latest news

അമേരിക്കന്‍ പൗരത്വമുള്ള നടന്‍ ഇമ്രാന്‍ഖാന് രാജ്യം വിടാന്‍ നോട്ടീസ് നല്‍കി മുംബൈ പൊലീസ്. മുംബൈയിലെ പ്രതിഷേധ പരിപാടിയില്‍ പങ്കെടുത്തതിനെ തുടര്‍ന്നാണ് നടപടി. ഒക്ടോബര്‍ 28 നകം രാജ്യം വിടണമെന്നാണ് നിര്‍ദേശം. ഓവര്‍സീസ് സിറ്റിസണ്‍ ഓഫ് ഇന്ത്യ പദവിയുള്ള ഇമ്രാന്‍ ഖാന്‍, മുംബൈ സെന്‍ട്രലിലെ ആഗസ്റ്റ് ക്രാന്തി മൈതാനത്ത് സിജെപിയെ പിന്തുണച്ചുകൊണ്ടുള്ള പ്രതിഷേധ പരിപാടിയില്‍ പങ്കെടുത്തുവെന്ന് ബിജെപി നേതാവ് കിരിത് സോമയ്യ പരാതിപ്പെട്ടതിനെ തുടര്‍ന്നാണ് ഈ നടപടി.

എസ്‌ഐആര്‍ പ്രക്രിയയില്‍ ക്രമക്കേടുകള്‍ നടന്നെന്നാരോപിച്ച് മുഖ്യ തിരഞ്ഞെടുപ്പ് കമ്മീഷണര്‍ ?ഗ്യാനേഷ് കുമാര്‍ രാജിവയ്ക്കണമെന്ന് ആവശ്യപ്പെട്ട് നടന്ന പ്രതിഷേധത്തിനിടെ, നടനെയും അദ്ദേഹത്തിന്റെ സുഹൃത്ത് ലേഖ വാഷിംഗ്ടണ്‍, അമ്മ നുസ്രത്ത്, അനന്തരവള്‍ സെയ്ന്‍ എന്നിവരെയും മറ്റ് 400 പേര്‍ക്കൊപ്പം പൊലീസ് കസ്റ്റഡിയിലെടുത്തിരുന്നു. പൊലീസ് കൈയേറ്റം ചെയ്തുവെന്ന് ആരോപിച്ച് സെയ്ന്‍ ഒരു വീഡിയോ പങ്കുവെച്ചിരുന്നു. കസ്റ്റഡിയില്‍ ഇരിക്കുമ്പോള്‍ തനിക്കുണ്ടായ പരിക്കുകളും വീഡിയോയില്‍ കാണിച്ചിരുന്നു.

പ്രതിഷേധ പരിപാടിക്കിടയില്‍, പ്രത്യേക ആവശ്യങ്ങളൊന്നും ഉന്നയിച്ചുകൊണ്ടല്ല താന്‍ അവിടെ എത്തിയതെന്നും, മറിച്ച് മുംബൈയില്‍ താമസിക്കുന്ന ഒരാള്‍ എന്ന നിലയിലാണ് താന്‍ പങ്കെടുത്തതെന്നും ഇമ്രാന്‍ ഖാന്‍ വ്യക്തമാക്കിയിരുന്നു. താന്‍ ഒരു സംഘടനയുമായും ബന്ധപ്പെട്ടിട്ടില്ലെന്നും, വ്യക്തിപരമായ നിലയിലാണ് പങ്കെടുക്കുന്നതെന്നും അദ്ദേഹം കൂട്ടിച്ചേര്‍ത്തു.

ഹിന്ദുമതത്തില്‍ നിന്ന് ഇസ്ലാം മതത്തിലേക്ക് പരിവര്‍ത്തനം ചെയ്ത വ്യക്തിക്ക് മതം മാറിയെന്ന കാരണത്തില്‍ മാത്രം പിന്നോക്ക വിഭാഗക്കാര്‍ക്കുള്ള സംവരണ ആനുകൂല്യങ്ങള്‍ക്ക് അര്‍ഹതയുണ്ടാവില്ലെന്ന് സുപ്രീം കോടതി. തമിഴ്നാട് സര്‍ക്കാരും സ്വകാര്യ വ്യക്തിയും നല്‍കിയ ഹര്‍ജികള്‍ തള്ളിക്കൊണ്ടാണ് സുപ്രീം കോടതിയുടെ ഉത്തരവ്. മുന്‍പ് മദ്രാസ് ഹൈക്കോടതി പുറപ്പെടുവിച്ച വിധി സുപ്രീം കോടതി പൂര്‍ണ്ണമായും ശരിവെച്ചു.

മതപരിവര്‍ത്തനം നടത്തുന്നതിലൂടെ ഒരു വ്യക്തിയുടെ മുന്‍കാല സാമൂഹികമോ സാമ്പത്തികമോ ആയ പിന്നാക്കാവസ്ഥ സ്വഭാവികമായി പുതിയ മതത്തിലെ പിന്നാക്ക വിഭാഗത്തിലേക്ക് കൈമാറ്റം ചെയ്യപ്പെടില്ലെന്ന് കോടതി നിരീക്ഷിച്ചു. നിയമപരമായ അടിസ്ഥാനമില്ലാതെ, കേവലം മതം മാറ്റത്തിന്റെ മാത്രം പേരില്‍ ഒരു വിഭാഗത്തിന് സംവരണം നല്‍കുന്നത് സമൂഹത്തില്‍ ഭിന്നതയ്ക്ക് കാരണമാകുമെന്നും കോടതി വ്യക്തമാക്കി. 2015-ല്‍ ഹിന്ദുമതത്തില്‍ നിന്ന് ഇസ്ലാമിലേക്ക് മാറുകയും 2016-ല്‍ ഗസറ്റ് വിജ്ഞാപനം വഴി സമീര്‍ അഹമ്മദ് എന്ന് പേര് മാറ്റുകയും ചെയ്ത വ്യക്തിക്ക് തമിഴ്നാട് സര്‍ക്കാര്‍ സംവരണ ആനുകൂല്യം നല്‍കിയ ഉത്തരവ് ചോദ്യം ചെയ്തുള്ളതായിരുന്നു ഹര്‍ജി. ഇതില്‍ മദ്രാസ് ഹൈക്കോടതി ഹര്‍ജിക്കാരുടെ വാദം ശരിവെച്ചതോടെയാണ് തമിഴ്നാട് സര്‍ക്കാരും ആനുകൂല്യം ലഭിച്ച വ്യക്തിയും സുപ്രീം കോടതിയെ സമീപിച്ചത്. പിന്നാക്ക സമുദായങ്ങളുടെ പട്ടികയില്‍ മാറ്റം വരുത്താനോ പുതിയ വിഭാഗങ്ങളെ ഉള്‍പ്പെടുത്താനോ സര്‍ക്കാര്‍ നിയമപരമായ മാര്‍ഗ്ഗനിര്‍ദ്ദേശങ്ങള്‍ പാലിക്കേണ്ടതുണ്ടെന്നും വിജ്ഞാപനത്തിലൂടെ അത് നടപ്പിലാക്കാനാകില്ലെന്നും കോടതി ചൂണ്ടിക്കാട്ടി.

നെടുമ്പാശ്ശേരി മിനി കൂപ്പര്‍ അപകടത്തിലെ മുഖ്യപ്രതി സുഹൈലുമായി പൊലീസ് തെളിവെടുപ്പ് നടത്തി. അപകടം ഉണ്ടായ എയര്‍പോര്‍ട്ട് റോഡിലും മദ്യപിച്ച ബാറുകളിലുമാണ് പ്രതിയെ എത്തിച്ചത്. ഇന്ന് വൈകിട്ട് അഞ്ചുമണി വരെയാണ് പ്രതികളെ പൊലീസ് കസ്റ്റഡിയില്‍ വിട്ടിരിക്കുന്നത്.

കേസിലെ മുഖ്യപ്രതി സുഹൈലിനെ മാത്രമാണ് തെളിവെടുപ്പിനായി കൊണ്ടുവന്നത്. ആദ്യം മൂന്ന് ജീവനുകള്‍ ഇടിച്ചുതെറിപ്പിച്ച എയര്‍പോര്‍ട്ട് റോഡിലേക്കാണ് കൊണ്ടുപോയത്. എന്നാല്‍ അപകടമുണ്ടായ സ്ഥലത്ത് സുഹൈലിനെ വാഹനത്തില്‍ നിന്ന് ഇറക്കിയില്ല. അപകടമുണ്ടായ സ്ഥലവും, പിന്നീട് വാഹനം നിര്‍ത്തിയ സ്ഥലവും സുഹൈല്‍ അന്വേഷണ സംഘത്തിന് ചൂണ്ടിക്കാണിച്ചു കൊടുത്തു. ആളുകള്‍ കൂടിയതോടെ ക്രമസമാധാന പ്രശ്‌നം ഉണ്ടായേക്കാം എന്ന് കണക്കാക്കിയാണ് പ്രതിയെ പുറത്തിറക്കാതിരുന്നത്. അതിവേഗം തെളിവെടുപ്പ് പൂര്‍ത്തിയാക്കി പിന്നീട് നെടുമ്പാശ്ശേരിയിലെ ബാറിലേക്ക് കൊണ്ടുപോയി. പ്രതികള്‍ അപകടത്തിന് മുമ്പ് അവസാനമായി മദ്യപിച്ചത് ഈ ബാറില്‍ വെച്ചായിരുന്നു. ബാറിലെ തെളിവെടുപ്പ് ഏറെനേരം തുടര്‍ന്നു. മറ്റ് ബാറുകളിലും തെളിവെടുപ്പ് നടത്തും.

പ്രായ പരിധി തികയാത്ത സുഹൈലിനും സുഹൃത്തുക്കള്‍ക്കും മദ്യം നല്‍കിയതില്‍ ബാറുകളുടെ ലൈസന്‍സ് സസ്‌പെന്‍ഡ് ചെയ്തിട്ടുണ്ട്. ഇന്ന് വൈകിട്ട് 5 മണി വരെയാണ് പ്രതികളെ പൊലീസ് കസ്റ്റഡിയില്‍ വിട്ടിരിക്കുന്നത്. അതിനുമുമ്പ് പരമാവധി വിവരങ്ങള്‍ ശേഖരിക്കാനുള്ള ശ്രമത്തിലാണ് ഉദ്യോഗസ്ഥര്‍.

പിഎം ശ്രീയുമായി ബന്ധപ്പെട്ട ചോദ്യങ്ങള്‍ക്ക് നിയമസഭയില്‍ മറുപടി നല്‍കി വിദ്യാഭ്യാസ മന്ത്രി എന്‍ ഷംസുദ്ദീന്‍. ഏകപക്ഷീയമായി സര്‍ക്കാരിന് പിന്‍മാറാനാകില്ലെന്നും ഭാവിനടപടികള്‍ മന്ത്രിസഭ ഉപസമിതിയുടെ റിപ്പോര്‍ട്ട് അനുസരിച്ചായിരിക്കുമെന്നും മന്ത്രി വ്യക്തമാക്കി. പിഎം ശ്രീ നടപ്പാക്കാത്തതിനാല്‍ കേന്ദ്രവിഹിതം തടയുന്നു. ഇതുവരെ കിട്ടാനുള്ളത് 1607 കോടി രൂപയാണെന്നും മന്ത്രി വ്യക്തമാക്കി.

സാമൂഹിക സുരക്ഷാ പെന്‍ഷന്‍ പദ്ധതികളുടെ പേര് മാറ്റി കേന്ദ്ര സര്‍ക്കാര്‍. മുന്‍ പ്രധാനമന്ത്രി ഇന്ദിരാ ഗാന്ധിയുടെ പേരിലുള്ള പെന്‍ഷന്‍ പദ്ധതികളുടെ പേരുകളാണ് മാറ്റിയത്. ഇന്ദിരാഗാന്ധിക്ക് പകരം പ്രധാനമന്ത്രി എന്ന് ചേര്‍ത്താണ് പേരുകള്‍ മാറ്റിയിരിക്കുന്നത്. പദ്ധതികള്‍ 2030-31 സാമ്പത്തിക വര്‍ഷം വരെ നീട്ടാന്‍ മന്ത്രിസഭാ അനുമതി നല്‍കി. ഇന്ദിരാഗാന്ധി ദേശീയ വാര്‍ധക്യ പെന്‍ഷന്‍ പദ്ധതി അടക്കമുള്ള പദ്ധതികളുടെ പേരുകളാണ് കേന്ദ്രം മാറ്റിയിരിക്കുന്നത്.

ഇന്ദിരാഗാന്ധി ദേശീയ വാര്‍ധക്യ പെന്‍ഷന്‍ പദ്ധതി ഇനി ‘പ്രധാനമന്ത്രി വൃദ്ധാവസ്ഥ പെന്‍ഷന്‍ യോജന’ എന്ന പേരിലാകും അറിയപ്പെടുക. കൂടാതെ ഇന്ദിരാഗാന്ധി വിധവാ പെന്‍ഷന്‍ പദ്ധതി ഇനി ‘പ്രധാനമന്ത്രി വിധവാ പെന്‍ഷന്‍ യോജന’ എന്നും, ഇന്ദിരാഗാന്ധി ഭിന്നശേഷി പെന്‍ഷന്‍ പദ്ധതി ‘പ്രധാനമന്ത്രി ദിവ്യാംഗ്ജന്‍ പെന്‍ഷന്‍ യോജന എന്നും പുനര്‍നാമകരണം ചെയ്തു. ദേശീയ കുടുംബ സഹായ പദ്ധതി ഇനി ‘പ്രധാനമന്ത്രി പരിവാര്‍ ലാഭ് യോജന എന്നും പേര് മാറ്റി.

ഭിന്നശേഷിക്കാര്‍ക്കുള്ള പെന്‍ഷന്‍ പദ്ധതി പ്രകാരമുള്ള സഹായത്തുക ഇനിമുതല്‍ 79 വയസ്സ് വരെയുള്ളവര്‍ക്ക് 375 രൂപയും, 80 വയസ്സും അതിനുമുകളിലും പ്രായമുള്ളവര്‍ക്ക് 625 രൂപയുമായിരിക്കും. അതേസമയം, വയോജനങ്ങള്‍ക്കും വിധവകള്‍ക്കുമുള്ള പെന്‍ഷന്‍ പദ്ധതികളും കുടുംബ ആനുകൂല്യ പദ്ധതിയും നിലവിലുള്ള രീതിയില്‍ തന്നെ തുടരുമെന്ന് മന്ത്രിസഭാ പത്രക്കുറിപ്പ് അറിയിച്ചു. 36 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി ആകെ 3.20 കോടി ഗുണഭോക്താക്കള്‍ക്ക് ഇതിന്റെ പ്രയോജനം ലഭിക്കും.

മാസപ്പടി കേസില്‍ പ്രതിപക്ഷ നേതാവ് പിണറായി വിജയന് ഹൈക്കോടതിയില്‍ നിന്ന് തിരിച്ചടി. പിണറായി വിജയന്റെയടക്കമുള്ള അപ്പീല്‍ അനുമതി ഹര്‍ജികള്‍ ഹൈക്കോടതി തള്ളി. വിജിലന്‍സ് എഫ്‌ഐആര്‍ ഇടാനുത്തരവിട്ട സിംഗിള്‍ ബഞ്ച് ഉത്തരവിനെതിരായ പിണറായിയുടെ അപ്പീല്‍ കോടതി പരിഗണിക്കില്ലെന്ന് വ്യക്തമാക്കി. തങ്ങളുടെ ഭാഗം കേട്ടില്ലെന്നും സിംഗിള്‍ ബഞ്ച് ഉത്തരവ് നിയമപരമല്ലെന്നുമായിരുന്നു ഹര്‍ജിക്കാരുടെ വാദം. സര്‍ക്കാരും ഹര്‍ജിക്കാര്‍ക്ക് അനുകൂലമായ നിലപാടാണ് അറിയിച്ചിരുന്നത്. എന്നാല്‍ അപ്പീലിന് അനുമതി നല്‍കരുതെന്നായിരുന്നു ഇഡിയുടെ നിലപാട്. ഇത് പരി?ഗണിച്ചാണ് കോടതി തള്ളിയത്. ഇതോടെ മാസപ്പടി കേസില്‍ പിണറായിയെ പിന്തുണച്ച സര്‍ക്കാരിനും കോടതിയില്‍ നിന്ന് തിരിച്ചടിയാണുണ്ടായത്.

എസ്എഫ്‌ഐ പ്രവര്‍ത്തകന്‍ അഭിമന്യു കൊലക്കേസില്‍ എട്ട് വര്‍ഷത്തിന് ശേഷം വിചാരണ നടപടികള്‍ക്ക് ഇന്ന് തുടക്കമാകും. ഒന്ന് മുതല്‍ 16 വരെ പ്രതികളാണ് വിചാരണ നേരിടുക. ആദ്യം വിസ്തരിക്കുക ഒന്നും രണ്ടും സാക്ഷികളെ. എറണാകുളം പ്രിന്‍സിപ്പല്‍ സെഷന്‍സ് കോടതിയിലാണ് വിചാരണ നടപടികള്‍ക്ക് തുടക്കം കുറിക്കുന്നത്. 2018 ജൂലൈ രണ്ടിന് പുലര്‍ച്ചെയാണ് അഭിമന്യു കൊല്ലപ്പെട്ടത്. 8 വര്‍ഷത്തിന് ശേഷമാണ് വിചാരണ തുടങ്ങുന്നത്.

ആദ്യ 16 പ്രതികളുടെ വിചാരണയാണ് നടക്കുക. നാല് മാസത്തിനുള്ളില്‍ വിചാരണ പൂര്‍ത്തിയാക്കാന്‍ ഹൈക്കോടതി നിര്‍ദേശമുണ്ട്. അഡ്വ. ജി മോഹന്‍രാജാണ് കേസിലെ സ്‌പെഷ്യല്‍ പബ്ലിക് പ്രോസിക്യൂട്ടര്‍. രഹസ്യ വിചാരണ വേണമെന്ന പ്രതികളുടെ ആവശ്യം ഹൈക്കോടതി തള്ളിയിരുന്നു. 26 പ്രതികളാണ് കേസിലുള്ളത്. ആദ്യ 16 പ്രതികള്‍ക്കെതിരെയുള്ള കുറ്റപത്രമാണ് സമര്‍പ്പിച്ചിട്ടുള്ളത്. അവര്‍ക്കെതിരെയുള്ള വിചാരണയായിരിക്കും ആദ്യ ഘട്ടത്തില്‍ നടക്കുക.

പൈതൃക നെല്‍വിത്തുകളുടെ കാവലാളായിരുന്ന പത്മശ്രീ ചെറുവയല്‍ രാമന്‍ അന്തരിച്ചു. കോഴിക്കോട് മെഡിക്കല്‍ കോളേജ് ആശുപത്രിയിലായിരുന്നു അന്ത്യം. വയറ് വേദനയെ തുടര്‍ന്ന് ആശുപത്രിയില്‍ പ്രവേശിപ്പിച്ച രാമന്റെ അന്ത്യം ആകസ്മികമായിരുന്നു. വയനാട് എടവക പഞ്ചായത്തിലെ കമ്മനയില്‍ ചെറുവയല്‍ കുറിച്യ തറവാട്ടില്‍ ജനിച്ച രാമന്‍ വയനാട്ടിലെ പരമ്പരാഗത നെല്ലിനങ്ങളുടെ സംരക്ഷകനെന്ന നിലയിലാണ് പ്രസിദ്ധനായത്. രാജ്യം പത്മശ്രീ കൊടുത്ത് ആദരിച്ച ചെറുവയല്‍ രാമന് അടുത്തിടെയാണ് സംസ്ഥാന സര്‍ക്കാര്‍ ഏര്‍പ്പെടുത്തിയ പ്രഥമ ഉമ്മന്‍ ചാണ്ടി കാര്‍ഷിക പുരസ്‌കാരം ലഭിച്ചത്.

സംസ്ഥാനത്ത് നാളെ മുതല്‍ അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. നാളെ നാല് ജില്ലകളില്‍ ഓറഞ്ച് അലേര്‍ട്ടും എട്ട് ജില്ലകളില്‍ യെല്ലോ അലേര്‍ട്ടും പ്രഖ്യാപിച്ചു. ഞായറാഴ്ച വരെ വിവിധ ജില്ലകളില്‍ യെല്ലോ അലേര്‍ട്ട് പ്രഖ്യാപിച്ചിട്ടുണ്ട്.

പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലാണ് കേന്ദ്ര കാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചത്. ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്. തിരുവനന്തപുരം, കൊല്ലം, ആലപ്പുഴ, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളില്‍ മഞ്ഞ അലര്‍ട്ടും പ്രഖ്യാപിച്ചിട്ടുണ്ട്.

വെള്ളിയാഴ്ച പത്തനംതിട്ട, ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസറഗോഡ് ജില്ലകളിലാണ് യെല്ലോ അലര്‍ട്ട്. ശനിയാഴ്ച പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും ഞായറാഴ്ച പത്തനംതിട്ട, കോട്ടയം, ഇടുക്കി ജില്ലകളിലും യെല്ലോ അലര്‍ട്ടാണ്.

കേരളത്തില്‍ ഒറ്റപ്പെട്ടയിടങ്ങളില്‍ ഇന്ന് താപനില സാധാരണയെക്കാള്‍ 3 to 4°C വരെ കൂടുതല്‍ ഉയരാന്‍ സാധ്യതയെന്നും കേന്ദ്ര കാലാവസ്ഥ വകുപ്പ് അറിയിക്കുന്നു.

നിയമസഭയില്‍ ചര്‍ച്ചയായി നെടുമ്പാശേരി മിനി കൂപ്പര്‍ അപകടം. എഫ്ഐആര്‍ ഇടുന്നത് വൈകിയെന്നും പ്രതിയുടെ പേര് ചേര്‍ക്കാത്തത് സംശയങ്ങള്‍ക്ക് ഇടവരുത്തിയെന്നും പ്രതിപക്ഷം വിമര്‍ശിച്ചു. കേസില്‍ ഒരു വിട്ടുവീഴ്ചയില്ലെന്നും ശക്തമായ നടപടിയെന്നും ആഭ്യന്തരമന്ത്രി രമേശ് ചെന്നിത്തല പറഞ്ഞു. അപകടത്തിന് പിന്നാലെ സമൂഹമാധ്യമങ്ങളില്‍ ഉണ്ടായ വിദ്വേഷപ്രചാരണം നിയമസഭ അപലപിച്ചു

സബ്മിഷനായാണ് പ്രതിപക്ഷനേതാവ് പിണറായി വിജയന്‍ നെടുമ്പാശേരി മിനികൂപ്പര്‍ അപകടം സഭയില്‍ ഉന്നയിച്ചത്. പ്രതിയുടെ വൈദ്യ പരിശോധന നടത്തുന്നതില്‍ ഉള്‍പ്പെടെ കാലതാമസമുണ്ടായെന്ന വാര്‍ത്തകള്‍ ആശങ്കപ്പെടുത്തുന്നതായി പ്രതിപക്ഷ നേതാവ് പറഞ്ഞു. പ്രതിക്ക് മദ്യം നല്‍കിയതില്‍ ബാറുകള്‍ക്കെതിരെ നടപടി സ്വീകരിച്ചതായി എക്സൈസ് മന്ത്രി സ്ഥിരീകരിച്ചിട്ടുണ്ട്. എന്നാല്‍ പ്രതി മദ്യം ഉപയോഗിച്ചുവെന്ന് തെളിയിക്കാന്‍ കൃത്യ സമയത്ത് വൈദ്യ പരിശോധന നടത്തിയോ എന്നതാണ് സംശയമെന്ന് പ്രതിപക്ഷ നേതാവ് പറഞ്ഞു. പ്രതിയുടെ അറസ്റ്റ് രേഖപ്പെടുത്തുന്നതില്‍ ഉള്‍പ്പെടെ കാലതാമസമുണ്ടായെന്നും അദ്ദേഹം കൂട്ടിച്ചേര്‍ത്തു.