ഷൂട്ടിങ് പരിശീലകനും ദ്രോണാചാര്യ പുരസ്കാര ജേതാവുമായ പ്രൊഫ. സണ്ണി തോമസ് അന്തരിച്ചു. 85 വയസായിരുന്നു. കോട്ടയം ഉഴവൂരില് ഇന്നു രാവിലെയായിരുന്നു അന്ത്യം. 19 വര്ഷം ഇന്ത്യന് ഷൂട്ടിങ് ടീമിന്റെ മുഖ്യ പരിശീലകനായിരുന്നു. മുന് ദേശീയ ഷൂട്ടിങ് ചാമ്പ്യന് കൂടിയായ സണ്ണി തോമസിന്റെ പരിശീലനത്തില് ഇന്ത്യ നേടിയത് നൂറിലേറെ അന്താരാഷ്ട്ര മെഡലുകളാണ്.
ഒളിമ്പിക്സ് മെഡല് ജേതാവ് അഭിനവ് ബിന്ദ്രയുടെ പരിശീലകനായിരുന്നു സണ്ണി തോമസ്. കോട്ടയം ജില്ലയിലെ ഉഴവൂരിലുള്ള സെന്റ് സ്റ്റീഫന്സ് കോളേജില് ഇംഗ്ലീഷ് പ്രൊഫസറായിരുന്ന അദ്ദേഹം 1993 മുതല് 2012 വരെ 19 വര്ഷം ഇന്ത്യന് ഷൂട്ടിങ് ടീമിന്റെ പരിശീലകനായിരുന്നു. റൈഫിള് ഓപ്പണ് സൈറ്റ് ഇവന്റില് കേരളത്തില് നിന്നുള്ള മുന് ഇന്ത്യന് ദേശീയ ഷൂട്ടിങ് ചാമ്പ്യനാണ്.
