പേരാവൂര്‍:പെരുമ്പുന്നയിലെ വ്യാപാര സ്ഥാപനത്തില്‍ നിന്നും നിരോധിത പുകയില ഉല്‍പന്നങ്ങള്‍ പിടികൂടി.പെരുമ്പുന്ന ജംഗ്ഷനില്‍ ലത്തീഫ് മൊട്ടമ്മല്‍ എന്നയാളുടെ ഉടമസ്ഥതയിലുള്ള പെരുമ്പുന്ന സ്റ്റോര്‍സ് എന്ന പലചരക്ക് കടയില്‍ നിന്നാണ് നിരോധിത പുകയില ഉല്‍പന്നമായ ഹാന്‍സ് പിടികൂടിയത്. മുഴക്കുന്ന് പോലീസ് സ്റ്റേഷന്‍ ഹൗസ് ഓഫീസര്‍ ജാന്‍സി മാത്യുവിന്റെ നേതൃത്വത്തിലാണ് പുകയില ഉത്പ്പന്നം പിടികൂടിയത്.മുന്‍പും ഇയാളുടെ കടയില്‍ നിന്ന് ഇത്തരത്തില്‍ നിരോധിത പുകയില ഉല്‍പന്നങ്ങള്‍ പിടികൂടിയിട്ടുണ്ട്.
അന്താരാഷ്ട്ര ഫുട്ബോളില്‍നിന്ന് പടിയിറങ്ങി ക്രിസ്റ്റ്യാനോ റൊണാള്‍ഡോ. സാമൂഹിക മാധ്യമങ്ങളില്‍ പങ്കുവെച്ച വിഡിയോയിലൂടെയാണ് പ്രഖ്യാപനം നടത്തിയത്. പോര്‍ച്ചുഗലിനായി 234 മത്സരങ്ങള്‍ കളിച്ച താരമാണ്. 146 ഗോളുകള്‍ നേടിയിട്ടുണ്ട്. 46 അസിസ്റ്റുകളും പേരിലുണ്ട്. ലോകകപ്പില്‍ 27 മത്സരങ്ങളില്‍ 11 ഗോളുകള്‍ നേടി. 2016ല്‍ യൂറോകപ്പും 2019ലും 2025ലും യൂറോ നേഷന്‍സ് കപ്പും നേടിയിട്ടുണ്ട്. ‘പോര്‍ച്ചുഗലിലെ ജനങ്ങളോട്… നമ്മുടെ ദേശീയ ടീമിന്റെ ഏഴാം നമ്പര്‍ ജഴ്‌സിയോട് വിടപറയാനുള്ള സമയമായിരിക്കുന്നു. ആ ജഴ്‌സി എന്റേത് മാത്രമാണെന്ന് ഒരിക്കലും ഞാന്‍ കരുതിയിട്ടില്ല. എന്നാല്‍ 23 വര്‍ഷക്കാലം അത് അണിയാനുള്ള ഭാഗ്യവും ഉത്തരവാദിത്തവും എനിക്ക് ലഭിച്ചു” വിരമിക്കല്‍ വിഡിയോയില്‍ റൊണാള്‍ഡോ പറഞ്ഞു.
ചേരാനെല്ലൂര്‍ വാഹനാപകട കേസില്‍ അപകടമുണ്ടാക്കിയ പതിനേഴുകാരന്റെ പിതാവായ ജഡ്ജിക്ക് മുന്‍കൂര്‍ ജാമ്യം. ഹൈക്കോടതിയാണ് മുന്‍കൂര്‍ ജാമ്യം അനുവദിച്ചത്. അതേസമയം പതിനേഴുകാരന്റെ ജാമ്യം റദ്ദാക്കണമെന്ന പ്രോസിക്യൂഷന്റെ ഹര്‍ജി പരിഗണിച്ച എറണാകുളം അഡീഷണല്‍ സെഷന്‍സ് കോടതി പ്രോസിക്യൂഷനോട് ഒരുകൂട്ടം ചോദ്യങ്ങള്‍ ഉയര്‍ത്തി.
ജുവനൈല്‍ ജസ്റ്റിസ് ബോര്‍ഡിന് എതിരായ അപ്പീല്‍ സെഷന്‍സ് കോടതിയില്‍ ഹാജരാക്കിയതിനെ കോടതി വിമര്‍ശിച്ചു. സമാനമായ കേസില്‍, മനപ്പൂര്‍വമല്ലാത്ത നരഹത്യ, മരണത്തിന് കാരണമായേക്കാവുന്ന അശ്രദ്ധ തുടങ്ങിയ വകുപ്പുകള്‍ നേരത്തെ ചുമത്തിയിട്ടുണ്ടോ എന്നും കോടതി അന്വേഷണ ഉദ്യോഗസ്ഥനോട് ചോദിച്ചു. അത്തരം എഫ്‌ഐആറുകള്‍ ഉണ്ടെങ്കില്‍ ഒരു മണിക്കൂര്‍ സമയത്തിനകം ഹാജരാക്കാനും കോടതി ആവശ്യപ്പെട്ടു.
കേസില്‍ ജഡ്ജി തെളിവുനശിപ്പിച്ചെന്ന ആരോപണത്തില്‍ മരിച്ച ജയബാലകൃഷ്ണന്റെ മകള്‍ ഭദ്രകീര്‍ത്തി ക്രൈംബ്രാഞ്ചിന് മൊഴി നല്‍കി. സിസിടിവി ദൃശ്യങ്ങള്‍ അടക്കം കൈമാറിയെന്നും അന്വേഷണത്തില്‍ പ്രതീക്ഷയുണ്ടെന്നും ഭദ്രകീര്‍ത്തി പറഞ്ഞു. പതിനേഴുകാരന്‍ ഓടിച്ച് വാഹനമിടിച്ച് അപകടമുണ്ടായ ശേഷം പിതാവായ അഡീഷണല്‍ ജില്ലാ ജഡ്ജി സ്ഥലത്തെത്തി ഏറെ നേരം ചെലവഴിച്ചെന്ന് ആരോപണം ഉണ്ടായിരുന്നു.
പാങ്ങപ്പാറ അഭിറാം കൊലപാതകത്തില്‍ ഉമറിന്റെ പെണ്‍ സുഹൃത്ത് ഐശ്വര്യ അറസ്റ്റില്‍. ചോദ്യംചെയ്യലിന് ശേഷം അറസ്റ്റ് രേഖപ്പെടുത്തി. കേസില്‍ തെളിവ് നശിപ്പിക്കാന്‍ ഐശ്വര്യ കൂട്ടുനിന്നെന്ന് പൊലീസ് വ്യക്തമാക്കി.മുഖ്യപ്രതി ഉമറിനൊപ്പം ?ഗൂഢാലോചന നടത്തിയെന്ന കുറ്റമാണ് ചുമത്തിയിരിക്കുന്നത്. വ്യക്തമായ ആസൂത്രണത്തോടെയാണ് കൊലപാതകം നടത്തിയതെന്ന് പൊലീസ് കണ്ടെത്തിയിട്ടുണ്ട്.
രണ്ടാം പ്രതിയായ ഉമറിന് കൂട്ട് നിന്നത് ഉമറിന്റെ സുഹൃത്തായ ഐശ്വര്യയെന്ന് പൊലീസ് കണ്ടെത്തിയിട്ടുണ്ട്. കൊലപാതകം നടക്കുന്ന സമയത്ത് ഉമര്‍ വീട്ടില്‍ തന്നെയുണ്ടായിരുന്നെന്ന് വരുത്തി തീര്‍ത്ത് അന്വേഷണത്തെ വഴി തെറ്റിക്കാന്‍ ഇരുവരും ശ്രമിച്ചു.
ഇതിനായി ഐശ്വര്യ ഉമറിനെ ഫോണില്‍ വിളിക്കുകയും കൃത്യം നടക്കുന്നത് വരെ ഫോണ്‍ സംഭാഷണം തുടരുകയും ചെയ്തുവെന്ന് പൊലീസ് പറയുന്നു.ഉമര്‍ കാപ്പാ കേസില്‍ ശിക്ഷ അനുഭവിച്ചയാളാണ്. മോഷണക്കേസില്‍ പ്രതിയായിരുന്നു ഒന്നാം പ്രതിയായ പതിനേഴുകാരന്‍.
സമൂഹ മാധ്യമങ്ങള്‍ക്ക് കടിഞ്ഞാണിടാന്‍ കേന്ദ്രസര്‍ക്കാര്‍ നീക്കം. ഇതിനായി ഐടി നിയമത്തില്‍ മാറ്റം കൊണ്ടുവരാനാണ് ആലോചന. ഐടി ആക്ടിലെ 79-ാം വകുപ്പില്‍ മാറ്റങ്ങളാണ് പരിഗണനയില്‍. ഉപയോക്താക്കള്‍ പോസ്റ്റ് ചെയ്യുന്ന ഉള്ളടക്കങ്ങള്‍ക്ക് കമ്പനികള്‍ നേരിട്ട് നിയമപരമായി ഉത്തരവാദികളാകില്ലെന്ന നിലവിലെ ചട്ടം മാറ്റിയേക്കും. വിവാദപരമോ നിയമവിരുദ്ധമോ ആയ ഉള്ളടക്കങ്ങളുടെ പേരില്‍ കമ്പനികള്‍ക്കെതിരെ നേരിട്ട് കേസെടുക്കാവുന്ന തരത്തിലാണ് മാറ്റങ്ങള്‍ പരിഗണിക്കുന്നത്.
എക്സ്, യൂട്യൂബ്, മെറ്റ എന്നീ സോഷ്യല്‍ മീഡിയ ഭീമന്മാരെ ലക്ഷ്യമിട്ടാണ് പുതിയ നീക്കം. ???സോഷ്യല്‍ മീഡിയാ പ്ലാറ്റ്ഫോമുകള്‍ വെറും കണ്ടന്റ് കാരിയര്‍മാര്‍ മാത്രമല്ലെന്ന് കേന്ദ്രം. അല്‍ഗോരിതം വഴി ഉള്ളടക്കം നിയന്ത്രിക്കുന്നതിനും പങ്കുവെക്കുന്നതിനും സമൂഹ? മാധ്യമ അക്കൗണ്ടുകള്‍ക്കും പ്ലാറ്റ്‌ഫോമുകള്‍ക്കും പങ്കുണ്ടെന്ന് കേന്ദ്രം പറയുന്നു. നിയമ പരിരക്ഷ പിന്‍വലിക്കുന്നതോടെ പ്ലാറ്റ്ഫോമുകള്‍ക്കെതിരെ കേന്ദ്രത്തിന് നേരിട്ട് കെസെടുക്കാന്‍ സാധിക്കും. നിലവില്‍ കേന്ദ്രം നോട്ടീസ് നല്‍കുന്നതനുസരിച്ച് സമൂഹമാധ്യമ പോസ്റ്റുകള്‍ പിന്‍വലിക്കുകയായിരുന്നു ചെയ്യുന്നത്.
ഉപയോക്താക്കള്‍ കാണുന്ന ഉള്ളടക്കം എന്തായിരിക്കണമെന്ന് സജീവമായി തീരുമാനിക്കുന്ന സോഷ്യല്‍ മീഡിയ കമ്പനികള്‍ക്ക് പകരം, വിവരങ്ങള്‍ കൈമാറുകയോ എത്തിക്കുകയോ മാത്രം ചെയ്യുന്ന സേവനങ്ങള്‍ക്ക്-ഉദാഹരണത്തിന് ഇന്റര്‍നെറ്റ് സേവന ദാതാക്കള്‍ (ISPs), ടെലികോം സേവന ദാതാക്കള്‍ (TSPs), പിയര്‍-ടു-പിയര്‍ മെസേജിംഗ് പ്ലാറ്റ്ഫോമുകള്‍ എന്നിവയ്ക്ക്-മാത്രമായി ഈ സംരക്ഷണം പരിമിതപ്പെടുത്താമോ എന്ന് സര്‍ക്കാര്‍ പരിശോധിച്ചുവരികയാണെന്നാണ് വിവരം.
കഴിഞ്ഞ ഏതാനും മാസങ്ങളായി സര്‍ക്കാരും സോഷ്യല്‍ മീഡിയ കമ്പനികളും തമ്മിലുള്ള അഭിപ്രായവ്യത്യാസങ്ങള്‍ കൂടുതല്‍ രൂക്ഷമായിരിക്കുകയാണ്. വിദ്യാര്‍ത്ഥി പ്രക്ഷോഭങ്ങള്‍ക്കിടയില്‍, പ്രധാനമന്ത്രി നരേന്ദ്ര മോദി അപ്ലോഡ് ചെയ്ത ഒരു വീഡിയോ ഫേസ്ബുക്ക് ഇന്ത്യയില്‍ താല്‍ക്കാലികമായി തടഞ്ഞുവെച്ചതിനെത്തുടര്‍ന്ന്, ജൂലൈ മാസത്തില്‍ ഐടി മന്ത്രാലയം മെറ്റയുടെ ആഗോള നയ വിഭാഗം ഉന്നത ഉദ്യോഗസ്ഥരെ വിളിച്ചുവരുത്തിയിരുന്നു.
മില്‍മ തിരുവനന്തപുരം മേഖല യൂണിയന്‍ പിരിച്ചുവിട്ട നടപടിയില്‍ സംസ്ഥാന സര്‍ക്കാരിന് തിരിച്ചടി. തിരുവനന്തപുരം മേഖല യൂണിയന്‍ പിരിച്ചുവിട്ട സര്‍ക്കാര്‍ ഉത്തരവ് ഹൈക്കോടതി റദ്ദാക്കി. അഡിമിനിസ്ട്രിറ്റീവ് ഭരണം മാറ്റി, പഴയ ഭരണസമിതിയെ ഉടന്‍ പുനഃസ്ഥാപിക്കാനും ഹൈക്കോടതി ഡിവിഷന്‍ ബെഞ്ച് ഉത്തരവിട്ടു. ഭരണസമിതിയംഗങ്ങള്‍ നല്‍കിയ അപ്പീലിലാണ് ഹൈക്കോടതി നിര്‍ദ്ദേശം.
തെരഞ്ഞെടുക്കപ്പെട്ട ഭരണസമിതിയെ, പുറത്താക്കിയത് നടപടിക്രമങ്ങള്‍ പാലിക്കാതെ എന്നാണ് കോടതി ഉത്തരവിലുള്ളത്. നോട്ടീസ് നല്‍കുകയോ ഹിയറിംഗ് നടത്തുകയോ ചെയ്തില്ലെന്ന കോടതി ഉത്തരവില്‍ ചൂണ്ടിക്കാട്ടി. ഭരണസമിതിയംഗങ്ങളെ കേട്ട് നടപടിക്രമങ്ങള്‍ പാലിച്ച് സര്‍ക്കാരിന് പുതിയ ഉത്തരവിറക്കാമെന്നും കോടതി വിധിയില്‍ പറയുന്നു. ശബരിമലയ്ക്ക് നല്‍കിയ നെയ്യിലെ ക്രമക്കേട് ചൂണ്ടിക്കാട്ടിയാണ് എല്‍ഡിഎഫ് ഭരിക്കുന്ന മില്‍മ തിരുവനന്തപുരം യൂണിയനെ സംസ്ഥാന സര്‍ക്കാര്‍ പിരിച്ചുവിട്ടത്. നേരത്തെ സര്‍ക്കാര്‍ ഉത്തരവ് സിംഗിള്‍ ബെഞ്ച് ശരിവച്ചിരുന്നു. ഇതിനെതിരെ ഡിവിഷന്‍ ബെഞ്ചില്‍ ഭരണസംതിയംഗങ്ങള്‍ നല്‍കിയ അപ്പീലിലാണ് സര്‍ക്കാരിന് തിരിച്ചടി.
ശബരിമലയിലേക്കുള്ള നെയ്യ് വിതരണവുമായി ബന്ധപ്പെട്ട ആരോപണങ്ങളുടെ പശ്ചാത്തലത്തില്‍ 2026 ജൂലൈ 25നാണ് മില്‍മ തിരുവനന്തപുരം മേഖലാ യൂണിയന്റെ ഭരണസമിതിയെ പിരിച്ചുവിട്ടത്. കേരള സഹകരണ സംഘം നിയമത്തിലെ 32-ാം വകുപ്പ് പ്രകാരമായിരുന്നു നടപടി. എല്‍ഡിഎഫ് ഭരണസമിതിക്ക് കീഴിലായിരുന്നു തിരുവനന്തപുരം മേഖല യൂണിയന്‍ പ്രവര്‍ത്തിച്ചിരുന്നത്.
സംസ്ഥാന വനം വകുപ്പിന്റെ അംബാസഡര്‍മാരായി ചലച്ചിത്ര താരങ്ങളായ പൃഥ്വിരാജ് സുകുമാരനെയും കുഞ്ചാക്കോ ബോബനേയും നിയമിച്ചു. ഇതുസംബന്ധിച്ച ഉത്തരവ് പുറത്തിറങ്ങി. വന സംരക്ഷണം, വന്യജീവി പരിപാലനം, പരിസ്ഥിതി സന്തുലിതാവസ്ഥ, ജൈവവൈവിധ്യ സംരക്ഷണം എന്നിവയെക്കുറിച്ച് പൊതുജനങ്ങളില്‍ അവബോധം വളര്‍ത്തുകയാണ് പ്രധാന ലക്ഷ്യം.
വനം വകുപ്പിന്റെ വിവിധ പദ്ധതികളും പൊതുജനസേവനങ്ങളും കൂടുതല്‍ ആളുകളിലേക്ക് എത്തിക്കുന്നതിനായി ബോധവല്‍ക്കരണ പരിപാടികള്‍, റെക്കോര്‍ഡ് ചെയ്ത സന്ദേശങ്ങള്‍, ഡിജിറ്റല്‍ പ്രചാരണങ്ങള്‍ എന്നിവയിലെല്ലാം ഇരുവരും പങ്കാളികളാകും. വനം വകുപ്പ് മേധാവിയുടെ നിര്‍ദേശത്തെത്തുടര്‍ന്ന് സ്വകാര്യ സേവന അടിസ്ഥാനത്തിലാണ് ഇരുവരെയും അംബാസഡര്‍മാരായി നിയമിച്ചിരിക്കുന്നത്.
സമഗ്ര വോട്ടര്‍ പട്ടിക പരിഷ്‌കരണവുമായി ബന്ധപ്പെട്ട് ഫോം 6 ലെ നിര്‍ണായക തിരുത്തല്‍ പൂര്‍ത്തിയാക്കി തിരഞ്ഞെടുപ്പ് കമ്മിഷന്‍. ഫോം 6 ന്റെ ഓണ്‍ലൈന്‍ പതിപ്പില്‍ നിന്ന് SIR ഡിക്ലറേഷന്‍ നീക്കം ചെയ്തു. നേരത്തെ രണ്ട് വിഭാഗങ്ങള്‍ ഒറ്റ ഫോമിന്റെ ഭാഗമാക്കിയത് നിയമവിരുദ്ധമാണെന്ന് തിരഞ്ഞെടുപ്പ് കമ്മിഷണര്‍മാര്‍ ചൂണ്ടിക്കാട്ടിയിരുന്നു. വോട്ടര്‍മാര്‍ നല്‍കേണ്ട സത്യവാങ്മൂലം ഒഴിവാക്കി വ്യത്യസ്ത ഫോം ആക്കി നിലനിര്‍ത്തും.
ഡിക്ലറേഷന്‍ പ്രകാരം അവസാന SIR ലെ വോട്ടറിന്റെ വിവരങ്ങളോ, മാതാപിതാക്കളുടെ വിവരങ്ങളോ നല്‍കാതെ എന്റോള്‍മെന്റുമായി മുന്നോട്ട് പോകാന്‍ കഴിഞ്ഞിരുന്നില്ല. തിരഞ്ഞെടുപ്പ് കമ്മിഷന്‍ സുപ്രീം കോടതിയില്‍ സമര്‍പ്പിച്ച സത്യവാങ്മൂലത്തിലും ഫോം 6 ല്‍ നിന്ന് ഡിക്ലറേഷന്‍ ഒഴിവാക്കും എന്ന് അറിയിച്ചിരുന്നു.
ഹൈക്കോടതി ഉത്തരവിനെതിരെ സുപ്രീംകോടതിയെ സമീപിച്ച് കാലടി ശ്രീ ശങ്കരാചാര്യ സംസ്‌കൃത സര്‍വകലാശാലയിലെ സസ്‌പെന്‍ഷനിലായ വിദ്യാര്‍ഥികള്‍. പരീക്ഷയെഴുതാന്‍ അനുമതി നല്‍കിയ ഹൈക്കോടതി സിംഗിള്‍ ബെഞ്ച് ഉത്തരവ് ഡിവിഷന്‍ ബെഞ്ച് റദ്ദാക്കിയതിനെ തുടര്‍ന്നാണ് എസ്എഫ്‌ഐ പ്രവര്‍ത്തകര്‍ സുപ്രീംകോടതിയില്‍ ഹര്‍ജി നല്‍കിയത്. സസ്‌പെന്‍ഷന്‍ നേരിട്ട 16 പേരില്‍ 7 പേര്‍ക്ക് ഇന്ന് പരീക്ഷ ആരംഭിക്കും. ആകെ 10 പേര്‍ക്കാണ് ഈ ആഴ്ച പരീക്ഷ നടക്കാനിരിക്കുന്നത്.
വിദ്യാര്‍ഥികള്‍ മാപ്പപേക്ഷ എഴുതി കൊടുത്ത് തെറ്റ് ഉള്‍ക്കൊണ്ടാല്‍ പരീക്ഷ എഴുതാന്‍ അവസരമൊരുക്കണമെന്ന് തന്നെയാണ് സര്‍ക്കാരിന്റെയും സര്‍വകലാശാലയുടെയും നിലപാട്. ഇനിയും അതിന് സാധ്യതയുണ്ടെന്ന് ഉന്നതവിദ്യാഭ്യാസ മന്ത്രി റോജി എം ജോണ്‍ പ്രതികരിച്ചിരുന്നു. സര്‍വകലാശാലയുടെ സുഗമമായ നടത്തിപ്പിന് തടസം സൃഷ്ടിക്കുന്ന തരത്തില്‍ സമരങ്ങള്‍ പാടില്ലെന്നും മന്ത്രി പറഞ്ഞു.
അതേസമയം, സര്‍വകലാശാലയില്‍ സമരം ഇന്നും തുടരും. വിവാദത്തിന് ആസ്പദമായ നാടകം സെക്രട്ടറിയേറ്റിന് മുന്നിലും ഇന്ന് അവതരിപ്പിക്കും. നിലവിലെ വിവാദ സംഭവങ്ങള്‍ കൂടി കൂട്ടിച്ചേര്‍ത്ത് എസ്എഫ്‌ഐ പ്രവര്‍ത്തകര്‍ സര്‍വകലാശാലയില്‍ ഇന്നലെ വീണ്ടും നാടകം അവതരിപ്പിച്ചിരുന്നു.
