മഞ്ഞുമ്മല് ബോയ്സ് സിനിമയുടെ നിര്മാതാക്കള്ക്കെതിരെ കേസ്. ഷോണ് ആന്റണി, സൗബിന് ഷാഹിര്, ബാബു ഷാഹിര് എന്നിവര്ക്കെതിരെയാണ് മരട് പൊലീസ് കേസെടുത്തത്. ഗൂഢാലോചന, വഞ്ചന, വ്യാജരേഖ ചമക്കല് എന്നീ വകുപ്പുകള് പ്രകാരമാണ് കേസ്. സിനിമയ്ക്കായി ഏഴ് കോടി മുടക്കി ലാഭ വിഹിതം വാഗ്ദാനം ചെയ്ത് പറ്റിച്ചെന്നാണ് കേസ്. എറണാകുളം സബ്കോടതിയുടെ നിര്ദേശപ്രകാരമാണ് കേസെടുത്തത്.
മഞ്ഞുമ്മല് ബോയ്സ് നിര്മ്മാതാക്കളുടെ അക്കൗണ്ട് മരവിപ്പിക്കാന് എറണാകുളം സബ് കോടതി ഉത്തരവിട്ടിരുന്നു. അരൂര് സ്വദേശി സിറാജിന്റെ പരാതിയിലാണ് കോടതി നടപടി. ഏഴ് കോടി മുടക്കിയിയിട്ട് ലാഭവിഹിതം നല്കിയില്ലെന്ന് പരാതി. പറവ ഫിലിംസിന്റെയും പാര്ട്ണര് ഷോണിന്റെയും അക്കൗണ്ടുകളാണ് മരവിപ്പിക്കുക. നിര്മാതാക്കളായ സൗബിന് ഷാഹിര്, ബാബു ഷാഹിര് എന്നിവര്ക്കാണ് നോട്ടീസ് നല്കിയത്.
40 കോടി രൂപയുടെ ബാങ്ക് അക്കൗണ്ടാണ് സബ് കോടതി ജഡ്ജി സുനില് വര്ക്കി മരവിപ്പിക്കാന് ഉത്തരവിട്ടത്. ചിത്രത്തിന്റെ നിര്മാണത്തിന് ഏഴുകോടി രൂപ മുതല്മുടക്കിയ അരൂര് സ്വദേശി സിറാജ് വലിയത്തറ ഹമീദ് സമര്പ്പിച്ച ഹര്ജിയിലാണ് കോടതി ഉത്തരവ്. 40 ശതമാനം ലാഭവിഹിതം വാഗ്ദാനം ചെയ്തു നിര്മാതാക്കള് പണം കൈപ്പറ്റിയശേഷം ലാഭവിഹിതമോ മുതല്മുടക്കോ നല്കാതെ കബളിപ്പിച്ചതെന്നാണു ഹര്ജി.
ആഗോളതലത്തില് ഇതുവരെ 220 കോടി രൂപ ചിത്രം കളക്ഷന് നേടിയിട്ടുണ്ടെന്നും ഒടിടി പ്ലാറ്റ്ഫോമുകള് മുഖേന ചിത്രം 20 കോടിയോളം രൂപ നേടിയിട്ടുണ്ടെന്നും ഹര്ജിയില് പറയുന്നു. 22 കോടി രൂപ ചെലവ് വരുമെന്നു പറഞ്ഞാണ് ഏഴു കോടി രൂപ വാങ്ങിയതെന്നും ഹര്ജിയില് ചൂണ്ടിക്കാട്ടുന്നു.