നടന് ഷൈന് ടോം ചാക്കോയ്ക്കെതിരായ ലഹരിക്കേസില് പൊലീസിന് തിരിച്ചടി. ഷൈന് ടോം ചാക്കോ ലഹരി ഉപയോഗിച്ചുവെന്ന് പരിശോധനയില് തെളിയിക്കാനായില്ല. ഫോറന്സിക് റിപ്പോര്ട്ട് നടന് അനുകൂലമാണ്. കേസ് നിലനില്ക്കുമോ എന്നതില് പൊലീസ് നിയമോപദേശം തേടും.
ഹോട്ടലില് മുറിയെടുത്ത് ഷൈനും സുഹൃത്തും ലഹരി ഉപയോഗിച്ചുവെന്നാണ് കേസ്. താന് ലഹരി ഉപയോഗിക്കാറുണ്ടായിരുന്നുവെന്നായിരുന്നു ഷൈന്റെ മൊഴി. ഡാന്സാഫ് പരിശോധനയ്ക്കിടെ ഷൈന് ടോം ചാക്കോ ഹോട്ടല് മുറിയില് നിന്ന് ഇറങ്ങി ഓടിയത് വിവാദമായിരുന്നു. കഴിഞ്ഞ ഏപ്രിലില് കൊച്ചിയിലെ സ്വകാര്യ ഹോട്ടലില് വച്ചായിരുന്നു സംഭവം. കൊച്ചി നോര്ത്ത് പൊലീസ് രജിസ്റ്റര് ചെയ്ത കേസില് ഷൈനും സുഹൃത്ത് അഹമ്മദ് മുര്ഷാദുമായിരുന്നു പ്രതികള്.
