പാലക്കാട് തച്ചനാട്ടുകര സ്വദേശിനിക്ക് നിപ തന്നയെന്ന് സ്ഥിരീകരണം. പൂനെ വൈറോളജി ലാബില് നിന്നുള്ള 38 കാരിയുടെ പരിശോധന ഫലം പോസിറ്റിവാണെന്ന് സ്ഥിരീകരിച്ചതോടെ മേഖലയില് നിയന്ത്രണമേര്പ്പെടുത്തി. രോഗിയുടെ സമ്പര്ക്കപ്പട്ടികയിലെ നൂറിലധികം പേര് ഹൈറിസ്ക് സമ്പര്ക്ക പട്ടികയിലാണ്.
യുവതി നിലവില് പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലാണ്. 20 ദിവസം മുമ്പാണ് ഇവര്ക്ക് പനി തുടങ്ങിയത്. വീടിന് സമീപത്തെ ക്ലിനിക്ക് അടക്കം 3 ഇടങ്ങളിലാണ് ചികിത്സ നേടിയത്. യുവതി മക്കള്ക്കൊപ്പമാണ് താമസിക്കുന്നത്. ഭര്ത്താവ് വിദേശത്താണ്. നിലവില് നാട്ടിലെത്തിയിട്ടുണ്ട്. സമീപത്തുള്ളതെല്ലാം കുടുംബ വീടുകളാണെന്നതിനാല് സംമ്പര്ക്കപ്പട്ടിക നീളാനാണ് സാധ്യത.
പെരിന്തല്മണ്ണയിലെ സ്വകാര്യ ആശുപത്രിയില് പ്രവേശിപ്പിക്കും മുമ്പ് യുവതി മണ്ണാര്ക്കാട്, പാലോട്, കരിങ്കല്ലത്താണി എന്നിവിടങ്ങളിലെ സ്വകാര്യ ക്ലിനിക്കുകളില് ചികിത്സ തേടിയിരുന്നു. നാട്ടുക്കല് കിഴക്കുംപറം മേഖലയിലെ 3 കിലോമീറ്റര് പരിധി കണ്ടൈന്മെന്റ് സോണായി പ്രഖ്യാപിച്ചു.
