latest news

പേരാവൂര്‍:സ്വകാര്യ വ്യക്തിയുടെ വീടിന്റെ മതില്‍ ഇടിഞ്ഞ് റോഡിലേക്ക് വീണത് അപകടങ്ങള്‍ക്ക് ഇടയാക്കുന്നു.തൊണ്ടിയില്‍ മണത്തണ റോഡില്‍ കോറ ബസ് കത്തിരിപ്പ് കേന്ദ്രത്തിന് മുന്‍വശത്തെ സ്വകാര്യ വ്യക്തിയുടെ മതില്‍ ഇടിഞ്ഞ് റേഡിലേക്ക് വീണത് നീക്കം ചെയ്യാത്തതാണ് അപകടങ്ങള്‍ക്ക് കാരണം.നിരവധി വാഹനങ്ങള്‍ കടന്നു പോകുന്ന റോഡിനരികില്‍ കരിങ്കലുകള്‍ കിടക്കുന്നതാണ് അപകടങ്ങള്‍ക്കിടയാക്കുന്നത്. തൊണ്ടിയില്‍ സ്വദേശി ഷിജോയുടെ കാര്‍ കരിങ്കല്ലില്‍ ഇടിച്ച് അപകടമുണ്ടായി.

അപകടത്തില്‍ കാറിന്റെ മുന്‍ഭാഗം പൂര്‍ണ്ണമായും തകര്‍ന്നു.റോഡിലേക്ക് വീണ കരിങ്കല്ലുകള്‍ നീക്കം ചെയ്യാന്‍ ബന്ധപ്പെട്ട അധികൃതര്‍ അടിയന്തര നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.

നേതാക്കളെ അറസ്റ്റ് ചെയ്തതില്‍ പ്രതിഷേധിച്ച് പിഎഫ്‌ഐ കേരളത്തില്‍ പ്രഖ്യാപിച്ച ഹര്‍ത്താലില്‍ 70 കെഎസ്ആര്‍ടിസി ബസുകള്‍ നശിപ്പിക്കപ്പെട്ടുവെന്ന് സര്‍ക്കാര്‍ ഹൈക്കോടതിയെ അറിയിച്ചു. ഹര്‍ത്താലുമായി ബന്ധപ്പെട്ട് രണ്ട് മണി വരെ 157 കേസുകള്‍ രജിസ്റ്റര്‍ ചെയ്തിട്ടുണ്ടെന്നും സര്‍ക്കാര്‍ വ്യക്തമാക്കി. 237 പേരെയാണ് അറസ്റ്റ് ചെയ്യ്തതെന്നും 384 പേരെ കരുതല്‍ തടവിലാക്കുകയും ചെയ്തിട്ടുണ്ടെന്നും ഹൈക്കോടതിയില്‍ സര്‍ക്കാര്‍ അറിയിച്ചു. സംസ്ഥാനത്ത് ഇന്നലെ നടന്ന ഹര്‍ത്താല്‍ നിയമവിരുദ്ധമാണെന്ന് പറഞ്ഞ ഹൈക്കോടതി, നഷ്ടം ആരില്‍ നിന്ന് ഈടാക്കുമെന്നും ചോദിച്ചു. ഹര്‍ത്താല്‍ നടത്തിയ പോപ്പുലര്‍ ഫ്രണ്ടില്‍ നിന്നാണോ നഷ്ടം നികത്തുകയെന്നും ഹൈക്കോടതി ആരാഞ്ഞു.ഇന്ന് കൂടുതല്‍ അറസ്റ്റിന് സാധ്യതയുണ്ട്. സിസിടിവി ദൃശ്യങ്ങള്‍ പരിശോധിച്ചാകും നടപടി.

സംസ്ഥാനത്ത് ഇന്ന് സ്വര്‍ണവില കുറഞ്ഞു. ഇന്നലെ കുത്തനെ ഉയര്‍ന്ന സ്വര്‍ണവിലയാണ് ഇന്ന് കുറഞ്ഞത്. ഇന്നലെ ഉയര്‍ന്ന അതേ വിലയാണ് ഇന്ന് കുറഞ്ഞത്. അതായത് ഒരു പവന്‍ സ്വര്‍ണത്തിന് 400 രൂപയുടെ വര്‍ധനവാണ് ഇന്നലെ ഉണ്ടായത്. ഇന്ന് 400 രൂപയുടെ ഇടിവും ഉണ്ടായി. ഒരു പവന്‍ സ്വര്‍ണത്തിന്റെ ഇന്നത്തെ വിപണി വില 36800 രൂപയാണ്.

ഒരു ഗ്രാം 22 കാരറ്റ് സ്വര്‍ണത്തിന്റെ വില ഇന്ന് 50 രൂപ കുറഞ്ഞു. ഇന്നലെ 50 രൂപ വര്‍ധിച്ചിരുന്നു. ഒരു ഗ്രാം 22 കാരറ്റ് സ്വര്‍ണത്തിന്റെ ഇന്നത്തെ വിപണി വില 4600 രൂപയാണ്.18 കാരറ്റ് സ്വര്‍ണത്തിന്റെ വിലയും ഇടിഞ്ഞു. 45 രൂപയാണ് ഇടിഞ്ഞത്. ഇന്നലെ 45 രൂപ ഉയര്‍ന്നിരുന്നു. ഒരു ഗ്രാം 18 കാരറ്റ് സ്വര്‍ണത്തിന്റെ ഇന്നത്തെ വിപണി വില 3795 രൂപയാണ്.

പേരാവൂര്‍: വിദ്യാരംഗം കലാ സാഹിത്യവേദി ഇരിട്ടി ഉപജില്ലസര്‍ഗോത്സവം പേരാവൂര്‍ എം.പി.യു.പി സ്‌കൂളില്‍ നടന്നു. നാടക പ്രവര്‍ത്തകന്‍ ജിനോ ജോസഫ് ഉദ്ഘാടനം ചെയ്തു. പേരാവൂര്‍ ഗ്രാമ പഞ്ചായത്ത് പ്രസിഡണ്ട് പി.പി വേണുഗോപാലന്‍ അധ്യക്ഷത വഹിച്ചു. ഇരിട്ടി ഉപജില്ല വിദ്യാഭ്യാസ ഓഫീസര്‍ ജി ശ്രീകുമാര്‍ മുഖ്യപ്രഭാഷണം നടത്തി. പഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മറ്റി ചെയര്‍പേഴ്സണ്‍ എം ഷൈലജ സമ്മാനദാനം നിര്‍വഹിച്ചു. സ്‌കൂള്‍ മാനേജര്‍ കെ രാജീവ്, പി.ടി.എ പ്രസിഡണ്ട് റെന്നി വര്‍ഗീസ്, വിദ്യാരംഗം സബ്ജില്ല കണ്‍വീനര്‍ കെ വിനോദ്കുമാര്‍, മദര്‍ പിടിഎ പ്രസിഡണ്ട് ബിന്ദു രാജേഷ്, സീനിയര്‍ അസിസ്റ്റന്റ് എ സി രഞ്ജിനി, പ്രധാനാധ്യാപിക യു വി സജിത, വിദ്യാരംഗം കണ്‍വീനര്‍ ഇ കെ നിഷ എന്നിവര്‍ സംസാരിച്ചു.

വവ്വാലില്‍ നിന്ന് കണ്ടെത്തിയ ഖോസ്ത 2 വൈറസിന് മനുഷ്യനില്‍ പ്രവേശിക്കാന്‍ സാധിക്കുമെന്ന് അമേരിക്കന്‍ ശാസ്ത്രജ്ഞര്‍. നിലവിലെ വാക്സിനുകള്‍ വൈറസിനെതിരെ ഫലപ്രദമാകില്ലെന്നുമാണ് ശാസ്ത്രജ്ഞരുടെ കണ്ടെത്തല്‍. പിഎല്‍ഒഎസ് എന്ന ജേണലില്‍ നല്‍കിയ ഗവേഷണ പഠനത്തിലാണ് ഇക്കാര്യം പറഞ്ഞിരിക്കുന്നത്.

2020 ല്‍ റഷ്യയിലാണ് ആദ്യമായി ഖോസ്ത 2 വൈറസ് കണ്ടെത്തുന്നത്. അന്ന് ഈ വൈറസ് മനുഷ്യനില്‍ പ്രവേശിക്കുമെന്ന് കണ്ടെത്തിയിരുന്നില്ല. എന്നാല്‍ പിന്നീട് നടത്തിയ പഠനങ്ങള്‍ക്കൊടുവിലാണ് മനുഷ്യന് വൈറസ് വെല്ലുവിളിയാകുമെന്ന് കണ്ടെത്തുന്നത്.കൊറോണ വൈറസിന്റെ ഇനത്തില്‍ തന്നെ പെടുന്ന സാര്‍ബികോവൈറസാണ് ഖോസ്ത 2. ഖോസ്ത 1 മനുഷ്യ ശരീരത്തില്‍ പ്രവേശിക്കില്ല എന്നും ശാസ്ത്രജ്ഞര്‍ ചൂണ്ടിക്കാട്ടി.വവ്വാലുകള്‍, റക്കൂണ്‍, വെരുക് എന്നിവയില്‍ നിന്ന് ഖോസ്ത 2 വൈറസ് മനുഷ്യനിലേക്ക് പകരാം. ഖോസ്ത 2 മനുഷ്യ ശരീരത്തില്‍ ഗുരുതര ആരോഗ്യ പ്രശ്നങ്ങള്‍ക്ക് കാരണമാകില്ലെങ്കിലും വൈറസ് കൊവിഡ് വൈറസുമായി കൂടിച്ചേര്‍ന്നാല്‍ അത് വലിയ വിപത്തിന് വഴിമാറാം.നിലവില്‍ കൊറോണ വൈറസിനെതിരെ മാത്രമല്ല മറിച്ച് സാര്‍ബികോവ് വൈറസ് ഇനത്തില്‍പ്പെടുന്ന എല്ലാ വൈറസിനെതിരെയും ഫലപ്രദമായ ഒരു വാക്സിന്‍ കണ്ടുപിടിക്കാനുള്ള ശ്രമത്തിലാണ് ശാസ്ത്രലോകം.

വയനാട് തൊണ്ടര്‍നാട് കുഞ്ഞോത്ത് മാവോയിസ്റ്റ് അനുകൂല പോസ്റ്റര്‍ കണ്ടെത്തി. ഇന്ന് രാവിലെയാണ് നാട്ടുകാര്‍ ടൗണില്‍ പലയിടത്തും പോസ്റ്റര്‍ പതിച്ചത് കണ്ടത്.ആദിവാസികളോട് അവകാശ നിഷേധത്തിനെതിരെയും ഭൂമിയുടെ പട്ടയത്തിനുവേണ്ടിയും പോരാടാന്‍ ആഹ്വാനം ചെയ്താണ് സി.പി ഐ മാവോയിസ്റ്റ് പോസ്റ്റര്‍. തൊണ്ടര്‍നാട് പോലീസ് സ്ഥലത്തെത്തി അന്വേഷണം ആരംഭിച്ചു.

കേന്ദ്ര സര്‍ക്കാരിന് ടെലികോം രംഗത്ത് കൂടുതല്‍ അധികാരം നല്‍കുന്ന ടെലികമ്യൂണിക്കേഷന്‍ കരട് ബില്‍ കേന്ദ്രമന്ത്രി അശ്വിനി വൈഷണവ് അവതരിപ്പിച്ചു. വാട്സാപ്പ് , സിഗ്നല്‍ , ടെലിഗ്രാം തുടങ്ങിയ ആപ്പുകളടക്കമുള്ള ടെലികമ്യൂണിക്കേഷന്‍ പരിധിയില്‍ കൊണ്ടു വരുന്നതിന് ശുപാര്‍ശ ചെയ്യുന്നതാണ് ബില്‍. ഇതോടെ വാട്സാപ്പ് ഉള്‍പ്പെടെയുള്ള അപ്പുകള്‍ക്ക് ടെലികോം ലൈസന്‍സ് നിര്‍ബന്ധമാകും. ടെലിക്കോം കമ്പനികളോ , ഇന്റര്‍നെറ്റ് സേവനദാതാക്കളോ ലൈസന്‍സ് തിരികെ നല്‍കിയാല്‍ അടച്ച ഫീസ് നല്‍കുന്നതിനും ബില്ലില്‍ ശുപാര്‍ശയുണ്ട്.

കമ്പനിയില്‍ സാമ്പത്തിക പ്രതിസന്ധിയുണ്ടായാല്‍ ലൈസന്‍സ് ഇനത്തിലുള്ള തുക അടക്കുന്നതില്‍ ഇളവ് നല്‍കാന്‍ സര്‍ക്കാരിനാകും. ബില്ലില്‍ പൊതുജനങ്ങള്‍ക്ക് അഭിപ്രായം അറിയിക്കാമെന്ന് കേന്ദ്ര സര്‍ക്കാര്‍ വ്യക്തമാക്കിയിട്ടുണ്ട്. ഒക്ടോബര്‍ ഇരുപത് വരെയാകും പൊതുജനങ്ങള്‍ക്ക് അഭിപ്രായം അറിയിക്കാനുള്ള അവസരമുണ്ടാകുക.

സമസ്തമേഖലയിലും സ്വതന്ത്രസോഫ്റ്റ്‌വെയര്‍ ഉപയോഗിക്കുന്നതിന്റെ ഗുണഫലങ്ങളെപ്പറ്റി ജനങ്ങളെ ബോധവല്‍ക്കരിക്കുന്നതിനായി സോഫ്റ്റ്‌വെയര്‍ സ്വാതന്ത്ര്യദിനാഘോഷം ജില്ലാതല പരിപാടി സെപ്റ്റംബര്‍ 25 ന് മുനിസിപ്പല്‍ ഹൈസ്‌കൂള്‍ കാമ്പസിലെ കൈറ്റ് കണ്ണൂര്‍ ജില്ലാ ഓഫീസില്‍ നടക്കും. പൊതുവിദ്യാഭ്യാസ വകുപ്പിലെ കൈറ്റും സ്വാതന്ത്ര്യ വിജ്ഞാന മേഖലയില്‍ പ്രവര്‍ത്തിക്കുന്ന ഡി.എ.കെ.എഫും സംയുക്തമായാണ് ദിനാചരണം സംഘടിപ്പിക്കുന്നത്. സംസ്ഥാന തല ഉദ്ഘാടനം കൈറ്റ് വിക്ടേഴ്‌സ് ചാനലിലൂടെ രാവിലെ 10 ന് പൊതുവിദ്യാഭ്യാസ മന്ത്രി വി. ശിവന്‍കുട്ടി നിര്‍വഹിക്കും. തുടര്‍ന്ന് ജില്ലയില്‍ സ്‌ക്രൈബസ് എന്ന വിഷയത്തെക്കുറിച്ച് പരിശീലനം സംഘടിപ്പിക്കും. ഒരു സ്വതന്ത്ര ഡെസ്‌ക്ടോപ്പ് പബ്ലിഷിങ്ങ്, ഡിസൈനിങ്ങ് സോഫ്റ്റ്‌വെയര്‍ ആണ് സ്‌ക്രൈബസ്.

ഉച്ചയ്ക്ക് 2 മുതല്‍ 4 വരെ പൊതുജനങ്ങള്‍ക്കായി ഓപണ്‍ സെഷനുകളും സ്വതന്ത്ര സോഫ്റ്റ്‌വെയര്‍ സൗജന്യമായി ഇന്‍സ്റ്റാള്‍ ചെയ്ത് നല്‍കുന്ന ഇന്‍സ്റ്റാള്‍ ഫെസ്റ്റും സംഘടിപ്പിക്കും. സോഫ്റ്റ്‌വെയര്‍ സ്വാതന്ത്ര്യ ദിന പോര്‍ട്ടലായ www.kite.kerala.gov.in/SFDay2022 വഴി ആദ്യം രജിസ്റ്റര്‍ ചെയ്യുന്ന 70 പേര്‍ക്ക് ജില്ലയില്‍ സൗജന്യമായി പരിശീലനത്തില്‍ പങ്കെടുക്കാന്‍ അവസരവും പങ്കാളിത്ത സര്‍ട്ടിഫിക്കറ്റുകളും നല്‍കും.പരിശീലന പരിപാടിയില്‍ കണ്ണൂര്‍ ഗവ എന്‍ജി.കോളേജ് പ്രൊഫസര്‍ സി ശ്രീകുമാര്‍ മുഖ്യാതിഥിയാവും, റിസോഴ്‌സ് പേഴ്‌സണ്‍ കെ സുരേന്ദ്രന്‍ അടുത്തില, കൈറ്റ് ജില്ലാ കോ ഓര്‍ഡിനേറ്റര്‍ സുപ്രിയ പി,ഡി.എ.കെ.എഫ് സംസ്ഥാന വൈസ് പ്രസിഡണ്ട് അജിത്ത് പാനൂര്‍ തുടങ്ങിയവര്‍ ജില്ലയില്‍ പരിശീലനത്തിന് നേതൃത്വം നല്‍കും.

ലഹരിക്കെതിരെയുള്ള ക്യാംപെയ്ന്‍ സുസ്ഥിര ആരോഗ്യ ബോധവല്‍ക്കരണ പ്രവര്‍ത്തനമാക്കി മാറ്റി കതിരൂര്‍ ഗ്രാമ പഞ്ചായത്ത്. തുടര്‍വിദ്യാഭ്യാസ പ്രവര്‍ത്തനമായാണ് പദ്ധതി നടത്തുക. കെ ഷീല്‍ഡ് അഥവാ കതിരൂര്‍ സസ്റ്റെയിനബിള്‍ ഹെല്‍ത്ത് ഇമ്യൂണിറ്റി എജ്യുക്കേഷന്‍ ലോക്കലി എഗൈന്‍സ്റ്റ് ഡ്രഗ്‌സ് എന്ന പേരിലാണ് പഞ്ചായത്ത് പ്രവര്‍ത്തനം ഏറ്റെടുക്കുന്നത്. ഇതിന്റെ ഭാഗമായി ഗവ. വി എച്ച് എസ് എസ് കതിരൂരില്‍ ഗാന്ധിജയന്തി ദിനത്തില്‍ പഞ്ചായത്തിന്റെയും മറ്റു സംഘടനകളുടേയും സഹകരണത്തോടെ 2500 കുട്ടികള്‍ ഗാന്ധിജിയുടെ മുഖചിത്രം വരച്ച് ലഹരി വിരുദ്ധ പ്രതിജ്ഞയെടുക്കും. സ്പീക്കര്‍ അഡ്വ. എ എന്‍ ഷംസീര്‍ പരിപാടി ഉദ്ഘാടനം ചെയ്യും. തുടര്‍ പ്രവര്‍ത്തനമായി പഞ്ചായത്തില്‍ 25 വീടുകള്‍ ഉള്‍ക്കൊള്ളുന്ന ക്ലസ്റ്റര്‍ തയാറാക്കി പ്രത്യേക കമ്മിറ്റിയുടെ നേതൃത്വത്തില്‍ ലഹരിക്കെതിരെ ബോധവല്‍ക്കരണം, മോണിറ്ററിങ് , ലഹരി മുക്ത ചികിത്സ എന്നിവ നടത്തും.
12 വയസ്സിനു മുകളില്‍ പ്രായമുള്ള കുട്ടികളില്‍ പ്രത്യേക സര്‍വേ നടത്തും. അതില്‍ രക്ഷിതാക്കള്‍ വിദേശത്തുള്ള കുട്ടികള്‍, രക്ഷിതാക്കളില്‍ ലഹരി ആസക്തിയുള്ള കടുംബങ്ങളിലെ കുട്ടികള്‍, ഏതെങ്കിലും തരത്തിലുള്ള ലഹരി ആസക്തിയുള്ള വിദ്യാര്‍ഥികള്‍ എന്നിങ്ങനെ തരംതിരിച്ചാണ് മോണിറ്ററിങ് നടപ്പാക്കുക. പഞ്ചായത്തിലെ സ്‌കൂളുകളിലും പ്രത്യേകം കമ്മിറ്റികള്‍ രൂപീകരിക്കും. എല്‍ പി മുതലുള്ള ക്ലാസുകളില്‍ അഞ്ച് വിദ്യാര്‍ത്ഥികള്‍ അടങ്ങുന്ന കമ്മിറ്റിയും ഇവര്‍ക്ക് നോഡല്‍ ഓഫീസറായി ഒരു അധ്യാപകനെയും നിശ്ചയിച്ചാണ് വിദ്യാലയങ്ങളില്‍ പ്രവര്‍ത്തനങ്ങള്‍ നടത്തുക.

കണ്ണൂരിന് നിറങ്ങളുടെയും കാഴ്ചകളുടെയും സംഗീതത്തിന്റെയും വിരുന്നൊരുക്കികൊണ്ട് നീണ്ട ഇടവേളയ്ക്കു ശേഷം കണ്ണൂര്‍ ദസറ വീണ്ടും നടത്തുന്നു. ഒരു കാലത്ത് കണ്ണൂരിലെ ജനത പ്രൗഢിയോടെ നെഞ്ചിലേറ്റിയിരുന്ന രണ്ടാം ദസറ എന്നറിയപ്പെട്ടിരുന്ന നവരാത്രി ആഘോഷം, പഴയ പ്രൗഢിയോടെ സംഘടിപ്പിക്കുമെന്ന് കോര്‍പ്പറേഷന്‍ മേയര്‍ അഡ്വ.ടി.ഒ.മോഹനന്‍ വാര്‍ത്താസമ്മേളനത്തില്‍ അറിയിച്ചു. കണ്ണൂരിലെ വാണിജ്യ മേഖലയെ ഉത്തേജിപ്പിച്ചിരുന്ന വ്യാപാര ഉത്സവം കൂടിയായിരുന്ന കണ്ണൂര്‍ ദസറയുടെ ഗരിമ വീണ്ടെടുത്ത് എല്ലാ വിഭാഗം ജനങ്ങള്‍ക്കും ഒത്തൊരുമിക്കാനുള്ള വേദി സൃഷ്ടിക്കുകയാണ് കണ്ണൂര്‍ ദസറയുടെ ലക്ഷ്യം. ഡിടിപിസി, കേരള ഫോക് ലോര്‍ അക്കാദമി എന്നിവയുടെ സഹകരണവും പരിപാടികള്‍ക്കുണ്ട്. സെപ്റ്റംബര്‍ 26 മുതല്‍ ഒക്ടോബര്‍ 4 വരെ കണ്ണൂര്‍ കലക്ടറേറ്റ് മൈതാനിയില്‍ പ്രത്യേകം തയ്യാറാക്കിയ വേദിയില്‍ എല്ലാ ദിവസവും വര്‍ണ്ണശബളമായ കലാപരിപാടികളും സാസ്‌കാരിക സമ്മേളനങ്ങളും നടക്കും. കൊവിഡ് മഹാമാരിമൂലം കഴിഞ്ഞ രണ്ട് വര്‍ഷമായി കണ്ണൂരിലെ സാംസ്‌കാരിക പരിപാടികള്‍ കുറഞ്ഞ സാഹചര്യത്തില്‍ കണ്ണൂരിലെ സഹൃദയര്‍ക്ക് ഇന്ത്യയിലെ മുന്‍നിര കലാ പ്രതിഭകളുടെ കലാപരിപാടികള്‍ കാണാനുള്ള അവസരമുണ്ടാകും. കണ്ണൂരിലെ വളര്‍ന്നു വരുന്ന കലാപ്രതിഭകള്‍ക്കും എല്ലാ ദിവസവും വിവിധ പരിപാടികള്‍ അവതരിപ്പിക്കുന്നതിനായി അവസരമുണ്ട്.

നാടാകെ പടരുന്ന ലഹരിവിപത്തിനെതിരെയായ സന്ദേശത്തിലൂന്നിയാണ് ഇത്തവണത്തെ കണ്ണൂര്‍ ദസറ സംഘടിപ്പിക്കുന്നത്. ‘കളറാക്കാം ദസറ – കളയാം ലഹരിക്കറ’ എന്നാണ് കണ്ണൂര്‍ ദസറയുടെ ഇത്തവണത്തെ മുദ്രാവാക്യം. ദസറവേദിയില്‍ ലഹരി വിരുദ്ധ സന്ദേശങ്ങളടങ്ങിയ ഷോര്‍ട്ട് ഫിലിം പ്രദര്‍ശനവും മറ്റ് പരിപാടികളും ഉണ്ടായിരിക്കും. ലഹരി വിപത്തിനെതിരെ ശക്തമായ പ്രതിരോധം സൃഷ്ടിക്കുകയാണ് ലക്ഷ്യം.
ജാതി-മത-വര്‍ണ്ണ-വര്‍ഗ-രാഷ്ട്രീയ അതിരുകളില്ലാത്ത ബഹുജന പങ്കാളിത്തമാണ് കണ്ണൂര്‍ ദസറയില്‍ പ്രതീക്ഷിക്കുന്നത്. കണ്ണൂര്‍ ദസറ എല്ലാ വര്‍ഷവും നടത്തികൊണ്ട് സ്ഥിരം കലാവേദി എന്ന നിലയിലേക്കുയര്‍ത്തി ആഗോള ടൂറിസം ഭൂപടത്തില്‍ ഇടം നേടാനും ഉദ്ദേശിക്കുന്നു.
കണ്ണൂര്‍ ദസറയുടെ പ്രചരണാര്‍ത്ഥം വ്‌ളോഗര്‍മാരുടെയും സമൂഹമാധ്യമ പ്രവര്‍ത്തകരുടെയും കൂട്ടായ്മ ഇക്കഴിഞ്ഞ ബുധനാഴ്ച നടന്നു . വ്യാഴാഴ്ച വന്‍ ബഹുജന പങ്കാളിത്തത്തോടെ വിളംബരജാഥയും നടന്നു. ദസറയുടെ പ്രചരണാര്‍ത്ഥം വരും ദിവസങ്ങളില്‍ നഗരത്തിന്റെ വിവിധ ഭാഗങ്ങളില്‍ ഫ്‌ളാഷ് മോബ് അരങ്ങേറും . കണ്ണൂരിലെ പത്രപ്രവര്‍ത്തകരുടെ പ്രസ്സ്‌ക്ലബ് ടീമും കൗണ്‍സിലര്‍മാരും ജീവനക്കാരുമടങ്ങിയ കോര്‍പറേഷന്‍ ടീമൂം തമ്മിലുള്ള സൗഹൃദ ഫുട്ബാള്‍ മത്സരവും നടക്കും . ദസറയ്ക്ക് മുന്നോടിയായി ബഹുജന പങ്കാളിത്തത്തോടെ കോര്‍പറേഷന്‍ പരിധിയില്‍ ‘കളറാക്കാം ദസറ, ക്ലീനാക്കാം കണ്ണൂര്‍’ എന്ന സന്ദേശമുയര്‍ത്തികൊണ്ട് ശുചീകരണ പരിപാടിയും നടക്കും .
വാര്‍ത്താ സമ്മേളനത്തില്‍ ഡെപ്യൂട്ടി മേയര്‍ കെ.ഷബീന ടീച്ചര്‍, സ്റ്റാന്റിംഗ് കമ്മിറ്റി ചെയര്‍മാന്‍മാരായ സുരേഷ് ബാബു എളയാവൂര്‍, എം.പി.രാജേഷ്, പി .ഷമീമ ടീച്ചര്‍, അഡ്വ.പി.ഇന്ദിര, ഷാഹിന മൊയ്തീന്‍ കൗണ്‍സിലര്‍മാരായ മുസ്ലിഹ് മഠത്തില്‍, ടി.രവീന്ദ്രന്‍, ജനറല്‍ കണ്‍വീര്‍ കെ.സി.രാജന്‍ മാസ്റ്റര്‍, കോര്‍പറേഷന്‍ സെക്രട്ടറി വി.വി.ലതേഷ്‌കുമാര്‍, എന്നിവരും പങ്കെടുത്തു