അപൂര്വ രോഗമായ സ്പൈനല് മസ്കുലര് അട്രോഫി ബാധിച്ച കുട്ടികളുടെ എല്ലാ മാതാപിതാക്കള്ക്കും 3 മാസത്തിനുള്ളില് ചെസ്റ്റ് ഫിസിയോതെറാപ്പി പരിശീലനം നല്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ്. പദ്ധതിയില് രജിസ്റ്റര് ചെയ്ത കുട്ടികളുടെ മാതാപിതാക്കള്ക്കാണ് പരിശീലനം നല്കുന്നത്.
എം.എസ്.എ ബാധിച്ച കുട്ടികളെ ഏറ്റവും അലട്ടുന്ന പ്രശ്നമാണ് ശ്വാസകോശത്തില് കഫം കെട്ടുന്നത്. ഇതിന് ഏറ്റവും ഫലപ്രദമാണ് ചെസ്റ്റ് ഫിസിയോതെറാപ്പി. പലപ്പോഴും ഫിസിയോതെറാപ്പിസ്റ്റുകളുടെ അടുത്ത് കുട്ടിയെ എത്തിക്കാന് കഴിയാതെ ബുദ്ധിമുട്ടുണ്ടാകുന്ന സാഹചര്യമുണ്ട്. ഇത് പരിഹരിക്കുന്നതിനാണ് ആരോഗ്യ വകുപ്പ് കുട്ടികളുടെ രക്ഷിതാക്കള്ക്ക് തന്നെ ചെസ്റ്റ് ഫിസിയോതെറാപ്പിയില് വിദഗ്ധ പരിശീലനം നല്കാന് തീരുമാനിച്ചതെന്നും മന്ത്രി വ്യക്തമാക്കി.