കേന്ദ്ര ബിരുദ പരീക്ഷ (സി.യു.ഇ.ടി.-യു.ജി-2024) കേന്ദ്രങ്ങൾ മേയ് അഞ്ചിനുള്ളിൽ എൻ.ടി.എ. പ്രഖ്യാപിക്കുമെന്ന് യു.ജി.സി. അധ്യക്ഷൻ ജഗദീഷ് കുമാർ അറിയിച്ചു. അഡ്മിറ്റ് കാർഡുകൾ മേയ് രണ്ടാം വാരത്തോടെ ഡൗൺലോഡ് ചെയ്യാം. പരീക്ഷ മേയ് 15 മുതൽ 31 വരെ നടക്കും. ജൂൺ 30-ന് ഫലം പ്രഖ്യാപിക്കും. ജൂലായ് അവസാനമോ ഓഗസ്റ്റ് ആദ്യമോ ക്ലാസുകൾ ആരംഭിക്കും.
ഓൺലൈനിന് പുറമേ, ഇത്തവണ എഴുത്തുപരീക്ഷയും നടത്തും. ഏറ്റവുമധികം രജിസ്‌ട്രേഷനുള്ള വിഷയങ്ങളിലാണ് ഒ.എം.ആർ. പരീക്ഷ പരിഗണിക്കുക. ഒരു വിദ്യാർഥിക്ക് തിരഞ്ഞെടുക്കാവുന്ന വിഷയങ്ങളുടെ എണ്ണം കുറയ്ക്കാനും തീരുമാനിച്ചിട്ടുണ്ട്.
ദിവസം രണ്ടോ മൂന്നോ ഷിഫ്റ്റുകളിൽ പരീക്ഷ നടത്തും. ഒരു വിഷയത്തിൽ പല ദിവസങ്ങളിൽ പരീക്ഷ നടത്തി മാർക്ക് ഏകീകരിക്കുന്ന സംവിധാനം ഈവർഷത്തോടെ നിർത്തലാക്കിയേക്കും. തിരഞ്ഞെടുക്കാവുന്ന വിഷയങ്ങളുടെ എണ്ണം ആറായി ചുരുക്കി. മൂന്നു പ്രധാന വിഷയങ്ങൾ, രണ്ടു ഭാഷകൾ, ഒരു ജനറൽ പരീക്ഷ എന്നിവയുൾപ്പെടെയാകും ആറു വിഷയങ്ങൾ അനുവദിക്കുക.
