ഇത്തവണത്തെ സമാധാന നൊബേല്‍ ഇന്ത്യന്‍ വംശജ നവനേതം നവിപിള്ളൈയ്ക്ക്. രാജ്യാന്തരതലത്തില്‍ യുദ്ധവിരുദ്ധ പ്രവര്‍ത്തനങ്ങള്‍ക്ക് നേതൃത്വം നല്‍കിയത് പരിഗണിച്ചാണ് ദക്ഷിണാഫ്രിക്കന്‍ പൗരയായ നവനേതം നവിപിള്ളൈയ്ക്ക് അംഗീകാരം. മനുഷ്യാവകാശ ധ്വംസനങ്ങള്‍ക്കെതിരെ ധീരമായി പോരാടിയ വനിതയാണ് നവനേതം നവി പിള്ളൈയെന്ന് നോര്‍വീജിയന്‍ പാര്‍ലമെന്റ് കമ്മിറ്റി വിലയിരുത്തി.
ഇന്ത്യന്‍ തമിഴ് വംശജനായബസ് ഡ്രൈവറുടെ മകളായി 1941 സെപ്റ്റംബര്‍ 23-ന് ദക്ഷിണാഫ്രിക്കയിലെ ഡര്‍ബനിലാണ് ജനിച്ചത്. ഹാര്‍വാര്‍ഡ് സര്‍വകലാശാലയില്‍ ഉപരിപഠനം നടത്തിയ അവര്‍, 1988-ല്‍ ‘ഡോക്ടര്‍ ഓഫ് ജുറിഡിക്കല്‍ സയന്‍സ്’ ബിരുദം നേടി. 1995-ല്‍ അവര്‍ ദക്ഷിണാഫ്രിക്കയിലെ ഹൈക്കോടതിയിലേക്ക് നിയമിക്കപ്പെടുകയും, രാജ്യത്തെ നീതിന്യായ വ്യവസ്ഥയിലെ പ്രമുഖ വ്യക്തിത്വങ്ങളിലൊരാളായി മാറുകയും ചെയ്തു. 1999-ല്‍, റുവാണ്ടയ്ക്കായുള്ള അന്താരാഷ്ട്ര ക്രിമിനല്‍ ട്രൈബ്യൂണലിന്റെ (ICTR) ജഡ്ജിയായും പ്രസിഡന്റായും അവര്‍ നിയമിതയായി. തുടര്‍ന്ന് അന്താരാഷ്ട്ര ക്രിമിനല്‍ കോടതി ജയ്ജിയായും നിയമിതയായി. ഐക്യരാഷ്ട്രസംഘടനയുടെ മനുഷ്യാവകാശ ഹൈക്കമ്മീഷണറായിരുന്നു നവനേതം നവിപിള്ളൈ.
വയലിനിസ്റ്റ് ബാലഭാസ്‌കറിന്റെ മരണത്തില്‍ തുടരന്വേഷണം നടത്താന്‍ സിബിഐക്ക് നിര്‍ദേശം. രണ്ട് തവണ സിബിഐ അന്വേഷണം നടത്തി റിപ്പോര്‍ട്ട് നല്‍കിയിരുന്നു. ഇത് ചോദ്യം ചെയ്ത് കുടുംബം നല്‍കിയ ഹര്‍ജിയിലാണ് വീണ്ടും അന്വേഷണത്തിന് ഉത്തരവ് ഇട്ടത്. ഡിവൈഎസ്പി റാങ്കിലുള്ള ഉദ്യോഗസ്ഥര്‍ അന്വേഷിക്കാനാണ് നിര്‍ദേശം. ജസ്റ്റിസ് ഗിരിഷിന്റെ ബെഞ്ചണ് ഉത്തരവ് ഇട്ടത്. മരണത്തില്‍ ബാലഭാസ്‌കറിന്റെ മാതാപിതാക്കളുടെ സംശയവും പരിശോധിക്കണമെന്നും കോടതി നിര്‍ദേശിച്ചിട്ടുണ്ട്.
2018ലാണ് വാഹനാപകടത്തില്‍ ബാലഭാസ്‌കറും മകളും മരിച്ചത്. അപകടം നടന്ന ഉടന്‍ തന്നെ ദുരൂഹതകള്‍ ആരോപിക്കപ്പെട്ടിരുന്നു. പിന്നീട് നടന്ന സിബിഐ അന്വേഷണത്തില്‍ അപകടം സ്വാഭാവികമാണെന്നും ഗൂഢാലോചനയില്ലെന്നും കണ്ടെത്തി റിപ്പോര്‍ട്ട് സമര്‍പ്പിച്ചിരുന്നു. എന്നാല്‍ സിബിഐയുടെ കണ്ടെത്തലുകളില്‍ തൃപ്തരല്ലാത്ത കുടുംബം അപകടം നടന്ന സ്ഥലത്തെ ചില നിര്‍ണായക സാഹചര്യങ്ങളും സാമ്പത്തിക ഇടപാടുകളും കൂടുതല്‍ അന്വേഷിക്കണമെന്ന് ആവശ്യപ്പെട്ട് വീണ്ടും കോടതിയെ സമീപിക്കുകയായിരുന്നു.
സിഎംആര്‍എല്‍- എക്‌സാലോജിക് ഇടപാടിലെ ഹൈക്കോടതി ഉത്തരവ് പഠിച്ച ശേഷം തീരുമാനമെടുക്കുമെന്ന് ആഭ്യന്തരമന്ത്രി രമേശ് ചെന്നിത്തല. ഉത്തരവ് സര്‍ക്കാരിന് തിരിച്ചടിയല്ല. നേരത്തെ കേസിലെ നടപടികള്‍ സ്വീകരിച്ചത് നിയമോപദേശം അനുസരിച്ചാണെന്നും മന്ത്രി രമേശ് ചെന്നിത്തല പറഞ്ഞു. യുഡിഎഫ് നേതാക്കളിലേക്കും അന്വേഷണം വന്നാലും കോടതി വിധികളുടെ അടിസ്ഥാനത്തിലായിരിക്കും തീരുമാനമെടുക്കുക. ഹൈക്കോടതിയുടെ വിധി പരിശോധിച്ച ശേഷം നിയമപരമായ നടപടികള്‍ സ്വീകരിക്കുമെന്ന് രമേശ് ചെന്നിത്തല വ്യക്തമാക്കി.
എഫ്.ഐ.ആര്‍ രജിസ്റ്റര്‍ ചെയ്യണമെന്ന ഹൈക്കോടതി നിര്‍ദ്ദേശത്തോടെ ഇതുവരെ എക്‌സാലോജിക് കമ്പനിയിലും വീണാ ടിയിലും കേന്ദ്രീകരിച്ചിരുന്ന മാസപ്പടി കേസ് പ്രതിപക്ഷ നേതാവ് പിണറായി വിജയനിലേക്കും സിപിഐഎം സംസ്ഥാന സെക്രട്ടേറിയേറ്റ് അംഗം പി.എ മുഹമ്മദ് റിയാസിലേക്കും കേന്ദ്രീരിക്കുകയാണ്. രാഷ്ട്രീയ സമ്മര്‍ദ്ദം ഉയര്‍ന്നതിനെ തുടര്‍ന്ന് സര്‍ക്കാര്‍ എടുക്കാന്‍ മടിച്ച കേസാണ്,ഹൈകോടതി നിര്‍ദ്ദേശത്തെ തുടര്‍ന്ന് ഇപ്പോള്‍ രജിസ്റ്റര്‍ ചെയ്യേണ്ടി വരുന്നത്.അഴിമതി നിരോധന നിയമ പ്രകാരം എഫ് ഐ ആര്‍ രജിസ്റ്റര്‍ ചെയ്യണമെന്ന ഹര്‍ജിയിലാണ് എഫ്‌ഐആര്‍ രജിസ്റ്റര്‍ ചെയ്യാന്‍ കോടതി ഉത്തരവിട്ടിരിക്കുന്നത്.
കണ്ണൂർ: കണ്ണൂർ ആസ്റ്റർ മിംസിൽ ഒക്ടോബർ 18 -ഞായറാഴ്ച സമഗ്ര കരൾ രോഗ പരിശോധനാ ക്യാമ്പ് സംഘടിപ്പിക്കും. രാവിലെ ഒമ്പത് മുതൽ ഉച്ചയ്ക്ക് ഒരുമണി വരെ ഗ്യാസ്ട്രോ വിഭാഗം മേധാവി ഡോ സാബു കെ ജി യുടെ നേതൃത്വത്തിൽ ആശുപത്രിയിലെ ഗ്യാസ്ട്രോ വിഭാഗത്തിലാണ് ക്യാമ്പ് നടക്കുക.
7,150 രൂപയുടെ ഫാറ്റി ലിവർ സ്ക്രീനിംഗ് പാക്കേജ് ക്യാമ്പിൽ പങ്കെടുക്കുന്നവർക്ക് 2,999 രൂപയ്ക്ക് ലഭ്യമാകും. സിബിസി, സീറം ക്രിയാറ്റിനിൻ, ടി.എസ്.എച്ച്, എഫ്.എൽ.പി, എഫ്.ബി.എസ്, എച്ച്.ബി.എ1സി, എൽ.എഫ്.ടി എന്നീ പരിശോധനകൾക്ക് പുറമെ ഫൈബ്രോസ്കാനും ഗ്യാസ്ട്രോ കൺസൾട്ടേഷനും അടങ്ങുന്നതാണ് പാക്കേജ്.
തുടക്കത്തിൽ ലക്ഷണങ്ങളൊന്നുമില്ലാതെ നിശബ്ദമായി ശരീരത്തെ ബാധിക്കുന്ന അവസ്ഥയാണ് ഫാറ്റി ലിവർ. ഇത് പിന്നീട് ലിവർ സിറോസിസ്, ഹൃദ്രോഗം, സ്ട്രോക്ക്, വൃക്കരോഗങ്ങൾ തുടങ്ങിയ ഗുരുതരമായ ആരോഗ്യപ്രശ്നങ്ങളിലേക്ക് നയിക്കാൻ സാധ്യതയേറെയാണ്. പ്രമേഹ രോഗികളിൽ ഫാറ്റി ലിവർ സാധ്യത കൂടുതലാണ്. നേരത്തെ ബുക്ക് ചെയ്യുന്നവർക്ക് മാത്രമേ ക്യാമ്പിൽ പങ്കെടുക്കാനാകൂ. വിവരങ്ങൾക്ക്- 90615 67567.
പ്രതിസന്ധി കണക്കിലെടുത്ത് കൂടുതല്‍ വൈദ്യുതി വാങ്ങാന്‍ ടെന്‍ഡറുകള്‍ ക്ഷണിച്ച് കെഎസ്ഇബി. 300 മുതല്‍ 1300 മെഗാവാട്ട് വൈദ്യുതിവരെ ലഭ്യമാക്കാനാണ് കെഎസ്ഇബിയുടെ ശ്രമം. 2027 ജനുവരി 1 മുതല്‍ 2027 മേയ് 15 വരെയുള്ള കാലയളവിലേക്ക് ഹ്രസ്വകാല അടിസ്ഥാനത്തിലാണ് വൈദ്യുതി ലഭ്യമാക്കുന്നത്. ഈ വര്‍ഷത്തെ വൈദ്യുതി പ്രതിസന്ധി വരുംകാലങ്ങളിലും വരാതിരിക്കാനാണ് കെഎസ്ഇബിയുടെയും സര്‍ക്കാരിന്റെയും കരുതല്‍ നീക്കം.
ടെന്‍ഡറിലെ ഏറ്റവും കുറഞ്ഞ തുകയ്ക്ക് വൈദ്യുതി ലഭ്യമാക്കും. പത്തു രൂപയില്‍ താഴെയാണ് റെഗുലേറ്ററി കമ്മീഷന്‍ വൈദ്യുതി വാങ്ങാന്‍ അനുമതി നല്‍കിയിട്ടുള്ളത്. മാനദണ്ഡങ്ങള്‍ പാലിച്ച് റെഗുലേറ്ററി കമ്മീഷന്റെ അനുമതി തേടിയ ശേഷം വൈദ്യുതി ലഭ്യമാക്കി തുടങ്ങും. വേനല്‍ക്കാലം മുന്നില്‍കണ്ടാണ് വൈദ്യുതി വാങ്ങാനുള്ള നീക്കത്തിലേക്ക് സര്‍ക്കാര്‍ കടക്കുന്നത്.
സംസ്ഥാനത്ത് നിലവില്‍ വൈദ്യുതി നിയന്ത്രണങ്ങള്‍ക്ക് താത്കാലിക ആശ്വാസമുണ്ട്. കഴിഞ്ഞ മാസം വരെ സര്‍ക്കാര്‍ നിയന്ത്രണങ്ങള്‍ ഏര്‍പ്പെടുത്തിയിരുന്നു. ഇതിനെതിരെ വന്‍ വിമര്‍ശനവും പ്രതിഷേധവും ഉയര്‍ന്നിരുന്നു. ഈ പശ്ചാത്തലത്തിലാണ് വരുംകാലങ്ങളിലെ പ്രതിസന്ധി ഒഴിവാക്കാന്‍ സര്‍ക്കാര്‍ ശ്രമം നടത്തുന്നത്. കൂടുതല്‍ പദ്ധതികള്‍ ആവിഷ്‌കരിച്ചും വൈദ്യുതി ശേഖരിച്ചുവെക്കാനുള്ള നടപടിക്രമങ്ങളിലേക്കാണ് സര്‍ക്കാര്‍ കടക്കുന്നത്.
ചൊക്ലിയിലെ പ്ലസ് ടു വിദ്യാര്‍ഥി ശിവസൂര്യയുടെ തിരോധനത്തില്‍ ക്രൈംബ്രാഞ്ച് പ്രാഥമിക അന്വേഷണം തുടങ്ങി. അച്ഛന്‍ ജിഗീഷിന്റെ മൊഴിയെടുത്തു. ആക്ഷന്‍ കമ്മിറ്റി ഭാരവാഹികളുടേയും മൊഴി രേഖപ്പെടുത്തി. അന്വേഷണം ക്രൈംബ്രാഞ്ച് ഏറ്റെടുക്കുന്നതിന്റെ ഭാഗമായാണ് പ്രാഥമിക പരിശോധന നടത്തിയത്.
കഴിഞ്ഞ മാസം എട്ടിനാണ് ശിവസൂര്യ വീട് വിട്ട് പോയത്. കാശിയിലേക്ക് പോകുന്നുവെന്ന് കുറിപ്പ് എഴുതി വച്ചിരുന്നു. കേരളത്തില്‍ പലയിടങ്ങളിലും തിരച്ചില്‍ നടത്തിയെങ്കിലും ശിവസൂര്യയെക്കുറിച്ച് സൂചന കിട്ടിയിരുന്നില്ല. ശിവസൂര്യയെ തേടി വാരണാസിയിലേക്ക് പോയ പൊലീസ് സംഘം തിരികെ മടങ്ങിയിരുന്നു. ഒരാഴ്ച പരിശോധന നടത്തിയിട്ടും ശിവസൂര്യയെക്കുറിച്ച് വിവരങ്ങളൊന്നും കിട്ടിയിരുന്നില്ല. മലയാളി അസോസിയേഷന്‍ പ്രവര്‍ത്തകരും സഹായത്തിനുണ്ടായിരുന്നു.
ചൊക്ലി എസ് എച്ച് ഒ യുടെ നേതൃത്വത്തില്‍ പ്രത്യേക അന്വേഷണസംഘമായിരുന്നു കേസ് അന്വേഷിച്ചിരുന്നത്. സംസ്ഥാനത്തിന് പുറത്തും അകത്തും വ്യാപകമായി പരിശോധന നടത്തിയിട്ടും ശിവസൂര്യ എവിടെയെന്ന് പോലീസിനെ കണ്ടെത്താന്‍ കഴിഞ്ഞില്ല. ലോക്കല്‍ പോലീസ് അന്വേഷണത്തില്‍ കുടുംബത്തിന് അതൃപ്തി ഉണ്ടായിരുന്നു. പിന്നാലെ ക്രൈംബ്രാഞ്ച് അന്വേഷണം ആക്ഷന്‍ കമ്മിറ്റി ആവശ്യപ്പെടുകയായിരുന്നു. തുടര്‍ന്ന് ആഭ്യന്തരമന്ത്രി രമേശ് ചെന്നിത്തല ക്രൈംബ്രാഞ്ച് അന്വേഷണത്തിന് നിര്‍ദേശം നല്‍കിയത്.
സംസ്ഥാന സര്‍ക്കാരിനെതിരെ പ്രതിഷേധം വ്യാപിപ്പിക്കാന്‍ ഒരുങ്ങി ബിജെപി. നിയമസഭാ സമ്മേളന കാലയളവില്‍ റിലെ പ്രതിഷേധവുമായി ബിജെപി തെരുവിലിറങ്ങും. നിയമസഭാ സമ്മേളനം തുടങ്ങുന്ന പന്ത്രണ്ടാം തീയതി മുഖ്യമന്ത്രി വി ഡി സതീശന്‍ രാജിവെക്കുക എന്നാവശ്യപ്പെട്ടു കൊണ്ട് ബിജെപി നിയമസഭയിലേക്ക് പ്രതിഷേധം സംഘടിപ്പിക്കും. സംസ്ഥാന സര്‍ക്കാരിനെ പ്രതിസന്ധിയില്‍ ആക്കാവുന്ന തരത്തിലുള്ള പ്രതിഷേധ പരിപാടികള്‍ സംഘടിപ്പിക്കണമെന്ന തീരുമാനത്തിന് പിന്നാലെയാണ് ബിജെപി സമരമുഖത്തേക്ക് ഇറങ്ങുന്നത്.
പതിമൂന്നാം തീയതി സര്‍ക്കാരിനെതിരെ ബിജെപി ജനപ്രതിനിധികള്‍ പ്രതിഷേധിക്കും. പതിനാലാം തീയതി സംസ്ഥാനത്തെ മരുന്ന് ക്ഷാമവും ആരോഗ്യ മേഖലയിലെ അവസ്ഥയ്ക്ക് എതിരെ മഹിളാമോര്‍ച്ചയുടെ നേതൃത്വത്തില്‍ പ്രതിഷേധ മാര്‍ച്ച് സംഘടിപ്പിക്കും. പതിനാറിന് ‘തൊഴില്‍ എവിടെ സര്‍ക്കാരെ’ എന്ന മുദ്രാവാക്യം ഉയര്‍ത്തികൊണ്ട് യുവമോര്‍ച്ചയുടെ നേതൃത്വത്തില്‍ നിയമസഭയിലേക്ക് മാര്‍ച്ച് സംഘടിപ്പിക്കും. കഴിഞ്ഞദിവസം ചേര്‍ന്ന സംസ്ഥാന നേതൃയോഗത്തിന്റേതാണ് തുടര്‍ച്ചയായി സമരം ചെയ്യാനുള്ള തീരുമാനം.
സിഎംആര്‍എല്‍-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട് ഇഡി നല്‍കിയ കത്തില്‍ പിണറായി വിജയന്‍, മുഹമ്മദ് റിയാസ് എന്നിവര്‍ക്കെതിരെ എഫ്‌ഐആര്‍ ഇടാമെന്ന് ഹൈക്കോടതി. ഇ ഡി കത്ത് പരിഗണിച്ച് എഫ്‌ഐആര്‍ നേരിട്ട് രജിസ്റ്റര്‍ ചെയ്യാമെന്നാണ് ഹൈക്കോടതി വ്യക്തമാക്കിയിരിക്കുന്നത്. ഇ ഡി നല്‍കിയ കത്തില്‍ പ്രാഥമിക അന്വേഷണം നടത്തിയതിന് ശേഷം എഫ്‌ഐആര്‍ എന്നതായിരുന്നു സംസ്ഥാന സര്‍ക്കാരിന്റെ നിലപാട്. എന്നാല്‍ സംസ്ഥാന സര്‍ക്കാരിന്റെ ഈ വാദം തള്ളിയാണ് പ്രാഥമിക അന്വേഷണം ആവശ്യമില്ലെന്നും നേരിട്ട് എഫ്‌ഐആര്‍ ഇടാമെന്നും ഹൈക്കോടതി വ്യക്തമാക്കിയിരുന്നത്.
പ്രാഥമിക അന്വേഷണമാണ് ആദ്യം വേണ്ടത് അതിന് ശേഷമാണ് എഫ്‌ഐആര്‍ ഇടണോ എന്ന് പരിശേധിക്കേണ്ടത് എന്ന വാദമായിരുന്നു സംസ്ഥാന സര്‍ക്കാര്‍ ഹൈക്കോടതി ഉയര്‍ത്തിയ വാദം. എന്നാല്‍ ഇഡി കത്തിന്റെ അടിസ്ഥാനത്തില്‍ നേരിട്ട് എഫ്‌ഐആര്‍ രജിസ്റ്റര്‍ ചെയ്യാമെന്ന ഹൈക്കോടതിയുടെ ഇടക്കാല ഉത്തരവ് സംസ്ഥാന സര്‍ക്കാരിനും തിരിച്ചടിയാണ്. ഇഡി നടത്തിയത് പ്രാഥമിക അന്വേഷണമാണെന്നും അതിന്റെ റിപ്പോര്‍ട്ട് നിലനില്‍ക്കുമ്പോള്‍ സംസ്ഥാന പൊലീസ് മറ്റൊരു പ്രാഥമിക അന്വേഷണം നടത്തേണ്ടതില്ല എന്നായിരുന്നു ഹൈക്കോടതിയില്‍ ഇഡി വാദം. നേരിട്ട് എഫ്‌ഐആര്‍ രജിസ്റ്റര്‍ ചെയ്യുകയാണ് വേണ്ടതെന്നും ഇ ഡി കോടതിയില്‍ വാദിച്ചു. ഇഡിയുടെ ഈ വാദം ശരിവെച്ചാണ് ഇഡി കത്തിന്റെ അടിസ്ഥാനത്തില്‍ നേരിട്ട് എഫ്‌ഐആര്‍ രജിസ്റ്റര്‍ ചെയ്യാന്‍ ഹൈക്കോടതി ഇടക്കാല ഉത്തരവിട്ടത്. കെ എം ഷാജഹാന്‍ നല്‍കിയ ഹര്‍ജിയിലാണ് ഹൈക്കോടതി ഉത്തരവ്.
ടിബി മുക്ത് ഭാരത് അഭിയാന്റെ ഭാഗമായി ക്ഷയരോഗ മുക്ത നാടിനായി ജില്ലയില്‍ ജോയിന്റ് സ്‌ക്വാഡ് ഫോര്‍ ഹെല്‍ത്ത് -ജോഷ് ടീം സജ്ജമായി. ക്ഷയരോഗ ലക്ഷണങ്ങള്‍ കണ്ടെത്തല്‍, നേരത്തെയുളള പരിശോധന, ചികിത്സ, പോഷണം, പ്രതിരോധം തുടങ്ങിയ വിഷയങ്ങളില്‍ സമൂഹത്തില്‍ ബോധവത്കരണം നടത്തുകയും ക്ഷയരോഗത്തെ ചെറുക്കുകയും ചെയ്യുകയെന്നതാണ് ജോഷ് ടീമിന്റെ ലക്ഷ്യം.
ഗാര്‍ഹിക സന്ദര്‍ശനം, രോഗവ്യാപനം തടയാനുള്ള സാമൂഹിക ഇടപെടല്‍ തുടങ്ങിയ പ്രവര്‍ത്തനങ്ങളിലൂടെ യുവജനപങ്കാളിത്തമുള്ള ജോഷ് ടീം സജീവമാകും. കളക്ട്രേറ്റ് ഓഡിറ്റോറിയത്തില്‍ നടന്ന ജില്ലാതല ജോഷ് ടീം പ്രഖ്യാപനം അഡ്വ. സജീവ് ജോസഫ് എം.എല്‍.എ ഉദ്ഘാടനം ചെയ്തു. ഒരു കാലഘട്ടത്തിന്റെ ഭീതിയായിരുന്നു ക്ഷയരോഗമെന്നും ആരോഗ്യ സംവിധാനത്തിന്റെ ഫലപ്രദമായ ഇടപെടലിലൂടെ വലിയൊരു അളവ് വരെ അത് ഇല്ലാതാക്കാന്‍ കഴിഞ്ഞതായും അദ്ദേഹം പറഞ്ഞു. രോഗം പൂര്‍ണ്ണമയും സമൂഹത്തില്‍ നിന്നും തുടച്ചുമാറ്റുന്നതിനുള്ള വലിയ മുന്നേറ്റം നടന്നുവരികയാണ്. ജോഷ് ടീം സജ്ജമാകുന്നതോടെ ക്ഷയരോഗ മുക്ത നാട് എന്ന ലക്ഷ്യം അകലെയാവില്ല. ഇതിന് കൂട്ടായ പരിശ്രമങ്ങള്‍ അനിവാര്യമാണെന്നും സജീവ് ജോസഫ് എം.എല്‍.എ പറഞ്ഞു. ജോഷ് ടീം പോസ്റ്റര്‍ പ്രകാശനവും ഫ്ളാഗ് ഓഫും വളണ്ടിയര്‍മാര്‍ക്കുള്ള ബാഡ്ജ്, ക്യാപ് കൈമാറ്റവും ചടങ്ങില്‍ നടന്നു.
ജില്ലയില്‍ ക്ഷയരോഗ മുക്തമായ വളപട്ടണം, പാപ്പിനശ്ശേരി, ചെറുകുന്ന്, രാമന്തളി, കുഞ്ഞിമംഗലം, മാട്ടൂല്‍, എരുവേശ്ശി, മലപ്പട്ടം, ഉദയഗിരി ഗ്രാമപഞ്ചായത്തുകളെ ചടങ്ങില്‍ ആദരിച്ചു. ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അദ്ധ്യക്ഷത വഹിച്ചു. അസിസ്റ്റന്റ് കളക്ടര്‍ എസ്.സ്വാതി വിഷയാവതരണം നടത്തി. ജില്ലാ പ്രോഗ്രാം മാനേജര്‍ ഡോ. സി.അബൂബക്കര്‍ ക്ഷയരോഗ മുക്ത പ്രതിജ്ഞ ചൊല്ലിക്കൊടുത്തു. എല്‍.എസ്.ജി.ഡി ജോയിന്റ് ഡയറക്ടര്‍ പി.എം. ധനീഷ്, മേരാ യുവ ഭാരത് കണ്ണൂര്‍ ഡെപ്യൂട്ടി ഡയറക്ടര്‍ എച്ച്. സച്ചിന്‍, ഡെപ്യൂട്ടി ഡി.എം.ഒ ഡോ. ബി.സന്തോഷ്, ജില്ലാ ടി.ബി ഓഫീസര്‍ ഡോ.രശ്മി മാത്യു തുടങ്ങിയവര്‍ സംസാരിച്ചു. ജില്ലാ ടി.ബി സെന്റര്‍ കണ്‍സള്‍ട്ടന്റ് പള്‍മണോളജിസ്റ്റ് ഡോ. രജ്ന ശ്രീധരന്‍ ടി.ബി. ബോധവത്കരണ ക്ലാസ്സെടുത്തു. ജനപ്രതിനിധികള്‍, എന്‍.സി.സി, എന്‍.എസ്.എസ് പ്രവര്‍ത്തകര്‍, വിവിധ സന്നദ്ധ സേനാ വിഭാഗങ്ങള്‍ , ആരോഗ്യ പ്രവര്‍ത്തകര്‍ തുടങ്ങിയവര്‍ ചടങ്ങില്‍ പങ്കെടുത്തു.
പ്രതിരോധിക്കാം ക്ഷയരോഗത്തെ; ജോഷ് ടീം വീടുകളിലെത്തും
ക്ഷയരോഗ നിര്‍മ്മാര്‍ജ്ജനത്തിന് ജനപങ്കാളിത്ത അധിഷ്ഠിത ദേശീയ ക്യാമ്പയിനിന്റെ ഭാഗമായുള്ള ജോഷ് ടീം വീടുകളിലെത്തും. വിദ്യാര്‍ത്ഥികളും യുവജനങ്ങളും സന്നദ്ധ പ്രവര്‍ത്തകരും അണിനരിക്കുന്ന ജോഷ് ടീമിന്റെ നേതൃത്വത്തില്‍ നാടൊന്നാകെയുള്ള പ്രവര്‍ത്തനങ്ങളാണ് നടക്കുക. രോഗ ലക്ഷണമുള്ളവരെ കണ്ടെത്തുകയും യഥാസമയം ചികിത്സ ലഭ്യമാക്കുകയും ചെയ്യുക, ബോധവത്കരണ പ്രവര്‍ത്തനങ്ങള്‍ നടത്തുക, സാൂഹിക പിന്തുണ, അധിക പരിചരണം എന്നിവ ലഭ്യമാക്കുക തുടങ്ങിയവയാണ് വളണ്ടിയര്‍മാരുടെ ഉത്തരവാദിത്തം. ക്ഷയരോഗ ബാധിതരായവരുടെ പോഷകാരോഗ്യ സംരക്ഷണം, നിരീക്ഷണം തുടങ്ങിയവയെല്ലാം ഇതിന്റെ ഭാഗമായി ഉറപ്പാക്കും.
ത്രിതല പഞ്ചായത്ത് സംവിധാനത്തിനു കീഴിലാണ് ജോഷ് വളണ്ടിയര്‍മാര്‍ പ്രവര്‍ത്തിക്കുക. ബ്ലോക്ക്തല നോഡല്‍ ഓഫീസര്‍മാര്‍ പ്രവര്‍ത്തനങ്ങള്‍ ഏകോപിപ്പിക്കും. ആരോഗ്യ വകുപ്പിന്റെ നേതൃത്വത്തില്‍ ജോഷ് ടീം പ്രവര്‍ത്തനങ്ങള്‍ വിലയിരുത്തുകയും വ്യാപിപ്പിക്കുകയും ചെയ്യും. രോഗ നിര്‍മ്മാര്‍ജ്ജനത്തിനായി സജീവമായി പ്രവര്‍ത്തിക്കുന്ന ഗ്രാമപഞ്ചായത്തുകള്‍ക്ക് അവാര്‍ഡുകള്‍ നല്‍കും.
ജില്ലയില്‍ കഴിഞ്ഞ വര്‍ഷം 1430 ക്ഷയരോഗികള്‍
ജില്ലാ ടി.ബി സെന്ററിന്റെ കണക്ക് പ്രകാരം 2025ല്‍ കണ്ണൂര്‍ ജില്ലയില്‍ 1430 ക്ഷയരോഗ കേസുകളാണ് റിപ്പോര്‍ട്ട് ചെയ്തിട്ടുള്ളത്. ഇതില്‍ 147 രോഗികള്‍ മരണപ്പെട്ടു. ഈ വര്‍ഷം ആഗസ്റ്റ് 30 വരെയുള്ള കണക്കുകളില്‍ 840 രോഗികളാണ് ക്ഷയരോഗം ബാധിച്ച് ചികിത്സയിലുള്ളത്. ഈ വര്‍ഷം 64 രോഗികള്‍ മരണപ്പെട്ടു. പലപ്പോഴും രോഗ ലക്ഷണങ്ങളെ അവഗണിക്കുന്നതാണ് ചികിത്സയെ സങ്കീര്‍ണ്ണമാക്കുന്നതെന്ന് ജില്ലാ ടി.ബി ഓഫീസര്‍ ഡോ.രശ്മി മാത്യു പറഞ്ഞു. ശരിയായ ചികിത്സയിലൂടെയും പരിചരണത്തിലൂടെയും രോഗം പൂര്‍ണ്ണമായും ഭേദമാക്കാന്‍ കഴിയും. രോഗ ലക്ഷണങ്ങള്‍ മാറിയാലും ഡോക്ടറുടെ നിര്‍ദ്ദേശം അനുസരിച്ച് നിശ്ചിത കാലത്തേക്ക് മരുന്ന് കഴിക്കുന്നത് തുടരണം. സര്‍ക്കാര്‍ ആരോഗ്യ കേന്ദ്രങ്ങള്‍ വഴി ലഭ്യമാകുന്ന ഡോട്സ് ചികിത്സാ രീതികള്‍ പിന്തുടകയും പ്രധാനമാണ്. പാല്‍, മുട്ട, പയറുവര്‍ഗ്ഗങ്ങള്‍ തുടങ്ങിയ പോഷകാഹാരങ്ങളും മുടങ്ങാതെ കഴിക്കണം. ശരിയായ ജീവിതത്തിലേക്കുള്ള തിരിച്ചുവരിവിന് ഇതെല്ലാം ആവശ്യമാണെന്നും ഡോക്ടര്‍ അറിയിച്ചു.
രോഗ നിര്‍ണ്ണയത്തിന് എ.ഐ ടൂള്‍; ജില്ലയില്‍ നാലിടത്ത് സംവിധാനം
ക്ഷയരോഗ നിര്‍ണ്ണയം വേഗത്തിലാക്കുന്നതിന് ജില്ലയില്‍ ആധുനിക സംവിധാനങ്ങളും ലഭ്യമാണ്. എ.ഐ ടൂള്‍ സംവിധാനമുള്ള ഹാന്‍ഡ് ഹെല്‍ഡ് എക്സറേയാണ് ഇതില്‍ പ്രധാനപ്പെട്ടത്. എവിടേക്ക് വേണമെങ്കിലും കൊണ്ടുപാകാനും എളുപ്പത്തിലും കൂടുതല്‍ വ്യക്തതയോടെയും എക്സ് റേ എടുക്കാനും ഈ ഉപകരണം സഹായകമാണ്. പള്ളിക്കുന്ന് ജില്ലാ ടി.ബി സെന്റര്‍, തലശ്ശേരി ജനറല്‍ ആശുപത്രി, പയ്യന്നൂര്‍ താലൂക്ക് ആശുപത്രി, പേരാവൂര്‍ താലൂക്ക് ആശുപത്രി എന്നീ കേന്ദ്രങ്ങളിലാണ് ആദ്യഘട്ടത്തില്‍ ഈ സംവിധാനം ലഭ്യമായിട്ടുള്ളത്. രോഗ നിര്‍ണ്ണയും ഏറ്റവും വേഗത്തില്‍ നടത്തി ചികിത്സ തുടങ്ങാനും മറ്റും ഇതുവഴി കഴിയും. ഇതുകൂടാതെ രോഗ നിര്‍ണ്ണയം നടത്തുന്നതിന് ജില്ലയില്‍ പത്ത് മോളിക്യുലാര്‍ പരിശോധന കേന്ദ്രങ്ങളും സജ്ജമാണ്. ജില്ലയിലെ എല്ലാ സര്‍ക്കാര്‍ ആശുപത്രികളിലും സ്റ്റെപ്സ് പദവിയിലുള്ള 31 സ്വകാര്യ ആശുപത്രികളിലും ക്ഷയരോഗത്തിനുള്ള മരുന്നുകള്‍ സൗജന്യമായി വിതരണം ചെയ്യുന്നുണ്ട്.
സംസ്ഥാനത്ത് സ്പാകളുടെ മറവില്‍ നടക്കുന്ന നിയമവിരുദ്ധ പ്രവര്‍ത്തനങ്ങള്‍ പരിശോധിക്കാന്‍ കര്‍ശന നിര്‍ദേശം നല്‍കിയതായി ആഭ്യന്തര വകുപ്പ് മന്ത്രി രമേശ് ചെന്നിത്തല. കൊച്ചിയിലാണ് ഇത്തരം സ്പാകള്‍ കൂടുതലുള്ളതെന്നും അദ്ദേഹം പറഞ്ഞു. യാതൊരു ലൈസന്‍സുമില്ലാതെ പല സ്പാകളും ഒരു ബോര്‍ഡും വച്ച് പ്രവര്‍ത്തനം നടത്തിവരികയാണ്. ഇതിനെല്ലാമെതിരെ അന്വേഷണം നടത്താന്‍ സംസ്ഥാന പൊലീസ് മേധാവിക്ക് നിര്‍ദേശം നല്‍കിയിട്ടുണ്ടെന്ന് അദ്ദേഹം വ്യക്തമാക്കി.
