തിരുവല്ല കുറ്റൂരില് നവജാതശിശുവിനെ തട്ടുകടയില് ഉപേക്ഷിക്കപ്പെട്ട നിലയില് കണ്ടെത്തി. കുറ്റൂര് – മനക്കച്ചിറ റോഡില് റെയില്വേ അടിപ്പാതയ്ക്ക് സമീപത്തുള്ള തട്ടുകടയില് ഇന്ന് പുലര്ച്ചെ നാലുമണിയോടെയാണ് കുഞ്ഞിനെ ഉപേക്ഷിക്കപ്പെട്ട നിലയില് കണ്ടെത്തിയത്. കട ഉടമ ജയരാജന് ഉടന് തന്നെ പൊലീസില് വിവരം അറിയിക്കുകയായിരുന്നു. പൊലീസെത്തി ആംബുലന്സില് കുഞ്ഞിനെ തിരുവല്ല താലൂക്ക് ആശുപത്രിയിലേക്ക് മാറ്റി. കുഞ്ഞിന്റെ ആരോഗ്യനില തൃപ്തികരമാണെന്ന് ആശുപത്രി അധികൃതര് പറഞ്ഞു. കടയുടമ ജയരാജന് രാവിലെ തട്ടുകട തുറക്കാന് വന്നപ്പോഴാണ് കുഞ്ഞിനെ കണ്ടത്. കടയുടെ പിന്നില് തന്നെയുള്ള വീട്ടിലാണ് ജയരാജനും ഭാര്യ ഇന്ദുവും താമസിക്കുന്നത്.
