ഇരിട്ടി: കൂട്ടുപുഴ പേരട്ടയിൽ വീട്ടുമുറ്റത്തെ എർത്ത് കമ്പിയിൽ നിന്നും ഷോക്കേറ്റ് യുവാവിന് ദാരുണാന്ത്യം. പേരട്ട കുണ്ടേരി ഉപദേശിക്കുന്നിലെ പനക്കൽ ഹൌസിൽ അഖിലേഷ് (26) ആണ് മരിച്ചത്. ബുധനാഴ്ച രാവിലെ വീട്ടു മുറ്റത്ത് സ്ഥാപിച്ച എർത്ത് കമ്പിക്ക് സമീപം മരിച്ചു കിടക്കുന്ന നിലയിലായിരുന്നു മൃതദേഹം കണ്ടെത്തിയത്. വീട്ടിൽ മൊബൈൽ കവറേജ് ലഭിക്കാത്തതിനാൽ ചൊവ്വാഴ്ച രാത്രി സമീപത്തെ വീട്ടിൽ പോയശേഷം 10.30തോടെയാണ് അഖിലേഷ് വീട്ടിൽ എത്തിക്കിടന്നത്‌. ഇതിനു ശേഷം വീട്ടിൽ നിന്നും പുറത്തിറങ്ങിയപ്പോൾ വീട്ടിലെ വൈദ്യുതി മെയിൻ സ്വിച്ച് ബോർഡിൽ നിന്നും മുറ്റത്ത് സ്ഥാപിച്ച മഴമൂലം നനഞ്ഞു കിടന്ന എർത്ത് കമ്പിയിൽ ചവിട്ടിയപ്പോൾ ഷോക്കേറ്റു മരിച്ചതാവാം എന്നാണ് നിഗമനം. പരിയാരം കണ്ണൂർ ഗവ. മെഡിക്കൽ കോളേജിലെ പോസ്റ്റ്മോർട്ടത്തിന് ശേഷം വ്യാഴാഴ്ച ഉച്ചയോടെ മൃതദേഹം വീട്ടിലെത്തിച്ച് സംസ്കരിച്ചു. പനക്കൽ മോഹനന്റേയും കുസുമത്തിന്റേയും മകനാണ്. സഹോദരങ്ങൾ : അനീഷ്, അഭിജിത്ത്.
