ഇരിട്ടി: വിദ്യാര്‍ത്ഥികള്‍ക്കുള്‍പ്പെടെ ലഹരി വില്‍പ്പന നടത്തുന്ന പുന്നാട് സ്വദേശി പിടിയില്‍.പുന്നാട് പുറിപ്പാറയിലെ എം.കെ ഹൗസില്‍ മുസ്തഫ (50)യെയാണ് ഇരിട്ടി എസ് ഐ ഷാജിയുടെ നേതൃത്വത്തിലുള്ള പൊലീസ് സംഘം എടക്കാനം വായനശാലയ്ക്ക് സമീപത്ത് വച്ച് പിടികൂടിയത്. ഇയാളില്‍ നിന്ന് 75 പാക്കറ്റ് ഹാന്‍സും 4000 രൂപയും കണ്ടെടുത്തു. കര്‍ണ്ണാടകയില്‍ നിന്നുള്‍പ്പെടെ ലഹരി ഉല്‍പ്പന്നങ്ങള്‍ കടത്തികൊണ്ടു വന്ന് ഇരിട്ടി മേഖലയിലെ കടകളിലും പ്രായപൂര്‍ത്തിയാകാത്ത വിദ്യാര്‍ത്ഥികള്‍ക്കും വില്‍പ്പന നടത്തുന്ന സംഘത്തിലെ പ്രധാനിയാണ് ഇയാളെന്നാണ് പൊലീസ് പറയുന്നത്.
