ഒരു വര്‍ഷത്തിനിടെ തിരുവനന്തപുരം മൃഗശാലയില്‍ ചത്തത് 64 മൃഗങ്ങളെന്ന് മന്ത്രി ജെ ചിഞ്ചുറാണി. ക്ഷയരോഗ ബാധയുടെ പഠന റിപ്പോര്‍ട്ട് സര്‍ക്കാര്‍ പരിശോധിച്ചുവരികയാണ്. മൃഗങ്ങളുടെയും ജീവനക്കാരുടെയും സുരക്ഷയ്ക്ക് വേണ്ടിയുള്ള പ്രതിരോധ നടപടികള്‍ നടന്നുവരുന്നുണ്ട്. നിലവില്‍ ജീവനക്കാര്‍ക്ക് ആര്‍ക്കും ക്ഷയരോഗം ബാധിച്ചിട്ടില്ല. സന്ദര്‍ശകര്‍ മൃഗങ്ങളുമായി അടുത്ത് ഇടപഴകുന്നതൊഴിവാക്കാന്‍ നടപടി സ്വീകരിച്ചിട്ടുണ്ട്. ഇപ്പോള്‍ മരണനിരക്ക് കുറഞ്ഞുവെന്നും സ്ഥിതി നിയന്ത്രണ വിധേയമാണെന്നും മന്ത്രി വ്യക്തമാക്കി.
പുള്ളിമാനുകള്‍ക്കും കൃഷ്ണ മൃഗങ്ങള്‍ക്കുമാണ് ക്ഷയരോഗ ബാധ കണ്ടെത്തിയത്. . മൃഗങ്ങളിലെ ക്ഷയരോഗ ബാധക്ക് ഫലപ്രദമായ മരുന്നോ വാക്‌സീനോ ലഭ്യമല്ല. ഓരോ മൃഗങ്ങളേയും എണ്ണം തിരിച്ച് പരിശോധിക്കുന്നത് പ്രായോഗികമല്ല.
ചത്ത മൃഗങ്ങളെ കത്തിച്ച് കളയുകയും കൂട്ടില്‍ നിന്നു പുറം തള്ളുന്ന മാലിന്യങ്ങള്‍ പ്രത്യേകം സംസ്‌കകരിക്കുകയുമാണ് ചെയ്യുന്നത്. അടുത്തിടപഴകുന്ന മനുഷ്യരിലേക്ക് രോഗ പകര്‍ച്ച ഉണ്ടായേക്കാമെങ്കിലും ഇതുവരെ രോഗം സ്ഥിരീകരിച്ചിട്ടില്ല. അതുകൊണ്ട് തന്നെ പരിചാരകരും ജോലിക്കാരും മൃഗങ്ങളോടിടപെടുമ്പോള്‍ പാലിക്കേണ്ട പ്രോട്ടോകോള്‍ കര്‍ശനമായി പാലിക്കുന്നുണ്ട്. സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് അനിമല്‍ ഡിസീസ് സംഘം മാര്‍ഗനിര്‍ദ്ദേശങ്ങള്‍ നല്‍കിയിരുന്നു.
