latest news

കാലിക്കറ്റ് സര്‍വകലാശാലയില്‍ വനിതാ സെക്യൂരിറ്റി ജീവനക്കാരുടെ സേവനം ആരംഭിച്ചു. തിരഞ്ഞെടുത്തവരിലെ 25 പേരില്‍ 22 പേരാണ് ആദ്യദിനം ജോലിയില്‍ പ്രവേശിച്ചത്.സര്‍വകലാശാല രൂപവത്കൃതമായി അരനൂറ്റാണ്ടിനുശേഷമാണ് വനിതാ സുരക്ഷാ ജീവനക്കാരുടെ നിയമനം നടപ്പിലായത്. പരീക്ഷാഭവന്‍, ടാഗോര്‍ നികേതന്‍, ഭരണകാര്യാലയം, വനിതാ ഹോസ്റ്റല്‍, പ്രവേശനകവാടം തുടങ്ങിയ പ്രധാന ഇടങ്ങളിലാണ് വനിതാ സുരക്ഷാ ജീവനക്കാരെ നിയോഗിച്ചിരിക്കുന്നത്.രാവിലെ 10 മണി മുതല്‍ വൈകീട്ട് 5 മണി വരെയാണ് സേവനം.

സംസ്ഥാനത്ത് ഇന്ന് സ്വര്‍ണവില ഇടിഞ്ഞു. ഒരു പവന്‍ സ്വര്‍ണത്തിന് 80 രൂപയാണ് ഇന്ന് കുറഞ്ഞത്. ശനിയാഴ്ച ഒരു പവന്‍ സ്വര്‍ണത്തിന് 120 രൂപ ഉയര്‍ന്നിരുന്നു. ഒരു പവന്‍ സ്വര്‍ണത്തിന്റെ ഇന്നത്തെ വിപണി വില 36680 രൂപയാണ്.

ഒരു ഗ്രാം 22 കാരറ്റ് സ്വര്‍ണത്തിന്റെ വില 10 രൂപ കുറഞ്ഞു. ശനിയാഴ്ച 15 രൂപ ഉയര്‍ന്നിരുന്നു. ഒരു ഗ്രാം 22 കാരറ്റ് സ്വര്‍ണത്തിന്റെ ഇന്നത്തെ വിപണി വില 4585 രൂപയാണ്. 18 കാരറ്റ് സ്വര്‍ണത്തിന്റെ വിലയും കുറഞ്ഞു. 10 രൂപയാണ് കുറഞ്ഞത്. ഒരു ഗ്രാം 18 കാരറ്റ് സ്വര്‍ണത്തിന്റെ ഇന്നത്തെ വിപണി വില 3780 രൂപയാണ്.

തില്ലങ്കേരി: മച്ചൂര്‍മലയില്‍ സ്റ്റേഡിയം നിര്‍മ്മിക്കുന്നതിനായി സ്റ്റേഡിയം നിര്‍മ്മാണ കമ്മറ്റി നടപ്പിലാക്കിയ സ്വര്‍ണ്ണ സമ്മാന പദ്ധതിയുടെ നറുക്കെടുപ്പ് മച്ചൂര്‍മലയില്‍ നടന്നു. തില്ലങ്കേരി മുന്‍ പഞ്ചായത്ത് പ്രസിഡന്റ് കെ എ ഷാജി, ഇരിട്ടി ബ്ലോക്ക് പഞ്ചായത്ത് അംഗം സി സനീഷ് എന്നിവര്‍ ചേര്‍ന്ന് നറുക്കെടുത്തു. മുന്‍ പഞ്ചായത്ത് അംഗം സി രാജന്‍ അധ്യക്ഷത വഹിച്ചു. വാര്‍ഡ് മെമ്പര്‍ കെ കുമാരന്‍,കെ കെ പ്രീത,പി സുധീഷ്,ടി അജേഷ് തുടങ്ങിയവര്‍ സംബന്ധിച്ചു.ഒന്നാം സമ്മാനമായ ഒരു പവന്‍ സ്വര്‍ണ്ണ സമ്മാനം ആദിയ സനീഷും,രണ്ടാം സമ്മാനമായ സ്മാര്‍ട്ട് ഫോണ്‍ പ്രമീള ചന്ദ്രനും നേടി.600 ഓളം ആളുകളാണ് സമ്മാനപദ്ധതിയില്‍ അംഗങ്ങളായത്.സമ്മാനം ലഭിക്കാത്തവര്‍ക്ക് 3 ഫൈബര്‍ കസേരകളും നല്‍കി.

തില്ലങ്കേരി: കുണ്ടെരിഞ്ഞാല്‍ പൗര്‍ണമി & പൂര്‍ണിമ സംഘത്തിന്റെ നേതൃത്വത്തില്‍ എന്‍.വി കുഞ്ഞിരാമന്‍ നമ്പ്യാര്‍, എന്‍.വി ബാലകൃഷ്ണന്‍ എന്നിവരുടെ നിര്യാണത്തില്‍ അനുശോചന യോഗം ചേര്‍ന്നു. മുന്‍ ഗ്രാമ പഞ്ചായത്തംഗം യു.സി നാരായണന്‍ ഉദ്ഘാടനം ചെയ്തു. കെ.പുരുഷു, പി പ്രദീപന്‍, സി.ദിനേശ്, വി.രതീഷ്, വി.മോഹനന്‍ എന്നിവര്‍ സംസാരിച്ചു.

കേളകം: അമ്പായത്തോട് മുതല്‍ മണത്തണ വരെയുള്ള റോഡിന്റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ടുകൊണ്ട് അമ്പായത്തോട് കെ.സി.വൈ.എം, സി.എം.എല്‍ എന്നീ സംഘടനകളുടെ സംയുക്താഭിമുഖ്യത്തില്‍ പ്രതിഷേധ സദസും, അധികാരികള്‍ കാണിക്കുന്ന അലംഭാവത്തിനെതിരെ റോഡിലെ കുഴിയില്‍ പ്രതീകാത്മക വാഴ നടീലും നടന്നു. ദിനംപ്രതി നിരവധിയായ വാഹനങ്ങളും വഴിയാത്രക്കാരും സഞ്ചരിക്കുന്ന പാതയിലെ വലിയ ഗര്‍ത്തങ്ങളില്‍ വീണ് നിരവധിയായ വാഹനങ്ങളാണ് അപകടത്തില്‍പ്പെടുന്നത്. പ്രതിഷേധ പരിപാടികള്‍ക്ക് കെ.സി.വൈ.എം അമ്പായത്തോട് യൂണിറ്റ് പ്രസിഡന്റ് മെല്‍ബിന്‍ കല്ലടയില്‍, സെക്രട്ടറി ഗോഡ്‌സണ്‍ ഇലഞ്ഞിമറ്റത്തില്‍, സി.എം.എല്‍ പ്രസിഡന്റ് ഷെറിന്‍ അഞ്ചേരി, പ്രവര്‍ത്തകരായ ഫെബിന്‍ കൊച്ചുതാഴത്ത്, ഷോണ്‍ കവികല്ലറക്കല്‍,അലന്‍ ചെരുവിളയില്‍, നിജൂല്‍ റെജി, ക്രിസ്റ്റി അഞ്ചേരി, പ്രിന്‍സ് പയ്യമ്പള്ളി, അജിന്‍ പള്ളിത്താഴത്ത്, ഡോണ്‍ കവികല്ലറക്കല്‍ എന്നിവര്‍ നേതൃത്വം നല്‍കി.

ലഹരിക്കെതിരെ സംസ്ഥാന സര്‍ക്കാര്‍ നയിക്കുന്ന ക്യാമ്പയിന്‍ പൊതുജനങ്ങള്‍ ഏറ്റെടുക്കണമെന്ന് കേരള നിയമസഭാ സ്പീക്കര്‍ അഡ്വ. എ.എന്‍ ഷംസീര്‍. ബാല സൗഹൃദ കേരളം നാലാം ഘട്ടം പരിപാടിയുടെ സംസ്ഥാന തല ഉദ്ഘാടനം നിര്‍വ്വഹിച്ച് സംസാരിക്കുകയായിരുന്നു അദ്ദേഹം. കുട്ടികള്‍ വലിയ തോതില്‍ ലഹരിക്ക് അടിമപ്പെടുന്ന കാലമാണിത്. കുട്ടികള്‍ ലഹരി വസ്തുക്കള്‍ ഉപയോഗിക്കുന്നില്ലെന്ന് രക്ഷിതാക്കളും അധ്യാപകരും ഉറപ്പ് വരുത്തണം. വ്യാജ പോക്‌സോ കേസുകള്‍ ഭയന്ന് അധ്യാപകര്‍ വിദ്യാലയങ്ങളില്‍ പലതും കണ്ടില്ലെന്ന് വെക്കുകയാണ്. വിദ്യാര്‍ത്ഥികളുടെ പ്രശ്‌നങ്ങള്‍ അധ്യാപകര്‍ രക്ഷിതാവിനെ സ്വകാര്യമായി അറിയിക്കണം. തന്റെ കുട്ടിക്ക് ഏതെങ്കിലും തരത്തിലുള്ള സ്വഭാവ ദൂഷ്യമുണ്ടെന്ന് മനസിലായാല്‍ അത് മറച്ച് വെക്കാതെ വിദഗ്ദാഭിപ്രായം തേടണം. ഉപയോഗിച്ചാല്‍ മറ്റാര്‍ക്കും മനസിലാക്കാന്‍ സാധിക്കാത്ത പലവിധ മയക്കുമരുന്നുകള്‍ വിദ്യാര്‍ത്ഥികളുടെ ഇടയില്‍ സുലഭമാണ്. ഇതില്‍ പെടാതെ കുട്ടികളെ വളര്‍ത്തിയെടുക്കുന്നതിന് വീടുകളില്‍ ബാലസൗഹൃദ അന്തരീക്ഷം സൃഷ്ടിക്കണം. കുട്ടികള്‍ക്ക് മുന്നില്‍ വച്ച് അച്ഛനമ്മമാര്‍ വഴക്കിടുമ്പോള്‍ അതവരുടെ സ്വഭാവ രൂപീകരണത്തില്‍ മോശമായി ബാധിക്കുമെന്നും അദ്ദേഹം കൂട്ടിച്ചേര്‍ത്തു. കേരള സംസ്ഥാന ബാലാവകാശ സംരക്ഷണ കമ്മീഷന്റെ നേതൃത്വത്തില്‍ ബാലസംരക്ഷണ സമിതികളുടെ ശാക്തീകരണം, ബാലസൗഹൃദ തദ്ദേശ ഭരണം എന്നിവ ഉള്‍പ്പെടുത്തി കേരളത്തിലുടനീളം നടത്തി വരുന്ന ബൃഹദ് പ്രചാര പദ്ധതിയാണ് ബാലസൗഹൃദ കേരളം. ബാലസംരക്ഷണ സമിതികളുടെ രൂപീകരണം, സ്‌കൂളുകളിലെ കൊഴിഞ്ഞുപോക്ക് ഇല്ലാതാക്കുന്നതിന് ആവശ്യമായ പ്രവര്‍ത്തനം നടത്തുക, ലൈംഗികാതിക്രമങ്ങളില്‍ നിന്ന് കുട്ടികളെ സംരക്ഷിക്കുക, കുട്ടികള്‍ക്ക് നേരെയുണ്ടാകുന്ന പീഡനങ്ങള്‍ ഇല്ലാതാക്കുക, മദ്യം -മയക്കുമരുന്ന് എന്നിവയുടെ ഉപയോഗത്തില്‍ നിന്ന് കുട്ടികളെ മോചിപ്പിക്കുക, ബാലവേല – ഭിക്ഷാടനം എന്നിവ തടയുക, ശൈശവ വിവാഹം ഇല്ലാതാക്കുക, കുട്ടികളുടെ ആത്മഹത്യകള്‍ ഇല്ലാതാക്കുക, ലിംഗസമത്വം സൃഷ്ടിക്കുക, ശാസ്ത്രീയ അവബോധം വളര്‍ത്തുക തുടങ്ങിയവയ്ക്കുള്ള പദ്ധതികള്‍ ആവിഷ്‌ക്കരിച്ച് നടപ്പാക്കുകയാണ് നാലാം ഘട്ടത്തില്‍ പദ്ധതി ലക്ഷ്യം വെക്കുന്നത്. കേരള സംസ്ഥാന ബാലാവകാശ സംരക്ഷണ കമ്മീഷന്റെ നേതൃത്വത്തില്‍ തലശ്ശേരി ബ്ലോക്ക് പഞ്ചായത്ത് ഇഎംഎസ് ഓഡിറ്റോറിയത്തില്‍ നടന്ന പരിപാടിയില്‍ സംസ്ഥാന ബാലാവകാശ സംരക്ഷണ കമ്മീഷന്‍ അധ്യക്ഷന്‍ കെ.വി മനോജ് കുമാര്‍ അധ്യക്ഷത വഹിച്ചു. തലശ്ശേരി ബ്ലോക്ക് പഞ്ചായത്ത് പ്രസിഡണ്ട് സി പി അനിത, തലശ്ശേരി ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷ രജിത പ്രദീപ്, തലശ്ശേരി ബി.ഡി.ഒ അഭിഷേക് കുറുപ്പ്, തലശ്ശേരി സി.ഡി.പി.ഒ എം ശ്രീജ എന്നിവര്‍ സംസാരിച്ചു. ഗുഡ് പാരന്റിംഗ് എന്ന വിഷയത്തില്‍ മജീഷ്യന്‍ ഗോപിനാഥ് മുതുകാട്, ബാലാവകാശ സംരക്ഷണ നിയമങ്ങള്‍ – സംസ്ഥാന ബാലാവകാശ കമ്മീഷന്‍ അംഗം ശ്യാമളാദേവി, ബാലസംരക്ഷണ സമിതികളുടെ ശാക്തീകരണം- ജില്ലാ ശിശു സംരക്ഷണ ഓഫീസര്‍ കെ.വി രജീഷ എന്നിവര്‍ ക്ലാസുകളെടുത്തു.

കൊട്ടിയൂര്‍: ഭാരത് ജോഡോ യാത്രയുമായി ബന്ധപ്പെട്ട് കൊട്ടിയൂര്‍ മണ്ഡലം 147-ാം ബൂത്ത് കണ്‍വെന്‍ഷന്‍ പന്നിയാംമലയില്‍ നടന്നു. ബൂത്ത് പ്രസിഡണ്ട് ശാര്‍ങ്ധരന്‍ നായര്‍ അധ്യക്ഷത വഹിച്ചു. ബ്ലോക്ക് പ്രസിഡണ്ട് സുരേഷ് ചാലാറാത്ത്, കെ.പി.സി.സി മെമ്പര്‍ ലിസി ജോസഫ്, ജോയി ഓരത്തേല്‍, സണ്ണി ഓരത്തേല്‍, എം.ജി ഷിജു, രജീഷ് കുളങ്ങര എന്നിവര്‍ സംസാരിച്ചു. ഭാരത് ജോഡോ യാത്രയുമായി ബന്ധപ്പെട്ട തുക ജോയി ഓരത്തേലിന് ബൂത്ത് പ്രസിഡണ്ട് കൈമാറി.

ഓണം ബംബര്‍ ഒന്നാം സമ്മാനം ലഭിച്ചത് മുട്ടത്തറ ശ്രീവരാഹം സ്വദേശി അനൂപിന് . ഇയാള്‍ ലോട്ടറി ഏജന്റിന്റെ സഹോദരനാണ്. TJ 750605 എന്ന നമ്പറിനാണ് സമ്മാനം. ഭഗവതി ഏജന്‍സിയുടെ പഴവങ്ങാടിയിലെ സബ് ഏജന്‍സിയില്‍ ആണ് ടിക്കറ്റ് വിറ്റിരിക്കുന്നത്. തങ്കരാജ് എന്ന ഏജന്റ് ആണ് ടിക്കറ്റ് വിറ്റിരിക്കുന്നത്. ഇന്നലെ വൈകുന്നേരം ആണ് സമ്മാനാര്‍ഹമായ ടിക്കറ്റ് വിറ്റുപോയിരിക്കുന്നത്.രണ്ടാം സമ്മാനമായ അഞ്ച് കോടി കോട്ടയത്ത് വിറ്റ ടിക്കറ്റിനാണ് ലഭിച്ചത്. TG 270912 എന്ന നമ്പറിനാണ് സമ്മാനം. പാലായിലെ മീനാക്ഷി ലക്കി സെന്റര്‍ ആണ് ഈ ടിക്കറ്റ് വിറ്റിരിക്കുന്നത്. ഇവിടെ നിന്നും പാപ്പച്ചന്‍ എന്ന കച്ചവടക്കാരന്‍ പത്ത് ടിക്കറ്റുകള്‍ എടുത്തിരുന്നു. ഇദ്ദേഹത്തിന്റെ കയ്യില്‍ നിന്നുമാണ് ടിക്കറ്റ് വിറ്റ് പോയിരിക്കുന്നത്.

കൊവിഡ് കാലത്ത് ഏര്‍പ്പെടുത്തിയ നിയന്ത്രണങ്ങള്‍ ലംഘിച്ചതിന്റെ പേരിലെടുത്ത കേസുകള്‍ പിന്‍വലിക്കാന്‍ നീക്കം. ഗൗരവമേറിയവ ഒഴികെയുള്ള കേസുകളാണ് പിന്‍വലിക്കുന്നത്. 29ന് ചേരുന്ന ഉന്നതതല യോഗം കേസുകളില്‍ പിന്‍വലിക്കുന്നതില്‍ അന്തിമ തീരുമാനമെടുക്കും.കൊവിഡ് കാലത്ത് രോഗം പടരാതിരിക്കാന്‍ സര്‍ക്കാര്‍ പലതരം നിയന്ത്രണങ്ങള്‍ ഏര്‍പ്പെടുത്തിയിരുന്നു. ഇതു ലംഘിക്കുന്നവര്‍ക്കെതിരെ കേസ് രജിസ്റ്റര്‍ ചെയ്യുകയും വാഹനങ്ങള്‍ പിടിച്ചെടുക്കുകയും ചെയ്തു. മാത്രമല്ല പിഴയും ഈടാക്കി. എന്നാല്‍ നിയന്ത്രണങ്ങള്‍ നീക്കിയ സാഹചര്യത്തില്‍ കേസുകള്‍ കൂടി പിന്‍വലിക്കാനാണ് ആലോചന. കേസുകളുമായി മുന്നോട്ട് പോകുന്നത് ജനങ്ങള്‍ക്ക് കൂടുതല്‍ ബുദ്ധിമുട്ടാകുമെന്ന വിലയിരുത്തലിന്റെ അടിസ്ഥാനത്തിലാണിത്. ഗൗരവമേറിയ ഒഴികെയുള്ള കേസുകളാണ് പിന്‍വലിക്കുന്നത്. കേസുകളുടെ വിശദാംശങ്ങള്‍ അറിയിക്കാന്‍ സംസ്ഥാന പോലീസ് മേധാവി ജില്ലാ പോലീസ് മേധാവിമാര്‍ക്ക് നിര്‍ദ്ദേശം നല്‍കി. ഇതു പരിശോധിച്ച ശേഷമാകും തീരുമാനം. നിയന്ത്രണം ലംഘിച്ചതിന് സംസ്ഥാനത്ത് ഏഴ് ലക്ഷം കേസുകളാണ് രജിസ്റ്റര്‍ ചെയ്തിട്ടുള്ളത്. നിയമലംഘനത്തിന് പിഴയായി 35 കോടിയോളം രൂപ ഈടാക്കിയിട്ടുണ്ട്.

ഭക്ഷ്യ സുരക്ഷാ വകുപ്പില്‍ നികുതിയിതര വരുമാനത്തില്‍ സര്‍വകാല റെക്കോര്‍ഡെന്ന് ആരോഗ്യ മന്ത്രി വീണാ ജോര്‍ജ്. ഈ വര്‍ഷം ഏപ്രില്‍ ഒന്നു മുതല്‍ ആഗസ്റ്റ് 31 വരെ 9.62 കോടി രൂപയാണ് നികുതിയിതര വരുമാനമായി ഭക്ഷ്യസുരക്ഷാ വകുപ്പിന് ലഭിച്ചത്. ഫുഡ് സേഫ്റ്റി ലൈസന്‍സ്, രജിസ്ട്രേഷന്‍ ഫീ ഇനത്തില്‍ 7.71 കോടി രൂപയും, ഫൈന്‍ വഴി 78.59 ലക്ഷം രൂപയും, അഡ്ജ്യൂഡിക്കേഷന്‍ മൂലമുള്ള ഫൈന്‍ വഴി 51.51 ലക്ഷം രൂപയും, കോടതി മുഖേനയുള്ള ഫൈന്‍ വഴി 3.28 ലക്ഷം രൂപയും, സാമ്പിള്‍ അനലൈസിസ് ഫീസായി 58.09 ലക്ഷം രൂപയുമാണ് ലഭ്യമായത്. മുന്‍ വര്‍ഷങ്ങളെ അപേക്ഷിച്ച് കേവലം അഞ്ച് മാസം കൊണ്ട് നികുതിയിതര വരുമാനത്തില്‍ ഇരട്ടിയിലധികം തുകയാണ് അധികമായി ലഭിച്ചത്. ഭക്ഷ്യ സുരക്ഷാ പരിശോധനകള്‍ ശക്തമാക്കിയതാണ് ഇതിന് കാരണമെന്നും മന്ത്രി വ്യക്തമാക്കി.