. കഴിഞ്ഞ ശമ്പള പരിഷ്‌ക്കരണ കമ്മീഷനും വി എസ് അച്യുതാനന്ദന്‍ ഭരണപരിഷ്‌ക്കാര കമ്മീഷന്‍ ചെയര്‍മാനായിരിക്കെ സമര്‍പ്പിച്ച റിപ്പോര്‍ട്ടിലും ഇക്കാര്യം നിര്‍ദേശിച്ചിരുന്നു. ചീഫ് സെക്രട്ടറി വിളിച്ചിരിക്കുന്ന ഓണ്‍ലൈന്‍ യോഗത്തില്‍ സര്‍വീസ് സംഘടകള്‍ ഉള്‍പ്പെടെ പങ്കെടുക്കും. അഞ്ച് പ്രവര്‍ത്തി ദിവസങ്ങള്‍ എന്നതിനോട് ഇടതുസംഘടനകള്‍ക്കും വലതു സംഘടനകള്‍ക്കും യോജിപ്പാണ്. ജീവനക്കാരുടെ ലീവ് ഉള്‍പ്പടെ അവകാശങ്ങള്‍ ഹനിക്കരുതെന്ന് ജോയിന്റ് കൗണ്‍സില്‍ ജനറല്‍ സെക്രട്ടറി കെ പി ഗോപകുമാര്‍ പ്രതികരിച്ചു.

അതേസമയം, പ്രവര്‍ത്തി ദിവസങ്ങള്‍ അഞ്ചാക്കി കുറച്ചാല്‍ ജനങ്ങള്‍ക്ക് സേവനം കിട്ടേണ്ട ദിവസങ്ങള്‍ കുറയുമെന്ന വിമര്‍ശനവും ഉയരുന്നുണ്ട്. ആഴ്ചയില്‍ അവധി ദിനം രണ്ടാക്കുന്നതോടെ ലീവുകള്‍ വെട്ടിക്കുറയ്ക്കപ്പെടുന്ന നിര്‍ദേശത്തോട് സര്‍വീസ് സംഘടനകള്‍ യോജിച്ചേക്കില്ല.

ഡല്‍ഹിയില്‍ സിപിഐഎം നേതാക്കളെ കൂട്ടത്തോടെ കസ്റ്റഡിയിലെടുത്തു

ഡല്‍ഹിയില്‍ പൊലീസ് നടപടി. കേരളത്തിലെ സിപിഐഎം നേതാക്കളെ പൊലീസ് കൂട്ടത്തോടെ കസ്റ്റഡിയിലെടുത്തു. പ്രതിപക്ഷ നേതാവ് പിണറായി വിജയന്‍ ഉള്‍പ്പെടെയുള്ള നേതാക്കളെയാണ് കസ്റ്റഡിയിലെടുത്തത്. എം.എ ബേബി, ഇ.പി ജയരാജന്‍, എം.വി ഗോവിന്ദന്‍, കെ.കെ ശൈലജ, പി.കെ ശ്രീമതി, കെ.എന്‍ ബാലഗോപാല്‍, ജോണ്‍ ബ്രിട്ടാസ് എംപി തുടങ്ങിയ നേതാക്കളെയും പൊലീസ് കസ്റ്റഡിയിലെടുത്തിട്ടുണ്ട്. കേരള ഹൗസില്‍ നിന്ന് മാര്‍ച്ചിന് തയ്യാറെടുക്കുന്നതിനിടെയായിരുന്നു പൊലീസ് നടപടി.

ഗ്യാനേഷ് കുമാറിന്റെ രാജിയ്ക്ക് വേണ്ടിയുള്ള പ്രതിഷേധമാണിതെന്ന് പിണറായി വിജയന്‍ പറഞ്ഞു. ജനാധിപത്യത്തിനോടുള്ള വെല്ലുവിളിയാണിത്. ഗ്യാനേഷ് കുമാര്‍ ജനാധിപത്യ അവകാശങ്ങള്‍ നിഷേധിച്ചു. ജനങ്ങളുടെ വോട്ടവകാശം ഇല്ലാതാക്കാനുള്ള ശ്രമം നടന്നു. 13 കോടിയോളം ആളുകളുടെ വോട്ടവകാശം നിഷേധിച്ചത് കേന്ദ്രത്തിന്റെ താത്പ്പര്യത്തിന് വേണ്ടിയാണ്. കേന്ദ്രം ഗ്യാനേഷ് കുമാറിനെ സംരക്ഷിക്കാന്‍ വഴി വിട്ട നീക്കങ്ങള്‍ നടത്തുകയാണെന്നും പിണറായി വിജയന്‍ വ്യക്തമാക്കി.

കേരളത്തിലെ സാഹചര്യവുമായി എസ്‌ഐആറിന് ബന്ധമുണ്ടോയെന്ന ചോദ്യത്തിന് എസ്‌ഐആര്‍ നടപ്പാക്കിയ എല്ലായിടത്തും അതിന്റെ പ്രത്യാഘാതം ഉണ്ടായിട്ടുണ്ടെന്ന് പിണറായി വിജയന്‍ പറഞ്ഞു. രാജ്യതലസ്ഥാനത്ത് എന്തിന് ഇങ്ങനെയൊരു അവസ്ഥ കേന്ദ്രം ഉണ്ടാക്കുന്നുവെന്ന് അദ്ദേഹം ചോദിച്ചു. സുപ്രീം കോടതി ഉള്‍പ്പെടെ പ്രതിഷേധിക്കാനുള്ള അവകാശം ഹനിക്കരുതെന്ന് വ്യക്തമാക്കിയിട്ടുണ്ടെന്നും ജനാധിപത്യത്തിനോട് ബഹുമാനമില്ലാത്തവരാണ് കേന്ദ്രത്തിലുള്ളതെന്നും അദ്ദേഹം വിമര്‍ശിച്ചു.

സംസ്ഥാനത്ത് ശക്തമായ മഴ തുടരാന്‍ സാധ്യത. അടുത്ത മൂന്ന് മണിക്കൂര്‍ മഴയ്ക്ക് സാധ്യത. കോഴിക്കോട്, കണ്ണൂര്‍, കാസര്‍ഗോഡ് ജില്ലകളില്‍ ഇടിമിന്നലോട് കൂടിയ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്‍കി. തിരുവനന്തപുരം, കൊല്ലം, ആലപ്പുഴ, മലപ്പുറം, വയനാട് ജില്ലകളിലും ഒറ്റപ്പെട്ട ഇടങ്ങളില്‍ നേരിയ മഴയ്ക്ക് സാധ്യതയുണ്ട്. മഴയോടൊപ്പം ശക്തമായ കാറ്റിനും ഇടിമിന്നലിനും സാധ്യതയുണ്ട്. നാളെയോടെ സംസ്ഥാനത്ത് മഴയുടെ ശക്തി കുറയും എന്നാണ് കാലാവസ്ഥ നിരീക്ഷണ കേന്ദ്രം അറിയിക്കുന്നത്.

ഒക്ടോബര്‍ 11,12,13 തീയതികളില്‍ ഇടിമിന്നലോട് കൂടിയ മഴയ്ക്കും മണിക്കൂറില്‍ 30-40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.

കെഎസ്ഇബി മീറ്റര്‍ റീഡര്‍മാരുടെ സമരം പിന്‍വലിക്കാന്‍ ധാരണയായി. വൈദ്യുതി മന്ത്രിയുമായി നടത്തിയ ചര്‍ച്ചയിലാണ് തീരുമാനം.സമരത്തെ തുടര്‍ന്ന് പുറത്താക്കിയ മീറ്റര്‍ റീഡര്‍മാരെ തിരികെ ജോലിയില്‍ പ്രവേശിപ്പിക്കും. മീറ്റര്‍ റീഡര്‍മാര്‍ ഉന്നയിച്ച പ്രശ്‌നങ്ങള്‍ വിശദമായി ചര്‍ച്ച ചെയ്യാന്‍ അടുത്ത വ്യാഴാഴ്ച വീണ്ടും യോഗം ചേരും.സമരം താല്‍ക്കാലികമായി പിന്‍വലിച്ചെന്ന് സമരക്കാര്‍ വ്യക്തമാക്കി.

വ്യാഴാഴ്ചയിലെ ചര്‍ച്ചയില്‍ ആവശ്യങ്ങള്‍ അംഗീകരിച്ചില്ലെങ്കില്‍ സമരം തുടരും. സമരം കാരണം മീറ്റര്‍ റീഡിങ് തടസപ്പെട്ടതോടെയാണ് സമവായനീക്കം.സമരം കനത്തതോടെ റീഡിങ് മിഷന്‍ ഉള്‍പ്പെടെ കെഎസ്ഇബി തിരികെ വാങ്ങിയിരുന്നു. മെഷീന്‍ തിരികെ നല്‍കാത്തവര്‍ക്കെതിരെ പോലീസ് നടപടിയെടുക്കാനും കെഎസ്ഇബി തീരുമാനിച്ചിരുന്നു.