വൈദ്യുതി കുടിശ്ശിക പിരിച്ചെടുക്കാനുള്ള കെ എസ് ഇ ബിയുടെ ഒറ്റത്തവണ തീര്‍പ്പാക്കല്‍ പദ്ധതിക്ക് കേരള സംസ്ഥാന വൈദ്യുതി റഗുലേറ്ററി കമ്മീഷന്‍ അംഗീകാരം നല്‍കി. പദ്ധതിയുടെ കാലാവധി ജൂലൈ 20 മുതല്‍ ഡിസംബര്‍ 30 വരെയായിരിക്കും. നിലവില്‍ രണ്ട് വര്‍ഷമോ അതില്‍ കൂടുതലോ വര്‍ഷങ്ങളായി കുടിശ്ശിക വരുത്തിയ ഉപഭോക്താക്കള്‍ക്കാണ് പദ്ധതി വഴി കുറഞ്ഞ പലിശ നിരക്കില്‍ കുടിശ്ശിക തീര്‍പ്പാക്കാന്‍ കഴിയുക.
2023 മാര്‍ച്ച് 31ലെ കണക്കുകളനുസരിച്ച് കെ എസ് ഇ ബിക്ക് ഉപഭോക്താക്കളില്‍നിന്ന് പിരിഞ്ഞു കിട്ടാനുള്ള കുടിശ്ശിക 3260 കോടി രൂപയോളമാണ്. നിലവില്‍, വൈദ്യുതി കുടിശ്ശികയ്ക്ക് കെ എസ് ഇ ബി 18 ശതമാനം പിഴപ്പലിശയാണ് ഈടാക്കുന്നത്. എന്നാല്‍ ഒറ്റത്ത വണ തീര്‍പ്പാക്കല്‍ പദ്ധതിയില്‍ രണ്ട് വര്‍ഷം മുതല്‍ അഞ്ച് വര്‍ഷം വരെയുള്ള കുടിശ്ശികയ്ക്ക് ആറ് ശതമാനം പലിശയും, അഞ്ച് വര്‍ഷം മുതല്‍ 15 വര്‍ഷം വരെയുള്ള കുടിശ്ശികയ്ക്ക് അഞ്ച് ശതമാനം പലിശയും 15 വര്‍ഷത്തില്‍ കൂടുതലുള്ള കുടിശ്ശികയ്ക്ക് നാല് ശതമാനം പലിശയും നല്‍കിയാല്‍ മതി.
ഒറ്റത്തവണ തീര്‍പ്പാക്കല്‍ പദ്ധതി പ്രയോജനപ്പെടുത്തുന്ന ഉപഭോക്താക്കള്‍ക്ക് മുതലും പലിശയും തിരിച്ചടക്കാന്‍ 12 തവണകള്‍ വരെ അനുവദിക്കും. കോടതി നടപടികളില്‍ കുടുങ്ങി തടസ്സപ്പെട്ടുകിടക്കുന്ന കുടിശ്ശികകളും പദ്ധതിയില്‍ ഉള്‍പ്പെടുത്തി അടച്ചു തീര്‍ക്കാം.
വര്‍ഷങ്ങളായി പ്രവര്‍ത്തന രഹിതമായി കിടക്കുന്ന വൈദ്യുതി കുടിശ്ശികയുള്ള സ്ഥാപനങ്ങള്‍ക്ക് കാലയളവില്‍ അടക്കേണ്ട മിനിമം ഡിമാന്റ് ചാര്‍ജ് പുനര്‍നിര്‍ണ്ണയം ചെയ്ത്, മിനിമം ഡിമാന്റ് ചാര്‍ജില്‍ കുറവു വരുത്തി പിരിച്ചെടുക്കുന്നതിന് കെ എസ് ഇ ബിക്ക് നിര്‍ദേശം നല്‍കിയിട്ടുണ്ട്. മുന്‍കാലങ്ങളില്‍ ഒറ്റത്തവണ തീര്‍പ്പാക്കല്‍ പദ്ധതിയുടെ ആനുകൂല്യം തേടിയ ഉപഭോക്താക്കളില്‍, പല കാരണങ്ങളാല്‍ ഈ പദ്ധതി വഴി കുടിശ്ശിക തിരിച്ചടക്കാന്‍ കഴിയാത്തവര്‍ക്കും ഇതിന്റെ ആനുകൂല്യം ലഭിക്കും.
