latest news

മുതിര്‍ന്ന പൌരന്മാരുടെ പരിചരണവും അവകാശങ്ങളും ഉറപ്പാക്കുന്ന വയോജന ക്ഷേമ ബില്‍ നാളെ നിയമസഭയില്‍ അവതരിപ്പിക്കും. മുതിര്‍ന്ന പൗരന്മാരുടെ ക്ഷേമം ഉറപ്പാക്കാന്‍ സംസ്ഥാന-ജില്ലാതല മേല്‍നോട്ട സംവിധാനങ്ങള്‍ സ്ഥാപിക്കും. തിരുവനന്തപുരം ആസ്ഥാനമായി സംസ്ഥാന മുതിര്‍ന്ന പൗര സംരക്ഷണ യൂണിറ്റ് വയോജന ക്ഷേമ വകുപ്പ് ഡയറക്ടറായിരിക്കും അധ്യക്ഷന്‍.

ജില്ലാതലത്തില്‍ സംരക്ഷണ ഫോറവും യൂണിറ്റും രൂപീകരിക്കും. വയോജനങ്ങള്‍ സ്വന്തം വീട്ടില്‍ സുരക്ഷിതമായി കഴിയുന്നതിനാണ് പ്രാഥമിക പരിഗണന. സ്ഥാപന പരിചരണം അവസാന മാര്‍ഗ്ഗം മാത്രം. മുതിര്‍ന്ന പൗരന്മാരെ ശാരീരികമായോ മാനസികമായോ പീഡിപ്പിക്കുകയോ, ക്രൂരത കാട്ടുകയോ, ഉപേക്ഷിക്കുകയോ ചെയ്യുന്ന കുടുംബാംഗങ്ങള്‍/പരിചരണദാതാക്കള്‍ എന്നിവര്‍ക്ക് ശിക്ഷ നല്‍കാനും ബില്ലില്‍ വ്യവസ്ഥ. 3 വര്‍ഷം വരെ തടവും 50,000 വരെ പിഴയും ചുമത്തും.

ജീവിതാന്ത്യ ഘട്ടത്തിലെ ചികിത്സാ മുന്‍ഗണനകള്‍ വ്യക്തികള്‍ക്ക് മുന്‍കൂട്ടി എഴുതിവെയ്ക്കാനുള്ള (‘ലിവിംഗ് വില്‍’) നിയമപരമായ അവകാശം നല്‍കാനും ബില്ലില്‍ വ്യവസ്ഥ. വയോജന വിഷയങ്ങള്‍ കൈകാര്യം ചെയ്യാന്‍ പൊലീസ് സ്റ്റേഷനുകളില്‍ നോഡല്‍ ഓഫീസറെ ചുമതലപ്പെടുത്തും. മുതിര്‍ന്ന പൗരന്മാരുടെ ക്ഷേമത്തിനും സംരക്ഷണത്തിനുമായി പ്രത്യേക ‘സംസ്ഥാന കരുതല്‍ നിധി’ രൂപീകരിക്കും.

മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ നിയമനടപടിക്കൊരുങ്ങുകയാണെന്ന് ലോക്‌സഭ പ്രതിപക്ഷ നേതാവ് രാഹുല്‍ഗാന്ധി. തെരഞ്ഞെടുപ്പ് കമ്മീഷണര്‍ക്കെതിരെ ഹര്‍ജി നല്‍കുമെന്ന് രാഹുല്‍ ഗാന്ധി പറഞ്ഞു. 5 ക്രിമിനലുകളെ നിയമത്തിന് മുന്നില്‍ കൊണ്ടുവരും വരെ പോരാട്ടം തുടരും. മോദി, അമിത്ഷാ, മോഹന്‍ ഭാഗവത്, ഗ്യാനേഷ് കുമാര്‍, അജിത് ഡോവല്‍ എന്നിവരാണ് 5ക്രിമിനലുകള്‍. ഇത് ഒരു ദിവസത്തെ യുദ്ധമല്ല, ഈ യുദ്ധം എപ്പോള്‍ അവസാനിക്കുമെന്ന് പറയാനാകില്ലെന്നും എത്ര കൊല്ലം വേണമെങ്കിലും പോരാടുമെന്നും രാഹുല്‍ ഗാന്ധി പറഞ്ഞു.

ദില്ലി നഗരം ജയിലിലാണ്. ഇവിടേക്ക് എത്തുന്ന ആളുകളെ തടയുകയാണ്. എല്ലായിടത്തും പൊലീസ് ആണ്. പതിനായിരക്കണക്കിന് സേനകളെ വിന്യസിച്ചിരിക്കുന്നു. മോദിയും സര്‍ക്കാരും ഗ്യാനേഷ്‌കുമാറിനെ സംരക്ഷിക്കുകയാണ്. എത്ര സംരക്ഷിക്കുന്നുവോ പ്രതിഷേധം അത്ര ശക്തമാകും. ആര്‍എസ്എസ് ബിജെപി ഗുണ്ടകളെകൂടി വിന്യസിച്ചിരിക്കുകയാണ്. അവര്‍ സ്ത്രീകളയും യുവാക്കളെയും തല്ലിച്ചതക്കുന്നു. പ്രതിപക്ഷത്തെയും ഗുണ്ടകളെ ഉപയോഗിച്ച് ആക്രമിക്കുന്നു. എന്തുകൊണ്ട് ഗ്യാനേഷ്‌കുമാര്‍ രാജിവയ്ക്കുന്നില്ല? പക്ഷേ ഞങ്ങള്‍ വെറുതെ വിടില്ല. നിങ്ങളെ കുറിച്ചുള്ള എല്ലാ വിവരങ്ങളും ഞങ്ങളുടെ കൈയിലുണ്ട്. നിങ്ങളുടെ അഴിമതികളെ കുറിച്ചുള്ള വിവരങ്ങള്‍ ഞങ്ങള്‍ക്ക് കിട്ടിയിട്ടുണ്ട്. കാലം കണക്ക് ചോദിക്കാതെ പോകില്ലെന്നും സുപ്രീംകോടതിയിലേക്ക് മാര്‍ച്ച് നടത്തുമെന്നും രാഹുല്‍ ഗാന്ധി പറഞ്ഞു

മുഖ്യതിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരായ പ്രമേയം പാസാക്കി നിയമസഭ. തെരഞ്ഞെടുപ്പ് കമ്മീഷന്റെ പ്രവര്‍ത്തനങ്ങളില്‍ സമീപകാലത്ത് ഗുരുതരമായ ആശങ്കകളെന്നും എസ്‌ഐആറിലൂടെ ലക്ഷക്കണക്കിന് അര്‍ഹരായ വോട്ടര്‍മാരെ പട്ടികയില്‍ നിന്ന് ഒഴിവാക്കിയെന്നും പ്രമേയം അവതരിപ്പിച്ച മുഖ്യമന്ത്രി വി ഡി സതീശന്‍ പറഞ്ഞു. പ്രമേയത്തെ പ്രതിപക്ഷം പിന്തുണച്ചു. പ്രതിപക്ഷ നേതാവ് വാക്കാല്‍ പറഞ്ഞ ഭേദഗതി അംഗീകരിച്ചാണ് പ്രമേയം. പ്രമേയത്തെ എതിര്‍ത്ത ബിജെപി ,നിയമസഭ പിരിച്ചുവിടണമെന്ന ഭേദഗതി അവതരിപ്പിച്ചു.

ജനാധിപത്യത്തിന്റെ സൗന്ദര്യം നീതിപൂര്‍വ്വമായ തെരഞ്ഞെടുപ്പാണ്. അതിന് അനുകൂലമായി രാഷ്ട്രീയ ഭേദം ഇല്ലാതെ നില്‍ക്കുക എന്നതാണ് വേണ്ടതെന്നും പ്രമേയം അവതരിപ്പിച്ചുകൊണ്ട് മുഖ്യമന്ത്രി പറഞ്ഞു.

എറണാകുളം നെടുമ്പാശ്ശേരിയില്‍ മദ്യപിച്ച് പത്തൊമ്പതുകാരന്‍ ഓടിച്ച കാറിടിച്ച് മൂന്ന് പേര്‍ മരിച്ച സംഭവത്തില്‍, മൂന്ന് ബാറുകള്‍ക്കെതിരെ കേസ്. പ്രതി സുഹൈല്‍ സജീവ് മദ്യപിച്ച ബാറുകള്‍ക്കെതിരെയാണ് എക്‌സൈസിന്റെ നടപടി. എറണാകുളം എക്‌സൈസ് ഡെപ്യൂട്ടി കമ്മീഷണര്‍, എക്‌സൈസ് കമ്മീഷണര്‍ക്ക് ഇന്ന് റിപ്പോര്‍ട്ട് നല്‍കും. ബാര്‍ ലൈസന്‍സ് റദ്ദാക്കുന്ന നടപടി അടക്കം ഉണ്ടായേക്കും.

അപകടവുമായി ബന്ധപ്പെട്ട് രണ്ടുപേരെ കൂടി പൊലീസ് കസ്റ്റഡിയിലെടുത്തു. പ്രതി സുഹൈല്‍ മൂന്ന് ബാറുകളിലും കയറി മദ്യപിച്ചതിന് ശേഷമാണ് നെടുമ്പാശ്ശേരിയിലേക്ക് പോയത്. സംഭവത്തില്‍ സുഹൈലിന്റെ സുഹൃത്തുക്കളായ മൂന്ന് പേര്‍കൂടി പിടിയിലായിട്ടുണ്ട്. ഇവര്‍ അപകട സമയം വാഹനത്തിലുണ്ടായിരുന്നു. ഇതില്‍ ഒരാള്‍ പ്രായപൂര്‍ത്തിയായിട്ടില്ലെന്നാണ് വിവരം. അപകടസമയം 125 കി.മി മുകളില്‍ വേഗതയിലായിരുന്നു വഹാനമെന്ന് പ്രതി തെളിവെടുപ്പിനിടെ സമ്മതിച്ചിരുന്നു.

പ്രതി സുഹൈല്‍ സജീവിന്റെ ലൈസന്‍സ് റദ്ദാക്കാനുള്ള നടപടികളും ആരംഭിച്ചിട്ടുണ്ട്. സംഭവത്തില്‍ പൊലീസും എക്സൈസും കര്‍ശന നടപടികളാണ് സ്വീകരിച്ചുവരുന്നത്. പാലക്കാട് സ്വദേശി ഗോപിക, വയനാട് സ്വദേശി ദേവിക, കര്‍ണാടക സുള്ള്യ സ്വദേശി ഇയാസ് എന്നിവരായിരുന്നു സുഹൈല്‍ ഓടിച്ച മിനി കൂപ്പര്‍ ഇടിച്ച് മരിച്ചത്. മരിച്ച പാലക്കാട് മണ്ണാര്‍ക്കാട് സ്വദേശി ഗോപികയുടെ സംസ്‌കാരം ഇന്നാണ്.

സിഎംആര്‍എല്‍-എക്‌സാലോജിക് ഇടപാടില്‍ കേസെടുത്ത് വിജിലന്‍സ്. പ്രതിപക്ഷ നേതാവ് പിണറായി വിജയനെ ഒന്നാം പ്രതിയാക്കിയാണ് വിജിലന്‍സ് കേസെടുത്തിരിക്കുന്നത്. രണ്ട് എഫ്‌ഐആറുകളാണ് രജിസ്റ്റര്‍ ചെയ്തിരിക്കുന്നത്. അഴിമതി നിരോധന നിയമം പ്രകാരമാണ് ഒന്നാമത്തെ കേസ്. കള്ളപ്പണം വെളുപ്പിക്കലിനാണ് രണ്ടാമത്തെ കേസ് രജിസ്റ്റര്‍ ചെയ്തിരിക്കുന്നത്.

മകള്‍ വീണ ടിയെയും മുഹമ്മദ് റിയാസിനെയും പ്രതികളായി ചേര്‍ത്തിട്ടുണ്ട്. അഴിമതി നിരോധന നിയമപ്രകാരമുള്ള കേസില്‍ ഒന്നാം പ്രതിയായി പിണറായി വിജയന്‍ രണ്ടാം പ്രതിയായി വീണ ടിയെയും പ്രതി ചേര്‍ത്തു. കള്ളപ്പണം വെളുപ്പിക്കല്‍ കേസില്‍ മുഹമ്മദ് റിയാസ് ഒന്നാം പ്രതിയും ടി വീണയുമാണ് രണ്ടാം പ്രതി.

ഡല്‍ഹിയിലെ പൊലീസ് നടപടിയില്‍ ഇടപെടലുമായി സുപ്രീംകോടതി. സര്‍ക്കാരിനെ മറികടന്ന് ക്രമസമാധാനം നടപ്പാക്കാന്‍ പൊലീസിന് അധികാരമില്ലെന്ന് സുപ്രീംകോടതി പറഞ്ഞു. ജീവന് രക്ഷയും സ്വാതന്ത്ര്യവും ഒരു പോലെ പ്രധാനമാണ്. അത് പൗരനായാലും പൊലീസ് ഓഫീസറായാലും ഒരു പോലെയാണ്. എല്ലാ ഹര്‍ജികളും ഫയലില്‍ സ്വീകരിക്കാമെന്ന് സുപ്രീംകോടതി അറിയിച്ചു. സംഭവത്തില്‍ കേന്ദ്ര ക്യാബിനറ്റ് സെക്രട്ടറിയോട് റിപ്പോര്‍ട്ട് തേടി. ഡല്‍ഹി പൊലീസും ഡിഎംആര്‍സിയും റിപ്പോര്‍ട്ട് നല്‍കണമെന്ന് നിര്‍ദേശിച്ചു.

കസ്റ്റഡിയിലെടുക്കേണ്ടി വന്ന സാഹചര്യം അതിന് സ്വീകരിച്ച നടപടികളും വിശദീകരിക്കണമെന്ന് കോടതി നിര്‍ദേശിച്ചു. ഡല്‍ഹി പൊലീസ് കമ്മിഷണറും റിപ്പോര്‍ട്ട് നല്‍കണം. നിയന്ത്രണം പാടില്ലെന്ന ഉത്തരവ് പാലിച്ചോ എന്ന് വിശദീകരിക്കണം. ഇന്റര്‍നെറ്റ് നിരോധനം പാടില്ലെന്നും മറ്റന്നാള്‍ മറുപടി നല്‍കണമെന്നും കോടതി നിര്‍ദേശം നല്‍കി. ഹര്‍ജി ചൊവ്വാഴ്ച വീണ്ടും പരിഗണിക്കും.

ഡല്‍ഹിയില്‍ സ്വതന്ത്ര സഞ്ചാരം പൂര്‍ണമായി പുനഃസ്ഥാപിക്കണമെന്നും ഡല്‍ഹിയില്‍ ഉടനീളം ഉള്ള ബാരിക്കേടുകള്‍ പിന്‍വലിക്കണമെന്നും ഹര്‍ജിക്കാര്‍ ആവശ്യപ്പെട്ടു. ഇടക്കാല ഉത്തരവ് വേണമെന്ന് കപില്‍ സിബല്‍ ആവശ്യപ്പെട്ടു. സോളിസിറ്റര്‍ ജനറലിനെ കൂടി കേട്ട ശേഷം പരിഗണിക്കാമെന്ന് സുപ്രീംകോടതി അറിയിച്ചു.

അതിനിടെ നാളെ ഉച്ചതിരിഞ്ഞ് സുപ്രീംകോടതി ചീഫ് ജസ്റ്റീസുമായി ഇന്ത്യാസഖ്യം നേതാക്കള്‍ കൂടിക്കാഴ്ച നടത്തും. പ്രധാനമന്ത്രിയും ആഭ്യന്തരമന്ത്രിയും രാജ്യത്ത് സൃഷ്ടിച്ച സംഘര്‍ഷസാഹചര്യം ചീഫ് ജസ്റ്റിസിനെ അറിയിക്കുമെന്ന് എഐസിസി അധ്യക്ഷന്‍ മല്ലികാര്‍ജുന്‍ ഖര്‍ഗെ വ്യക്തമാക്കി. ജനാധിപത്യസംരക്ഷണത്തിനും ഭരണഘടനാ അവകാശങ്ങള്‍ക്കുമായുള്ള പോരാട്ടം തുടരുമെന്നും മല്ലികാര്‍ജുന്‍ ഖര്‍ഗെ പ്രസ്താവനയില്‍ പറഞ്ഞു.

ആസൂത്രണ ബോര്‍ഡിലെ പരീക്ഷ അട്ടിമറിയില്‍ പി എസ് സി ക്കെതിരെ ക്രൈംബ്രാഞ്ച്. 10 ചോദ്യങ്ങളുടെ ഉത്തരങ്ങള്‍ മൂല്യനിര്‍ണയം നടത്താത്തത് ക്ലറിക്കല്‍ വീഴ്ച അല്ലെന്നും അതു ബോധപൂര്‍വ്വമാണെന്നും ക്രൈം ബ്രാഞ്ച് ചൂണ്ടിക്കാട്ടി. എഫ് ഐ ആര്‍ റദ്ദാക്കാന്‍ പി എസ് സി കോടതിയെ സമീപിച്ചത് ദുരൂഹമാണ്. പി എസ് സി ചെയര്‍മാനും അംഗങ്ങളും അടങ്ങുന്ന പ്രതികളെ രക്ഷിക്കാനാണ് നീക്കം നടക്കുന്നതെന്നും ഹൈക്കോടതിയില്‍ ക്രൈംബ്രാഞ്ച് നല്‍കിയ റിപ്പോര്‍ട്ടിലുണ്ട്.

ആസൂത്രണ ബോര്‍ഡിലെ പരീക്ഷയിലെ ആദ്യ ഒന്നാം റാങ്കുകാരന്‍ അരുണ്‍ ജെ പ്രതാപന്‍ 10 ചോദ്യങ്ങള്‍ക്ക് അപൂര്‍ണ്ണമായ ഉത്തരമാണ് നല്‍കിയത്. ഈ ഉത്തരങ്ങള്‍ പരിശോധിക്കാതിരുന്നത് ബോധപൂര്‍വം എന്ന് കരുതണം. മാര്‍ക്ക് ഷീറ്റ് പരാതിക്കാര്‍ക്ക് കൈമാറാന്‍ ഉണ്ടായ കാലതാമസവും സംശയസ്പദമാണ്. ജയലാല്‍ എന്ന ഉദ്യോഗാര്‍ത്ഥി 2025 ജൂണ്‍ 11ന് ഉത്തര കടലാസിനായി അപേക്ഷ നല്‍കി. പി എസ് സി മറുപടി നല്‍കിയത് ഒരു വര്‍ഷത്തിന് ശേഷം 2026 ജൂണ്‍ 18 നായിരുന്നു. മനപ്പൂര്‍വമുള്ള വൈകിപ്പിക്കല്‍ ആണ് പി എസ്. സി നടത്തിയത്.