കോളയാട്: പെരുവയില്‍ കനത്ത മഴയില്‍ തകര്‍ന്ന വീടിന്റെ ഉടമസ്ഥന് ധനസഹായം പ്രഖ്യാപിക്കണമെന്ന് കണ്ണൂര്‍ ജില്ലാ കുറിച്ച്യ മുന്നേറ്റ സമിതി പ്രസ്താവനയിലൂടെ ആവശ്യപ്പെട്ടു.കോളയാട് പഞ്ചായത്തില്‍ പതിമൂന്നാം വാര്‍ഡ് പെരുവ ചന്ദ്രോത്ത് കെഎസ്ഇബി ജീവനക്കാരനായ സി ബാബുവിന്റെ നിര്‍മ്മാണം നടന്നുകൊണ്ടിരിക്കുന്ന ഇരുനില വീടാണ് ഞായറാഴ്ച പുലര്‍ച്ചെ പൂര്‍ണ്ണമായും നിലം പതിച്ചത് . 2600 അടി വിസ്തീര്‍ണ്ണം ഉള്ള വീട് നിര്‍മ്മാണ പ്രവര്‍ത്തനം ഒന്നര വര്‍ഷമായി നടന്നുകൊണ്ടിരിക്കുകയായിരുന്നു.ഗവണ്‍മെന്റ് ഈ വിഷയത്തില്‍ പ്രത്യേക പ്രാധാന്യം കല്‍പ്പിച്ച് അദ്ദേഹത്തിന് സഹായം ലഭിക്കുന്നതിന് ആവശ്യമായ നടപടികള്‍ സ്വീകരിക്കണമെന്ന് കണ്ണൂര്‍ ജില്ല കുറിച്യമുന്നേറ്റ സമിതി ഭാരവാഹികളായ പ്രസിഡണ്ട് സി സതീശന്‍, സെക്രട്ടറി എം ബിജേഷ്, വൈസ് പ്രസിഡണ്ട് സി. സജീവന്‍, എന്‍. സുഷാന്ത്, പി.പവിത്രന്‍, കെ വിജേഷ് എന്നിവര്‍ പ്രസ്താവനയിലൂടെ ആവശ്യപ്പെട്ടു.
