തിരുവനന്തപുരം നെയ്യാറ്റിന്കരയില്, 22 വയസുകാരനെ കുത്തിക്കൊലപ്പെടുത്തിയ കേസില്, നാല് പേര് കാഞ്ഞിരംകുളം പൊലീസിന്റെ കസ്റ്റഡിയില്. പ്രായപൂര്ത്തിയാകാത്ത ഒരാള് ഉള്പ്പെടെ ബിജു എന്ന പൊടിയന്, ഇയാളുടെ മകന് മിഥിന്, സഹോദരന് വിജിന് എന്നിവരാണ് കസ്റ്റഡിയില് ഉള്ളത്. കൊലപാതകം നടത്തുമ്പോള് പ്രതികള് മദ്യലഹരിയിലായിരുന്നു. കാഞ്ഞിരംകുളം ആലുനിന്നകുഴി എന്ന സ്ഥലത്ത് വെച്ചാണ് കൊലപാതകം നടന്നത്. മനോജ് എന്ന് വിളിക്കുന്ന മനു ആണ് കൊല്ലപ്പെട്ടത്.
മിഥിന്റെ വീട്ടില് സഹോദരനെ കാണാന് എത്തിയ യുവാവിന്റെ ബൈക്കിന്റെ പെട്രോള് തീരുകയും പെട്രോള് വാങ്ങി ഒഴിച്ച ശേഷം ബൈക്ക് റെയ്സ് ചെയ്യുകയും ചെയ്തു. എന്നാല് ബൈക്ക് റെയ്സ് ചെയ്തത് സമീപവസിയായ മനോജ് ചോദ്യം ചെയ്യുകയായിരുന്നു. തുടര്ന്ന് ഉണ്ടായ സംഘര്ഷമാണ് കൊലപാതകത്തില് കലാശിച്ചത്. കുത്തേറ്റ മനോജിനെ ആദ്യം കൊണ്ട് പോയത് നെയ്യാറ്റിന്കര ആശുപത്രിയിലായിരുന്നു. കൈയ്യില് പരുക്കേറ്റ മിഥിനെയും ഇതേ ആശുപത്രിയില് എത്തിച്ചു. എന്നാല് ഇവിടെ വെച്ചും ഇരു വിഭാഗങ്ങള് തമ്മില് സംഘര്ഷം ഉണ്ടായി.
