സംസ്ഥാനത്ത് കനത്ത ചൂടും, ഉഷ്ണതരംഗ മുന്നറിയിപ്പും തുടരുന്ന സാഹചര്യത്തില്
ജാഗ്രത നിര്ദേശവുമായി മുഖ്യമന്ത്രി പിണറായി വിജയന്. എല്ലാ സുരക്ഷ നിര്ദേശങ്ങളും കര്ശനമായി പാലിക്കണം പ്രതിസന്ധികള് നേരിടാന് സര്ക്കാര് സജ്ജമെന്ന് മുഖ്യമന്ത്രിയുടെ ഫേസ്ബുക്ക് കുറിപ്പ്.
താപനില 40 ഡിഗ്രി സെല്ഷ്യസിനു മുകളിലേക്ക് ഉയര്ന്ന പശ്ചാത്തലത്തില് പാലക്കാട്, കൊല്ലം, തൃശൂര് ജില്ലകളില് കേന്ദ്ര കാലാവസ്ഥാ വകുപ്പ് ഔദ്യോഗികമായി ഉഷ്ണതരംഗ മുന്നറിയിപ്പ് പ്രഖ്യാപിച്ചു. അന്തരീക്ഷത്തില് ഈര്പ്പം കൂടുതലായതിനാല് മറ്റ് ജില്ലകളിലും അനുഭവപ്പെടുന്ന ചൂട് വളരെ കൂടുതലാണ്. ക്ഷീണമോ സൂര്യാഘാതത്തിന്റെ ലക്ഷണങ്ങളോ തോന്നിയാല് ഉടന് തന്നെ വൈദ്യസഹായം തേടണം. മറ്റൊരാള്ക്ക് ബുദ്ധിമുട്ട് അനുഭവപ്പെടുന്നതായി കണ്ടാല് അവരെ ഉടന് തണലിലേക്ക് മാറ്റി കിടത്തുകയും ശരീരം തണുപ്പിക്കാന് ശ്രമിക്കുകയും വൈദ്യസഹായം ലഭ്യമാക്കുകയും ചെയ്യണമെന്ന് അദ്ദേഹം നിര്ദേശം നല്കി.
