കണ്ണൂർ: കണ്ണൂർ ആസ്റ്റർ മിംസിൽ ഒക്ടോബർ 18 -ഞായറാഴ്ച സമഗ്ര കരൾ രോഗ പരിശോധനാ ക്യാമ്പ് സംഘടിപ്പിക്കും. രാവിലെ ഒമ്പത് മുതൽ ഉച്ചയ്ക്ക് ഒരുമണി വരെ ഗ്യാസ്ട്രോ വിഭാഗം മേധാവി ഡോ സാബു കെ ജി യുടെ നേതൃത്വത്തിൽ ആശുപത്രിയിലെ ഗ്യാസ്ട്രോ വിഭാഗത്തിലാണ് ക്യാമ്പ് നടക്കുക.
7,150 രൂപയുടെ ഫാറ്റി ലിവർ സ്ക്രീനിംഗ് പാക്കേജ് ക്യാമ്പിൽ പങ്കെടുക്കുന്നവർക്ക് 2,999 രൂപയ്ക്ക് ലഭ്യമാകും. സിബിസി, സീറം ക്രിയാറ്റിനിൻ, ടി.എസ്.എച്ച്, എഫ്.എൽ.പി, എഫ്.ബി.എസ്, എച്ച്.ബി.എ1സി, എൽ.എഫ്.ടി എന്നീ പരിശോധനകൾക്ക് പുറമെ ഫൈബ്രോസ്കാനും ഗ്യാസ്ട്രോ കൺസൾട്ടേഷനും അടങ്ങുന്നതാണ് പാക്കേജ്.
തുടക്കത്തിൽ ലക്ഷണങ്ങളൊന്നുമില്ലാതെ നിശബ്ദമായി ശരീരത്തെ ബാധിക്കുന്ന അവസ്ഥയാണ് ഫാറ്റി ലിവർ. ഇത് പിന്നീട് ലിവർ സിറോസിസ്, ഹൃദ്രോഗം, സ്ട്രോക്ക്, വൃക്കരോഗങ്ങൾ തുടങ്ങിയ ഗുരുതരമായ ആരോഗ്യപ്രശ്നങ്ങളിലേക്ക് നയിക്കാൻ സാധ്യതയേറെയാണ്. പ്രമേഹ രോഗികളിൽ ഫാറ്റി ലിവർ സാധ്യത കൂടുതലാണ്. നേരത്തെ ബുക്ക് ചെയ്യുന്നവർക്ക് മാത്രമേ ക്യാമ്പിൽ പങ്കെടുക്കാനാകൂ. വിവരങ്ങൾക്ക്- 90615 67567.
പ്രതിസന്ധി കണക്കിലെടുത്ത് കൂടുതല്‍ വൈദ്യുതി വാങ്ങാന്‍ ടെന്‍ഡറുകള്‍ ക്ഷണിച്ച് കെഎസ്ഇബി. 300 മുതല്‍ 1300 മെഗാവാട്ട് വൈദ്യുതിവരെ ലഭ്യമാക്കാനാണ് കെഎസ്ഇബിയുടെ ശ്രമം. 2027 ജനുവരി 1 മുതല്‍ 2027 മേയ് 15 വരെയുള്ള കാലയളവിലേക്ക് ഹ്രസ്വകാല അടിസ്ഥാനത്തിലാണ് വൈദ്യുതി ലഭ്യമാക്കുന്നത്. ഈ വര്‍ഷത്തെ വൈദ്യുതി പ്രതിസന്ധി വരുംകാലങ്ങളിലും വരാതിരിക്കാനാണ് കെഎസ്ഇബിയുടെയും സര്‍ക്കാരിന്റെയും കരുതല്‍ നീക്കം.
ടെന്‍ഡറിലെ ഏറ്റവും കുറഞ്ഞ തുകയ്ക്ക് വൈദ്യുതി ലഭ്യമാക്കും. പത്തു രൂപയില്‍ താഴെയാണ് റെഗുലേറ്ററി കമ്മീഷന്‍ വൈദ്യുതി വാങ്ങാന്‍ അനുമതി നല്‍കിയിട്ടുള്ളത്. മാനദണ്ഡങ്ങള്‍ പാലിച്ച് റെഗുലേറ്ററി കമ്മീഷന്റെ അനുമതി തേടിയ ശേഷം വൈദ്യുതി ലഭ്യമാക്കി തുടങ്ങും. വേനല്‍ക്കാലം മുന്നില്‍കണ്ടാണ് വൈദ്യുതി വാങ്ങാനുള്ള നീക്കത്തിലേക്ക് സര്‍ക്കാര്‍ കടക്കുന്നത്.
സംസ്ഥാനത്ത് നിലവില്‍ വൈദ്യുതി നിയന്ത്രണങ്ങള്‍ക്ക് താത്കാലിക ആശ്വാസമുണ്ട്. കഴിഞ്ഞ മാസം വരെ സര്‍ക്കാര്‍ നിയന്ത്രണങ്ങള്‍ ഏര്‍പ്പെടുത്തിയിരുന്നു. ഇതിനെതിരെ വന്‍ വിമര്‍ശനവും പ്രതിഷേധവും ഉയര്‍ന്നിരുന്നു. ഈ പശ്ചാത്തലത്തിലാണ് വരുംകാലങ്ങളിലെ പ്രതിസന്ധി ഒഴിവാക്കാന്‍ സര്‍ക്കാര്‍ ശ്രമം നടത്തുന്നത്. കൂടുതല്‍ പദ്ധതികള്‍ ആവിഷ്‌കരിച്ചും വൈദ്യുതി ശേഖരിച്ചുവെക്കാനുള്ള നടപടിക്രമങ്ങളിലേക്കാണ് സര്‍ക്കാര്‍ കടക്കുന്നത്.
ചൊക്ലിയിലെ പ്ലസ് ടു വിദ്യാര്‍ഥി ശിവസൂര്യയുടെ തിരോധനത്തില്‍ ക്രൈംബ്രാഞ്ച് പ്രാഥമിക അന്വേഷണം തുടങ്ങി. അച്ഛന്‍ ജിഗീഷിന്റെ മൊഴിയെടുത്തു. ആക്ഷന്‍ കമ്മിറ്റി ഭാരവാഹികളുടേയും മൊഴി രേഖപ്പെടുത്തി. അന്വേഷണം ക്രൈംബ്രാഞ്ച് ഏറ്റെടുക്കുന്നതിന്റെ ഭാഗമായാണ് പ്രാഥമിക പരിശോധന നടത്തിയത്.
കഴിഞ്ഞ മാസം എട്ടിനാണ് ശിവസൂര്യ വീട് വിട്ട് പോയത്. കാശിയിലേക്ക് പോകുന്നുവെന്ന് കുറിപ്പ് എഴുതി വച്ചിരുന്നു. കേരളത്തില്‍ പലയിടങ്ങളിലും തിരച്ചില്‍ നടത്തിയെങ്കിലും ശിവസൂര്യയെക്കുറിച്ച് സൂചന കിട്ടിയിരുന്നില്ല. ശിവസൂര്യയെ തേടി വാരണാസിയിലേക്ക് പോയ പൊലീസ് സംഘം തിരികെ മടങ്ങിയിരുന്നു. ഒരാഴ്ച പരിശോധന നടത്തിയിട്ടും ശിവസൂര്യയെക്കുറിച്ച് വിവരങ്ങളൊന്നും കിട്ടിയിരുന്നില്ല. മലയാളി അസോസിയേഷന്‍ പ്രവര്‍ത്തകരും സഹായത്തിനുണ്ടായിരുന്നു.
ചൊക്ലി എസ് എച്ച് ഒ യുടെ നേതൃത്വത്തില്‍ പ്രത്യേക അന്വേഷണസംഘമായിരുന്നു കേസ് അന്വേഷിച്ചിരുന്നത്. സംസ്ഥാനത്തിന് പുറത്തും അകത്തും വ്യാപകമായി പരിശോധന നടത്തിയിട്ടും ശിവസൂര്യ എവിടെയെന്ന് പോലീസിനെ കണ്ടെത്താന്‍ കഴിഞ്ഞില്ല. ലോക്കല്‍ പോലീസ് അന്വേഷണത്തില്‍ കുടുംബത്തിന് അതൃപ്തി ഉണ്ടായിരുന്നു. പിന്നാലെ ക്രൈംബ്രാഞ്ച് അന്വേഷണം ആക്ഷന്‍ കമ്മിറ്റി ആവശ്യപ്പെടുകയായിരുന്നു. തുടര്‍ന്ന് ആഭ്യന്തരമന്ത്രി രമേശ് ചെന്നിത്തല ക്രൈംബ്രാഞ്ച് അന്വേഷണത്തിന് നിര്‍ദേശം നല്‍കിയത്.
സംസ്ഥാന സര്‍ക്കാരിനെതിരെ പ്രതിഷേധം വ്യാപിപ്പിക്കാന്‍ ഒരുങ്ങി ബിജെപി. നിയമസഭാ സമ്മേളന കാലയളവില്‍ റിലെ പ്രതിഷേധവുമായി ബിജെപി തെരുവിലിറങ്ങും. നിയമസഭാ സമ്മേളനം തുടങ്ങുന്ന പന്ത്രണ്ടാം തീയതി മുഖ്യമന്ത്രി വി ഡി സതീശന്‍ രാജിവെക്കുക എന്നാവശ്യപ്പെട്ടു കൊണ്ട് ബിജെപി നിയമസഭയിലേക്ക് പ്രതിഷേധം സംഘടിപ്പിക്കും. സംസ്ഥാന സര്‍ക്കാരിനെ പ്രതിസന്ധിയില്‍ ആക്കാവുന്ന തരത്തിലുള്ള പ്രതിഷേധ പരിപാടികള്‍ സംഘടിപ്പിക്കണമെന്ന തീരുമാനത്തിന് പിന്നാലെയാണ് ബിജെപി സമരമുഖത്തേക്ക് ഇറങ്ങുന്നത്.
പതിമൂന്നാം തീയതി സര്‍ക്കാരിനെതിരെ ബിജെപി ജനപ്രതിനിധികള്‍ പ്രതിഷേധിക്കും. പതിനാലാം തീയതി സംസ്ഥാനത്തെ മരുന്ന് ക്ഷാമവും ആരോഗ്യ മേഖലയിലെ അവസ്ഥയ്ക്ക് എതിരെ മഹിളാമോര്‍ച്ചയുടെ നേതൃത്വത്തില്‍ പ്രതിഷേധ മാര്‍ച്ച് സംഘടിപ്പിക്കും. പതിനാറിന് ‘തൊഴില്‍ എവിടെ സര്‍ക്കാരെ’ എന്ന മുദ്രാവാക്യം ഉയര്‍ത്തികൊണ്ട് യുവമോര്‍ച്ചയുടെ നേതൃത്വത്തില്‍ നിയമസഭയിലേക്ക് മാര്‍ച്ച് സംഘടിപ്പിക്കും. കഴിഞ്ഞദിവസം ചേര്‍ന്ന സംസ്ഥാന നേതൃയോഗത്തിന്റേതാണ് തുടര്‍ച്ചയായി സമരം ചെയ്യാനുള്ള തീരുമാനം.
സിഎംആര്‍എല്‍-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട് ഇഡി നല്‍കിയ കത്തില്‍ പിണറായി വിജയന്‍, മുഹമ്മദ് റിയാസ് എന്നിവര്‍ക്കെതിരെ എഫ്‌ഐആര്‍ ഇടാമെന്ന് ഹൈക്കോടതി. ഇ ഡി കത്ത് പരിഗണിച്ച് എഫ്‌ഐആര്‍ നേരിട്ട് രജിസ്റ്റര്‍ ചെയ്യാമെന്നാണ് ഹൈക്കോടതി വ്യക്തമാക്കിയിരിക്കുന്നത്. ഇ ഡി നല്‍കിയ കത്തില്‍ പ്രാഥമിക അന്വേഷണം നടത്തിയതിന് ശേഷം എഫ്‌ഐആര്‍ എന്നതായിരുന്നു സംസ്ഥാന സര്‍ക്കാരിന്റെ നിലപാട്. എന്നാല്‍ സംസ്ഥാന സര്‍ക്കാരിന്റെ ഈ വാദം തള്ളിയാണ് പ്രാഥമിക അന്വേഷണം ആവശ്യമില്ലെന്നും നേരിട്ട് എഫ്‌ഐആര്‍ ഇടാമെന്നും ഹൈക്കോടതി വ്യക്തമാക്കിയിരുന്നത്.
പ്രാഥമിക അന്വേഷണമാണ് ആദ്യം വേണ്ടത് അതിന് ശേഷമാണ് എഫ്‌ഐആര്‍ ഇടണോ എന്ന് പരിശേധിക്കേണ്ടത് എന്ന വാദമായിരുന്നു സംസ്ഥാന സര്‍ക്കാര്‍ ഹൈക്കോടതി ഉയര്‍ത്തിയ വാദം. എന്നാല്‍ ഇഡി കത്തിന്റെ അടിസ്ഥാനത്തില്‍ നേരിട്ട് എഫ്‌ഐആര്‍ രജിസ്റ്റര്‍ ചെയ്യാമെന്ന ഹൈക്കോടതിയുടെ ഇടക്കാല ഉത്തരവ് സംസ്ഥാന സര്‍ക്കാരിനും തിരിച്ചടിയാണ്. ഇഡി നടത്തിയത് പ്രാഥമിക അന്വേഷണമാണെന്നും അതിന്റെ റിപ്പോര്‍ട്ട് നിലനില്‍ക്കുമ്പോള്‍ സംസ്ഥാന പൊലീസ് മറ്റൊരു പ്രാഥമിക അന്വേഷണം നടത്തേണ്ടതില്ല എന്നായിരുന്നു ഹൈക്കോടതിയില്‍ ഇഡി വാദം. നേരിട്ട് എഫ്‌ഐആര്‍ രജിസ്റ്റര്‍ ചെയ്യുകയാണ് വേണ്ടതെന്നും ഇ ഡി കോടതിയില്‍ വാദിച്ചു. ഇഡിയുടെ ഈ വാദം ശരിവെച്ചാണ് ഇഡി കത്തിന്റെ അടിസ്ഥാനത്തില്‍ നേരിട്ട് എഫ്‌ഐആര്‍ രജിസ്റ്റര്‍ ചെയ്യാന്‍ ഹൈക്കോടതി ഇടക്കാല ഉത്തരവിട്ടത്. കെ എം ഷാജഹാന്‍ നല്‍കിയ ഹര്‍ജിയിലാണ് ഹൈക്കോടതി ഉത്തരവ്.
ടിബി മുക്ത് ഭാരത് അഭിയാന്റെ ഭാഗമായി ക്ഷയരോഗ മുക്ത നാടിനായി ജില്ലയില്‍ ജോയിന്റ് സ്‌ക്വാഡ് ഫോര്‍ ഹെല്‍ത്ത് -ജോഷ് ടീം സജ്ജമായി. ക്ഷയരോഗ ലക്ഷണങ്ങള്‍ കണ്ടെത്തല്‍, നേരത്തെയുളള പരിശോധന, ചികിത്സ, പോഷണം, പ്രതിരോധം തുടങ്ങിയ വിഷയങ്ങളില്‍ സമൂഹത്തില്‍ ബോധവത്കരണം നടത്തുകയും ക്ഷയരോഗത്തെ ചെറുക്കുകയും ചെയ്യുകയെന്നതാണ് ജോഷ് ടീമിന്റെ ലക്ഷ്യം.
ഗാര്‍ഹിക സന്ദര്‍ശനം, രോഗവ്യാപനം തടയാനുള്ള സാമൂഹിക ഇടപെടല്‍ തുടങ്ങിയ പ്രവര്‍ത്തനങ്ങളിലൂടെ യുവജനപങ്കാളിത്തമുള്ള ജോഷ് ടീം സജീവമാകും. കളക്ട്രേറ്റ് ഓഡിറ്റോറിയത്തില്‍ നടന്ന ജില്ലാതല ജോഷ് ടീം പ്രഖ്യാപനം അഡ്വ. സജീവ് ജോസഫ് എം.എല്‍.എ ഉദ്ഘാടനം ചെയ്തു. ഒരു കാലഘട്ടത്തിന്റെ ഭീതിയായിരുന്നു ക്ഷയരോഗമെന്നും ആരോഗ്യ സംവിധാനത്തിന്റെ ഫലപ്രദമായ ഇടപെടലിലൂടെ വലിയൊരു അളവ് വരെ അത് ഇല്ലാതാക്കാന്‍ കഴിഞ്ഞതായും അദ്ദേഹം പറഞ്ഞു. രോഗം പൂര്‍ണ്ണമയും സമൂഹത്തില്‍ നിന്നും തുടച്ചുമാറ്റുന്നതിനുള്ള വലിയ മുന്നേറ്റം നടന്നുവരികയാണ്. ജോഷ് ടീം സജ്ജമാകുന്നതോടെ ക്ഷയരോഗ മുക്ത നാട് എന്ന ലക്ഷ്യം അകലെയാവില്ല. ഇതിന് കൂട്ടായ പരിശ്രമങ്ങള്‍ അനിവാര്യമാണെന്നും സജീവ് ജോസഫ് എം.എല്‍.എ പറഞ്ഞു. ജോഷ് ടീം പോസ്റ്റര്‍ പ്രകാശനവും ഫ്ളാഗ് ഓഫും വളണ്ടിയര്‍മാര്‍ക്കുള്ള ബാഡ്ജ്, ക്യാപ് കൈമാറ്റവും ചടങ്ങില്‍ നടന്നു.
ജില്ലയില്‍ ക്ഷയരോഗ മുക്തമായ വളപട്ടണം, പാപ്പിനശ്ശേരി, ചെറുകുന്ന്, രാമന്തളി, കുഞ്ഞിമംഗലം, മാട്ടൂല്‍, എരുവേശ്ശി, മലപ്പട്ടം, ഉദയഗിരി ഗ്രാമപഞ്ചായത്തുകളെ ചടങ്ങില്‍ ആദരിച്ചു. ജില്ലാ പഞ്ചായത്ത് പ്രസിഡന്റ് അഡ്വ. ബിനോയ് കുര്യന്‍ അദ്ധ്യക്ഷത വഹിച്ചു. അസിസ്റ്റന്റ് കളക്ടര്‍ എസ്.സ്വാതി വിഷയാവതരണം നടത്തി. ജില്ലാ പ്രോഗ്രാം മാനേജര്‍ ഡോ. സി.അബൂബക്കര്‍ ക്ഷയരോഗ മുക്ത പ്രതിജ്ഞ ചൊല്ലിക്കൊടുത്തു. എല്‍.എസ്.ജി.ഡി ജോയിന്റ് ഡയറക്ടര്‍ പി.എം. ധനീഷ്, മേരാ യുവ ഭാരത് കണ്ണൂര്‍ ഡെപ്യൂട്ടി ഡയറക്ടര്‍ എച്ച്. സച്ചിന്‍, ഡെപ്യൂട്ടി ഡി.എം.ഒ ഡോ. ബി.സന്തോഷ്, ജില്ലാ ടി.ബി ഓഫീസര്‍ ഡോ.രശ്മി മാത്യു തുടങ്ങിയവര്‍ സംസാരിച്ചു. ജില്ലാ ടി.ബി സെന്റര്‍ കണ്‍സള്‍ട്ടന്റ് പള്‍മണോളജിസ്റ്റ് ഡോ. രജ്ന ശ്രീധരന്‍ ടി.ബി. ബോധവത്കരണ ക്ലാസ്സെടുത്തു. ജനപ്രതിനിധികള്‍, എന്‍.സി.സി, എന്‍.എസ്.എസ് പ്രവര്‍ത്തകര്‍, വിവിധ സന്നദ്ധ സേനാ വിഭാഗങ്ങള്‍ , ആരോഗ്യ പ്രവര്‍ത്തകര്‍ തുടങ്ങിയവര്‍ ചടങ്ങില്‍ പങ്കെടുത്തു.
പ്രതിരോധിക്കാം ക്ഷയരോഗത്തെ; ജോഷ് ടീം വീടുകളിലെത്തും
ക്ഷയരോഗ നിര്‍മ്മാര്‍ജ്ജനത്തിന് ജനപങ്കാളിത്ത അധിഷ്ഠിത ദേശീയ ക്യാമ്പയിനിന്റെ ഭാഗമായുള്ള ജോഷ് ടീം വീടുകളിലെത്തും. വിദ്യാര്‍ത്ഥികളും യുവജനങ്ങളും സന്നദ്ധ പ്രവര്‍ത്തകരും അണിനരിക്കുന്ന ജോഷ് ടീമിന്റെ നേതൃത്വത്തില്‍ നാടൊന്നാകെയുള്ള പ്രവര്‍ത്തനങ്ങളാണ് നടക്കുക. രോഗ ലക്ഷണമുള്ളവരെ കണ്ടെത്തുകയും യഥാസമയം ചികിത്സ ലഭ്യമാക്കുകയും ചെയ്യുക, ബോധവത്കരണ പ്രവര്‍ത്തനങ്ങള്‍ നടത്തുക, സാൂഹിക പിന്തുണ, അധിക പരിചരണം എന്നിവ ലഭ്യമാക്കുക തുടങ്ങിയവയാണ് വളണ്ടിയര്‍മാരുടെ ഉത്തരവാദിത്തം. ക്ഷയരോഗ ബാധിതരായവരുടെ പോഷകാരോഗ്യ സംരക്ഷണം, നിരീക്ഷണം തുടങ്ങിയവയെല്ലാം ഇതിന്റെ ഭാഗമായി ഉറപ്പാക്കും.
ത്രിതല പഞ്ചായത്ത് സംവിധാനത്തിനു കീഴിലാണ് ജോഷ് വളണ്ടിയര്‍മാര്‍ പ്രവര്‍ത്തിക്കുക. ബ്ലോക്ക്തല നോഡല്‍ ഓഫീസര്‍മാര്‍ പ്രവര്‍ത്തനങ്ങള്‍ ഏകോപിപ്പിക്കും. ആരോഗ്യ വകുപ്പിന്റെ നേതൃത്വത്തില്‍ ജോഷ് ടീം പ്രവര്‍ത്തനങ്ങള്‍ വിലയിരുത്തുകയും വ്യാപിപ്പിക്കുകയും ചെയ്യും. രോഗ നിര്‍മ്മാര്‍ജ്ജനത്തിനായി സജീവമായി പ്രവര്‍ത്തിക്കുന്ന ഗ്രാമപഞ്ചായത്തുകള്‍ക്ക് അവാര്‍ഡുകള്‍ നല്‍കും.
ജില്ലയില്‍ കഴിഞ്ഞ വര്‍ഷം 1430 ക്ഷയരോഗികള്‍
ജില്ലാ ടി.ബി സെന്ററിന്റെ കണക്ക് പ്രകാരം 2025ല്‍ കണ്ണൂര്‍ ജില്ലയില്‍ 1430 ക്ഷയരോഗ കേസുകളാണ് റിപ്പോര്‍ട്ട് ചെയ്തിട്ടുള്ളത്. ഇതില്‍ 147 രോഗികള്‍ മരണപ്പെട്ടു. ഈ വര്‍ഷം ആഗസ്റ്റ് 30 വരെയുള്ള കണക്കുകളില്‍ 840 രോഗികളാണ് ക്ഷയരോഗം ബാധിച്ച് ചികിത്സയിലുള്ളത്. ഈ വര്‍ഷം 64 രോഗികള്‍ മരണപ്പെട്ടു. പലപ്പോഴും രോഗ ലക്ഷണങ്ങളെ അവഗണിക്കുന്നതാണ് ചികിത്സയെ സങ്കീര്‍ണ്ണമാക്കുന്നതെന്ന് ജില്ലാ ടി.ബി ഓഫീസര്‍ ഡോ.രശ്മി മാത്യു പറഞ്ഞു. ശരിയായ ചികിത്സയിലൂടെയും പരിചരണത്തിലൂടെയും രോഗം പൂര്‍ണ്ണമായും ഭേദമാക്കാന്‍ കഴിയും. രോഗ ലക്ഷണങ്ങള്‍ മാറിയാലും ഡോക്ടറുടെ നിര്‍ദ്ദേശം അനുസരിച്ച് നിശ്ചിത കാലത്തേക്ക് മരുന്ന് കഴിക്കുന്നത് തുടരണം. സര്‍ക്കാര്‍ ആരോഗ്യ കേന്ദ്രങ്ങള്‍ വഴി ലഭ്യമാകുന്ന ഡോട്സ് ചികിത്സാ രീതികള്‍ പിന്തുടകയും പ്രധാനമാണ്. പാല്‍, മുട്ട, പയറുവര്‍ഗ്ഗങ്ങള്‍ തുടങ്ങിയ പോഷകാഹാരങ്ങളും മുടങ്ങാതെ കഴിക്കണം. ശരിയായ ജീവിതത്തിലേക്കുള്ള തിരിച്ചുവരിവിന് ഇതെല്ലാം ആവശ്യമാണെന്നും ഡോക്ടര്‍ അറിയിച്ചു.
രോഗ നിര്‍ണ്ണയത്തിന് എ.ഐ ടൂള്‍; ജില്ലയില്‍ നാലിടത്ത് സംവിധാനം
ക്ഷയരോഗ നിര്‍ണ്ണയം വേഗത്തിലാക്കുന്നതിന് ജില്ലയില്‍ ആധുനിക സംവിധാനങ്ങളും ലഭ്യമാണ്. എ.ഐ ടൂള്‍ സംവിധാനമുള്ള ഹാന്‍ഡ് ഹെല്‍ഡ് എക്സറേയാണ് ഇതില്‍ പ്രധാനപ്പെട്ടത്. എവിടേക്ക് വേണമെങ്കിലും കൊണ്ടുപാകാനും എളുപ്പത്തിലും കൂടുതല്‍ വ്യക്തതയോടെയും എക്സ് റേ എടുക്കാനും ഈ ഉപകരണം സഹായകമാണ്. പള്ളിക്കുന്ന് ജില്ലാ ടി.ബി സെന്റര്‍, തലശ്ശേരി ജനറല്‍ ആശുപത്രി, പയ്യന്നൂര്‍ താലൂക്ക് ആശുപത്രി, പേരാവൂര്‍ താലൂക്ക് ആശുപത്രി എന്നീ കേന്ദ്രങ്ങളിലാണ് ആദ്യഘട്ടത്തില്‍ ഈ സംവിധാനം ലഭ്യമായിട്ടുള്ളത്. രോഗ നിര്‍ണ്ണയും ഏറ്റവും വേഗത്തില്‍ നടത്തി ചികിത്സ തുടങ്ങാനും മറ്റും ഇതുവഴി കഴിയും. ഇതുകൂടാതെ രോഗ നിര്‍ണ്ണയം നടത്തുന്നതിന് ജില്ലയില്‍ പത്ത് മോളിക്യുലാര്‍ പരിശോധന കേന്ദ്രങ്ങളും സജ്ജമാണ്. ജില്ലയിലെ എല്ലാ സര്‍ക്കാര്‍ ആശുപത്രികളിലും സ്റ്റെപ്സ് പദവിയിലുള്ള 31 സ്വകാര്യ ആശുപത്രികളിലും ക്ഷയരോഗത്തിനുള്ള മരുന്നുകള്‍ സൗജന്യമായി വിതരണം ചെയ്യുന്നുണ്ട്.
സംസ്ഥാനത്ത് സ്പാകളുടെ മറവില്‍ നടക്കുന്ന നിയമവിരുദ്ധ പ്രവര്‍ത്തനങ്ങള്‍ പരിശോധിക്കാന്‍ കര്‍ശന നിര്‍ദേശം നല്‍കിയതായി ആഭ്യന്തര വകുപ്പ് മന്ത്രി രമേശ് ചെന്നിത്തല. കൊച്ചിയിലാണ് ഇത്തരം സ്പാകള്‍ കൂടുതലുള്ളതെന്നും അദ്ദേഹം പറഞ്ഞു. യാതൊരു ലൈസന്‍സുമില്ലാതെ പല സ്പാകളും ഒരു ബോര്‍ഡും വച്ച് പ്രവര്‍ത്തനം നടത്തിവരികയാണ്. ഇതിനെല്ലാമെതിരെ അന്വേഷണം നടത്താന്‍ സംസ്ഥാന പൊലീസ് മേധാവിക്ക് നിര്‍ദേശം നല്‍കിയിട്ടുണ്ടെന്ന് അദ്ദേഹം വ്യക്തമാക്കി.
ഗാര്‍ഹിക പീഡനങ്ങള്‍ക്കെതിരെ സ്പീക് അപ് പദ്ധതിയുമായി ആഭ്യന്തരവകുപ്പ്. ഗാര്‍ഹിക പീഡനങ്ങള്‍ കൂടി വരുന്ന പശ്ചാത്തലത്തിലാണ് പുതിയ പദ്ധതിയെന്ന് ആഭ്യന്തരമന്ത്രി പറഞ്ഞു. പരാതി നല്‍കുന്ന സ്ത്രീകളുടെ വിവരങ്ങള്‍ രഹസ്യമായി സൂക്ഷിക്കുമെന്ന് നോഡല്‍ ഓഫീസര്‍ ഐജി അജീതാ ബീഗം പറഞ്ഞു
സ്ത്രീധനത്തിന്റെ പേരില്‍ കൊടിയ പീഡനങ്ങളുടെ മുറിപ്പാടുമായുള്ള കൊല്ലത്തെ യുവതിയുടെ ചിത്രം ഇപ്പോള്‍ വലിയ ചര്‍ച്ചയാകുന്നുണ്ട്. സ്ത്രീധന പീഡനത്തിനിരയായി ജീവന്‍ നഷ്ടമായ വിസ്മയെയും ഉത്തരയെയും ഈ നാട് മറന്നിട്ടില്ല. അന്നുയര്‍ന്ന പ്രതിക്ഷേധങ്ങള്‍ക്കും പ്രഖ്യാപിക്കപ്പെട്ട വിവിധ പദ്ധതികള്‍ക്കും സ്ത്രീധനമെന്ന വിപത്തിനെ ചെറുക്കുന്നതിന് ഇനിയും കഴിഞ്ഞിട്ടില്ല. പരാതികള്‍ വീണ്ടും വീണ്ടും ഉയരുന്ന പശ്ചാത്തലത്തിലാണ് പുതിയ പദ്ധതി. സതിയെന്ന ദുരാചാരത്തെ കുഴിച്ചുമൂടിയെങ്കിലും വീടിന്റെ അകത്തളങ്ങളില്‍ പുതിയ രൂപത്തില്‍ സതി തുടരുന്നവെന്ന് പറഞ്ഞുകൊണ്ടാണ് സ്പീക് അപ് പദ്ധതി ആഭ്യന്തര മന്ത്രി പ്രഖ്യാപിക്കുന്നത്.
കഴിഞ്ഞ ഏഴുവര്‍ഷത്തിനിടെ ഗാര്‍ഹിക പീഡനത്തില്‍ ജീവനൊടുക്കിയത് 92 സ്ത്രീകളാണ്. 15,000 ത്തോളം പരാതികളാണ് പൊലീസിന് മുന്നിലെത്തിയത്. വിസ്മയയുടെ മരണത്തിന് അപരാജിത എന്ന പദ്ധതി പൊലിസ് ആവിഷ്‌കരിച്ചിരുന്നു. തുടക്കത്തില്‍ സമഗ്രമായി നടന്നുവെങ്കിലും ഉദ്യോഗസ്ഥ മാറ്റവും ഭരണമാറ്റവുമുണ്ടായതോടെ പദ്ധതി മെല്ലപ്പോക്കിലായി. ഓരോ മരണവും ചര്‍ച്ചയാകുമപോള്‍ നടത്തുന്ന പ്രഖ്യാപനങ്ങളും പദ്ധതികളും കാര്യക്ഷമമായി തുടര്‍ന്ന് കൊണ്ട് പോകാനാകാത്തത് പ്രധാന പ്രശ്‌നമാണ്.
സ്‌കൂളുകളിലെ ഉച്ചഭക്ഷണ വിതരണ പദ്ധതി അവതാളത്തിലെന്ന് മുന്‍ വിദ്യാഭ്യാസ മന്ത്രി വി ശിവന്‍കുട്ടി. 23.5 ലക്ഷം വിദ്യാര്‍ത്ഥികള്‍ക്കാണ് ഉച്ചഭക്ഷണം വിതരണം ചെയ്യുന്നത്. മനുഷ്യത്വരഹിതമായ നടപടിയാണ് ഇപ്പോള്‍ നടക്കുന്നത്. ഓഗസ്റ്റ്, സെപ്റ്റംബര്‍ മാസങ്ങളിലെ ഉച്ചഭക്ഷണ വിതരണത്തിനുള്ള തുക കുടിശികയാണ്. അങ്കണവാടികളിലെ പോഷകാഹാര വിതരണവും വലിയ പ്രതിസന്ധിയിലാണെന്ന് മുന്‍ വിദ്യാഭ്യാസ മന്ത്രി പറഞ്ഞു.
തദ്ദേശ സ്ഥാപനങ്ങളില്‍ നിന്ന് ഫണ്ട് ലഭിക്കാന്‍ കാലതാമസം നേരിടുകയാണ്. ഇതാണ് പ്രതിസന്ധിക്ക് കാരണം. ഇടതുപക്ഷം കൊണ്ടുവന്ന മാതൃകാ മെനു നടപ്പാക്കണമെന്ന് ശിവന്‍കുട്ടി ആവശ്യപ്പെട്ടു. അരിയും പച്ചക്കറിയും പുറത്തുനിന്ന് വിലകൊടുത്ത് വാങ്ങേണ്ട അവസ്ഥയാണ്. അധ്യാപകര്‍ സ്വന്തം കയ്യില്‍ നിന്ന് പൈസ എടുത്ത് സാധനം വാങ്ങേണ്ട സ്ഥിതിയാണ് നിലവിലുള്ളത്. പലരും സ്വര്‍ണ്ണം പണയം വെച്ച് പോലും സാധനങ്ങള്‍ വാങ്ങുകയാണ്. ചോറും രണ്ട് കറിയും മാത്രം ആണ് ഇപ്പോള്‍ നല്‍കുന്നത്. എഗ്ഗ് ഫ്രൈഡ് റൈസ് അടക്കം നല്‍കുന്നത് നിര്‍ത്തലാക്കി. ക്ഷേമ ആശ്വാസ പദ്ധതികളോട് പുറം തിരിഞ്ഞു നില്‍ക്കുന്ന സമീപനമാണ് സര്‍ക്കാരിന്റേതെന്ന് വി ശിവന്‍കുട്ടി വിമര്‍ശിച്ചു.
ഇന്ത്യയില്‍ തന്നെ ശ്രദ്ധിക്കപ്പെടുന്ന മേളയാണ് സ്‌കൂള്‍ ഒളിമ്പിക്‌സ്. കഴിഞ്ഞ സര്‍ക്കാര്‍ 25000 കുട്ടികള്‍ക്ക് താമസവും ഭക്ഷണവും എല്ലാം നല്‍കി. ഒരു പരാതിയും ഉണ്ടായിരുന്നില്ല. ഇപ്പോള്‍ സ്വര്‍ണ്ണ കപ്പ് പോലും കാണാന്‍ ഇല്ല. ഓരോ മേളയും കഴിയുമ്പോള്‍ അടുത്ത മേള എവിടെ നടത്തണം എന്ന് തീരുമാനിക്കും. ഇത്തവണ അത് ഉണ്ടായില്ല. പതാക പോലും കാണാന്‍ ഇല്ലാത്ത സ്ഥിതിയാണെന്ന് ശിവന്‍കുട്ടി പറഞ്ഞു.
സ്വാതന്ത്ര്യ സമര സേനാനി സോഷ്യോ വാസു (പി വാസു,103) അന്തരിച്ചു. വാര്‍ധക്യ സഹജമായ അസുഖത്തെ തുടര്‍ന്ന് ചികിത്സയിലായിരുന്നു. കോഴിക്കോട് ചെറുവണ്ണൂരിലെ വസതിയിലായിരുന്നു അന്ത്യം. ക്വിറ്റ് ഇന്ത്യ സമരത്തില്‍ പങ്കെടുത്തിട്ടുണ്ട്. സമരത്തില്‍ പങ്കെടുത്തതിനാല്‍ ബ്രിട്ടീഷ് പൊലീസിന്റെ ക്രൂരമായ മര്‍ദനത്തിന് ഇരയായിരുന്നു. ജയില്‍ വാസവും അനുഭവിച്ചിട്ടുണ്ട്.
